Azərbaycan xalqı bir yumruq kimi birləşdi
Azərbaycan torpaqlarını hissə-hissə ələ keçirməklə
dövlət statusu qazanan Ermənistana nəhayət ki, yerini göstərmək mümkün oldu. İşğalın
davam etdiyi son 30 ildə "məğlubedilməz ordu” mifi yaratmış Ermənistan müharibənin
rəmzinə çevrilmiş "Dəmir yumruq”la qısa müddətdə şanlı Azərbaycan
əsgərinin qarşısında diz çökdü, pərən-pərən oldu, keçilməz istehkamlar
darmadağın oldu. BMT-nin 4 qətnaməsinə məhəl qoymayan, bəlli dövlətlər
tərəfindən himayə edilərək işğalı sürdürən Ermənistan qarşımızda ağ bayraq
qaldırmağa məcbur oldu. Bəli, bütün tarixi dövrlərdə və mühariblərdə olduğu
kimi, Qarabağ zəfərinin də lokomativi Şanlı Ordumuz, əsgər və zabitlərimiz,
memarı zaman və məkan seçimini, beynəlxalq aləmdəki real durumu düzgün
qiymətləndirən, etibarlı müttəfiqlər qazanan ölkə Prezidenti, Ali Baş Komandan
İlham Əliyev oldu. Vətən müharibəsində cənab Prezident həm sərkərdə olub döyüş
tapşırıqları verdi, həm də diplomatik və informasiya cəbhəsində sözün həqiqi
mənasında axına qarşı savaşdı. Azərbaycan əsgərləri döyüş
meydanında böyük rəşadət və şücaət nümayiş etdirdilər. Eyni zamanda, Vətən
müharibəsi göstərdi ki, xalqımız onu ümdə arzularına qovuşduran Liderinin,
Müzəffər Ali Baş Komandan İlham Əliyevin ətrafında yumruq kimi birləşib.
Beləliklə, İlham Əliyevin yenilməz siyasi iradə və qətiyyəti, Ordumuzun gücü və
xalqımızın öz rəhbəri ətrafında bir amal uğrunda səfərbərliyi Vətən
müharibəsində Azərbaycanın parlaq qələbəsini şərtləndirən əsas amillər oldu.
İlham Əliyevin yenilməz qətiyyəti, Ordumuzun gücü və xalqımızın öz rəhbəri
ətrafında səfərbər olması Vətən müharibəsində Azərbaycanın Qələbəsini təmin
etdi. İgid Azərbaycan oğulları şərəfləri ilə ən böyük tariximizi yazdılar,
qanları, canları bahasına, heç nədən qorxmadan, çəkinmədən, ölümün gözünə dik
baxaraq xalqın 30 illik həsrətinə son qoydular. Ali Baş Komandanın müharibə dövründə
xalqa müraciətlərindəki mətinlik, qətiyyət onu göstərdi ki, cənab İlham Əliyev
güclü ordusuna və arxasında dayanan Azərbaycan xalqına güvənir. Xalq isə hər
zaman olduğu kimi, öz liderinə arxalanır və qələbə müjdəsini səbirsizliklə
gözləyirdi ki, bu da çox çəkmədi. Müzəffər Komandanın "Dəmir yumruq” əməliyyatını uğurla
icra edən Azərbaycan Ordusu düşməni diz çökdürdü. Azərbaycan Ordusunun hər
döyüşü qəhrəmanlıq dastanına çevrildi. "Dəmir yumruq” Müzəffər Ali Baş
Komandanın müdrikliyinin
və uzaqgörənliyinin, zəka və bacarığının, habelə iradə, qətiyyət və mənəvi
gücünün göstəricisidir! Daha bir vacib məqam isə yumruğun ustalıqla
işlədilməsi, düşmənin kəlləsinə zamanında və dəqiqliklə çırpılmasıdır! Yumruq sahibi dəmir yumruğunun
gücünü və hikmətini xalqa belə açıqlayıb: "Bu günlərdə dəfələrlə
Azərbaycan xalqına müraciət edərək düşmənə yumruq göstərmişdim. Demişdim ki, bu
yumruq elə-belə
yumruq deyil. Bu, dəmir yumruqdur. Bu dəmir yumruqla düşmənin başını əzirik və
əzəcəyik! Eyni zamanda bu yumruq birliyimizin rəmzidir. Bax, bu gün Azərbaycan
xalqı bu yumruq kimi birləşib! Həmişə belə olacaq! Bu birlik əbədi olacaq! Bu
birlik bizə gələcəkdə də bütün vəzifələri icra etmək üçün imkan yaradacaq!”. Hər bir
xalqın tarixində xilaskar rolunu oynayan Lider var. O Lider xalqının taleyüklü
məsələsinin həllində xilaskarlıq missiyasını üzərinə götürüb cəsarət nümayiş
etdirir və adını əbədi olaraq dövlətinin şanlı tarixinə yazdırır. Azərbaycanı
tarixinin ən qüdrətli dövlətinə çevirən, xalqın 30 illik həsrətinə son qoyan
Ali Baş Komandan İlham Əliyev məhz həmin liderlərdən biridir. Çünki məhz İlham
Əliyevin Sərkərdəliyi ilə çoxlarının qeyri-mümkün hesab etdiyi Qarabağ münaqişəsi
cəmi 44 günə həll olundu. Uzun illər dünya dövlətlərinin əksəriyyətinin himayə
etdiyi işğalçı Ermənistan İlham Əliyevin hərbi-siyasi diplomatiyası qarşısında
diz çökdü. Şanlı Zəfərlə cənab İlham Əliyev hər bir azərbaycanlının qəlbində
əbədi heykəlini ucaltdı Qarabağı "Dəmir
yumruq”la azad edən Ali Baş Komandan bu gün dəmir iradə ilə qədim yurdumuzu
yenidən qurur. Bütün şəhər və qəsəbələrin, rayonların, kəndlərin baş planını
təsdiq edir və aparılan tikinti-quruculuq işləri ilə şəxsən maraqlanır. İşğaldan
azad edilən ərazilərimizə Qalib Sərkərdə kimi səfər edərək düşmənə gözdağı
verir.
Elçin İSMAYIL,
"Göyəzən” qəzetinin baş redaktoru,
"Tərəqqi” medalı və "Qızıl qələm” mükafatı laureatı,
Azərbaycan Jurnalistlər Birliyinin
üzvü.
Facebook-da paylaş