Yanvarın 16-da Qazax rayon Mədəniyyət Mərkəzinin təşkilatçılığı ilə Mədəniyyət Mərkəzinin tabeliyində fəaliyyət göstərən mədəniyyət müəssisələrinin əməkdaşları ilə birgə 20 Yanvar - Ümumxalq Hüzn Gününün 35-ci ildönümü ilə əlaqədar Şəhidlərin xatirəsini əbədiləşdirmək üçün salınmış Şəhidlər xiyabanı ziyarət olunub, əbədi məşəl kompleksi önünə tər güllər qoyulub.

Daha sonra tədbir Mədəniyyət Mərkəzinin kiçik zalında “20 Yanvar - Milli Qürur və Şərəf tariximizdir” adlı dəyirmi masa ilə davam etdirilib.

Tədbirdə mədəniyyət işçiləri ilə yanaşı, eyni zamanda Birinci Qarabağ və 44 günlük Vətən müharibələri Şəhidlərinin ailə üzvləri, yaxınları da iştirak ediblər. 

Tədbir Şəhidlərin əziz xatirəsini birdəqiqəlik sükutla yad etməklə başlayıb.

Qazax rayon Mədəniyyət Mərkəzinin direktoru Zahidə Həsənova tədbiri giriş sözü ilə açaraq qeyd edib ki, qanla yazılmış bu tarix heç vaxt yaddaşlardan silinməyəcək. 20 Yanvar - Tariximizin qəhrəmanlıq səhifəsidir və Azərbaycan tarixində təkcə faciə deyil, mili məfkurəmizin azadlıq istəyinin oyanış günüdür. 

Çaylı kənd Folklor evinin müdiri Məhəmmdəli Məşədiyev çıxışında bildirib ki, o müdhiş gecə tariximizə təkcə faciə kimi yox, həm də Azərbaycan xalqının mübarizlik, dönməzlik, qəhrəmanlıq günü kimi daxil olub. Azərbaycan xalqı 20 Yanvarda hərbi, siyasi və mənəvi təcavüzə məruz qalsa da, öz tarixi qəhrəmanlıq ənənələrinə sadiq olduğunu, Vətənin azadlığı və müstəqilliyi naminə ən ağır sınaqlara sinə gərmək, hətta Şəhid vermək əzmini bütün dünyaya nümayiş etdirdi.

Digər çıxış edənlərdən Vətən müharibəsi şəhidləri gizir Sərxan Abdullayevin, çavuş Timur Əliyevin həyat yoldaşları, şəhid Nizami Hüseynovun bacısı şəhidlərin həyat və döyüş yolundan, sonuncu dəfə ailələri ilə görüşlərindən  danışıblar. Bildiriblər ki, 20 Yanvar faciəsi Azərbaycan xalqının yaddaşından heç vaxt silinməyəcək. Şəhidlərimizin əziz ruhu və xatirəsi Azərbaycan xalqının qəlbində daim yaşayacaqdır.

Sonda Şəhidlərin körpə övladlarına hədiyyələr təqdim edilib.