İcra başçısı Kosalar kəndində fəaliyyət göstərən güləş zalında yeniyetmə idmançılarla görüşüb
Respublika Prezidenti cənab İlham Əliyevin, Birinci
vitse-prezident Mehriban Əliyevanın ölkəmizdə idman sahəsinə, bu sahədə çalışan
insanlara, idmançılara göstərdikləri qayğı onu deməyə əsas verir ki, bu sahə
hər zaman dövlət siyasətinin prioritet istiqamətlərindən birini təşkil edir. Ölkə
başçısının və Birinci vitse-prezidentin idman sahəsinə göstərdikləri dövlət
qayğısı Qazaxda da hər zaman hiss olunur. 2020-ci ilin sentyabrında Heydər
Əliyev Fondu tərəfindən rayonun Kosalar kəndində istifadəyə verilən güləş zalı
da dövlətin qazaxlı idmançılara olan növbəti qayğısıdır. Xalq yazıçısı İsmayıl
Şıxlının adını daşıyan Kosalar kənd tam orta məktəbin əsaslı şəkildə yenidən
qurulması ilə yanaşı, məktəbin həyətində müasir standartlara cavab verən güləş
zalının tikilməsi Qazaxda bu sahənin inkişafı istiqamətində atılan nümunəvi
addımdır. Heç kəsə sirr deyil ki, Qazax Rayon İcra Hakimiyyətinin
başçısı Rəcəb Babaşovun fəaliyyətə başladığı ilk gündən daim diqqət və
qayğı göstərdiyi sahələrdən biri də məhz idman sahəsidir. Bunu rayon rəhbərinin
idmançılarla olan görüşlərindən, rayonda fəaliyyət göstərən idman müssisələrinə
baxış keçirməsindən, idmançılar üçün yaradılan şəraitin yaxşılaşdırılması
istiqamətində gördüyü işlərdən, atdığı addımlardan da aydın şəkildə görmək
olar.
Aprelin 28-də Qazax Rayon İcra Hakimiyyətinin başçısı Rəcəb
Babaşov icra aparatının məsul şəxsləri, rayonun hüquq-mühafizə
orqanlarının rəhbərləri ilə birlikdə Kosalar kəndində
fəaliyyət göstərən sözügedən güləş zalında olub, burada yunan-Roma və sərbəst
güləşlə məşğul olan yeniyetmə idmançılarla görüşüb. Rayon rəhbərliyinə
hər cür şəraiti olan güləş zalında hazırda 50-yə yaxın idmançının yunan-Roma
güləşi, 25-ə yaxın idmançının isə sərbəst güləşlə məşğul olduqları bildirilib. Kənd ağsaqqalı,
Əməkdar məşqçi Tariyel Nəsibov idman
sahəsinə göstərilən dövlət qayğısına görə ölkə Prezidenti İlham Əliyevə,
Birinci vitse-prezident Mehriban Əliyevaya qazaxlı idmançılar və kənd sakinləri
adından minnətdarlığını bildirib. Kənd sakinlərinin, xüsusilə də gənc və
yeniyetmələrin müraciətini nəzərə alaraq Kosalar kəndində güləş zalının
tikilməsinə, idmançılara hədiyyə olunmasına görə Birinci vitse-prezident
Mehriban Əliyevaya bu gün də sonsuz minnətdar olduqlarını dilə gətirib. Hər zaman
idmançıları, gənc və yeniyetmələri diqqətdə saxladığına görə rayon rəhbərliyinə
razılığını bildirən Əməkdar məşqçi bugünkü görüşü də onlara olan növbəti qayğı
kimi qiymətləndirib. Yeniyetmə və idmançılarla
səmimi söhbət edən icra başçısı bayrağımızın yüksəklərdə dalğalanması, beynəlxalq
idman yarışlarında, arenalarında ölkəmizin adının qaliblər sırasında dayanması
naminə onlara uğurlar arzulayıb, sonda xatirə şəkli çəkdirib.
GOYEZEN.AZ
Facebook-da paylaş