Quşçu Ayrım kəndində səyyar görüş keçirilib
Ölkəmizdə vətəndaş amili hər zaman ön planda
dayanır. Bunu ölkə Prezidenti cənab İlham Əliyev çıxışları zamanı dəfələrlə
səsləndirir. Ölkə rəhbərinin icra hakimiyyəti başçılarını, mərkəzi icra
hakimiyyəti orqanlarının rəhbərlərini qəbul edən zaman dövlət məmurları
haqqında söylədiyi fikirlər, onlara daim xalqın
içində olmaları haqda verdiyi tapşırıq və tövsiyələr də bunu bir daha sübut
edir. Ölkə rəhbərinin icra başçılarına bütün kəndləri gəzmələri,
sakinlərlə görüşmələri, vətəndaşların qayğılarını öz dillərindən eşitmələri,
onların problemlərini yerində öyrənmələri, düzgün təhlil aparmaları barədə
verdiyi tapşırıqlar onu göstərir ki, dövlət hər zaman öz vətəndaşını düşünür.
Ölkə Prezidentinin tapşırıq və tövsiyəsinə əsasən respublikamızın şəhər və
rayonlarında sakinlərlə keçirilən səyyar qəbullar da məhz bu məqsədə xidmət
edir. Məlum
koronavirus (COVID-19) infeksiyasının yayılması səbəbindən artıq 2 ildən çoxdur
ki, şəhər və kəndlərdə keçirilən səyyar görüşlər dayandırılmışdı. Azərbaycan Respublikası Nazirlər Kabineti yanında
Operativ Qərargahın xüsusi karantin rejiminin tələb və tövsiyələri nəzərə
alınmaqla 2022-ci ilin mart ayından etibarən səyyar görüşlər
yenidən bərpa olunub. Respublika Prezidenti İlham
Əliyevin insanlara layiqli xidmət göstərilməsi, vətəndaşların qayğılarına
xüsusi həssaslıqla yanaşılması ilə bağlı tapşırıqları Qazaxda da daim diqqətdə
saxlanılır. Əhalini narahat edən problemlərin yerlərdə birbaşa
həlli və sosial əhəmiyyətli sifarişlərin müəyyən edilməsi məqsədilə mart
ayından başlayaraq Qazax Rayon İcra Hakimiyyəti başçısının şəhər və kəndlərdə
keçirilən səyyar qəbullarına start verilib. Uzun fasilədən sonra keçirilən ilk səyyar görüş
sərhəddə yerləşən Quşçu Ayrım kəndində olub. Martın 3-də rayonun hüquq-mühafizə
orqanlarının, aidiyyəti idarə, müəssisə və təşkilat, xidmət sahələri
rəhbərlərinin, kənd sakinlərinin iştirakı ilə keçirilən səyyar görüşdə ölkə
başçısı tərəfindən vətəndaşlara göstərilən diqqət və qayğıdan, əhalinin maddi
rifah halının, sosial vəziyyətinin yaxşılaşdırılması istiqamətində atılan
uğurlu addımlardan danışılıb. 2021-ci ildə respublikamızda
qazanılan uğur və nailiyyətlərin Qazaxda öz real əksini tapması qeyd olunub. Qazax Rayon İcra Hakimiyyətinin başçısı Rəcəb
Babaşov kənd sakinlərini salamlayaraq bugünkü səyyar
görüşün əsas məqsədinin vətəndaşları narahat edən qayğıları dinləməyə, onlar
tərəfindən qaldırılan məsələləri, səslənən fikirləri öyrənərək operativ şəkildə
yerindəcə həlli istiqamətində əməli işlər görməyə yönəldiyini bildirib. Ən
əsası da ehtiyac olduğu halda aidiyyəti təşkilatlar qarşısında məsələ
qaldırmaqdan ibarət olduğunu vurğulayıb. "Özümə borc bildim ki, uzun fasilədən sonra ilk
səyyar görüşü sərhəddə yerləşən Quşçu Ayrım kəndində keçirim”, - deyən icra
başçısı bu kənddə yaşayan sakinlərə olan qayğının bundan sonra da daim diqqət
mərkəzində olacağını qeyd edib. Son illər rayonda, eləcə də kəndlərdə aparılan
genişmiqyaslı abadlıq işlərindən söz açan rayon rəhbəri Quşçu Ayrım kəndinin də
həmin kəndlər sırasında olduğunu söyləyib.
İcra başçısı bildirib ki, son illər Qazaxda daim diqqət
ayrılan sahələrdən biri uşaqlara göstərilən qayğıdır. Həmin qayğının bariz
nümunəsi bu gün rayonda mövcud olan 25 məktəbəqədər təhsil müəssisəsindən (6-sı
şəhər, 19-u kənd üzrə) 21-nin müasir tələblərə cavab verən səviyyədə olmasıdır.
Həmin təmirli bağçalardan biri də məhz Quşçu Ayrım kəndində yerləşən uşaq bağçasıdır.
Əvvəlki səyyar görüşlərin birində bağçanın təmiri ilə bağlı məsələ qaldırılmışdı
ki, bu gün öz müsbət həllini tapıb, təmirli bağça kimi uşaqların
ixtiyarındadır. 2020-ci ilin 27 sentyabrında başlayan və 44 gün
davam edən haqq savaşında qazandığımız tarixi Qələbədən söz açan icra
başçısı bu qələbəni bizlərə bəxş edən Ali Baş Komandana, hərbçilərimizə,
şəhidlərimizə, qazilərimizə borclu və minnətdar olduğumuzu vurğulayıb. Rayon
rəhbəri Respublika Prezidenti İlham Əliyev, Birinci vitse-prezident Mehriban
Əliyeva tərəfindən şəhid ailələrinə və qazilərimizə göstərilən qayğının Qazaxda
da hər zaman nümunə götürüldüyünü bildirib. Qazaxda bütün şəhidlərimizin, eləcə də Vətən müharibəsi
şəhidlərinin daim yad olunacağını, şəhid ailələrinə olan qayğının bundan sonra
da davam etdiriləcəyini vurğulayıb. Şəhidlərin adlarının əbədiləşdirilməsi
istiqamətində görülmüş işlərdən danışan rayon rəhbəri şəhərin
N.Nərimanov küçəsində Vətən müharibəsi şəhidlərinin xatirələrini əbədiləşdirən
Abidə Kompleksinin inşa olunduğunu söyləyib. Rayon rəhbəri bu il kənddə görülməsi nəzərdə
tutulan işlərdən - kəndə internet xəttinin çəkilməsi, kəndə gələn yolda cari
təmir işlərinin aparılmasından da söz açıb.
Daha
sonra icra başçısı sakinləri narahat edən məsələləri dinləyib, qayğıları ilə
maraqlanıb. Kənd sakinlərindən şəhid atası Abbas
Mirzəyev, Lətif Dünyamalıyev, İradə İsgəndərova, Mariya Süleymanova, Firəngiz
Cəfərova, Zülfiyyə Süleymanova, Musa İsmayılov, Yusif Nəbiyev, Nəsib İsmayılov,
Könül Hüseynova çıxış edərək respublikamızda, Qazax rayonunda, eləcə də rayonun
kəndlərində görülən genişmiqyaslı işlərə görə ölkə başçısına və rayon
rəhbərliyinə təşəkkürlərini çatdırıblar. Rayonda, o cümlədən Quşçu Ayrım kəndində görülən işlərdən danışan
sakinlər abadlıq və quruculuğu, sosial problemlərin müsbət həllini tapmasını
yüksək qiymətləndiriblər. Ölkəmizdə vətəndaşlara göstərilən diqqət və qayğıya
görə Prezident İlham Əliyevə, rayon rəhbərliyinə bütün kənd sakinləri adından
bir daha öz dərin minnətdarlıqlarını bildiriblər. Səmimi söhbət əsasında keçən
görüşdə minnətdarlıqla yanaşı, sakinlər onları narahat edən bir sıra
məsələlərdən də söz açıblar. Vətəndaşların elektrik sayğacında yaranmış borcun
silinməsi, kəndə gedən yolun cari təmir olunması, kənddəki su nasosunun təmir
edilməsi, işlə təmin olunma ilə bağlı müraciətlərini
dinləyən rayon rəhbəri qaldırılan hər bir məsələyə həssaslıqla yanaşılacağını,
diqqətlə baxılacağını bildirib. GOYEZEN.AZ
Facebook-da paylaş