İcra başçısı Qarapapaq kəndində vətəndaşların müraciətinə yerində baxıb
Son illər ölkəmizdə vətəndaş amili hər zaman ön planda
dayanır. Bunu ölkə Prezidenti cənab İlham Əliyev çıxışları zamanı dəfələrlə
səsləndirir. İcra hakimiyyəti başçılarını, mərkəzi icra hakimiyyəti
orqanlarının rəhbərlərini qəbul edən zaman dövlət məmurları haqqında söylədiyi
fikirlər, onlara daim xalqın içində olmaları haqda
verdiyi tapşırıq və tövsiyələr də bir daha sübut edir. Ölkə rəhbərinin icra
başçılarına bütün kəndləri gəzmələri,
sakinlərlə görüşmələri, vətəndaşların qayğılarını öz dillərindən eşitmələri,
onların problemlərini yerində öyrənmələri, düzgün təhlil aparmaları barədə verdiyi
tapşırıqlar onu göstərir ki, dövlət hər zaman öz vətəndaşını düşünür. Dövlət başçısının vətəndaşlarla bağlı mövqeyi son
illər Qazaxda da öz real əksini tapır. Fəaliyyətə başladığı ilk gündən vətəndaş
amilini əldə rəhbər tutan Rayon İcra Hakimiyyətinin başçısı Rəcəb Babaşov bunu sakinlərə
olan səmimi münasibəti, vətəndaşlara göstərdiyi diqqət və qayğısı ilə dəfələrlə
sübut edib. Şəhər və kəndlərdə sakinlərlə keçirdiyi görüşlər zamanı səslənən
müraciətlərə operativ şəkildə baxılması, vətəndaşların yaşadığı ünvandan asılı
olmayaraq istəyinə əsasən yerində baxış keçirilməsi, qaldırılan məsələlərin
həlli istiqamətində yerindəcə tapşırıq verilməsi vətəndaşlara olan qayğının əyani
sübutudur. Bu gün Qazax Rayon İcra
Hakimiyyətinin başçısı Rəcəb Babaşov icra aparatına
yaşadıqları əraziyə su və kanalizasiya xəttinin çəkilməsinə köməklik olunması
barədə müraciət etmiş bir qrup Qarapapaq kənd sakininin istəyinə əsasən həmin kənddə olub, sakinlərin
müraciətlərinə yerində baxış keçirib. "Akkord Sənaye Tikinti
İnvestisiya Korporasiyası” ASC-də Tikinti direktorunun müavini Fəqani Əkbərovun, Qazax rayonunun içməli su və kanalizasiya
sistemlərinin yenidən qurulması layihəsinin rəhbəri Sədi Namazovun iştirakı ilə
keçirilən baxış zamanı icra başçısı su-kanalizasiya xəttinin çəkilişi üzrə hazırlanmış layihədə qeyd olunan
ərazinin də nəzərə alınması barədə aidiyyatı təşkilat qarşısında məsələ
qaldırıldığını və müsbət həll olunduğunu bildirib. Rayon rəhbəri 70-dən artıq ailənin
yaşadığı həmin əraziyə də su və kanalizasiya sisteminin çəkiləcəyini qeyd edib. "Akkord Sənaye Tikinti
İnvestisiya Korporasiyası” ASC-də Tikinti direktorunun müavini Fəqani Əkbərov yaxın günlərdə həmin ərazidə çəkilişlərə
başlanılacağını vurğulayıb. Sakinlər onlara
göstərilən dövlət qayğısına, qaldırdıqları məsələnin müsbət həllini tapmasına
görə ölkə başçısına və rayon rəhbərliyinə minnətdarlıqlarını bildiriblər. GOYEZEN.AZ
Facebook-da paylaş