Bayraq dövlətin varlığının göstəricisidir
Hər bir dövlətin, millətin, xalqın tarixində azadlığın
və müstəqilliyin ifadəsi olan bayraq çox mühüm məna daşıyır və xalqın
varlığını, ideologiyasını özündə əks etdirir. Hər bir xalqın tarixinin şanlı
səhifələri məhz Dövlət Bayrağı ilə bəzənir. Xalqa, millətə milli qürur, mənlik,
ləyaqət, güc, qüvvət, qüdrət verir. Bizim bayrağımız da bu gün sərhədlər
aşdıqca, ölkələr keçdikcə və ən əsası işğaldan azad edilən tarixi Azərbaycan
torpaqlarında dalğalandıqca azərbaycanlıların milli simvolu kimi könülləri fəth
edir, əbədiləşir. Dövlət Bayrağımız bu gün həm də Qələbə və Zəfər üfüqlərini
özündə təcəssüm edir. Həm dünyada, həm də azad edilmiş torpaqlarda dalğalanan
bayrağımız siyasi qələbəmizin təntənəsi kimi bütün azərbaycanlılara qürur verir
və bizim xalq kimi birliyimizin, həmrəyliyimizin rəmzidir. İlk dəfə 1918-ci
ilin noyabrın 9-da Bakıda hökumətin iclasında qəbul edilən və iclasın
keçirildiyi Azərbaycan Xalq Cümhuriyyəti Nazirlər Şurasının binası üzərində
qaldırılan üçrəngli bayrağımız keşməkeşli tarixi yol keçib. 1920-ci ilin aprel
ayında dövlət statusuna malik olan Azərbaycan Bayrağı Azərbaycan Xalq Cümhuriyyətinin süqut etməsi və
Sovet hakimiyyətinin qurulması ilə xalqın qəlbində yaşadı. Müəllifi
Ə.Hüseynzadə olan və üzərində ifadə etdiyi milli istiqlal ideologiyamızın üç
təməl prinsipini təşkil edən "türkçülük, müasirlik və islamçılıq” düsturu
Cümhuriyyət yadigarı olaraq bizim azadlıq məfkurəsinə, milli–mənəvi dəyərlərə
və ümumbəşəri ideallara sadiqliyimizin təcəssümü kimi 1990-cı il noyabrın 17-də
Naxçıvan Muxtar Respublikası Ali Məclisinin sessiyasında Ümummilli Liderimiz
Heydər Əliyevin təşəbbüsü ilə yenidən qaldırıldı. Heydər Əliyevin rəhbərliyi
ilə keçirilən sessiyada Naxçıvan Muxtar Respublikasının dövlət bayrağı olaraq
təsdiq edildi. Naxçıvan Muxtar Respublikasının Ali Məclisi Azərbaycan
SSR Ali Soveti qarşısında üçrəngli bayrağın Azərbaycanın rəsmi dövlət rəmzi
kimi tanınması haqqında vəsatət qaldırmışdır. 1991-ci il fevral ayının 5-də
həmin vəsatətə baxılmış və Azərbaycan Respublikasının Ali Soveti "Azərbaycan
Respublikasının Dövlət bayrağı haqqında” Qanun qəbul edərək onu yenidən Dövlət
bayrağı elan etmişdir. Sonralar ÜmummilliLider
bu barədə deyirdi: "Mən belə fikirdəyəm ki, Naxçıvan MR Ali Məclisinin qəbul
etdiyi qərarlar Azərbaycan Respublikasının işinə çox təsir etdi və Azərbaycan
rəhbərliyi bir neçə belə qərarın qəbul edilməsində məcburiyyət qarşısında
qaldı. Naxçıvan Muxtar Respublikasının üzərində bu bayraq 1990-cı il noyabrın
17-də, Azərbaycan Respublikasında isə 1991-ci il fevralın 5-də dalğalandı”. 1991-ci il oktyabrın 18-də "Azərbaycan Respublikasının
dövlət müstəqilliyi haqqında” Konstitusiya Aktı ilə Azərbaycan Respublikası
Azərbaycan Xalq Cümhuriyyətinin varisi kimi onun dövlət rəmzlərini, o cümlədən
Dövlət Bayrağını
bərpa etmişdir. Üçrəngli bayrağmızdakı simvollar və təsvirlər əsl
tarixi-fəlsəfi sistemdir. Dövlət
bayrağının təsviri Azərbaycan Respublikası Konstitusiyasının 23-cü maddəsi,
həmçinin "Azərbaycan Respublikası Dövlət Bayrağının təsvirinin təsdiq edilməsi
haqqında” Azərbaycan Respublikasının 2018-ci il 2 noyabr tarixli 1331-VKQ
nömrəli Konstitusiya Qanunu ilə tənzimlənir. Belə
ki, Azərbaycan Respublikasının Dövlət Bayrağı eni bərabər olan üç üfüqi
zolaqdan ibarət düzbucaqlı şəklindədir. Yuxarı zolaq mavi rəngdə, orta zolaq
qırmızı rəngdə, aşağı zolaq yaşıl rəngdədir. Düzbucaqlının eninin uzunluğuna
nisbəti 1:2-dir. Qırmızı zolağın ortasında aypara və səkkizguşəli ulduz təsviri
vardır. Aypara və ulduz ağ rəngdədir. Ayparanın ucları ondan sağda yerləşən
ulduza istiqamətlənmişdir. Dövlət Bayrağı, ölçüsündən asılı olmayaraq, onun
rəngli və sxematik təsvirlərinə uyğun gəlməlidir. Bütün bu rənglər aypara, ulduz özündə mənalar və
tarixin dərinliklərini ehtiva edir. Türkçülük, islamçılıq, çağdaşlıq,
dövlətçilik, demokratiklik, bərabərlik, azərbaycançılıq, əbədilik, sonsuzluq,
davamlılıq kimi dəyərlər istər milli, istərsə də mənəvi baxımdan Azərbaycan
xalqının həyat prinsiplərinə, qədim maraqların ifadəsinə, simvoluna çevrildi və
xalqın böyük oğlu dahi şəxsiyyət Heydər Əliyevin zəkasının nuru sayəsində
yenidən dalğalandı və bu gün də dalğalanmaqdadır, həm də daha vüqarlı, daha
əzəmətli, daha qürurlu. Ona görə də Azərbaycanın dövlət rəmzinə ən böyük
hörməti göstərməli və ona qarşı hörmətsizlik göstərənə ən layiqli cavabı
verməliyik. Azərbaycan Respublikası Konstitusiyasının 75-ci
maddəsinə əsasən hər bir vətəndaş Azərbaycan Respublikasının dövlət rəmzlərinə
- bayrağına, gerbinə və himninə hörmət etməlidir. Dövlət rəmzlərinə
hörmətsizliyin nümayiş etdirilməsi qanunla müəyyən edilmiş məsuliyyətə səbəb
olur. 2004-cü il iyunun 8-də "Azərbaycan Respublikası Dövlət
bayrağının istifadəsi qaydaları haqqında” Azərbaycan Respublikasının Qanunu ilə
bu sahədə qanunvericilik bazası təkmilləşdirilmişdir. Həmin Qanunla Azərbaycan
Respublikasının Dövlət Bayrağına
hörmət göstərilməsi ilə bağlı vəzifələr, Dövlət Bayrağının qaldırılmalı və yerləşdirilməli olduğu
yerlər, təsvirinin istifadəsi, həmçinin rəsmi tədbirlər zamanı, matəm
günlərində və matəm mərasimlərində istifadəsi, digər bayraqlarla birgə qaldırılması
(asılması) və ya yerləşdirilməsi, habelə, Dövlət Bayrağının
istifadəsinə dair tələblər və məhdudiyyətlər müəyyən edilmişdir. Dövlət Bayrağı
respublikamızın dövlət qurumlarının və diplomatik nümayəndəliklərinin binaları
üzərində ucalır, mühüm beynəlxalq tədbirlər, mötəbər mərasimlər və məclislərlə
yanaşı, irimiqyaslı ictimai-siyasi toplantılarda, mədəni tədbirlərdə və idman
yarışlarında qaldırılaraq milli birliyi təcəssüm etdirir. Ümummilli Liderimiz Heydər Əliyev deyirdi: "Kim
Azərbaycanı sevirsə, kim Azərbaycanın müstəqil dövlət olmasını istəyirsə, kim
Azərbaycanın işğal olunmuş torpaqlarının azad olunmasını istəyirsə, kim
Azərbaycanın ərazi bütövlüyünü istəyirsə, o, bu bayraq altında birləşməlidir”.
Bu siyasət bu gün Azərbaycan Respublikasının Prezidenti İlham Əliyev tərəfindən
uğurla davam etdirilir. 2020-ci il sentyabrın 27-də başlanan haqq savaşımızda
xalq, dövlət, ordu, birlik, həmrəylik nümayiş etdirdi, üçrəngli bayraq altında
birləşdi. Dövlətimizin gücünü, xalqımızın milli ruhunu, milli birliyini dünyada
nümayiş etdirdi. Bu gün bayrağmız təkcə beynəlxalq təşkilatlarda,
respublikamızda fəaliyyət göstərən xarici ölkə səfirliklərinin yerləşdiyi
binalarda, beynəlxalq sularda üzən gəmilərdə, beynəlxalq səviyyəli yarışlarda,
mədəni tədbirlərdə deyil, həm də Qarabağda, Laçında, Kəlbəcərdə, Şuşada
əzəmətlə dalğalanır. Həm də ən yüksəkdə, zirvədə dalğalanır. Azərbaycan Respublikasının Dövlət Bayrağı Azərbaycan vətəndaşlarının
milli həmrəyliyinin, vahid məfkurə ətrafında sıx birləşməsinin başlıca amillərindən
biridir. Bayraq milli identikliyin təzahür formalarından biridir. Ən müqəddəs
rəmzlərdən olan bayraq millətin varlığının, mövcudluğunun sübutu, müstəqil
dövlətə sahib çıxmaq bacarığının əsas göstəricisidir. Özünütəsdiq simvolu olan
bayraq hər bir Azərbaycan vətəndaşı üçün qürur və güvənc yeridir. Azərbaycan Respublikası Prezidentinin "Azərbaycan
Respublikasının paytaxtı Bakı şəhərində Dövlət bayrağı meydanının yaradılması
haqqında” 2007-ci il 17 noyabr tarixli Sərəncamı Dövlət Bayrağının dövlət rəmzləri sırasında
xüsusi yerini müəyyən edir. 2010-cu il sentyabrın 1-də Bakıda Dövlət Bayrağı
Meydanının təntənəli açılış mərasimində Azərbaycan Respublikasının Prezidenti
İlham Əliyev Dövlət Bayrağının
xüsusi əhəmiyyətini vurğulayaraq deyib: "Bizim bayrağımız qürur mənbəyimizdir.
Bizim bayrağımız canımızdır, ürəyimizdir. Bu gün Azərbaycanın hər bir yerində
Dövlət Bayrağı
dalğalanır. Azərbaycan ərazi bütövlüyünü bərpa edəndən sonra milli Dövlət Bayrağımız bu gün hələ də işğal
altında olan torpaqlarda qaldırılacaqdır. Bizim bayrağımız Dağlıq Qarabağda,
Xankəndidə, Şuşada dalğalanacaqdır. O günü biz hər an öz işimizlə
yaxınlaşdırmalıyıq və yaxınlaşdırırıq. Eşq olsun, Azərbaycan bayrağına!”. Bu fikirlər bu gün bir reallıqdır. "Bayrağımız
eşidilən səsimiz, duyulan nəfəsimizdir. Bizim bayrağımız qürur mənbəyimizdir.
Azərbaycan Respublikası müstəqilliyini bərpa etdikdən sonra Azərbaycanın Dövlət
Bayrağı milli suverenliyin simvolu kimi ölkəmizin bütün vətəndaşları üçün
müqəddəs dövlətçilik rəmzlərindən birinə çevrilib. Azərbaycan Xalq
Cümhuriyyətinin yadigarı olan bu bayraq bizim azadlıq məfkurəsinə, milli –
mənəvi dəyərlərə və ümumbəşəri ideallara sadiqliyimizi nümayiş etdirir”. Azərbaycan Respublikası Prezidenti İlham Əliyevin
2009-cu il noyabrın 17-də imzaladığı Sərəncamla hər il noyabrın 9-u ölkədə
Dövlət BayrağıGünü
kimi qeyd edilir. Azərbaycan Respublikası Əmək Məcəlləsinin 105-ci maddəsinə
əsasən bu bayram ölkədə qeyri-iş günü olan bayramların siyahısına daxil edilib. Ceyhunə HÜSEYNOVA, Qazax Rayon Heydər Əliyev Mərkəzinin direktoru
Facebook-da paylaş