Qazaxda “Şəhidli, şahidli gecə” adlı rəsm sərgisi və kompozisiya nümayiş olunub
Bu gün Qazax Rayon İcra Hakimiyyətinin təşkilatçılığı, "Azərbaycan Qarabağ müharibəsi əlilləri,
veteranları və şəhid ailələri” İctimai Birliyi Qazax rayon şöbəsinin və rayon Gənclər və İdman İdarəsinin dəstəyi ilə 20 Yanvar faciəsinin
29-cu ildönümünə həsr olunmuş "Şəhidli, şahidli gecə” adlı rəsm sərgisi və
kompozisiya nümayiş olunub. Qazax Dövlət Rəsm
Qalereyasında təşkil olunmuş sərgidə Qazax RİHB aparatının məsul işçiləri, Qarabağ
müharibəsi əlilləri və veteranları, Bakı Dövlət Universiteti Qazax fillialının, Qazax
Dövlət Sosial-İqtisadi Kollecinin müəllim-tələbə kollektivləri, idarə, müəssisə
və təşkilat rəhbərləri, təhsil, səhiyyə, mədəniyyət işçiləri, bağça müdirləri, KİV
nümayəndələri iştirak ediblər. 20 Yanvar faciəsini
özündə əks etdirən sərgidə
qalereyanın fondundan və rayon məktəblilərinin, Qazax Uşaq-Gənclər
İnkişaf Mərkəzinin dərnək üzvlərinin 20 Yanvar faciəsinə həsr olunmuş
70 əsəri sərgilənib. Məktəb şagirdlərinin əl işlərinin nümayiş olunduğu
sərgidə faciə qurbanlarını əks etdirən rəsmlər yer alıb. Qazax
Rayon İcra Hakimiyyətinin başçısı Rəcəb Babaşov sərgidə iştirak etmək üçün Qazax
Dövlət Rəsm Qalereyasına gəlib. Tədbir Qazax şəhər 1 saylı Uşaq Musiqi Məktəbinin
xor kollektivinin ifasında Azərbaycan Respublikasının Dövlət Himinin səsləndirilməsi
ilə başlayıb. Vətənin azadlığı və müstəqilliyi uğrunda canından
keçən şəhidlərin əziz xatirəsi bir dəqiqəlik sükutla yad edilib. Sonra
icra başçısı və sərgi iştirakçıları Azərbaycanın tarixinə ən dəhşətli və faciəli səhifələrdən
biri kimi daxil olan 20 Yanvar faciəsini özündə əks etdirən məktəblilərin əl
işləri ilə tanış olublar. Rayon rəhbəri hər bir rəsmin qarşısında dayanaraq əl
işlərinə baxıb, məktəblilərlə söhbət edib, bu istedadlı uşaqların rəsmlərdə nə
demək istədikləri ilə maraqlanıb. Uşaqlar çəkdikləri rəsmlər haqqında məlumat
verməklə yanaşı, 20 Yanvar faciəsinə həsr edilmiş şeirlər söyləyiblər. Qazax
Uşaq-Gənclər İnkişaf
Mərkəzinin dərnək üzvləri Nərmin Tatlıyevanın, Türkan İsgəndərovanın, S.Vurğun
adına şəhər 2 nömrəli tam orta məktəbin şagirdləri Növrəstə Haqverdiyevanın,
Fatimə və Sənubər Məmmədovaların şəhidlərimizə həsr etdikləri şeirlər sərgiyə
toplaşanlar tərəfindən qürur hissi ilə qarşılanıb. Tədbirin
aparıcısı, gənc rəssamAkif Əmirov rayon
rəhbərliyinə məktəblilərin əl işlərindən ibarət olan sərgi barədə məlumat
verib. Qeyd olunub ki, uşaqlar 20 Yanvar faciəsini öz gözləri ilə
görmədiklərinə baxmayaraq çəkdikləri rəsmlərdə faciəni canlandıra biliblər.
Rəsmlərdə düşmənə nifrət canlı şəkildə əks etdirilib. Daha
sonra İ.Qayıbov adına şəhər 3 saylı tam orta məktəbin şagirdləri Sevda
Qocalıyevanın, Əfqan Osmanovun, Fidan Hüseynovanın, Vahid Məmmədovun, Şəfa
Qurbanovanın, Nazim Şaqumovun, Çinarə Ömərovanın, Nigar Vəliyevanın, Validə Şəmilovanın, Nurcan Əsgərovanın iştirakı
ilə 20 Yanvar faciəsinə həsr olunmuş kompozisiya nümayiş olunub.
Qazax Rayon İcra Hakimiyyətinin başçısı Rəcəb
Babaşov çıxış edərək bildirib ki, Azərbaycan xalqının tarixinə qəhrəmanlıq
səhifəsi kimi daxil olmuş 20 Yanvar faciəsinin törədilməsindən 29 il ötür.
1990-cı il yanvarın 19-dan 20-nə keçən gecə Bakıda sovet ordusu tərəfindən dinc
əhaliyə qarşı dəhşətli qırğın törədilmişdir. Faciə zamanı yüzlərlə insan şəhid
olmuş, yaralanmış və xəsarət almışdır. Bu qanlı hadisənin törədilməsində əsas
məqsəd azadlıq, suverenlik uğrunda mübarizə aparan Azərbaycan xalqının
iradəsini qırmaq, insanların müstəqillik arzularını əzmək idi. 20 Yanvar faciəsinə ilk dəfə öz etirazını
bildirən ümummilli lider Heydər Əliyev 1990-cı il yanvarın 21-də Azərbaycanın
Moskvadakı daimi nümayəndəliyinə gəlmiş və kəskin bəyanatla çıxış edərək Bakıda
baş vermiş faciəni törədənlərin məsuliyyətə cəlb olunmasını tələb etmişdir.
Ümummilli lider ölkəmizdə siyasi hakimiyyətə qayıtdıqdan sonra isə faciəyə
dövlət səviyyəsində tam siyasi-hüquqi qiymət verilmişdir. 1994-cü ilin fevral
ayında keçirilən Milli Məclisin xüsusi sessiyasında 1990-cı il yanvarın 20-də
günahsız insanların qəddarcasına qətlə yetirilməsi hərbi təcavüz və cinayət
kimi qiymətləndirilmiş, "1990-cı il yanvarın 20-də Bakıda törədilmiş faciəli
hadisələr haqqında” qərar qəbul edilmişdir. "Şəhidlik vətənpərvərliyin ən ali məqamıdır”,-
deyən rayon rəhbəri bildirib ki, bu ucalığa yüksələnlərin ömür yolu gələcək
nəsillər üçün örnəkdir. 20 Yanvar şəhidlərinin mübarizəsi də Azərbaycan
xalqının qəhrəmanlıq tarixi, vətənpərvərlik dərsidir. Qətiyyətli lideri və
güclü ordusu olan Azərbaycan xalqı əmindir ki, şəhidlərimizin qanı yerdə
qalmayacaqdır! Xalqımız bir daha soyqırımlarla, faciələrlə sınağa
çəkilməyəcəkdir! Çünki Prezident İlham Əliyev ümummilli lider Heydər Əliyevin
yolunu qətiyyətlə davam etdirərək ölkəmizin müstəqilliyini daimi və əbədi edib. Rayon rəhbəri qeyd edib ki, bu gün Respublika
Prezidenti İlham Əliyev 20 Yanvar şəhidlərinin xatirəsinin əbədiləşdirilməsi,
adlarının uca tutulması, o cümlədən onların ailələrinin sosial müdafiəsinin
gücləndirilməsini daim diqqət mərkəzində saxlayır, bu istiqamətdə mühüm
tədbirlər həyata keçirilir. Hər il 20 Yanvar faciəsinin ildönümü ölkəmizdə
geniş qeyd olunur. İcra başçısı bildirib ki, bu
gün minlərlə şəhidi olan Azərbaycanda düşmənlə 168 km məsafədə sərhəddi olan, 5
kəndi daim mənfur düşmən gülləsinin atəşinə məruz qalan, Bağanıs Ayrım,
Xeyrımlı, Barxudarlı, Sofulu, Qızılhacılı, Yuxarı Əskipara və Aşağı Əskipara
kimi 7 kəndi hələ də düşmən tapdağı altında olan Qazax rayonu da yüzlərlə şəhid
verib. Bu gün Qazaxın Vətən uğrunda canından keçən 285 nəfər şəhidi və 7 nəfər
Milli Qəhrəmanı var. "Bu gün biz azad şəkildə
yaşayırıqsa, bunu şəhidlərimizə borcluyuq”, - deyən rayon rəhbəri Qazaxda Vətən
torpaqlarının azadlığı uğrunda canından keçmiş şəhidlərimizin xatirəsinin hər
zaman əziz tutulduğunu qeyd edib. Nəinki şəhidlərimizə, eləcə də Qarabağ
müharibəsi veteranlarına, əlillərinə də daim diqqət və qayğı göstərildiyini
bildirib.
Gənc rəssam Akif Əmirov çıxış edərək bildirib ki,
20 Yanvar günü tariximizə qanla yazılsa da, bu gün biz qürur gününü yaşayırıq.
Şəhidliyin uca zirvə olduğunu bildirən gənc rəssam bu ali məqamın Allah qatında
da yüksək dəyəri olduğunu qeyd edib. Şəhidlərin hər bir azərbaycanlının övladı
olduğunu və daim qəlblərdə yaşadıqlarını vurğulayıb. Bu cür sərgilərin davamlı
olmasının vacibliyini önə çəkərək gənc və yeniyetmələrin vətənpərvər ruhda
böyüməsində böyük rolu olduğunu bildirib. S.Əfəndiyev adına şəhər 1 saylı tam orta məktəbin
direktoru Bəsdi Ələkbərova, "Azərbaycan Qarabağ müharibəsi əlilləri,
veteranları və şəhid ailələri” İctimai Birliyi Qazax rayon şöbəsinin sədr müavinləri Xasay Balayev, Qarabağ müharibəsi əlili Namiq Alıyev çıxış edərək 20 Yanvar hadisələrindən söhbət açıb,
həmin gün xalqımızın igid oğul və qızlarının göstərdikləri şücaətdən
danışıblar. Bu gün təşkil olunan sərginin məktəblilərin vətənpərvər ruhda böyüməsində,
tərbiyə olunmasında, gənclərin öz tarixi keçmişinə sahib çıxmasında böyük əhəmiyyət
kəsb etdiyini qeyd ediblər. Qazax
Dövlət Rəsm Qalereyasının sərgi salonunda sərgilənən rəsmlər, nümayiş etdirilən
matəm kompozisiyaları, söylənilən şeirlər bir daha sübut edib ki, bugünkü nəsil
vətənpərvər ruhda böyüyür və bunun üçün Qazaxda məqsədyönlü işlər həyata
keçirilir. GOYEZEN.AZ
Facebook-da paylaş