Qazaxda sərgi iştirakçıları ilə görüş keçirilib
Qazax Rayon İcra Hakimiyyətinin başçısı Rəcəb Babaşov
fəaliyyətə başladığı ilk gündən təhsil, mədəniyyət sahələrinə xüsusi diqqət ayırır,
istər müəllimlərə, istər şagirdlərə, istərsə də gənc rəssamlara, yeniyetmələrə
qayğı ilə yanaşır. Bu gün rayon rəhbərinin gənc rəssam Akif Əmirovun təşəbbüsü və Qazax
Uşaq-Gənclər İnkişaf Mərkəzinin təşkilatçılığı ilə təşkil
olunmuş "Ekoloji problemlərin həlli yolları” adlı sərginin iştirakçıları ilə görüş keçirməsi bu qayğının ən bariz nümunəsidir. İcra Hakimiyyətində keçirilən görüşdə icra aparatının
məsul şəxsləri, Uşaq-Gənclər İnkişaf Mərkəzinin dərnək rəhbərləri və üzvləri iştirak ediblər. Rayon İcra Hakimiyyətinin başçısı Rəcəb Babaşov görüşdə
çıxış edərək sərginin yüksək səviyyədə təşkil olunmasına görə əməyi keçən bütün
müəllimlərə, dərnək üzvlərinə minnətdarlığını bildirib və səmimi qəlbdən təbrik
edib. Qazax rayonunun ölkəmizdə
təhsilin beşiyi sayıldığını bildirən icra başçısı bu sahəyə göstərilən diqqət
və qayğıdan danışıb. Qeyd edib ki, rayonumuzda bütün sahələrlə yanaşı, təhsil və
mədəniyyət sahələri də ildən-ilə inkişaf edərək daha böyük bəhrə verir. Bunu
istər təhsil, istərsə də mədəniyyət sahəsində əldə etdiyimiz uğurlardan,
qazandığımız nailiyyətlərdən də aydın şəkildə görmək olar. Bu yaxınlarda "Ölkəmizi
tanıyaq” layihəsində qazaxlı məktəblilərin Azərbaycan İntellektual Klublar
Assosiasiyası tərəfindən təşkil olunmuş "Nə?, harada?, nə zaman?” adlı bilik yarışmasından qalib kimi qayıtması bunu bir daha sübut etdi. 9 rayon
arasında keçirilən bilik yarışında öz bilik və bacarıqlarını, ən əsası da
Qazaxın ziyalılar yurdu olduğunu bir daha nümayiş etdirən məktəblilərin bu
qələbəsini yüksək qiymətləndirən rayon rəhbəri təhsilə olan qayğının təzahürü
olduğunu çatdırıb. Hər rayon üzrə 6 komanda olmaqla, ümumilikdə 54 komandanın
iştirak etdiyi yarışda rayonumuzun "Göyəzən” komandasının 1-ci yeri
qazanaraq Assosiasiya tərəfindən Kuboka, Sertifikata və medallara layiq
görülməsini, bundan əlavə, məktəblilərin "Asan həyat"
kompleksindəki "İntellektual mərkəz"də "Breyn Rinq"
yarışmasından da qalib kimi dönmələrini təhsil sahəsinə göstərilən qayğının,
diqqətin öz bəhrəsini verdiyini qeyd edib. Bildirib ki, bu qələbənin
qazanılmasında noyabr ayının 10-da Qazax Rayon İcra Hakimiyyətinin
təşkilatçılığı ilə hazırlanmış ”Rayonumuzu tanıyaq” devizi altında təşkil olunmuş turun da böyük əhəmiyyəti oldu. Rayon
rəhbəri qazanılan bu uğuru dövlət başçısı İlham Əliyevin Qazax Müəllimlər
Seminariyasının 100 illik yubileyinin qeyd olunması ilə bağlı imzaladığı 3
noyabr 2018-ci il tarxli Sərəncamına əsl töhfə olduğunu bildirib. İcra başçısı
qeyd edib ki, bu qələbə bir daha onu sübut etdi ki, Qazax hər zaman ziyalılar,
tarixi şəxsiyyətlər yurdu olub və bu, bundan sonra da belə olacaqdır. Təkcə
Qazax Müəllimlər Seminariyası onu deməyə əsas verir ki, rayonda savadlı, bilikli gənclərimizin sayı gündən-günə artır. Bu il
qəbul imtahanlarının nəticələrinə görə Qazaxın respublika məktəbləri arasında
3-cü yerdə dayanması da bütün bu dediklərimizin əyani sübutudur. İcra başçısı bildirib ki, bu gün
respublikamızda, eləcə də bölgələrimizdə "Yeniləşən Azərbaycana yeni məktəb”
layihəsinin uğurla icra edilməsi təhsilə dövlət səviyyəsində göstərilən diqqət və qayğının ən bariz nümunəsidir. Rayon rəhbəri hazırda rayonumuzda əsaslı şəkildə yenidən
qurulan 964 şagird yerlik S.Vurğun adına şəhər 2 nömrəli tam orta məktəbdə
görülən işləri bu qayğının əyani sübutu kimi qiymətləndirib. Bundan əlavə, növbəti
tədris ilində rayonda daha 3 məktəbin – Kosalar, Qaymaqlı və Kəmərli kənd məktəblərinin
də əsaslı şəkildə yenidən qurulmasının nəzərdə tutulduğunu bildirib. İcra
başçısı rayonumuzda keçirilən mədəni-kütləvi tədbirlərdən söz açaraq qeyd edib
ki, bu cür yüksək səviyyəli tədbirlərin keçirilməsində əsas məqsəd Qazaxı
olduğu kimi tanıtmaq, hər zaman bütün sahələrdə öndə dayandığını bir daha
nümayiş etdirməkdir. Ən əsası da mədəniyyətimizin bir qolu olan rəssamlıq sahəsinə xüsusi qayğı
ilə yanaşmaq, bu sənətlə məşğul olan insanların, xüsusilə də gənclərin bu sahəyə
olan marağını artırmaq, istedadlarını inkişaf etdirmək və bunun üçün onlara hərtərəfli dəstək olmaqdır.
Bu dəstəyin nəticəsidir
ki, bu gün Qazaxda yüksək səviyyəli sərgilər keçirilir, tədbirlər təşkil
olunur. Ötən həftə Qazax Dövlət Rəsm Qalereyasında gənc rəssam Akif Əmirovun təşəbbüsü və Qazax Uşaq-Gənclər
İnkişaf Mərkəzinin təşkilatçılığı ilə "Ekoloji problemlərin həlli
yolları” adlı təşkil olunmuş sərgi və orada nümayiş olunan əl işləri,
rəsm əsərləri bunu bir daha sübut etdi ki, gənc və yeniyetmələrimizə olan qayğı
öz bəhrəsini verir. Onlar öz yaradıcılıqları ilə töhfə verməyə çalışırlar. Rayon rəhbəri bildirib ki, bu gün bu gözəl balaları
qəbul etməkdə əsas məqsədim onlara olan diqqət və qayğını göstərmək, xüsusi
istedadı ilə seçilən uşaqları daha da ruhlandırmaqdır. Nəinki bu uşaqlara,
eləcə də bütün məktəblilərə daim diqqət mərkəzində olduqlarını hər zaman hiss
etdirmək lazımdır. Gənc rəssam Akif
Əmirov çıxış edərək bildirib ki, Qazaxda təşkil olunan bütün sərgilərin yüksək
səviyyədə təşkil olunmasında rayon rəhbəri olaraq Sizin dəstəyiniz olduqca
böyükdür. Ona görə də biz gənc rəssamlar, eləcə də yeniyetmələr, məktəblilər,
ən əsası da mərkəzin kollektivi çalışırıq ki, rayonumuzun adını bundan sonra da
layiqincə təmsil edək. Gənc rəssam onlara göstərilən diqqətə, qayğıya və
sərgidə iştirak etdiyinə görə öz adından və mərkəzin dərnək üzvləri adından
Rayon İcra Hakimiyyətinin başçısı Rəcəb Babaşova bir daha dərin minnətdarlığını
bildirib. Qazax Uşaq-Gənclər İnkişaf
Mərkəzinin direktoru Gövhər Rəhimova çıxış edərək bildirib ki, sərgini
təşkil etməkdə əsas məqsədimiz məktəblilərin ekoloji sahəyə maraqlarını artırmaqla
yanaşı, onların qabiliyyətlərini və yaradıcılıqlarını üzə çıxarmaq, uşaqlara
mənəvi dəstək olmaq idi. Bundan başqa, dərnək üzvlərinin əl işlərinin və
rəsmlərinin bir çox müsabiqələrdə də nümayiş olunduğunu və müvafiq yerlər
tutduğunu da çatdırıb. G.Rəhimova onlarla keçirilən bugünkü görüşün istər
dərnək rəhbərlərinin, istərsə uşaqların həyatlarında böyük əhəmiyyət daşıdığını
qeyd edib, ən əsası da onların əməyinə verilən böyük qiymət olduğunu bildirib.
Bu diqqətin onların üzərinə daha böyük məsuliyyət qoyduğunu qeyd edən mərkəzin
direktoru göstərilən diqqət və qayğının etimadı olaraq bundan sonra daha da
səylə çalışacaqlarını vurğulayıb. İstər təhsil, istərsə də mədəniyyət sahəsinə dövlət
səviyyəsində göstərilə diqqət və qayğıya görə Respublika Prezidenti İlham
Əliyevə, onlara göstərilən bu səmimi münasibətə və qayğıya görə rayon
rəhbərliyinə kollektivi və öz adından dərin minnətdarlığını bildirib. Sonda "Ekoloji problemlərin həlli yolları” adlı sərgidə fəal iştiraklarına görə Qazax Uşaq-Gənclər İnkişaf
Mərkəzinin direktoru Gövhər Rəhimova və gənc rəssam Akif Əmirov Qazax Rayon
İcra Hakimiyyəti başçısının Fəxri Fərmanları təltif ediliblər. Mərkəzin
direktor müavini Afaq Həsənovaya, mərkəzdə təşkilatçı müəllim Rima
Xanbabayevaya, operator Şəlalə Həsənovaya, dərnək rəhbərlərindən – Nüşabə Hacıyevaya,
Xədicə Kazımovaya, Pərvanə Həsənovaya, Kəmalə Mehtiyevaya Təşəkkür elan olunub
və gül dəstəsi təqdim olunub. Mərkəzin kollektivi də öz
növbəsində sərgidə rayon rəhbərinin iştirakını əks etdirən fotoşəkillərdən
ibarət albom hədiyyə ediblər. Qazax
Rayon İcra Hakimiyyətinin başçısı Rəcəb Babaşov görüşə yekun vuraraq sərginin
yüksək səviyyədə keçməsi münasibətilə mərkəzin kollektivini bir daha səmimi
qəlbdən təbrik edib, bundan sonrakı fəaliyyətlərində daha böyük nailiyyətlər
qazanmalarını arzu edib. GOYEZEN.AZ
Facebook-da paylaş