Qazaxda tütün yığımı davam edir
Bu gün ölkəmizdə qeyri-neft
sektorunun dinamik inkişafı, iqtisadiyyatın şaxələndirilməsi istiqamətində
həyata keçirilmiş məqsədyönlü tədbirlər bütün bölgələrimizdə uğurla davam
etdirilir. Əlverişli torpaq-iqlim şəraitinin və mövcud işçi qüvvəsinin
olması ənənəvi kənd təsərrüfatı sahəsi olan tütünçülüyün inkişafında mühüm
nəticələrin əldə olunmasına gətirib çıxarıb.
Ölkə başçısı
İlham Əliyev tərəfindən imzalanmış 2017-ci il 10 avqust tarixli, 3163 nömrəli
Sərəncama əsasən "Azərbaycan Respublikasında tütünçülüyün inkişafına dair
2017–2021-ci illər üçün Dövlət Prqoramı”nın təsdiq olunması tütünçülüyün
inkişaf etdirilməsi baxımından böyük əhəmiyyət kəsb edir.
Sevindirici
haldır ki, qəbul edilmiş həmin dövlət proqramına uyğun olaraq respublikamızın
bütün bölgələrində tütünçülüyün inkişafına dövlət dəstəyi güclənmiş, rəqabət
qabiliyyəti yüksəlmiş və tütün istehsalı ilə məşğul olan əhalinin sosial rifah
halı daha da yaxşılaşmışdır.
Qazaxda da
ölkənin ümumi iqtisadi inkişafında mühüm rol oynayan aqrar sahələrdən biri kimi
tütünçülüyə böyük maraq göstərilir. Son 2 ildə
rayonda tütünçülüyün inkişafı istiqamətində görülən məqsədyönlü tədbirlər bunu
söyləməyə əsas verir. Məhz bu tədbirlərin nəticəsidir ki, 2016-cı ildə cəmi 10 hektar
sahədə tütün əkilmişdisə, ötən il bu rəqəm 50 hektara çatdırıldı. Bütün
aqrotexniki tədbirləri vaxtında həyata keçirən tütünçülər göstərilən sahədən 80
tondan çox məhsul götürdülər. Əldə etdikləri qazancdan razı qalan
tütünçülər bu il əkin sahələrini daha 10 hektar da artıraraq 60 hektara
çatdırdılar.
Bu məqsədlə
rayonun Kosalar kəndində 32 ha, Qazaxbəyli kəndində 8 ha, İkinci Şıxlı və Çaylı
kəndlərində 1 ha, Birinci Şıxlı, Aşağı Salahlı, Hüseynbəyli, Daş Salahlı,
Alpout kəndlərinin hər birində 2 ha, Dəmirçilər kəndində 1,5 ha, Cəfərli
kəndində 2,5 ha və Fərəhli kəndində 4 ha sahədə tütün əkilməsi bu sahənin artan
templə inkişaf etdirilməsi deməkdir.
Rayon rəhbərliyi tez-tez
tütünçülüklə məşğul olan fermerlərin yanında olur, onların arzu və istəklərini
dinləməklə yanaşı, problemlərinin həllinə də yaxından kömək göstərir. Rayon İcra
Hakimiyyətinin başçısı Rəcəb Babaşov bu gün də Kosalar kəndində olub. Tütün
sahələrini gəzərək mövcud vəziyyətlə tanış olduqdan sonra yığımda çalışan kənd
sakinləri ilə görüşüb. Tütünçülərlə səmimi söhbət zamanı fermerlər rayon
rəhbərliyinə görülən işlər haqqında məlumat verərək bildiriblər ki, bu günədək
149 ton yaş tütün tədarük edilib. 7 tondan çox məhsul
"İlham-M” MMC-yə təhvil verilib. Qeyd ediblər ki, hazırda tütün dərimi
sürətlə davam edir. Dərimin vaxtında və itkisiz başa çatdırılması üçün
əlverişli keçən hava şəraitindən maksimum dərəcədə istifadə etməyə çalışırlar.
Yığılmış tütün xüsusi talvarlar altında ipə düzülərək qurudulur.
Tütünçülər respublikamızda kənd təsərrüfatının inkişaf etdirilməsinə,
əhalinin maddi rifah halının yaxşılaşdırılmasına görə ölkə başçısına, mütəmadi
olaraq göstərilən diqqət və qayğıya görə rayon rəhbərliyinə minnətdarlıqlarını
bildiriblər.
GOYEZEN.AZ
Facebook-da paylaş