“Erkən nikah və onun fəsadları” mövzusunda vebinar keçirilib
Dekabrın
17-də Qazax Rayon Gənclər və İdman İdarəsi tərəfindən "Erkən nikah və onun fəsadları”
mövzusunda vebinar keçirilib. Vebinarı
giriş sözü ilə Qazax Rayon Gənclər və İdman İdarəsinin rəisi Vüqar Nəbiyev
açaraq tədbir iştirakçılarını salamlayıb, keçirilən tədbirin
əhəmiyyətindən danışıb. Qeyd edib ki, bu gün
bütün dünyada olduğu kimi ölkəmizdə də doğurduğu fəsadlara və cəmiyyətə vurduğu
ziyana görə erkən nikah məsələsi dövrümüzün mühüm və aktual problemlərindən
biri olaraq qalır. Belə ki, erkən yaşda qızların ailə həyatı qurmağa məcbur
edilməsi onların təhsilinə, bir fərd kimi inkişafına mane olur, psixologiyasına
mənfi təsir göstərir. Erkən nikah gələcək nəsillərin sağlamlığı və həyatını təhlükə
altına atmaqla yanaşı, həmçinin risklər də yaradır. Belə hallar boşanmalara,
sağlamlıq imkanları məhdud uşaqların dünyaya gəlməsinə və nəticədə sosial cəhətdən
həssas qrupların sayının artmasına səbəb olur. Hazırda ölkəmizdə bu məsələnin nəzarətdə
saxlanılması və həll edilməsi üçün ciddi normativ hüquqi baza mövcuddur. Azərbaycan
Respublikasının Qanunları bu sahədə olan problemlərin həllinə yönəlib. 2011-ci
ildə Azərbaycan Respublikasının Ailə Məcəlləsinə dəyişiklik edilərək qadınlar
üçün minimum yaş həddinin 17-dən 18-ə qaldırılması bu sahədə aparılan dövlət
siyasətinin ən mühüm göstəricilərindən biridir. Sonra vebinar iştirakçılarından Ombudsmanın Gəncə Regional Mərkəzinin rəhbəri
Səbuhi Abbasov, "Qazax Gənclər evi” sosial xidmət müəssisəsinin psixoloqu Fatma
Rəhimova və Bakı Dövlət Universiteti Qazax filialının tələbəsi Vüqar Mehdizadə mövzu
ətrafında geniş çıxış ediblər. Çıxış edənlər erkən
nikahla bağlı problemlərin aradan qaldırılması baxımından maarifləndirici tədbirlərin
təşkili, yeniyetmə və gənclərlə müntəzəm olaraq görüşlərin keçirilməsi, onlara
milli və mənəvi dəyərlərin aşılanmasının böyük əhəmiyyət kəsb etdiyini
vurğulayıblar. Natiqlər, həmçinin erkən nikahın fəsadlarından və aparılacaq
mübarizə üsullarından da bəhs ediblər.
GOYEZEN.AZ
Facebook-da paylaş