Qazaxda “Məişət zorakılığı və erkən nikahların acı nəticələri” mövzusunda vebinar keçirilib
Aprelin 22-də
Qazax Rayon İcra Hakimiyyətinin, Qazax Rayon Gənclər və İdman İdarəsi və Qazax
Dövlət Sosial-İqtisadi Kollecinin birgə təşkilatçılığı ilə 2021-ci ilin birinci
yarımilliyi üçün təsdiqlənmiş Tədbirlər Planına əsasən "Məişət zorakılığı və erkən
nikahların acı nəticələri” mövzusunda vebinar keçirilib.
Qazax Rayon
Gənclər və İdman İdarəsinin rəisi Vüqar Nəbiyev vebinarı giriş sözü ilə açaraq erkən
nikahın doğurduğu fəsadlara və cəmiyyətə vurduğu ziyana görə dövrümüzün mühüm və
aktual problemi olduğunu qeyd edib. Erkən yaşda qızların ailə həyatı qurmağa məcbur
edilməsinin onların təhsilinə, bir fərd kimi inkişafına mane olması,
psixologiyasına mənfi təsir göstərməsi barədə danışıb. Erkən nikahın gələcək nəsillərin
sağlamlığını və həyatını təhlükə altına atdığını, boşanma hallarını artırdığını
qeyd edib. Erkən nikahın mühüm problem olaraq iki nəslin - həm indiki, həm də gələcək
nəslin nümayəndələrinə sağalmaz yaralar vurduğunu bildirib.
Qazax Rayon İcra
Hakimiyyəti başçısı aparatında İctimai-siyasi və humanitar məsələlər şöbəsinin
baş məsləhətçisi Gülnar Quluyeva çıxış edərək cəmiyyətin
diqqətinin ailə məsələlərinə cəlb edilməsinin, ailə dəyərlərinin qorunub
saxlanaraq gələcək nəsillərə ötürülməsinin, gənclərin ailə həyatına
hazırlığının, sağlam həyat tərzinin prioritet məsələ olduğunu və bu cür tədbirlərin
mühüm əhəmiyyət daşıdığını söyləyib. Qazax RİH başçısı aparatı yanında fəaliyyət göstərən
Yetkinlik Yaşına Çatmayanların İşləri və Hüquqlarının Müdafiəsi üzrə
Komissiyanın illik iş planına müvafiq olaraq, Qazax rayonu üzrə şəhər, kənd
tam orta məktəblərində, ali və orta ixtisas məktəblərində mütəmadi olaraq psixoprofilaktik
maarifləndirici tədbirlərin keçirildiyini diqqətə çatdırıb. Bugünkü onlayn
görüşün də məhz bu məqsədə xidmət etdiyini qeyd edib.
Ombudsmanın Gəncə
Regional Mərkəzinin rəhbəri Səbuhi Abbasov çıxış
edərək erkən nikahların məişət zorakılığının tərkib hissəsi olması, bu cür
nikahların yaratdığı hüquqi, psixoloji və tibbi fəsadlar barədə danışıb, məişət
zorakılığına qarşı mübarizə sahəsində Ombudsmanın həyata keçirdiyi fəaliyyətlə
bağlı geniş məlumat verib.
Ailə, Qadın və Uşaq Problemləri
üzrə Dövlət Komitəsinin nəzdində fəaliyyət göstərən Şüvəlan Uşaq və Ailələrə Dəstək
Mərkəzinin psixoloqu Mətanət Abdullayeva çıxışı
zamanı cəmiyyətimizdə erkən nikahların yaratdığı mənəvi, sosial və hüquqi zərərlər
haqqında danışıb. Erkən nikah hallarının həm də uşaq hüquqlarının pozulmasına gətirib
çıxardığını qeyd edərək bu istiqamətdə maarifləndirmə işlərinin daha intensiv
aparılmasının vacibliyini vurğulayıb. Vebinar iştirakçılarından Qazax Dövlət Sosial-İqtisadi Kollecinin Monitorinq
və Qiymətləndirmə şöbəsinin müdiri, Tələbə Gənclər Təşkilatının sədri Elvira
Əfəndiyeva, Kollecin psixoloqu Şaxlıq Mustafayeva, Qazax şəhər Səməd Vurğun
adına 2 nömrəli tam orta məktəbin psixoloqu Afət Əsgərova mövzu ətrafında geniş
çıxış ediblər. Çıxış edənlər bu məsələnin aktuallığını
qeyd edərək, erkən nikahların qarşısının alınması məqsədilə vaxtaşırı olaraq
profilaktiki və maarifləndirmə tədbirlərinin keçirilməsinin vacibliyini diqqətə
çatdırıblar. Ümumilikdə 94 nəfərin iştirak etdiyi vebinarda mövzu ətrafında müzakirələr aparılıb, gəncləri maraqlandıran suallar
cavablandırılıb.
GOYEZEN.AZ
Facebook-da paylaş