Gənclər "Hərbi Qənimətlər Parkı"na virtual ekskursiya ediblər
Noyabrın
2-də Gənclərin İnkişaf və Karyera Mərkəzinin Qazax nümayəndəliyi və Qazax
Dövlət Sosial-İqtisadi Kollecinin birgə təşkilatçılığı ilə
"ZəfərimİZ" layihəsi çərçivəsində gənclərin "Hərbi Qənimətlər
Parkı"na virtual ekskursiyası təşkil edilib. 8 Noyabr –
Zəfər Günü ərəfəsində Heydər Əliyev Mərkəzində təşkil olunan ekskursiya zamanı
iştirakçılar əvvəlcə Ulu Öndər Heydər Əliyevin həyatı və siyasi fəaliyyəti
haqqında ətraflı məlumat əldə ediblər.
Sonra
Mərkəzin ekspozisiya zalında yerləşdirilmiş monitorda 44 günlük Vətən müharibəsi
dövründə döyüş meydanında məğlubiyyətə uğrayan düşməndən qənimət götürülmüş hərbi
texnikaların nümayiş etdirildiyi "Hərbi Qənimətlər Parkı”na virtual ekskursiya təşkil
edilib. Gənclərə
"Hərbi Qənimətlər Parkı” haqqında məlumat verilib. Bildirilib ki, burada
Azərbaycan Respublikasının ərazi bütövlüyünün bərpası uğrunda 44 gün davam edən
Vətən müharibəsi zamanı müzəffər Azərbaycan Ordusunun işğalçı Ermənistanı döyüş
meydanında məğlub etməsi nəticəsində düşməndən qənimət götürülən hərbi qənimətlərin
bir qismi və Ermənistan ordusu tərəfindən qurulmuş müdafiə sədləri nümayiş
olunur. Parka gələnlər Vətən müharibəsinin
real nəticələri ilə daha yaxından tanış olmaq imkanı əldə edirlər. Düşməndən
qənimət götürülən hərbi texnikanın bir qismi, ümumilikdə, 300-dən çox eksponat,
o cümlədən 150-dək ağır texnika, tanklar, döyüş maşınları, artilleriya
qurğuları, zenit-raket kompleksləri, atıcı silahlar, hərbi nəqliyyat
sərgilənir. Həmçinin, parkda
Silahlı Qüvvələrimizin işğaldan azad olunan ərazilərdə ermənilərdən qənimət
götürdükləri avtomobillərin nömrə nişanlarından hazırlanan və üzərində "Qarabağ
Azərbaycandır!” şüarı əks olunan kompozisiya, Ermənistan tərəfindən törədilən
müharibə cinayətləri, o cümlədən döyüş bölgəsindən uzaq olan ərazilərimizin
raket zərbələrinə məruz qalması, dinc sakinlərin qətlə yetirilməsi, yaralanması
barədə faktlar, eləcə də düşmən tərəfindən Azərbaycan ərazisinə atılmış
"İskəndər-M” raketinin qalıqları nümayiş etdirilir.
GOYEZEN.AZ
Facebook-da paylaş