Gənclərə göstərilən dövlət qayğısı öz bəhrəsini verir
Bu gün hər kəsə yaxşı məlumdur ki, gənclik cəmiyyətin
aparıcı qüvvəsidir. Eyni zamanda da daim axtarışda olan, yeniliyi sevən bir
qüvvədir. Sağlam gənclik sağlam nəsil deməkdir. Bu gün tam əminliklə söyləyə
bilərik ki, müstəqil Azərbaycanda dövlətin diqqət və qayğısı sayəsində sağlam
bir gənclik yetişir. Ölkəmiz öz tarixi müstəqilliyini bərpa etdikdən, xüsusilə
də xalqın təkidli tələbi ilə Ümummilli Lider Heydər Əliyevin hakimiyyətə
qayıdışından sonra Azərbaycanda ölkə gənclərinin sağlam ruhda tərbiyəsi, əsl vətəndaş
kimi formalaşması naminə məqsədyönlü islahatlar həyata keçirilir. Bu gün sevindirici haldır ki, son illər Azərbaycanın dövlət siyasətinin
əsas istiqamətlərindən biri də məhz gənclər siyasətidir. Ulu Öndər Heydər
Əliyevin siyasi kursunun layiqli davamçısı olan Respublika Prezidenti cənab İlham
Əliyev bu meyarları nəzərə alaraq ölkəmizin qüdrətli dövlətə çevrilməsi naminə
gənclərə böyük inam bəsləyir, ölkəmizdə onlara yüksək şərait yaradılması
istiqamətində dövlət proqramları qəbul edilir. "2007-2015-ci illərdə Azərbaycan Gənclərinin təhsili
üzrə Dövlət Proqramı" gənclərin təhsil səviyyəsinin yüksəldilməsinin
parlaq ifadəsidir. Bütün bunların nəticəsidir ki, ötən dövr ərzində gənclər
siyasəti və gənclərlə iş sahəsində bir sıra mühüm nəticələr əldə edilib. Bundan
əlavə, Prezident İlham Əliyevin 15 sentyabr 2017-ci il tarixli Sərəncamı ilə
növbəti "Azərbaycan gəncliyi 2017-2021-ci illərdə" Dövlət Proqramının
təsdiq edilməsi gənclərə olan qayğının bariz nümunəsidir. Əsas məqsədi
respublikamızda gənclər siyasətinin daha da səmərəli həyata keçirilməsini təmin
etmək olan həmin Dövlət Proqramı bu gün də uğurla icra olunur. Ölkə
Prezidenti İlham Əliyevin diqqət və qayğısı sayəsində 2 fevral
2019-cu il tarixindən Azərbaycan Respublikasının Gənclər Fondunun maddi texniki
bazası əsasında yaradılan "Gənclərin İnkişaf və Karyera Mərkəz”ləri (GİKM) də gənclərə
olan qayğının əyani sübutudur. Hazırda Qazax, Şəmkir,
Biləsuvar və İsmayıllı rayonlarında
fəaliyyət göstərən GİKM-ləri gənclərin karyera qurmalarına, istənilən sahədə
inkişaf etmələrinə daha geniş şəkildə imkanlar açır. Əsas hədəfi gənclərin
doğru istiqamətdə inkişafını təmin etmək olan həmin GİKM-ləri ölkəmizdə həm də
savadlılığın artırılmasına böyük töhfədir. Bu gün təqdirəlayiq
hal isə odur ki, gənclər də dövlət tərəfindən onlara göstərilən diqqət və
qayğını, onlara olan etimadı yüksək qiymətləndirərək var qüvvələri ilə çalışır,
ölkənin inkişafı naminə öz töhfələrini verirlər. Aprelin 1-dən başlayaraq fəaliyyət göstərən Qazax
Gənclərin İnkişaf və Karyera Mərkəzindən, orada çalışan gənclərdən gələn
təşəbbüs də bir daha göstərdi ki, gənclər üzərilərinə düşən işin məsuliyyətini
hər an dərk edir, müxtəlif sahələr üzrə daim yeniliklər etməyə can atırlar.
Belə ki, Mərkəzin rəhbərliyi və "Gənc könüllüləri” Azərbaycan Respublikası
vətəndaşlarının 2019-cu il oktyabrın 1-dən 30-dək müddətli həqiqi hərbi xidmətə
çağırılması və müddətli həqiqi hərbi xidmət hərbi qulluqçularının ehtiyata
buraxılması haqqında Respublika Prezidentinin 28 avqust
2019-cu il tarixli Sərəncamına müvafiq olaraq oktyabrın
3-də gənclərin yolasalma mərasiminin təşkilatçılığını, tədbirin təşkilini öz
üzərilərinə götürmək kimi təşəbbüs irəli sürüblər. Bu gün Qazax Rayon İcra Hakimiyyətinin başçısı
Rəcəb Babaşov gənclər tərəfindən irəli sürülən bu təşəbbüsü yüksək
qiymətləndirərək həmin gəncləri qəbul edib, atdıqları bu addımı nümunəvi bir
addım kimi dəyərləndirib. Tədbirlə bağlı gənclərin fikirlərini öyrənən rayon
rəhbəri respublikamızın hər yerində olduğu kimi qazaxlı gənclərin
də yüksək əhval-ruhiyyə ilə hərbi xidmətə yola düşmələri üçün gənclərin təşkil
etmək istədikləri işləri və təklifləri dinləyib. İcra başçısı ölkə Prezidenti İlham Əliyevin və Birinci
vitse-prezident Mehriban Əliyevanın bugünkü gəncliyə verdiyi dəyəri, yüksək
diqqət və qayğını bir daha vurğulayaraq həmin dövlət qayğısının bundan sonra da
uğurla davam etdiriləcəyini qeyd edib. Rayon rəhbəri fəaliyyətə başladığı ilk
gündən Qazax gəncliyinə hər zaman xüsusi qayğı ilə yanaşdığını, rayon
gənclərinin istədikləri sahə üzrə inkişaf etmələri üçün həmişə dəstək olmağa
çalışdığını bildirib. Dövlətin gənclərə olan qayğısının Qazaxda da olduğu kimi
həyata keçirildiyini vurğulayıb. Bugünkü təşəbbüsü də bir daha yüksək
qiymətləndirib və gənclərə gələcək fəaliyyətlərində uğurlar arzulayıb.
Qazax Gənclərin İnkişaf və Karyera Mərkəzinin direktoru İsmayıl
Süleymanov çıxış edərək gənclərə göstərilən diqqət və qayğıya görə ölkə başçısına
və rayon rəhbərliyinə, eləcə də Gənclər Fondunun rəhbərliyinə Mərkəzin üzvləri
və könüllüləri adından dərin minnətdarlığını çatdırıb. İ.Süleymanov rəhbərlik
etdiyi Mərkəzin fəaliyyətə başladığı ilk gündən hər zaman yeniliklər etməyə,
xüsusilə də gənclərin vətənpərvərlik ruhunda tərbiyəsinə daha çox üstünlük
verdiyini diqqətə çatdırıb. Builki oktyabr çağırışı üzrə gənclərin həqiqi hərbi
xidmətə yolasalma tədbirinin təşkilatçılığını öz üzərilərinə götürmək istəyini
hər bir gəncin dəstəklədiyini və həmin tədbir üçün böyük səylə çalışdıqlarını
qeyd edib. Mərkəzin direktoru fəaliyyətləri
dövründə gördüyü işlərdən də söz açıb. Qazax Gənclər Mərkəzi ilə eyni ərazidə
yerləşən Ulu Öndər Heydər Əliyevin adını daşıyan Mərkəzlə birlikdə mütəmadi
olaraq tədbirlər keçirdiklərini, hər zaman əlaqəli şəkildə çalışdıqlarını
vurğulayıb. Qazax
Rayon İcra Hakimiyyətinin başçısı Rəcəb Babaşov sonda bir daha gənclərin bu
addımını alqışlayıb və onlara uğurlar arzulayıb. GOYEZEN.AZ
Facebook-da paylaş