Qazaxda Xalq şairi Mirvarid Dilbazinin xatirəsi anılıb
"Fəxri qazaxlılar” parkında keçirilən tədbirdə Qazax Rayon İcra Hakimiyyəti başçısı aparatında aparıcı məsləhətçi-psixoloq Kəmalə Cəfərova, məktəb direktorları, mədəniyyət işçiləri, Bakıdan qonaq gəlmiş ziyalılar, şairlər, aşıqlar, ictimaiyyət və KİV nümayəndələri iştirak ediblər. Tədbir iştirakçıları əvvəlcə şairin parkda yerləşən büstü önünə gül dəstələri qoyub, əziz xatirəsini böyük ehtiramla anıblar.
Tədbirin aparıcısı, AYB Qazax zona filialının sədri, Əməkdar incəsənət
xadimi, şair Barat Vüsal tədbiri giriş sözü ilə açaraq iştirakçıları
salamlayıb, Xalq şairi Mirvarid
Dilbazinin Azərbaycan ədəbiyyatının inkişafındakı xidmətlərindən, onun zəngin
yaradıcılığından söz açıb. Bildirib ki, XX yüzillik Azərbaycan
şeirinin görkəmli yaradıcılarından biri - Xalq şairi Mirvarid Dilbazi 70 ildən
artıq yaradıcılıq yolu keçmiş, lirikamızın rəngarəng və kamil nümunələrini
yaratmışdır. B.Vüsal qeyd edib ki, M.Dilbazinin şeirləri yalnız mövzu rəngarəngliyi ilə deyil, həmçinin
forma müxtəlifliyi və fikrin bədii ifadəsi baxımından da yetkin sənət nümunəsi
səviyyəsinə qalxmış, şeir xəzinəmizi zənginləşdirmişdir. M.Dilbazi Azərbaycanın çoxəsrlik zəngin
ədəbiyyatı tarixində öz dəstxəti, öz sözü olan sənətkarlardandır. Poeziyamızda
silinməz izlər qoymuş bu qüdrətli söz ustasının yaradıcılığındakı humanizm,
yüksək insani dəyərlər, vətənpərvərlik onu xalqa sevdirib. Bildirib ki, yaradıcılığı yüksək qiymətləndirilən
M.Dilbazi Əməkdar Mədəniyyət İşçisi, Xalq Şairi fəxri adlarına layiq görülüb,
"Şərəf nişanı”, "Qırmızı əmək bayrağı”, "İstiqlal” ordenləri və medallarla təltif
edilib. Şairin dövlət səviyyəsində keçirilən 85 illik yubileyi mərasimində Ümummilli
Llider Heydər Əliyev şəxsən iştirak edib. Respublika Prezidenti İlham Əliyevin
2012-ci il 16 may tarixli Sərəncamına əsasən Mirvarid Dilbazinin 100 illik
yubileyi dövlət səviyyəsində qeyd olunub. B.Vüsal Qazax Rayon İcra Hakimiyyətinin
başçısı Rəcəb Babaşov tərəfindən şairlərimizə, yazarlarımıza, aşıqlarımıza göstərilən
diqqət və qayğıdan da söz açıb. Qazaxda keçirilən yubiley tədbirlərinin, anım
günlərinin artıq bir ənənə halını aldığını, hər bir tədbirin yüksək səviyyədə təşkil
olunduğunu qeyd edib. Bu il ölkə başçısı İlham Əliyevin 28 yanvar 2019-cu il tarixli
Sərəncamı ilə Xalq yazıçısı İsmayıl Şıxlının 100 illik yubiley tədbirinin ölkə
səviyyəsində qeyd edildiyini, həmin Sərəncamdan irəli gələn vəzifələrin rayon rəhbərliyi
tərəfindən də layiqincə yerinə yetirildiyini vurğulayıb. Yubileylə bağlı silsilə
tədbirlərin keçirildiyini diqqətə çatdırıb. Bu gün Xalq şairi Mirvarid
Dilbazinin ildönümü ilə bağlı tədbirin keçirilməsini ziyalılara verilən qiymətin
daha bir bariz nümunəsi kimi qiymətləndirib. Mirvarid Dilbazi Məclisinin sədri, şair-publisist
Güllü Eldar Tomarlı, sədr müavini, gənc şairə Nuranə Təbriz, ağsaqqal şair,
şairənin qohumu Zaməddin Ziyadoğlu, AYB-nin təmsilçisi Güləmail Murad, Azərbaycan yazıçısı, publisist, filologiya üzrə fəlsəfə doktoru Natəvan
Dəmirçioğlu, AYB-nin üzvlərindən
şairə Tamella Poladlı, Gülsənəm Cəlili, Azərbaycan
Yazıçılar və Jurnalistlər Birliklərinin üzvü, şairə Zərəngiz
Dəmirçi Qayalı, rəssam, Azərbaycan Rəssamlar İttifaqının üzvü Qafar Sarıvəlli çıxış edərək M.Dilbazi ilə bağlı xatirələrindən danışıb, ürək
sözlərini çatdırıblar. Bugünkü tədbirin təşkilinə görə əziyyəti keçən insanlara
minnətdarlıqlarını bildiriblər. Çıxış edənlər qeyd ediblər ki, M.Dilbazi öz
zəngin yaradıcılığı ilə Azərbaycan poeziyasının bir çox parlaq nümunələrini
yaradıb. O, nəinki böyüklər, eyni zamanda, uşaqlar üçün də şeirlər yazıb. Bunun
nəticəsidir ki, onun şeirləri bu gün də sevilə-sevilə oxunur. Ömrünü
poeziyamızın zənginləşməsinə həsr edən M.Dilbazinin həm çox dəyərli bir şair,
həm müqəddəs bir ana, həm də bu Vətənin qürur simvolu kimi yaddaşlara
yazıldığını vurğulayıblar. Doğma Azərbaycanı
qarış-qarış gəzmiş şairin onun hər guşəsinin gözəlliyini dərindən duya-duya,
mənəvi dünyasından keçirərək bədiiləşdirməyə nail olduğunu, təbiətən kəndə
doğma hisslərlə bağlı olduğu üçün zəhmət adamlarının saf mənəviyyatını da
ilhamla qələmə aldığını söyləyiblər. Aşıqlardan Hüsən Kəmərli, Kifayət Şəmistanqızı, Saqif Məzəmli çıxış edərək M.Dilbazinin ədəbiyyatımızın
inkişafındakı xidmətlərindən danışıb, onun şeirlərini saz havaları üstdə
oxuyublar. Tədbirdə şairin şeirləri, eləcə də ona həsr olunmuş şeirlər
səslənib. Sonda xatirə şəkli çəkdirilib.
GOYEZEN.AZBu gün Azərbaycanın ilk qadın Xalq şairi Mirvarid Dilbazinin anadan olmasından 107 il ötür. Qazax Rayon İcra
Hakimiyyətinin və Azərbaycan Yazıçılar Birliyi (AYB) Qazax zona filialının
birgə təşkilatçılığı, Mirvarid Dilbazi Məclisinin təşəbbüsü ilə Xalq şairi Mirvarid Dilbazinin anadan olmasının 107-ci
ildönümü münasibətilə tədbir keçirilib.
Facebook-da paylaş