Qazax Uşaq-Gənclər İnkişaf Mərkəzinin əməkdaşları və dərnək üzvləri Vətən müharibəsi şəhidlərinin adlarını əbədiləşdirən Abidə Kompleksini ziyarət ediblər
Dövlətimizin müstəqilliyi, Vətən torpaqlarının
ərazi bütövlüyü uğrunda canından keçən şəhidlərimizin xatirəsi Qazaxda həmişə
əziz tutulur. Şəhidlərimizə, onların ailə üzvlərinə olan qayğı hər zaman yüksək
səviyyədədir. Rayonda istər Birinci Qarabağ, istərsə də 44 günlük Vətən
müharibəsi şəhidlərinin adlarının əbədiləşdirilməsi istiqamətində nümunəvi addımlar
atılır. Şəhərin mərkəzində yerləşən Şəhidlər xiyabanı, Qazax
Tarix-Diyarşünaslıq Muzeyinin ikinci mərtəbəsində Birinci və İkinci Qarabağ
müharibəsi zamanı Vətən uğrunda canlarından keçən 339 nəfər şəhidin xatirəsinə yaradılmış
guşə, Qazax Rayon İcra
Hakimiyyətinin təşəbbüsü və dəstəyi ilə "Göyəzən” qəzetinin baş redaktoru,
şair-publisist Elçin İsmayıl tərəfindən Vətən müharibəsi
şəhidlərinə həsr olunmuş "Qanları ilə dastan yazanlar" kitabının
yazılması bu dediklərimizin bariz nümunəsidir. 44 günlük Vətən müharibəsində qanları ilə tarix yazan
igid oğullarımızın əziz xatirələrini əbədiləşdirmək
üçün inşa olunan Abidə Kompleksi də şəhidlərimizə olan hörmət və ehtiramı
özündə əks etdirir. Şəhərin Nəriman Nərimanov küçəsində yaradılan bu
Abidə Kompleksi müstəqil Azərbaycanın
suverenliyi, torpaqlarımızın ərazi bütövlüyü uğrunda canından keçən
qəhrəmanlarımızı gələcək nəsillərə tanıtmaq üçün görülən təqdirəlayiq bir
işdir. 27 sentyabr Anım Günündə açılışı olan Abidə Kompleksi Vətən, xalq,
dövlət naminə canını fəda edən oğullarımızın xatirəsini əbədiləşdirən müqəddəs
bir məkandır. Bu gün yaşından asılı olmayaraq hər kəs bu müqəddəs məkanı
ziyarət etməyi, şəhidlərimizə olan ehtiramlarını bildirməyi özlərinə borc
bilirlər. Qazax Uşaq-Gənclər İnkişaf Mərkəzinin əməkdaşları və
dərnək üzvləri də Vətən uğrunda canından keçən şəhidlərimizi hər zaman yad
edir, əziz xatirələrini dərin ehtiramla anırlar. Ənənəsinə sadiq
qalan Mərkəzin əməkdaşları və dərnək üzvləri 18 Oktyabr - Müstəqilliyin Bərpası Günü ərəfəsində şəhidlərimizi yad etməyi unutmayıblar. 44 günlük Vətən
müharibəsində Azərbaycanın ərazi bütövlüyü uğrunda qəhrəmancasına döyüşərək
Şəhidlik zirvəsinə ucalmış şəhidlərimizin xatirəsini əbədiləşdirən Abidə
Kompleksini ziyarət ediblər. Rayon rəhbərliyi tərəfindən yaradılmış kompleks önünə tər çiçəklər düzərək igid Vətən oğullarına olan
ehtiramlarını bildiriblər.
Şəhidlərimiz, onların keçdikləri döyüş yolu, təltif
olunduqları orden və medallar haqqında ətraflı məlumatı özündə əks etdirən lövhələrlə
tanış olublar. Qazax Uşaq-Gənclər İnkişaf Mərkəzinin direktoru Gövhər
Rəhimova bildirib ki, 44
günlük Vətən müharibəsində Müzəffər Ali Baş Komandan İlham Əliyevin rəhbərliyi
altında adlarını hərb tariximizə və xalqımızın qəlbinə qanları ilə əbədi
yazdıran igid oğullarımızın xatirəsi hər zaman əziz tutulacaq. 44 günlük
savaşda qazandığımız tarixi nailiyyətə görə Ali Baş Komandana, onun rəhbərliyi
altında bizləri Qələbə ilə sevindirən Azərbaycan Ordusunun əsgər və
zabitlərinə, hərbçilərimizə, Vətən uğrunda sağlamlığını itirən qeyrətli, cəsur
qazilərimizə, canından keçən şəhidlərimizə bir ömür boyu minnətdar və borclu olacağıq.
Ən əsası da minnətdar olmaqla yanaşı, Vətən uğrunda canlarından keçən
şəhidlərimizin adlarını yaşatmaq, gələcək nəsillərə tanıtmaq, şəhidlərimizin
ailələrinə sahib çıxmaq, onları daim yad etmək müqəddəs amal hesab edilir ki,
bu, Qazaxda yüksək səviyyədə icra olunur. Bu gün ziyarət etdiyimiz Abidə
Kompleksi bu sahədə görülmüş işlərin əyani sübutudur. G.Rəhimova qeyd edib ki,
şəhidlərimizin həyatı, keçdiyi döyüş yolu hər bir vətəndaşa, xüsusilə də
gənclərimizə örnəkdir. Belə tədbirlərin təşkil olunmasında məqsəd həm
şəhidlərimizin ruhuna ehtiram, minnətdarlıq borcu, həm də gənclərin
qəhrəmanlarımızı daha yaxından tanımasına, vətənpərvərlik ruhunda
formalaşmasına zəmin yaratmaqdır. Şəhidlərimizin xatirəsinə olan ehtiramı özündə əks
etdirən tədbirdə Mərkəzin dərnək üzvləri tərəfindən Vətən uğrunda canından
keçən igid oğullarımıza həsr olunmuş şeirlər səsləndirilib. Qəhrəman
şəhidlərimizin xatirəsi dərin ehtiramla bir daha yad olunub. Tarixi Qələbəni bizlərə bəxş edən Ali Baş Komandana,
şəhidlərimizə, qazilərimizə, hərbçilərimizə borclu və minnətdar olduğumuz qeyd
edilib. GOYEZEN.AZ
Facebook-da paylaş