Atatürk Mərkəzində Qazax müəllimlər seminariyasının 100 illik yubileyi ilə əlaqədar konfrans keçirilib
Bakı. Azərbaycan Atatürk Mərkəzində
Qazax müəllimlər seminariyasının 100 illik yubileyinə həsr olunmuş elmi-praktik
konfrans və Şəmistan Nəzirlinin "Qoridən gələn qatar” kitabının təqdimatı
keçirilib. Tədbirdə Atatürk Mərkəzinin, "Qazax Xeyriyyə” İctimai Birliyinin rəhbərliyi
və üzvləri, AMEA-nın Riyaziyyat və Mexanika İnstitutunun rəhbərliyi, Qazax müəllimlər
seminariyasının araşdırıcıları, Qazax rayonunun nümayəndələri, tanınmış elm
xadimləri iştirak edib. "Qazax Xeyriyyə” İctimai
Birliyinin sədri, professor İlham Pirməmmədov konfransı giriş sözü ilə açaraq Prezident
İlham Əliyevin Qazax müəllimlər seminariyasının 100 illik yubileyinin qeyd
edilməsi haqqında imzaladığı 3 noyabr 2018-ci il tarixli Sərəncamın əhəmiyyətini
yüksək qiymətləndirib. Bugünkü tədbirin həmin tarixi sənədin icrası ilə əlaqədar
görülmüş işlərin davamı olduğunu qeyd edib. Eyni zamanda, yazıçı-publisist Şəmistan
Nəzirlinin "Qoridən gələn qatar” kitabının yeni nəşrinin təqdim olunduğunu
bildirib. "Qoridən gələn qatar” kitabının müəllifi
yazıçı-publisist Şəmistan Nəzirli çıxış edərək Zaqafqaziya Müəllimıər
Seminariyasının yaranmasını və fəaliyyətini tarixi sənədlər əsasında qələmə
aldığından danışıb. Pedaqoji elmlər
doktoru professor, Rusiya Elmlər
Akademiyasının xarici üzvü Hüseyn Əhmədov öz çıxışında elmi
fəaliyyətinin əsas hissəsini seminariyanın araşdırılmasına həsr etdiyini
bildirib. AXC-nin qərarı əsasında yaradılmış Qazax müəllimlər seminariyasının
Azərbaycan maarif salnaməsinin ən parlaq səhifələrindən biri olduğunu qeyd
edib. AMEA-nın müxbir üzvü, AMEA-nın Riyaziyyat və Mexanika İnstitutunun direktoru, fizika-riyaziyyat
elmləri doktoru, professor Misir Mərdanov
çıxış edərək görkəmli ədəbiyyatşünas, tanınmış maarifpərvər və ictimai xadim
Firudin bəy Köçərlinin rəhbərliyi ilə fəaliyyətə başlayan Qazax müəllimlər seminariyasının
ana dilinin inkişafına, Azərbaycanda elmin, maarifin və mədəniyyətin tərəqqisinə
verdiyi misilsiz töhfələrdən danışıb. Atatürk Mərkəzinin direktoru,
Milli Məclisin deputatı, Əməkdar elm xadimi, AMEA-nın həqiqi üzvü Nizami Cəfərov
çıxış edərək Azərbaycan təhsil sisteminin yaranmasında və inkişaf etməsində Qazax müəllimlər seminariyasının oynadığı roldan
danışıb, onun əhəmiyyətini yüksək qiymətləndirib. Xalq şairi Nəriman Həsənzadə seminariyanın məzunları
olmuş Səməd Vurğunun, Mehdi Hüseynin, Osman Sarıvəllinin, İsmayıl Şıxlının Azərbaycan
ədəbiyyatına verdikləri töhfələrdən söz açıb. Azərbaycan Dövlət Pedaqoji Universitetinin ibtidai
təhsil fakültəsinin dekanı, professor Fərrux Rüstəmov öz çıxışında Qazax müəllimlər
seminariyasını Azərbaycanın maarifçi fikir tarixinin mühüm bir hissəsi kimi
qiymətləndirib. "Göyəzən” qəzetinin baş redaktoru Elçin İsmayıl
seminariyanın 100 illik yubileyi ilə əlaqədar Qazax rayonunda görülən işlərdən
söz açıb. Qeyd edib ki, Rayon İcra Hakimiyyətinin
başçısı Rəcəb Babaşov bununla bağlı sərəncam verib. Sərəncama uyğun
olaraq hazırlanmış Tədbirlər planı Təhsil Nazirliyinə təqdim edilmiş və olduğu kimi
qəbul edilərək təsdiq edilmişdir. Yubileylə əlaqədar rayonun qabaqcıl elm, təhsil və ictimaiyyətin
müxtəlif təbəqələrinin nümayəndələrindən ibarət komissiya yaradılmışdır. Seminariyanın
100 illiyi ilə bağlı "Ziya ocağı” adlı tarixi kitabın yazılmasına
başlanılmışdır. Eyni zamanda, araşdırma aparmaq üçün Gürcüstan Milli Arxivinə
müraciət edilmişdir. Yubileylə bağlı "Qoridən
gələn Ziya qatarı” filminin çəkilməsi də nəzərdə tutulmuş, filmin ssenarisi
yazılmış və yaxın günlərdə çəkilişlərinə başlanılacaqdır. Azərbaycan Milli Elmlər Akademiyasının Folklor
İnstitutu Azərbaycan Dillər Universiteti və Bakı Dövlət Universitetinin Qazax
filialı ilə birlikdə may ayında seminariyanın 100 illiyinə həsr edilmiş
"Azərbaycan təhsili və elminin müasir problemləri” mövzusunda elmi-praktik
konfransın keçirilməsi nəzərdə tutulmuşdur. "Şərq” qəzetinin baş redaktoru Akif Aşırlı, tədqiqatçılardan
İsmayıl Umudlu, Pərixanım Mikayılqızı, tənqidçi Əsəd Cahangir isə öz
çıxışlarında keçirilən konfransı yüksək qiymətləndiriblər. Seminariyanın məzunu Qənirə Mehdixanlı, şair Zaməddin
Ziyadoğlu seminariyanın 100 illiyinə və Ş.Nəzirliyə həsr etdikləri şeirlərini
oxuyublar. "Qazax Xeyriyyə” İctimai
Birliyinin sədri, professor İlham Pirməmmədov konfransa yekun vuraraq Qazax müəllimlər seminariyasının Azərbaycanın təhsil tarixində xüsusi yeri olduğunu
qeyd edib, bu sahədə gələcəkdə görüləcək işlərdən danışıb.
Facebook-da paylaş