Qazaxda RMX PHŞ-də təşkil edilmiş “Səyyar həkim briqadaları” şəhidlərimizin ailə üzvlərinə tibbi xidmət göstəriblər
2020-ci il 27 sentyabrda Qarabağ uğrunda davam edən
44 günlük müharibə Azərbaycanın hərbi gücünü bütün dünyaya göstərdi. Azərbaycan
əsgəri Vətənə olan çox böyük sevgisi, məhəbbəti və heç nədən qorxmadan ölümün
üstünə getmək məharəti ilə əzəli torpaqlarımızı fədakarlıqla mənfur düşməndən
azad etdi. Müstəqil Azərbaycan dövləti erməni faşizmi üzərindəki 44 günlük Vətən
müharibəsində unudulmaz Qələbə qazandı. Ali Baş Komandan, Prezident İlham
Əliyevin rəhbərliyi ilə yenilməz Ordumuz bu Qələbəni Azərbaycan xalqına
yaşatdı. Bu gün özünü qalib ölkənin vətəndaşı hesab edən
hər bir azərbaycanlı Ali Baş Komandanla, ordumuzun əsgər və zabitləri, hərbçiləri,
Vətən uğrunda canından keçən qəhrəman oğullarımızla, şəhidlərimizlə, qazilərimizlə
fəxr edir, qürur duyur. Bu gün hər birimiz fəxarətlə
söylədiyimiz, qürurlandığımız o tarixi Qələbəni bizlərə bəxş edən Ali Baş
Komandana, şəhidlərimizə, qazilərimizə, hərbçilərimizə borclu və minnətdarıq. Vətən torpaqlarının ərazi
bütövlüyünü bərpa edən hərbçilərimizə, əsgərlərimizə, canından keçən şəhidlərimizə,
sağlamlıqlarını itirən qazilərimizə, onların ailə üzvlərinə, diqqət ayırmaq, qayğı göstərmək hər birimizin
borcudur. Ölkə Prezidenti İlham Əliyevin,
Birinci vitse-prezident Mehriban Əliyevanın və rayon rəhbərliyinin şəhid ailələrinə,
qazilərə göstərdikləri qayğını əldə rəhbər tutan Qazax Rayon Mərkəzi Xəstəxanası
Publik Hüquqi Şəxsin həkim kollektivi də bu təbəqədən olan insanlara
qayğılarını əsirgəmirlər. Qazax RMX PHŞ-də təşkil edilmiş "Səyyar
həkim briqadaları” şəhidlərimizin ailə üzvlərini ziyarət edib, tibbi xidmət
göstəriblər. Qazax RMX PHŞ-in direktoru Sevda Məmmədova,
"Səyyar həkim briqadaları”nın üzvləri xəstəxananın baş həkimi Allahverdi
Quliyev, direktorun köməkçisi Məhəmməd Məmmədov, Səhiyyə İşçiləri Həmkarlar
İttifaqı şurasının sədri Sevda Həsənova, nevropatoloqlar Sima Qapaqova, Sonayə
Orucova, kardioloqlar Ayna Aşurova, Samirə Qəhrəmanova, terapevt Mehman Məmmədov,
endokrinoloq Qəmər Carçıyeva şəhid ailələri ilə evlərində görüşüb, tibbi müayinə
ediblər. Qazax şəhərində, Alpout,
Ürkməzli, Dəmirçilər, Xanlıqlar, Qaymaqlı, Aslanbəyli, Yuxarı Salahlı, Birinci
Şıxlı kəndlərində olan həkimlərimiz şəhidlərimizin,
qazilərimizin ailələrinə xidmət göstərməyin onlar üçün qürurverici olduğunu, bu
cür ziyarətin və xidmətin kökündə ölkə başçısının və rayon rəhbərliyinin dövlət
qayğısının dayandığını vurğulayıblar. Şəhid ailələri sağlamlıqlarının
keşiyində dayanan həkimlərimizə nümunəvi təşəbbüsə görə razılıqlarını bildiriblər.
Şəhid ailəsi kimi onlara göstərilən diqqət və qayğıya görə ölkə Prezidentinə,
Birinci vitse-prezidentə, rayon rəhbərliyinə minnətdarlıqlarını çatdırıblar. Məlumat üçün qeyd edək ki, sözügedən
təşəbbüs davam etdirilir.
GOYEZEN.AZ
Facebook-da paylaş