Moskva Bəyannaməsi Azərbaycanın ərazi bütövlüyünə, müstəqilliyinə və təhlükəsizliyinə zəmanət verir
Möhtərəm
Prezidentimiz cənab İlham Əliyevin Rusiyaya rəsmi səfəri Azərbaycanla bu ölkə
arasında münasibətləri yeni mərhələyə yüksəldən mühüm siyasi–tarixi hadisədir.
"Azərbaycan Respublikası ilə Rusiya Federasiyası arasında müttəfiqlik
qarşılıqlı fəaliyyəti haqqında Bəyannamə” ikitərəfli münasibətlərə yeni məzmun
gətirib və xalqımızın milli maraqlarına xidmət edir. Hər iki ölkə arasında əlaqələr
son dövrlərdə daha da möhkəmlənən dövlətlərarası münasibətlərə, dostluğa və
mehriban qonşuluğa əsaslanır. Uzun illərdir ki, dost və qonşu Rusiya ilə ölkəmizin yüksək səviyyəli
əlaqələri vardır və son dövrlərdə iki ölkə prezidentləri arasında qarşılıqlı hörmət
və etimada əsaslanan dostluq münasibəti formalaşıb. Rusiya Azərbaycanın
qonşusu, dünyanın ən güclü ölkələrindən və BMT Təhlükəsizlik Şurasının daimi
üzvlərindən biridir. Ölkələrimiz arasında tarixən dərin mədəni, humanitar,
iqtisadi əlaqələr mövcuddur. Rusiyada milyonlarla azərbaycanlı yaşayır və işləyir.
Eyni zamanda Azərbaycanda da çoxsaylı rus icması yaşayır. Azərbaycanda təhsilin rus dilində olduğu 340-a
yaxın məktəb var, bu məktəblərdə 140 mindən çox şagird təhsil alır. Azərbaycanda
15 mindən çox tələbə ali məktəblərdə rus dili bölmələrində oxuyur. Bu faktlar
iki dövlət başçısı arasındakı görüş zamanı xüsusi vurğulanıb. Ölkəmizin milli maraqlarına tam uyğun olan 43 maddəlik Moskva Bəyannəməsində
hər iki ölkənin müttəfiqlik fəaliyyətinin bir-birinin müstəqilliyinə, dövlət
suverenliyinə, ərazi bütövlüyünə, sərhədlərin toxunulmazlığına qarşılıqlı hörmət,
bir-birinin daxili işlərinə qarışmamaq, güc tətbiq etməmək və güclə hədələməmək
prinsipləri üzərində qurulması, müttəfiqlik münasibətlərinə xələl gətirən hərəkətlərdən,
eləcə də bir-birinə qarşı yönəlmiş hərəkətlərdən çəkinmək və öz ərazisində hər
hansı bir təşkilat və şəxslərin digər tərəfin suverenliyi, müstəqilliyi və ərazi
bütövlüyünə qarşı yönəlmiş fəaliyyətinin qarşısını almağa dair öhdəliklər yer
alıb. Moskva Bəyannaməsində keçmiş münaqişəyə son qoymuş 10 noyabr 2020-ci
il tarixli üçtərəfli Bəyanatın, eləcə də 11 yanvar 2021-ci il tarixli və 26
noyabr 2021-ci il tarixli üçtərəfli Bəyanatların müddəalarının həyata keçirilməsinin
vacibliyi vurğulanır. Bəyannamədə beynəlxalq terrorçuluq, ekstremizm,
separatçılıq, transmilli mütəşəkkil cinayətkarlıq və digər bu tipli təhdidlərin
qarşısının alınması üçün səylərin birləşdirilməsi qeyd olunur. Qardaş Türkiyə ilə imzalanmış Şuşa Bəyannamasi kimi, Rusiya ilə
Moskva Bəyannaməsi də Azərbaycanın ərazi bütövlüyünə, müstəqilliyinə və təhlükəsizliyinə
zəmanət verir. Azərbaycan öz müstəqil siyasətinə, təhlükəsizliyinə əlavə zəmanət
qazanır. Bu müqavilə Azərbaycanı daha da gücləndirir. Türkiyə və Rusiya ilə
müttəfiq olmaq, yaxın zamanlarda Avropa İttifaqı ilə ikitərəfli sazişin
imzalanması perspektivi ölkə başçısı cənab İlham Əliyevin dahi siyasətçi
olduğunu bir daha təsdiqlədi. Moskvada Azərbaycan Respublikasının
Prezidenti İlham Əliyev və Rusiya Federasiyasının Prezidenti Vladimir Putinin
"Azərbaycan Respublikası və Rusiya Federasiyası arasında qarşılıqlı müttəfiqlik
fəaliyyəti haqqında” Bəyannamə imzalamaları regionumuzda yeni siyasi-iqtisadi eranın
başlanmasıdır. Prezident İlham Əliyev cənablarının
bilavasitə rəhbərliyi ilə aparılan xarici siyasət diplomatiyasına nəzər
saldıqda görürük ki, müttəfiqlik sənədinin hazırlanması və tərəflər arasında
razılaşdırılması heç də asan proses deyil və bu mühüm sənəd 2008-ci ildə
imzalanan Azərbaycanla Rusiya arasında dostluq və strateji tərəfdaşlıq haqqında
Bəyannamənin uğurlu davamı kimi də qiymətləndirilə bilər. Azərbaycanla Rusiya
arasında imzalanmış qarşılıqlı müttəfiqlik fəaliyyəti haqqında Bəyannamə iki
dövlət arasındakı etimadlı münasibətlərin danılmaz sübutudur. Belə ki,
Bəyannamə qarşılıqlı faydalı münasibətlərin inkişafına, regional təhlükəsizliyə
müsbət təsir göstərəcək, Azərbaycan-Rusiya münasibətlərinin istər iqtisadi,
istərsə də siyasi və hərbi tərəfdaşlıq müstəvisindəki inkişafına böyük
töhfələrini verəcək. 2021-ci il iyun ayının 15-də Şuşada
Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan
"Azərbaycan Respublikası ilə Türkiyə Respublikası arasında müttəfiqlik münasibətləri
haqqında Şuşa Bəyannaməsi"ni imzaladılar və bu sənəd hər iki ölkənin
parlamentləri tərəfindən təsdiq olundu. Artıq Moskva Bəyannaməsinin də
imzalanması Cənubi Qafqaz regionunda yeni konfiqurasiyanın əsas oyunçularını
müəyyən etdi. Azərbaycan, Türkiyə və Rusiya birlikdə regionumuzun
təhlükəsizliyini, iqtisadi inkişafını təmin edəcəklər. Qarşıda bu üçlüyün daha
çox uğurlu platformalarda bir araya gələcəklərini, birləşəcəklərini əminliklə
proqnozlaşdıra bilərik. O cümlədən, Azərbaycanın regionda yaratdığı yeni
reallığın tam olaraq qəbul edilməsi mühüm əhəmiyyət daşıyır. Yəni qardaş
Türkiyə ilə imzalanmış Şuşa Bəyannaməsi kimi, dost və qonşumuz Rusiya ilə
imzalanan Moskva Bəyannaməsi də Azərbaycanın ərazi bütövlüyünə, müstəqilliyinə
və təhlükəsizliyinə zəmanət verir. Hər iki ölkənin qarşılıqlı hörmət və etimad
prinsiplərinə əsaslanan hərtərəfli və bərabərhüquqlu əməkdaşlığının
genişləndirilməsinə dönməz sadiqliklərini ifadə edir. Ölkəmiz Prezident İlham
Əliyevin rəhbərliyi altında öz müstəqil siyasətinə, təhlükəsizliyinə əlavə
zəmanət qazanır. Anar NƏBİYEV, Yeni Azərbaycan Partiyası Qazax Rayon Təşkilatının
sədri
Facebook-da paylaş