2020-ci il hərb tariximizdə və xalqımızın yaddaşında müstəqil Azərbaycan dövlətinin erməni faşizmi üzərindəki 44 günlük Vətən müharibəsində qazandığı unudulmaz Qələbə ilə yadda qaldı. Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə yenilməz Ordumuz bu Qələbəni Azərbaycan xalqına yaşatdı.

44 gündə qəhrəmanlığı ilə tarix yazan oğullarımızdan biri də üçrəngli bayrağımızı işğaldan azad etdiyi torpaqlara sancan, xalqına qələbə sevincini yaşadan, bu günlərdə doğum gününü qalib ölkənin vətəndaşı olaraq qeyd edən, hamımızın fəxri, qürur mənbəyimiz Vətən Müharibəsi Qəhrəmanı Nicad Bədəlovdur.

Bu əlamətdar günü təkcə Qəhrəmanımız deyil, bütün xalqımız qeyd edib. 32 il öncə, Qarabağ savaşından 1 il əvvəl – 1989-cu ilin 12 dekabrında Qazax mahalının Kommuna (indiki Bala Çaylı) kəndində dünyaya göz açan oğlan illər sonra Qarabağın döyünən ürəyinə, vuran biləyinə, dizinin gücünə çevrildi. 3300 metr yüksəkliyi – sıldırım qayaları, çalın-çarpaz yolları, Şuşanın başı dumanlı dağlarını Qartal kimi fəht etdi. Nicad Şuşaya ilk daxil olan Qəhrəmanlardandır. Şuşanın Zəfər tarixinin yazılmasında kapitan Nicad Bədəlovun öz dəst-xətti, öz imzası var.

Rəhbər təyin olunduğu ilk gündən şəhidlərimizi, onların ailələrini, qazilərimizi, müharibə iştirakçılarını daim diqqətdə saxlayan Qazax Rayon İcra Hakimiyyətinin başçısı Rəcəb Babaşov öz ənənəsinə sadiq qalıb qəhrəmanımızı təbrik etməyi də unutmayıb. İcra başçısı Rəcəb Babaşov Vətən Müharibəsi Qəhrəmanı Nicad Bədəlovu doğum günü münasibətilə Qazax ictimaiyyəti, ziyalılar və öz adından səmimi qəlbdən təbrik edib. İgid Vətən oğluna cansağlığı və ən xoş arzularını çatdırıb. Müstəqil Azərbaycanımızın, Qazaxımızın inkişafı naminə gələcək işlərində və fəaliyyətində uğurlar arzulayıb.

Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin, hərbi qulluq vəzifəsini yerinə yetirən zaman igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 9 dekabr 2020-ci il tarixli Sərəncamına əsasən Nicad Bədəlova "Vətən Müharibəsi Qəhrəmanı” adı verilib.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 25 dekabr 2020-ci il tarixli Sərəncamına əsasən Nicad Bədəlov "Füzulinin azad olunmasına görə” medalı ilə təltif edilib.

Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 29 dekabr 2020-ci il tarixli Sərəncamına əsasən Nicad Bədəlov "Şuşanın azad olunmasına görə” medalı ilə təltif olunub.

GOYEZEN.AZ