Azərbaycan azad edilmiş ərazilərdə müasir şəhər planlaşdırılması həyata keçirir...
2022-ci il iyunun 27-də Polşanın Katovitse şəhərində Ümumdünya Şəhər Forumunun"Daha yaxşı gələcək naminə şəhərlərimizi dəyişdirək” mövzusunda 11-ci sessiyası işə başlamış və Forumda Azərbaycan
nümayəndə heyəti də iştirak etmişdir. BMT-nin Yaşayış Məskənləri Proqramının
təşkil etdiyi bu nüfuzlu beynəlxalq konfrans şəhər və yaşayış məskənlərinin inkişafına
həsr olunub. Ümumdünya
Şəhər Forumunun 11-ci sessiyasının şüarı isə "Şəhərlərimizi daha yaxşı gələcək
üçün dəyişdirmək” olmuşdur. Forum tarixdə ilk dəfədir ki Mərkəzi Avropada təşkil
edilir. Forumun müzakirə ediləcək 6 əsas mövzusuna-ədalətli şəhərlər,
şəhərlərin yaşıl gələcəyi, innovasiya və texnologiya, şəhərlərin
dayanıqlılığının yüksəldilməsi, şəhərlərin planlaşdırılması və idarə edilməsi,
iqtisadiyyatın gələcəyi və bələdiyyələrin maliyyə məsələsi mövzularına "müharibədən sonra
şəhərlərin bərpası” mövzusu da əlavə edilmişdir. Azərbaycan Respublikasının
Prezidenti İlham Əliyev Ümumdünya Şəhər Forumunun "Daha yaxşı gələcək naminə
şəhərlərimizi dəyişdirək” adlı 11-ci sessiyasında iştirak və çıxış etmişdir.
Dövlətimizin başçısı öz çıxışında strateji planlama və səmərəli əməkdaşlıq,
paytaxt Bakının tarixi simasını qorumaqla bərabər, onun infrastrukturunun
yenidən qurulması və müasirləşdirilməsi, Ermənistanın 30 illik işğalından sonra
dayanıqlı şəhər inkişafı, Rəsmi İrəvanın hərbi cinayətləri və azad edilmiş
ərazilərimizdə müasir şəhər planlaşdırılması, "yaşıl enerji” və "sıfır
tullantı” konsepsiyası haqqında məsələlərə toxunmuş və maraqlı faktlar, xüsusi
mesajlar vermişdir. Prezident bildirmişdir ki, 2022-ci il Azərbaycanın
Birləşmiş Millətlər Təşkilatına üzvlüyünün 30 illiyi tamam olur. Bu mühüm
hadisəni qeyd etmək məqsədilə cari ilin mart ayında Azərbaycanın mədəniyyət
paytaxtı olan, azad edilmiş Şuşa şəhərində BMT qurumlarının iştirakı ilə
münaqişədən və pandemiyadan sonrakı dövrdə Dayanıqlı İnkişaf Məqsədlərinə nail
olunmasına həsr edilmiş çox mühüm tədbir təşkil edilmişdir. Strateji planlama
və səmərəli əməkdaşlıq haqqında danışan ölkə başçısı qeyd etmişdir ki, "2030-cu
ilə qədər Dayanıqlı İnkişaf Gündəliyi” və "Yeni Şəhər Gündəliyi” dayanıqlı urbanizasiyanı
və şəhərlərimiz üçün daha yaxşı gələcəyi təmin etmək üzrə səylərimizi
istiqamətləndirir. Paytaxt Bakının tarixi simasını qorumaqla bərabər, onun
infrastrukturunun yenidən qurulması və müasirləşdirilməsi təmin olunub. Bakının
və Azərbaycanın digər şəhərlərinin müasirləşdirilməsi və yenidən qurulması
zamanı şəhərlərin inkişafı baxımından yeni imkanlar və təcrübə əldə olunub. Ən
gözəl şəhərlərdən biri hesab olunan Bakı misilsiz memarlığı, park və bulvarları
ilə tarixi irs və müasirliyin ahəngliyini özündə birləşdirir. 44 günlük Vətən müharibəsindəki qələbəmizdən danışan
İlham Əliyev vurğulamışdır ki, Azərbaycanın öz ərazilərini Ermənistanın 30
illik işğalından azad etməsi ilə nəticələnən Vətən müharibəsindən sonra
dayanıqlı şəhər inkişafı daha böyük dəyər kəsb edir. Ermənistan Azərbaycan
torpaqlarının 30 illik işğalı zamanı şəhər və kəndləri qəsdən dağıdaraq, hər
bir mədəni və dini abidəni talan edərək həmin əraziləri urbisid və kultursidin
bariz nümunəsinə çevirib. Azərbaycanın 9 şəhəri və yüzlərlə kəndi yer üzündən
silinib. Ağdam şəhəri o dərəcədə dağıdılıb ki, əcnəbi mütəxəssislər onu
"Qafqazın Xirosiması”
adlandırıblar. Füzuli şəhəri işğaldan azad edildikdən sonra Azərbaycan Ordusu
orada bayrağımızı dalğalandırmağa bir dənə də olsun tikili tapa bilməyib.
Xarici diplomatlar, jurnalistlər və beynəlxalq QHT-lərin nümayəndələri azad
edilmiş ərazilərə səfərləri zamanı bu vandalizmin şahid olmuş və dağıntıların
tam miqyasını sənədləşdirmişlər. Sülh müqaviləsi bölgəni sülh və əməkdaşlıq
regionuna çevirə bilər. Ermənistanın 30 illik işğalına baxmayaraq, Azərbaycan
müharibə səhifəsini çevirmək, münasibətləri normallaşdırmaq və bir-birinin
suverenliyinin və ərazi bütövlüyünün qarşılıqlı tanınması prinsipi əsasında
Ermənistanla sülh müqaviləsi imzalamaq istəyindədir. Azərbaycan sülh
danışıqları üçün 5 əsas prinsip irəli sürüb və Ermənistan onları qəbul edib. Prezident həmçinin qeyd etmişdir ki, Rəsmi İrəvanın
hərbi cinayətləri sülh dövründə də davam edir. Yenidənqurma prosesi minalardan
təmizlənmə ilə başlayır. Kütləvi minalanma qarşımızda duran ən böyük
çətinlikdir və bu, yenidənqurma işlərini, məcburi köçkünlərin qayıdışını
ləngidir. İlkin hesablamalara görə, işğal dövründə Ermənistan həmin ərazilərə
bir milyondan artıq mina basdırıb. 2020-ci ilin noyabr ayında Vətən müharibəsi
başa çatdıqdan sonra mina partlaması nəticəsində 220-dən artıq Azərbaycan
vətəndaşı həlak olub və ya ağır yaralanıb. Azərbaycan azad edilmiş ərazilərdə
müasir şəhər planlaşdırılması həyata keçirir, "yaşıl enerji” və "sıfır
tullantı” konsepsiyalarını tətbiq edir. Məcburi köçkünlərimiz 30 il ərzində
Ermənistanın işğalından əziyyət çəkib və doğma yurdlarından məhrum edilib.
Məcburi köçkünlərin qayıdışı üçün ilk pilot layihə Zəngilan rayonunun Ağalı
kəndində reallaşdırılıb. Bu ilin may ayında Ağalı kəndinin ilk sakinləri doğma
torpaqlarında məskunlaşmağa başlayıblar. Bu gün Ağalı ağıllı kəndi dünyanın ən
müasir kəndlərindən biridir. Azərbaycan işğaldan azad olunmuş Füzuli şəhərində
səkkiz aydan az müddətdə hava limanı inşa edib. İşğaldan azad olunmuş Zəngilan
və Laçın rayonlarında hazırda daha iki hava limanının tikintisi davam edir.
Azad edilmiş bəzi şəhərlərin baş planları artıq hazırdır. Şuşa şəhərinin baş
planı onun möhtəşəm tarixi irsinin qorunması üzərində qurulub. Qarabağ
bölgəsinin sənaye mərkəzinə çevriləcək Ağdamda on minlərlə sakin üçün nəzərdə
tutulmuş tamamilə yeni şəhər inşa olunur. Ərazisi 200 hektar təşkil edən Ağdam
Sənaye Parkı artıq fəaliyyət göstərir, sərmayədarlara və sahibkarlara açıqdır.
Zəngilan şəhəri onun təbiətə inteqrasiyası və park şəhərinə çevrilməsi baxışı
ilə inşa edilir. Məqsədimiz Dayanıqlı İnkişaf Məqsədlərinə uyğun olaraq
inklüziv, təhlükəsiz, dözümlü və dayanıqlı şəhər və kəndlərin inşasıdır. Bütün
bu işlər Azərbaycanın öz maliyyə resursları hesabına aparılır. Qazax Rayon Heydər Əliyev Mərkəzi
Facebook-da paylaş