İcra başçısı Azərbaycan Respublikası “Beynəlmiləlçi Əlil Döyüşçülər” Fondunun nümayəndələri ilə görüşüb
Məlumat
üçün qeyd edək ki, Azərbaycan Respublikasının Qeyri-Hökumət Təşkilatlarına Dövlət
Dəstəyi Agentliyinin maliyyə dəstəyi ilə Azərbaycan Respublikasının "Beynəlmiləlçi
Əlil Döyüşçülər” Fondu 01.02.2022-01.06.2022-ci il tarixlərini əhatə edəcək
"Hökumət və xalq öz müdafiəçilərinin xidmətlərini heç vaxt unutmamalıdır!” layihəsini
həyata keçirir. Aprelin
12-də Qazax Rayon İcra Hakimiyyətinin başçısı Rəcəb Babaşov Azərbaycan
Respublikasının "Beynəlmiləlçi Əlil Döyüşçülər” Fondunun
prezidenti, Əfqanıstan və Qarabağ müharibəsinin veteranı Sərraf Orucovu, Fondun
vitse-prezidenti, Əfqanıstan və Qarabağ müharibəsinin veteranı Ənvər
Qarayevi, Hüquqşünası, Qarabağ müharibəsinin veteranı Fəqan Nəsibzadəni
qəbul edib. Rayon İcra Hakimiyyətində keçirilən görüşdə icra aparatının məsul işçiləri, Azərbaycan Respublikası Səfərbərlik və Hərbi Xidmətə
Çağırış üzrə Dövlət Xidmətinin Qazax Rayon Şöbəsinin rəisi, polkovnik-leytenant
Tural Məmmədov, "Azərbaycan Qarabağ Müharibəsi Əlilləri, Veteranları və Şəhid
Ailələri” İctimai Birliyinin Qazax rayon şöbəsinin sədri Xasay Balayev, Azərbaycan Respublikası
Müharibə, Əmək və Silahlı Qüvvələr Veteranları Şurasının Qazax rayon şöbəsinin
sədri Azər Məmmədov iştirak ediblər. Qazax
Rayon İcra Hakimiyyətinin başçısı Rəcəb Babaşov qonaqları
salamlayıb, şəhid ailələri, Qarabağ müharibəsi əlilləri və veteranları ilə bağlı
layihənin keçirilməsinə
görə razılıq edib, layihə barədə fikirlərini bölüşüb. İcra başçısı tarixi
Qələbə ilə başa çatan 44 günlük Vətən müharibəsindən söz açaraq bu gün qəhrəman
xalq olaraq şanlı qələbəni bizlərə bəxş edən Ali Baş Komandana, hərbçilərimizə,
şəhidlərimizə, qazilərimizə borclu və minnətdar olduğumuzu dilə gətirib. Rayon
rəhbəri Respublika Prezidenti İlham Əliyev, Birinci vitse-prezident Mehriban
Əliyeva tərəfindən şəhid ailələrinə və qazilərimizə göstərilən qayğının Qazaxda
da hər zaman nümunə götürüldüyünü bildirib. Qazaxda bütün şəhidlərimizin,
eləcə də Vətən müharibəsi şəhidlərinin daim yad olunduğunu, şəhid ailələrinə
olan qayğının bundan sonra da davam etdiriləcəyini vurğulayıb. Rayon rəhbəri şəhidlərin
adlarının əbədiləşdirilməsi istiqamətində görülmüş işlərdən danışaraq Qazax
Rayon İcra Hakimiyyətinin təşəbbüsü və dəstəyi ilə "Göyəzən” qəzetinin baş
redaktoru, şair-publisist Elçin İsmayıl tərəfindən Vətən müharibəsi
şəhidlərinə həsr olunmuş "Qanları ilə dastan
yazanlar" kitabının yazılmasını, Qazax
Tarix-Diyarşünaslıq Muzeyində Birinci və İkinci Qarabağ müharibəsi zamanı Vətən
uğrunda canlarından keçən 339 nəfər şəhidin xatirəsinə guşənin yaradılmasını,
şəhərin mərkəzində yerləşən Şəhidlər xiyabanında Vətən müharibəsi şəhidlərinin
lövhələrinin vurulmasını, N.Nərimanov küçəsində Vətən müharibəsi şəhidlərinin
xatirələrini əbədiləşdirən Abidə Kompleksinin inşa olunmasını, ətraf ərazidə
parkın salınmasını bu istiqamətdə atılan addımların əyani sübutu kimi qeyd edib. İcra başçısı 44 günlük savaşda respublikamızın hər
yerindən olduğu kimi, Qazax elindən də 51 nəfər igid Vətən oğlunun Şəhidlik
zirvəsinə ucaldığını, onların daim bizim qəlbimizdə əbədi
yaşayacağını qeyd edib. Şəhid ailələri, qazilərlə bağlı həyata keçirilən bütün
layihələrdə hər zaman dəstək olmağa hazır olduğunu bildirib.
Azərbaycan
Respublikasının "Beynəlmiləlçi Əlil Döyüşçülər” Fondunun
prezidenti Sərraf Orucov çıxış edərək öncə səmimi münasibətə və qonaqpərvərliyə görə rayon rəhbərliyinə
razılığını bildirib. Qazaxda şəhid ailələrinə, Qarabağ müharibəsi əlillərinə və
veteranlarına göstərilən dövlət qayğısına, şəhid adlarının əbədiləşdirilməsi
istiqamətində görülmüş işlərə görə icra başçısına dərin minnətdarlığını çatdırıb. Sonra
həyata keçirilən layihə barədə məlumat verən S.Orucov qeyd edib ki, əsas məqsəd
27 sentyabr - 8 noyabr 2020-ci il tarixlərində Azərbaycanın ərazi bütövlüyünün
bərpası uğrunda Vətən müharibəsində döyüşərək şəhid olmuş oğullarımızın ailələrinin
və müharibə əlillərinin onlara dövlət tərəfindən qanunla nəzərdə tutulmuş tibbi
və sosial təminat hüquqlarının Səhiyyə Nazirliyi və Əmək və Əhalinin Sosial
Müdafiəsi Nazirliyi tərəfindən təmin olunmasına hüquqi köməklik göstərərək, adı
çəkilən vətəndaşlar arasında yaranmış narazılıqları aradan qaldırmaqdır. Fond rəhbəri
bildirib ki, layihə çərçivəsində qeyd olunan problemlərin həlli ilə bağlı
aidiyyəti olan Səhiyyə, Əmək və Əhalinin Sosial Müdafiəsi Nazirliklərinin, Azərbaycan Respublikası Səfərbərlik və Hərbi
Xidmətə Çağırış üzrə Dövlət
Xidmətinin Səbail, Qazax və Ağstafa rayon şöbələri ilə birlikdə əməkdaşlıq
edərək Bakı şəhərində və sərhədyanı Qazax, Ağstafa rayonlarında Vətən müharibəsində döyüşərək şəhid
olanların ailələrinin, müharibə əlillərinin və
veteranlarının tibbi-reabilitasiyası və sosial problemlərinin həllinə hüquqi yardım göstəriləcəkdir. Həmçinin, Vətəndaşların
Respublikadan Kənar Müalicəyə Göndərilməsi Məsələləri üzrə Komissiyasından keçərək
xarici ölkələrdə müalicə olunmaları üçün rəy almış müharibə əlillərinə
aidiyyəti
qurumlar tərəfindən təmin olunmasına hüquqi köməklik olunacaqdır. S.Orucov qeyd
edib ki, vətəndaşlarımız dərk etməlidirlər ki, bu gün daha çox şəhid ailələrinin,
müharibə əlillərinin xalqın mənəvi dəstəyinə və sayğısına ehtiyacları vardır. Onlar
həm dövlətin, həm də cəmiyyətin daim diqqət mərkəzində olmalıdırlar. Şəhid ailələrinin
və müharibə əlillərinin problemləri yalnız onların problemləri deyil, bütün cəmiyyətin
problemi sayılmalıdır. Fond rəhbəri bildirib ki, layihənin icra planına əsasən
mart, aprel və may aylarında adları qeyd olunan Bakı şəhərinin Səbail rayonunda
və Qazax, Ağstafa rayonlarında, aidiyyəti olan qurumlarla birlikdə əməkdaşlıq
edərək şəhid ailələri, müharibə əlilləri və veteranlarının iştirakı ilə onlara
verilmiş tibbi və sosial imtiyazlar barəsində maarifləndirmə işləri aparılması
nəzərdə tutulub. Fondun
vitse-prezidenti Ənvər Qarayev, Hüquqşünası Fəqan Nəsibzadə çıxış edərək qonaqpərvərliyə və
layihənin həyata keçirilməsində göstərilən dəstəyə görə təşəkkürlərini çatdırıblar. Ulu
Öndər Heydər Əliyev tərəfindən şəhid ailələrinə, Qarabağ müharibəsi əlillərinə,
veteranlarına göstərilən qayğının bu gün ölkə Prezidenti İlham Əliyev, Birinci
vitse-prezident Mehriban Əliyeva tərəfindən layiqincə davam etdirildiyini qeyd
ediblər. Dövlətin bu təbəqədən olan insanlara göstərdikləri qayğının bölgələrimizdə
də olduğu kimi icra olunmasını təqdirəlayiq hal hesab ediblər. Həmin qayğının
Qazaxda real əksini tapmasını razılıqla qarşılayıblar.
GOYEZEN.AZ
Facebook-da paylaş