Qazax RİH başçısının İƏD üzrə nümayəndələrinin və səhiyyə işçilərinin iştirakı ilə rayonda vaksinasiyanın hazırki vəziyyətinə dair müşavirə keçirilib
Respublika Prezidenti cənab İlham Əliyevin və Birinci
vitse-prezident Mehriban Əliyevanın rəhbərliyi altında Azərbaycan
Respublikası Nazirlər Kabineti yanında Operativ Qərargahın tövsiyə və
tapşırıqlarına uyğun olaraq, ölkəmizdə koronavirus (COVID-19) pandemiyası
ilə mübarizə məqsədilə həyata keçirilən kompleks tədbirlər bu gün də davam
etdirilir. Son günlər koronavirus infeksiyasına yoluxmaların
sayında artım müşahidə olunduğundan respublikamızın hər yerində olduğu
kimi, Qazaxda da infeksiyasının yayılmasının
qarşısının alınması sahəsində həyata keçirilən tibbi-profilaktik və
dezinfeksiyaedici tədbirlər gücləndirilib. Noyabrın 15-də Qazax Rayon İcra Hakimiyyətinin
başçısı Rəcəb Babaşovun, icra aparatının məsul şəxslərinin, Rayon Polis Şöbəsinin rəisi Sənan Əsədovun, polis
əməkdaşlarının, Qazax RİH
başçısının şəhər və kənd İnzibati Ərazi Dairələri üzrə nümayəndələrinin, səhiyyə işçilərinin iştirakı ilə Azərbaycan Respublikası Nazirlər Kabineti yanında
Operativ Qərargah tərəfindən ölkəmizdə elan olunmuş xüsusi karantin rejimi
dövründə rayondakı epidemioloji vəziyyət, vətəndaşların vaksinasiya prosesinin
və tibbi maskadan istifadənin mövcud vəziyyəti müzakirə olunub. Karantin
qaydalarının icra vəziyyəti qiymətləndirilib. Əhali tərəfindən ictimai
nəqliyyatda, eləcə də digər yerlərdə sanitariya-epidemioloji qaydalara riayət
edilməsi, tibbi maskadan istifadə olunması üçün nəzarətin gücləndirilməsinə
ehtiyac olduğu bildirilib. Vətəndaşlarımızın, bütün cəmiyyətin sosial məsuliyyətdən irəli gələn
addımlara, görülən işlərə dəstəyinin, Azərbaycan Respublikası Nazirlər Kabineti
yanında Operativ Qərargahın bütün tövsiyə, təklif və qərarlarının qeyd-şərtsiz
icra olunmasının vacibliyi bir daha diqqətə çatdırılıb. Qazax Rayon İcra Hakimiyyətinin başçısı Rəcəb
Babaşov giriş sözü ilə çıxış
edərək müşavirənin məqsəd və əhəmiyyətindən danışıb. İcra başçısı koronavirus
infeksiyasının yayılmasının qarşısının alınması istiqamətində Azərbaycanda
həyata keçirilən təxirəsalınmaz tədbirlərdən söz açıb. Respublika Prezidenti
İlham Əliyevin atdığı qətiyyətli addımlar, xalqımıza göstərdiyi diqqət və qayğı
sayəsində bu gün Azərbaycan Respublikası Nazirlər Kabineti yanında Operativ
Qərargah tərəfindən ölkəmizdə koronavirus pandemiyasının geniş yayılmasının
qarşısının alınması istiqamətində görülən bütün işlərin məhz vətəndaşların sağlamlığının
qorunmasına yönəldiyini vurğulayıb. İcra başçısı bildirib ki, ölkə rəhbəri
İlham Əliyevin və Birinci vitse-prezident Mehriban Əliyevanın xalqın yanında
olması, ölkə vətəndaşlarına çağırışlar etməsi bir daha onu sübut edir ki,
Azərbaycanda vətəndaş amili, xüsusilə də onların sağlamlığı və təhlükəsizliyi
hər zaman prioritet sahə olub və bu, bundan sonra da belə olacaq. İcra başçısı
Respublika Prezidentinin rəhbərliyi altında ölkəmizdə pandemiya ilə mübarizə
sahəsində həyata keçirilən işlərə hər birimizin dəstək olmalı, verilən tapşırıq
və tövsiyələrdən nəticə çıxarmalı, ən əsası da ümumrespublika işində hər kəsin
səfərbər olmalı olduğunu bildirib. İcra başçısı respublikamızın hər yerində olduğu kimi,
Qazax rayonunda da pandemiyanın daha geniş şəkildə yayılmasının qarşısının
alınması istiqamətində görülmüş işlərin bundan sonra da davam etdiriləcəyini
qeyd edib. İcra
başçısı bu gün hər bir ölkə vətəndaşının koronavirusla mübarizədə fəal olmaqla,
xüsusi karantin rejiminin qaydalarına ciddi şəkildə riayət etməklə COVID-19-la
mübarizədə bundan sonra da uğurlu nəticələrin əldə edilə biləcəyini vurğulayıb.
Xüsusilə də bu gün cəmiyyət olaraq qarşımızda duran əsas vəzifənin xüsusi
karantin rejiminin qaydalarına birmənalı şəkildə riayət etmək, maska taxmaq,
sosial məsafəni və şəxsi gigiyenanı gözləmək olduğunu bir daha diqqətə
çatdırıb. Yas mərasimləri zamanı həyətlərdə qurulan mərasim çadırlarında,
xüsusilə də qəbiristanlıqlarda kütləvi şəkildə toplaşmağın insanların
sağlamlığı baxımından birmənalı şəkildə yolverilməz olduğunu qeyd edib. Şənlik mərasimlərinin – toy, nişan və s.
tədbirlərin keçirilməsi zamanı xüsusi karantin rejimi qaydalarına nəzarətin
gücləndirilməsinin böyük əhəmiyyət daşıdığını söyləyib. İcra başçısı qeyd edib ki, bugünkü müşavirədə peyvəndlənmə ilə bağlı verilmiş tapşırıqlar bir daha onu sübut
edir ki, pandemiya ilə mübarizə tədbirləri çərçivəsində həyata keçirilən
vaksinasiya vətəndaşların sağlamlığı üçün vacibdir və ümumrayon işində hər bir
vətəndaşın üzərinə böyük məsuliyyət düşür. Qazax Rayon İcra Hakimiyyəti başçısı
aparatında Ərazi idarəetmə və yerli özünüidarəetmə
orqanları ilə iş şöbəsinin müdiri Adil Vəliyev çıxış edərək respublikamızın hər yerində olduğu kimi, Qazax rayonunda
da əhalinin peyvənd olunması prosesinin uğurla davam etdiyini bildirib. A.Vəliyev qeyd edib
ki, rayon mərkəzi xəstəxanasının həkim heyəti tərəfindən rayon mərkəzi ilə
yanaşı, kənd yaşayış məntəqələrində əhalinin səyyar şəkildə həyata
keçirilən vaksinasiya prosesi zamanı rayon sakinlərinə bugünədək 138 min 507 doza
vaksin vurulub. Birinci mərhələ üzrə peyvənd olunanların sayı 58 min 899, ikinci
mərhələ üzrə peyvənd olunanların sayı isə 55 min 931 nəfərdir. A.Vəliyev
bildirib ki, Buster
peyvəndin gücləndirici dozasıdır. Koronavirusun mutasiyası nəticəsində
yeni "Delta” variantının ortaya çıxmasından sonra Azərbaycan da daxil
olmaqla bir sıra ölkələrdə 3‑cü peyvənd dozası – buster dozası təklif olunur. Nəzərə
alınmalıdır ki, bəzi hallarda yeni variantlara qarşı qorumanı gücləndirmək üçün
peyvəndin əvvəlkindən fərqli növü tətbiq oluna bilər. Bu gün Qazaxda da vətəndaşlara
Buster dozanın vurulması prosesi aparılır ki, bu günə kimi Buster doza üzrə peyvənd olunanların sayı 23 min 677 nəfərdir. A.Vəliyev
vaksinasiya prosesinin
bundan sonra da uğurla davam etdirilməsi üçün hər kəsin var qüvvə ilə çalışmalı
olduğunu söyləyib. "Qazax Rayon
Mərkəzi Xəstəxanası” Publik Hüquqi Şəxsin baş direktoru Sevda Məmmədova səhiyyə sahəsinə göstərdiyi qayğıya görə dövlət
başçısı İlham Əliyevə rəhbərlik etdiyi kollektiv adından təşəkkürünü çatdırıb.
Hər zaman onların qayğıları ilə yaxından maraqlanan rayon rəhbərliyinə
minnətdarlıq edib. Dövlətin səhiyyə işçilərinə olan qayğısını bundan sonra da
öz əməli işləri ilə doğrultmağa çalışacaqlarını bildirib. Bugünkü müşavirənin
mühüm əhəmiyyət daşıdığını və bundan sonra görüləcək işlərə öz töhfəsini
verəcəyini bildirib. Baş həkim hazırda rayonda 357 nəfərin aktiv
COVID-19 xəstəsi kimi qeydiyyata alındığını və müalicələrini davam etdirdiyini
bildirib. Baş həkim həmin xəstələrin əsasən vaksin olunmayan şəxslər və
ağırlaşmış formada müraciət edənlər olduğunu qeyd edib. Baş həkim vurğulayıb
ki, xəstələrin hazırki vəziyyəti onu deməyə əsas verir ki, vətəndaşların
vaksinasiya olunması olduqca vacibdir və bunu hər bir vətəndaş dərk etməlidir. Qazax
Rayon Polis Şöbəsinin rəisi Sənan Əsədov çıxış edərək bu gün koronavirusla mübarizədə hər bir vətəndaşın öz
məsuliyyətlərini dərk edərək diqqətli olmalarını tövsiyə edib. Dövlətin
pandemiya ilə mübarizədə həyata keçirdiyi işlərə, verilən tapşırıq və
tövsiyələrə ciddi şəkildə əməl etmələrini, əks təqdirdə qanunamüvafiq qaydada
lazımi tədbirlər görüləcəyini, qanunu pozan hər bir vətəndaşın qanun qarşısında
cavab verəcəyini qeyd edib. Geniş
müzakirələr şəraitində keçirilən müşavirədə vətəndaşlara göstərilən xidmət
sahələri də müzakirə olunub. Xüsusilə də payız-qış mövsümü ilə bağlı elektrik
enerjisinin verilişində yaranan fasilələr, qazın təzyiqinin aşağı olması və s.
məsələlər geniş şəkildə müzakirə edilərək aidiyyatı şəxslərə ciddi tapşırıqlar
verilib. Qazax Rayon İcra Hakimiyyətinin
başçısı Rəcəb Babaşov müşavirəyə
yekun vuraraq respublikamızın hər yerində olduğu kimi, Qazax rayonunda da
pandemiyanın geniş şəkildə yayılmasının qarşısının alınması istiqamətində
görülmüş tədbirlərlə, peyvəndlənmənin sürətləndirilməsi, şənlik mərasimlərinin
– toy, nişan və s. tədbirlərin keçirilməsi zamanı xüsusi karantin rejimi
qaydalarına nəzarət məsələləri ilə əlaqədar aidiyyatı üzrə bir daha
tapşırıqlarını verib.
Facebook-da paylaş