Qazaxda COVID-19 pandemiyası ilə bağlı aparılan mübarizə tədbirləri müzakirə olunub
Respublika Prezidenti cənab İlham Əliyevin və Birinci
vitse-prezident Mehriban Əliyevanın rəhbərliyi altında Azərbaycan
Respublikası Nazirlər Kabineti yanında Operativ Qərargahın tövsiyə və
tapşırıqlarına uyğun olaraq, ölkəmizdə koronavirus (COVID-19) pandemiyası
ilə mübarizə məqsədilə həyata keçirilən kompleks tədbirlər bu gün də davam
etdirilir. Son günlər koronavirus infeksiyasına yoluxmaların
sayında artım müşahidə olunduğundan respublikamızın hər yerində olduğu
kimi, Qazaxda da infeksiyasının yayılmasının
qarşısının alınması sahəsində həyata keçirilən tibbi-profilaktik və
dezinfeksiyaedici tədbirlər gücləndirilib. Bu gün Qazax Rayon İcra Hakimiyyətinin
başçısı Rəcəb Babaşovun, hüquq-mühafizə
orqanları rəhbərlərinin, təhsil və səhiyyə işçilərinin iştirakı
ilə Azərbaycan
Respublikası Nazirlər Kabineti yanında Operativ Qərargah tərəfindən
ölkəmizdə elan olunmuş xüsusi karantin rejimi dövründə rayondakı epidemioloji
vəziyyətin, vətəndaşların vaksinasiya prosesinin və tibbi maskadan istifadənin mövcud
vəziyyəti müzakirə olunub. Karantin qaydalarının icra vəziyyəti
qiymətləndirilib. Əhali tərəfindən ictimai nəqliyyatda, eləcə də digər yerlərdə
sanitariya-epidemioloji qaydalara riayət edilməsi, tibbi maskadan istifadə
olunması üçün nəzarətin gücləndirilməsinə ehtiyac olduğu bildirilib. İcra başçısı Rəcəb Babaşov qeyd edib ki, Respublika
Prezidenti İlham Əliyevin rəhbərliyi altında ölkəmizdə Pandemiya ilə mübarizə
sahəsində həyata keçirilən işlərə hər birimiz dəstək olmalı, verilən tapşırıq
və tövsiyələrdən nəticə çıxarmalı, ən əsası da ümumrespublika işində hər kəs
səfərbər olmalıdır. İcra başçısı hazırda rayonda 6 məktəbdə müəllim və
şagirdlər arasında COVID-19 virusuna yoluxma halının olduğunu, hətta, İsmayıl
Şıxlı adına Kosalar kənd tam orta məktəbdə yoluxma sayının çox olması səbəbindən
Qazax Rayon Gigiyena və Epidemiologiya Mərkəzinin qərarına
əsasən, distant təhsilə keçirildiyini bildirib. Rayon rəhbəri istər müəllimlərin, istərsə
də valideynlərin üzərinə çox böyük məsuliyyət düşdüyünü qeyd edib. Sonra icra
başçısı "Qazax Rayon Mərkəzi Xəstəxanası Publik Hüquqi Şəxs”in direktoru Sevda
Məmmədovaya, baş həkim Allahverdi Quliyevə, "Qazax Müalicə Diaqnostika Mərkəzi
Publik Hüquqi Şəxs”in direktoru Kamandar İbrahimova, Rayon Gigiyena və Epidemiologiya Mərkəzinin direktor
əvəzi Sədət Nazarovaya, Rayon Təhsil Şöbəsinin müdiri Nizaməddin Babanlıya qeyd olunan,
eləcə də digər məsələlərlə bağlı ciddi tapşırıqlarını verib. Sonda rayonda koronavirus infeksiyasının geniş
yayılmasının qarşısının alınması istiqamətində görüləcək işlər bir daha geniş
şəkildə müzakirə edilib. GOYEZEN.AZ
Facebook-da paylaş