22 yaşında Şəhidlik zirvəsinə ucalan qazaxlı leytenant Elmar Bayramlının ildönümü qeyd olunub
2020-ci ilin 27 sentyabrından
başlayan və 10 noyabrda böyük Qələbə ilə başa çatan Vətən müharibəsindən, hərb
tariximizin zəfər salnaməsindən 1 il ötür. Bu, o Vətən müharibəsidir ki, Ermənistan-Azərbaycan-Dağlıq Qarabağ
münaqişəsinə son qoyaraq Azərbaycanın
qüdrətini bütün dünyaya göstərdi. Bu, o müharibədir ki, Azərbaycan
Respublikasının Prezidenti, Silahlı Qüvvələrin Müzəffər Ali Baş Komandanı İlham
Əliyevin elan etdiyi "Qarabağ Azərbaycandır və nida" şüarı igid Vətən
oğullarının qələbə qazanmasının, torpaqlarımızın ərazi bütövlüyü uğrunda
başladığımız haqq savaşımızın əsas qayəsi, əsgər və zabitlərimizi,
hərbçilərimizi qələbəyə səsləyən rəhbər çağırışı oldu. 44 gün davam edən
müharibədə xalqımızın həmrəyliyi, birliyi, dövlət başçısının ətrafında sıx
birləşməsi bütün dünyaya qüdrətli Azərbaycanın var olmasını sübut etdi. Azərbaycanın
müzəffər ordusu günbəgün, anbaan xalqımızı qələbə sevinci ilə sevindirdi. Hərb
tariximizə şanlı zəfərlərlə dolu günlər yazdı. 44 günlük Vətən müharibəsində 22 yaşında Şəhidlik adlı uca zirvəyə yüksələn
igid oğullarımızdan biri də şəhid leytenant Bayramlı Elmar İsa oğludur. Bu gün qəhrəman şəhidimizin
uğrunda canını fəda etdiyi torpağa tapşırıldığı gündən 1 il ötür. Döyüş meydanında göstərdiyi igidliyə görə ölümündən
sonra ölkə Prezidenti İlham Əliyevin müvafiq Sərəncamlarına əsasən "Vətən
uğrunda”, "Laçının
azad olunmasına görə”, "Suqovuşanın
azad olunmasına görə” medalları ilə təltif olunmuş Elmar Bayramlını ildönümündə bu gün
təkcə ailəsi deyil, yaxınları, doğmaları, şəhidimizə ehtiram göstərən hər kəs yad
edib. Qazax Rayon İcra Hakimiyyətinin başçısı Rəcəb
Babaşov, icra aparatının məsul şəxsləri, rayonumuzda qonaq olan ADA Universitetinin ABŞ-dakı
Mərkəzinin prezidenti Qalib Məmməd, Universitetin akademik işlər üzrə
prorektoru Vəfa Kazdal, eləcə də digər əməkdaşlar, rayonun hüquq-mühafizə
orqanlarının, idarə, müəssisə və təşkilatların rəhbərləri, Azərbaycan
Respublikası Milli Məclisinin Beynəlxalq münasibətlər və parlamentlərarası əlaqələr
komitəsinin sədri Səməd Seyidovun köməkçisi Akif Əmirov, "Azərbaycan
Qarabağ Müharibəsi Əlilləri, Veteranları və Şəhid Ailələri İctimai Birliyi”nin
Qazax rayon filialının, Azərbaycan
Respublikası Müharibə, Əmək və Silahlı Qüvvələr Veteranları Şurasının Qazax
rayon şöbəsinin sədrləri və üzvləri, şəhidimizinvaxtilə təhsil aldığı Birinci Şıxlı kənd ümumi orta
məktəbin direktoru, Vətən müharibəsi şəhidi kapitan Rövşən Pənahovun
atası Mahmud Pənahov, şəhid ailələri, şəhidimizin ailə
üzvləri, yaxınları, doğmaları, kənd sakinləri igid Vətən oğlunun ildönümü
mərasimində iştirak ediblər. Torpaq uğrunda
canından keçən qəhrəman şəhidimizin ruhuna dua oxunub, şəhidimizə Allahdan
rəhmət, ailəsinə səbir dilənib, əziz xatirəsi böyük ehtiramla yad edilib. Ölkə Prezidenti, Ali Baş Komandan İlham Əliyevin
rəhbərliyi altında qüdrətli Azərbaycan Ordusunun 44 günlük Vətən müharibəsində
qazandığı şanlı Qələbədən danışan Qazax Rayon İcra Hakimiyyətinin başçısı
Rəcəb Babaşov həmin zəfərdə
payı olan Elmar kimi qəhrəman oğullarımızla hər birimizin fəxr etdiyini bildirib.
44 günlük savaşda əldə etdiyimiz tarixi Zəfərin müəllifi olan Ali Baş
Komandana, şanlı Azərbaycan Ordusuna, şəhidlərimizə, qazilərimizə borclu və minnətdar
olduğumuzu qeyd edib. "Bu gün Elmar bizim aramızda olmasa da o, daim
bizim qəlbimizdə yaşayır. Elmar döyüş meydanında göstərdiyi qəhrəmanlığı ilə
bizim qəlbimizə və yaddaşımıza əbədi yazıldı. O qəhrəmanlıq ki, Ali Baş
Komandan İlham Əliyev imzaladığı Sərəncamlarla Elmarın igidliyini, şücaətini
qiymətləndirdi. "Vətən uğrunda”, "Laçının azad olunmasına görə”, "Suqovuşanın azad olunmasına görə” medalları ilə təltif etdi. 22 yaşında Şəhidlik zirvəsinə ucalan Elmar
qısa ömrünə yüz illərin qəhrəmanlıq dastanını sığdırdı. Elmarın igidliyi,
qəhrəmanlığı nəinki indiki, eləcə də gələcək nəsillərə örnək olacaqdır”, -
deyən rayon rəhbəri Elmar kimi oğullarımızla tək bu gün deyil, illər ötsə belə
hər zaman qürur duyulacağını bildirib. Rayon rəhbəri şəhid ailələrinə bundan sonra
da diqqət və qayğı göstəriləcəyini, onların daim dövlətin qayğısı ilə əhatə
olunacaqlarını vurğulayıb. İllər keçsə belə şəhidlərimizin və onların
ailələrinin unudulmayacağını qeyd edib. İcra başçısı
Qazaxda bütün şəhidlərimiz kimi, Vətən müharibəsi şəhidlərinin adlarının əbədiləşdirilməsi
istiqamətində görülən məqsədyönlü işlərdən söz açaraq həmin işləri igid Vətən
oğullarına olan hörmət və ehtiram kimi qiymətləndirib. Qazax Rayon İcra
Hakimiyyətinin təşəbbüsü və dəstəyi ilə "Göyəzən” qəzetinin baş redaktoru,
şair-publisist Elçin İsmayıl tərəfindən
yazılmış "Qanları ilə
dastan yazanlar" kitabını, Qazax
Tarix-Diyarşünaslıq Muzeyində 338 nəfər şəhidin şəkillərindən ibarət
guşənin yaradılmasını bu sahədə atılan nümunəvi addımlardan biri kimi söyləyib.
Şəhərin mərkəzində yerləşən Şəhidlər xiyabanında Vətən müharibəsi şəhidlərinin
şəkli əks olunmuş lövhələrin vurulduğunu, bundan əlavə, şəhərin N.Nərimanov
küçəsində xatirələrini əbədiləşdirən Abidə Kompleksinin yaradıldığını
qeyd edib. Bu gün həmin Abidə Kompleksinin Şəhidlər xiyabanından sonra hər kəsin
ziyarət etdiyi müqəddəs ünvana çevrildiyini bildirib. Şəhid
atası İsa Bayramov hər zaman
onlara göstərilən diqqət və qayğıya görə şəhid ailəsi kimi razılığını ifadə
edib, ölkə Prezidenti İlham Əliyevə, Birinci vitse-prezident Mehriban
Əliyevaya, rayon rəhbərliyinə minnətdarlığını bildirib. Övladının şəhid
olduğu ilk gündən daim xatirəsinin yad olunmasını Elmarın timsalında bütün
şəhidlərimizə olan hörmət və ehtiramın bariz nümunəsi kimi qiymətləndirib.
Şəhid atası oğlu və onun kimi igid Vətən oğulları ilə hər zaman fəxr edəcəyini
söyləyib. Leytenant Bayramlı Elmar İsa oğlu Leytenant
Elmar Bayramlı 2 sentyabr 1998-ci ildə Qazax rayonunun Birinci Şıxlı kəndində
anadan olmuşdur. 1 sentyabr 2005-ci ildə Qazax rayon Birinci Şıxlı kənd ümumi
orta məktəbin 1-ci sinifinə daxil olmuşdur. 2016-cı ildə Sumqayıt şəhər 24 nömrəli
tam orta məktəbin 11-ci sinifini bitirmişdir. 2016-cı ildə Heydər Əliyev adına Azərbaycan Ali Hərbi Məktəbinə daxil
olmuş, 2020-ci
ildə həmin məktəbi bitirmişdir. 2020-ci ildə leytenant rütbəsi almış, Müdafiə
Nazirliyinin "N” saylı hərbi hissəsində "Tağım
komandiri” vəzifəsində xidmətə başlamışdır. Şəhid leytenantımız 29.09.2020-ci il tarixdə Tərtər
rayonunun Talış kəndi istiqamətində düşmənin hücumunun qarşısını alarkən qəhrəmancasına
şəhid olmuşdur. 30.09.2020-ci ildə Qazax
rayonunun Yuxarı Salahlı kənd qəbiristanlığında izdihamla dəfn olunmuşdur.
Subay idi. Şəhid Elmar
Bayramlı da ölümündən sonra cənab Prezident İlham Əliyevin 15 dekabr
2020-ci il tarixli Sərəncamına əsasən "Vətən uğrunda”, 29 dekabr 2020-ci il tarixli Sərəncamlarına
əsasən "Laçının azad olunmasına
görə” və "Suqovuşanın azad olunmasına görə”medalları ilə təltif olunmuşdur. GOYEZEN.AZ
Facebook-da paylaş