Qazax Müəllimlər Seminariyasının binası əsaslı təmir olunacaq
"Azərbaycan Xalq Cümhuriyyəti
hökumətinin qərarına əsasən, Qazax müəllimlər seminariyasının təşkili
Azərbaycanın maarif salnaməsinin ən parlaq səhifələrindəndir. Görkəmli ədəbiyyatşünas,
tanınmış maarifpərvər və ictimai xadim Firidun bəy Köçərlinin rəhbərliyi ilə
fəaliyyətə başlayan Qazax müəllimlər seminariyası bütün fənlərin tədrisinin ana
dilində mütərəqqi üsullarla aparıldığı yeni təhsil ocağı kimi Azərbaycanda
elmin, maarifin və mədəniyyətin inkişafına misilsiz töhfələr vermişdir.
Respublikanın bölgələri ilə yanaşı, qonşu ölkələr üçün də uzun illər boyu
yüksək ixtisaslı pedaqoji kadrlar hazırlamış seminariyanın yetirmələri
sırasında adları təhsil, elm və mədəniyyət tarixinə həkk olunmuş çox sayda
tanınmış simalar vardır. Qazax müəllimlər seminariyası müstəqil Azərbaycan Respublikasının
təhsil işçilərinə gənc nəslin azərbaycançılıq məfkurəsi ruhunda yetişdirilməsi
üçün zəngin irs qoymuşdur” kimi dəyərli sözlərin yer aldığı ölkə Prezidenti İlham
Əliyevin imzaladığı 3 noyabr 2018-ci il tarixli Sərəncam bir daha onu göstərdi
ki, dövlət başçısı Azərbaycanda təhsil sahəsinə hər zaman xüsusi qayğı ilə
yanaşır. Azərbaycan təhsilində, mədəniyyətində, eləcə də bir çox sahələrdə
görkəmli şəxsiyyətlər bəxş edən Qazax Müəllimlər Seminariyasının 100 illiyinin
qeyd olunması barədə ölkə rəhbəri tərəfindən imzalanmış bu Sərəncam eyni
zamanda qazaxlı ziyalılara verilən qiymətin daha bir bariz nümunəsidir.
ADA Universitetinin ana dilimizdə təhsilin ilk sütunu
sayılan Qazax Müəllimlər Seminariyasının tarixi binası qarşısında keçirdiyi "Bir
müəllimin manifesti” adlı tədbir də qazaxlı ziyalılara verilən böyük dəyəri
özündə təcəssüm etdirir. Hər zaman müxtəlif bölgələrdə fəaliyyət göstərən
yenilikçi müəllimləri "kəşf” edib, onları milli dəyərə çevirən ADA həmin ənənəni
bu gün də davam etdirir. "Bir müəllimin manifesti” də öz "kəşf”inə elə
regiondan, daha dəqiq desək, milli təhsil sistemimizin başlanğıc nöqtəsi olan
Qazax Müəllimlər Seminariyasının yerləşdiyi Qazax şəhərindən başlaması heç də
təsadüfi deyil. Çünki Qazax hər zaman öz ziyalıları ilə tanınıb. Tələbələri və məzunlarının sayı artdıqca, missiyası da
genişlənməkdə davam edən ADA öz təcrübəsini regionlarda yerləşən məktəblər və
onların müəllimləri ilə paylaşmaq fəaliyyətinə də ilk növbədə Qazaxdan
başlayacaq və bu işdə Bakı Dövlət Universitetinin Qazax filialı ilə əməkdaşlıq
edəcək.
Ən əsası isə ADA Universiteti "Bir müəllimin
manifesti” təşəbbüsü çərçivəsində həm də tariximizin incisi olan Qazax
Müəllimlər Seminariyasının binasını bərpa etməklə onun yenidən istifadəsini
mümkün edəcək. Firudin bəy Köçərlinin misilsiz çətinliklər bahasına qurduğu və
ilk direktoru olduğu Seminariya binasının bərpası, əslində, Azərbaycanda
maarifçilik irsimizin və Seminariyadan aldığımız milli qürurumuzun bərpası
olacaq. Burada illər öncə yandırılan elm işığı daha gur yanacaq, ətrafına yeni
nəsil maarifçiləri toplayacaq. Həyata keçiriləcək birgə layihələrlə müasir
təhsil tariximizin növbəti səhifələri burada yazılacaq. Bu gün Qazax Rayon İcra Hakimiyyətinin
başçısı Rəcəb Babaşov Seminariyanın bərpa işlərini həyata keçirəcək "PMD Projects” MMC-nin İdarə Heyətinin sədri Nəriman Topçibaşev, baş memar Fizuli
Əliyev, bərpa işlərinin rəhbəri Pərviz Mehrəliyev, əməkdaşlar Məhəmməd
Süleymanov, Zəminəli Şammədov, Zaur Məmmədov, Orxan İsmayılovla birlikdə Qazax Müəllimlər Seminariyasında olub, mövcud
vəziyyətlə maraqlanıblar. Görüləcək işlər müzakirə olunub. Rayon rəhbəri bərpa işləri
ilə əlaqədar hər cür dəstək göstəriləcəyini bildirib və layihəni həyata keçirən
insanlara qazaxlılar adından minnətdarlığını çatdırıb.
GOYEZEN.AZ
Facebook-da paylaş