Qazax müəllimlər seminariyası: milli təhsilimizin başlanğıc dövrü
19-cu yüzilin
axırları, 20-ci yüzilin əvvəllərində Azərbaycanda milli təhsilin əsaslarının
yaranmasında Qazax müəllimlər seminariyasının yetişdirdiyi kadrların əvəzsiz
rolu olub. Bu Seminariya fəaliyyət
göstərdiyi dövrdə Azərbaycana Üzeyir Hacıbəyov, Müslüm Maqomayev, Firidun bəy
Köçərli, Ə.Seyidov, S.Vəlibəyov, Teymur bəy Bayraməlibəyov, Y.Qasımov, M.Ə.Xələfov
və başqa onlarla görkəmli şəxsiyyətlər bəxş edib. Azərbaycan təhsilini, ziyalılarını bütün dünyada tanıdan Qazax Müəllimlər
Seminariyasının bu il 100 ili tamam olur. Respublika Prezidenti İlham Əliyevin noyabrın
3-də "Qazax müəllimlər seminariyasının 100 illik yubileyinin qeyd edilməsi
haqqında” Sərəncam imzalaması isə Qazax təhsilinə, bütün qazaxlılara verilən ən
böyük qiymətdir. Ən əsası isə ölkə başçısı tərəfindən imzalanan Sərəncamda yer
alan dəyərli fikirlər milli təhsilimizə verilən dəyərdir. Sərəncamda bildirilir ki, "2018-ci ilin
noyabr ayında Qazax müəllimlər seminariyasının yaradılmasının 100 illiyi tamam
olur. Azərbaycan Xalq Cümhuriyyəti hökumətinin qərarına əsasən, Qazax
müəllimlər seminariyasının təşkili Azərbaycanın maarif salnaməsinin ən parlaq
səhifələrindəndir. Görkəmli ədəbiyyatşünas, tanınmış
maarifpərvər və ictimai xadim Firidun bəy Köçərlinin rəhbərliyi ilə fəaliyyətə
başlayan Qazax müəllimlər seminariyası bütün fənlərin tədrisinin ana dilində
mütərəqqi üsullarla aparıldığı yeni təhsil ocağı kimi Azərbaycanda elmin,
maarifin və mədəniyyətin inkişafına misilsiz töhfələr verib. Respublikanın
bölgələri ilə yanaşı, qonşu ölkələr üçün də uzun illər boyu yüksək ixtisaslı
pedaqoji kadrlar hazırlamış seminariyanın yetirmələri sırasında adları təhsil,
elm və mədəniyyət tarixinə həkk olunmuş çox sayda tanınmış simalar var. Qazax müəllimlər seminariyası müstəqil Azərbaycan Respublikasının təhsil
işçilərinə gənc nəslin azərbaycançılıq məfkurəsi ruhunda yetişdirilməsi üçün
zəngin irs qoyub. Sərəncamda qeyd olunur ki, Azərbaycan təhsil sisteminin inkişafında
müstəsna xidmətlərini nəzərə alaraq, Qazax müəllimlər seminariyasının
yaradılmasının 100-cü ildönümünün layiqincə qeyd olunmasını təmin etmək məqsədilə
Təhsil Nazirliyi Qazax Rayon İcra Hakimiyyətinin təklifləri nəzərə alınmaqla,
Qazax müəllimlər seminariyasının 100 illik yubileyi ilə bağlı tədbirlər planı
hazırlayıb həyata keçirsin”. Sərəncamda qeyd olunan fikirlərdən də görünür ki, Qazax müəllimlər seminariyası
milli təhsilimizin başlanğıc dövrüdür. Bu gün
Qazax Rayon İcra Hakimiyyətinin başçısı Rəcəb Babaşov və Prezident
Administrasiyasının məsul işçisi Orxan Mürsəlov Qazax müəllimlər seminariyasına baxış
keçiriblər. Mövcud vəziyyətlə tanış olaraq sinif otaqlarına baxıblar. Dahi şair
Səməd Vurğunun vaxtilə təhsil aldığı sinifdə seminariyanı bitirmiş məzunları, eləcə
də o vaxt dərs deyən müəllimləri özündə əks etdirən guşə ilə tanış olublar.
Milli təhsilimizin əsasını qoyan seminariyanın tarixinə nəzər salıb, Azərbaycan
təhsilinə bəxş etdiyi saysız-hesabsız dəyərli insanları yad ediblər. GOYEZEN.AZ
Azərbaycan Xalq Cümhuriyyəti hökumətinin milli və
demokratik mövqeyi Qori seminariyasının Azərbaycan (tatar) şöbəsinin Qazaxa
köçürülməsini təmin etmişdi. Milli Hökumətin Gəncə xəzinəsindən 5080 manat
qızıl pulla Azərbaycan (tatar) şöbəsinin əmlak xərcini ödəməsi və Gürcüstan hökumətilə
əldə olunmuş razılıq, habelə böyük millətsevər, maarifçi Firidun bəy Köçərlinin
fədakarlığı bu işdə mühüm rol oynamışdı. Seminariyanın tatar şöbəsinin əmlakının
Ağstafa vağzalından Qazaxa köçürülməsində çox böyük fədakarlıq göstərən Qazaxın
camaatı, Qori seminariyasının Qazaxdakı keçmiş məzunları yaxından iştirak
etmişlər. Özünün 17 otağı olan mülkünü seminariyaya bağışlayan Qazaxın Kosalar
kənd sakini Məşədi İbrahim Hacı İsmayıl oğlunun hərəkəti isə sonsuz dərəcədə fərəhli,
bugünkü nəsillərə nümunə ola biləcək hadisə kimi xatırlanmağa layiqdir.
Facebook-da paylaş