Qazaxda növbəti “Novruz mühazirəsi” keçirilib
Bu gün Təhsil Nazirliyinin
təşkilatçılığı ilə "100 yaşlı maarif işığı: Qazax Müəllimlər Seminariyası” adlı
növbəti "Novruz mühazirəsi” keçirilib. Qazax şəhər
Səməd Vurğun adına 2 nömrəli tam orta məktəbdə keçirilən tədbirdə Qazax Rayon
İcra Hakimiyyətinin başçısı Rəcəb Babaşov, Təhsil Nazirliyinin şöbə
müdirinin müavini Əsgər Quliyev, nazirliyin mətbuat xidmətinin katibi Cəsarət
Valehov, nazirlikdə baş məsləhətçi Billurə Hacızadə, akademik,
Milli Məclisin deputatı Nizami Cəfərov, Avrasiya
Unversitetinin professoru Ədalət Tahirzadə, Ayna.az saytının və Ayna tv-nin təsisçisi
Elçin Şıxlı, "Azərbaycan müəllimi” qəzetinin baş redaktoru Nürəddin Heydərov,
"Şərq” qəzetinin baş redaktoru Akif Aşırlı, "Kaspi” qəzetinin nümayəndəsi Təranə
Məhərrəmova, rejissor Orxan Ağazadə, seminariyanın məzunları,
rayonun pedaqoji ictimaiyyəti, media nümayəndələri iştirak ediblər. Əvvəlcə
mühazirə iştirakçıları 2 nömrəli tam orta məktəbin həyətində Qazax müəllimlər seminariyasının 100 illiyi münasibətilə 100 ağac əkiblər.
Sonra tədbir 2
nömrəli tam orta məktəbin akt zalında davam edib. Təhsil
Nazirliyinin şöbə müdirinin müavini Əsgər Quliyev tədbiri açaraq Təhsil
Nazirliyi tərəfindən 2016-cı ildən etibarən "Novruz mühazirələri” keçirildiyini
bildirib. Mühazirələrdə Milli Məclisin deputatları, tanınmış alimlər, beynəlxalq
və yerli təhsil ekspertləri tərəfindən Azərbaycanın tarixi, elmi, mədəniyyəti və
təhsili üzrə müxtəlif məsələlərin ictimaiyyətə çatdırıldığını diqqətə çatdırıb. Qazax müəllimlər seminariyasının elm və təhsilin inkişafında xüsusi xidməti olduğunu
vurğulayan Ə.Quliyev bildirib ki, Qazax tarixən maarifçilik ənənələri ilə
tanınıb, bu ənənə indi də davam edir. Ölkə prezidenti İlham Əliyev tərəfindən
Qazax müəllimlər seminariyasının 100 illik yubileyinin qeyd olunması haqqında Sərəncam
verildiyini diqqətə çatdıran natiq Sərəncama uyğun olaraq, Təhsil Nazirliyinin
Tədbirlər Planının təsdiq olunduğunu bildirib. Bu gün təhsil ictimaiyyəti
və Azərbaycan cəmiyyəti üçün əhəmiyyətli bir tədbirin baş tutduğunu qeyd edən
Ə.Quliyev bu cür tədbirlərin silsiləli şəkildə davam etdiriləcəyini vurğulayıb.
Qazax Rayon
İcra Hakimiyyətinin başçısı Rəcəb Babaşov tədbirdə çıxış edərək qonaqları
qarşıdan gələn milli bayramımız olan Novruz bayramı və əlamətdar tədbirin
keçirilməsi münasibətilə səmimi qəlbdən təbrik edib, ən xoş arzularını
çatdırıb. Seminariyanın 100 illik yubileyinin qeyd edilməsinin əhəmiyyətini
diqqətə çatdıran rayon rəhbəri ölkə prezidentinin təhsilin inkişafına
göstərdiyi qayğı, həyata keçirilən islahatlar barədə danışıb. Qeyd edib ki, bildiyiniz
kimi, 1918-ci ildə Qori müəllimlər seminariyasının Azərbaycan şöbəsi böyük
maarifçi Firudin bəy Köçərli tərəfindən Qazaxa köçürülmüş və elə həmin il
noyabr ayının 10-da Qazax müəllimlər seminariyası kimi fəaliyyətə başlamışdır.
1918-ci ildən 1959-cu ilədək fəaliyyət göstərən seminariya mövcud olduğu 40 il ərzində
3 mindən çox ixtisaslı müəllim kadrı hazırlamışdır. Seminariyanın yetişdirdiyi
müəllimlər Azərbaycanın bütün bölgələrində, eləcə də qonşu Respublikanın Azərbaycan
kəndlərində savadsızlığın aradan qaldırılmasında, Azərbaycanda elmin inkişaf
etməsində böyük xidmətlər göstərmiş, əsl maarif çırağı yandırmışlar. Seminariya
adı Azərbaycan ədəbiyyatı tarixinə qızıl hərflərlə yazılmış Səməd Vurğun, Osman
Sarıvəlli və İsmayıl Şıxlı kimi görkəmli simalar yetişdirmişdir. Ulu öndər Heydər Əliyev Qazax müəllimlər seminariyasının bu fəaliyyətini
yüksək qiymətləndirərək, 1999-cu ildə seminariyanın 80 illik yubileyi ilə bağlı
keçirilən ümumrespublika elmi-praktik konfransının iştirakçılarına göndərdiyi təbrik
məktubunda qeyd etmişdir ki: "Qazax müəllimlər seminariyasının xalqımızın mədəni
həyatında oynadığı böyük rol danılmazdır. Onun təməli üzərində neçə-neçə təhsil
ocaqları yaranıb inkişaf etmişdir. Bu təhsil məbədi özündən sonra böyük mədəni
irs qoymaqla adını Azərbaycan maarifi tarixinə əbədi həkk etmişdir”. Azərbaycan elminin, təhsilinin himayədarı olan Prezident cənab İlham
Əliyev elm-təhsil tariximizdə silinməz izlər qoymuş "Qazax müəllimlər
seminariyasının 100 illik yubileyinin qeyd edilməsi haqqında” 3 noyabr 2018-ci
il tarixli Sərəncam imzalamışdır. Prezident İlham Əliyevin imzaladığı Sərəncamdan
irəli gələn vəzifələrlə əlaqədar Təhsil Nazirliyi və Qazax Rayon İcra Hakimiyyəti
tərəfindən bir sıra işlər görülmüşdür. Rayon rəhbəri bildirib ki, bununla bağlı Qazax Rayon İcra Hakimiyyəti
tərəfindən Sərəncam verilmiş və tədbirlər planı hazırlanmışdır. Tədbirlər planı
Təhsil Nazirliyinə təqdim edilmiş və olduğu kimi qəbul edilərək nazir Ceyhun
Bayramov tərəfindən imzalanaraq təsdiq edilmişdir.
Seminariyanın 100 illik yubileyinin keçirilməsi ilə əlaqədar Qazax
rayonun qabaqcıl elm, təhsil və ictimaiyyətin müxtəlif təbəqələrinin nümayəndələrindən
ibarət komissiya yaradılmışdır. Komissiyada qarşıda duran işlər müzakirə
edilmiş, verilən təkliflər nəzərdən keçirilmişdir. Tədbirlər planına uyğun
olaraq seminariyanın 100 illiyi ilə bağlı "Ziya ocağı” adlı tarixi kitabın
yazılması qərara alınmışdır. Bununla əlaqədar nümayəndəmiz Milli Arxiv İdarəsində
olmuş, Milli Dövlət Arxivi, Dövlət Tarix Arxivi, Təhsil Nazirliyinin Təhsil
Tarixi Muzeyində və Axundov adına kitabxanada araşdırmalar aparmışdır. Eyni
zamanda, işin davamı olaraq araşdırma aparmaq üçün Gürcüstan Milli Arxivinə
müraciət edilmiş, elektron sorğu göndərilmişdir. Yaxın günlərdə nümayəndəmiz
Gürcüstan Milli Arxivində də araşdırma aparılması işlərinə başlayacaqdır. İcra başçısı qeyd edib ki, yubileylə bağlı "Qoridən gələn Ziya
qatarı” filminin çəkilməsi də nəzərdə tutulmuşdur ki, bununla bağlı filmin
ssenarisi yazılmış və yaxın günlərdə çəkilişlərinə başlanılacaqdır. Azərbaycan Milli Elmlər Akademiyasının Folklor İnstitutu Azərbaycan
Dillər Universiteti və Bakı Dövlət Universitetinin Qazax filialı ilə birlikdə seminariyanın
100 illiyinə həsr edilmiş "Azərbaycan təhsili və elminin müasir problemləri”
mövzusunda elmi-praktik konfransın keçirilməsini planlaşdırmışdır. Həmin
konfransın may ayında Qazax rayonunda keçirilməsi nəzərdə tutulmuşdur. Rayon rəhbəri çıxışının sonunda bir daha Prezident İlham Əliyevə elmə,
təhsilə və ziyalılarımıza verdiyi yüksək dəyərə görə Qazax ziyalıları və
ictimaiyyəti adından öz dərin minnətdarlığını bildirib. Eyni zamanda, son illərdə
təhsildə aparılan ciddi islahatlara görə Təhsil naziri Ceyhun Bayramova öz
adından, müəllimlər və ziyalılar adından təşəkkürünü çatdırıb.
Sonra akademik
Nizami Cəfərov tərəfindən "100 yaşlı maarif işığı: Qazax müəllimlər seminariyası”
adlı "Novruz mühazirəsi” təqdim olunub. N.Cəfərov Qori müəllimlər
seminariyasının Azərbaycan şöbəsi və onun varisi olan Qazax müəllimlər seminariyasının
fəaliyyəti barədə ətraflı məlumat verib. Bildirib ki, Qazax müəllimlər seminariyasının
təşkili Azərbaycanın maarif salnaməsinin ən parlaq səhifələrindən biridir. Məruzəçi qeyd
edib ki, görkəmli ədəbiyyatşünas, tanınmış maarifpərvər və ictimai xadim
Firidun bəy Köçərlinin rəhbərliyi ilə fəaliyyətə başlayan Qazax müəllimlər seminariyası
bütün fənlərin tədrisinin ana dilində mütərəqqi üsullarla aparıldığı yeni
təhsil ocağı kimi Azərbaycanda elmin, maarifin və mədəniyyətin inkişafına
misilsiz töhfələr verib. Azərbaycanın bölgələri ilə yanaşı, qonşu ölkələr üçün
də uzun illər boyu yüksək ixtisaslı pedaqoji kadrlar hazırlamış seminariyanın
yetirmələri sırasında adları təhsil, elm və mədəniyyət tarixinə həkk olunmuş
çox sayda tanınmış simalar var. N.Cəfərov
diqqətə çatdırıb ki, Qazax müəllimlər seminariyası fəaliyyət göstərdiyi illər
ərzində 2862 nəfər pedaqoji mütəxəssis hazırlayıb.
Bakı Avrasiya
Universitetinin professoru Ədalət Tahirzadə çıxış edərək yazmış olduğu
"Azərbaycan cümhuriyyəti tələbələri” adlı kitabdan söz açıb. Həmin kitabda
Qazax müəllimlər seminariyasının məzunlarının adlarının da qeyd olunduğunu
bildirib. Natiq çıxışı zamanı vurğulayıb ki, Qazaxın ziyalılar yurdu olduğunu,
Azərbaycan Cümhuriyyətinin yaradılmasında payı olan qazaxlı ziyalıların
simasında da aydın şəkildə görmək olar.
Seminariyanın
90 yaşlı məzunu Nuşrəvan Xəlilov da tədbirdə söz alaraq keçmiş xatirələrindən
danışıb. Vaxtilə təhsil aldığı və Azərbaycan elminə, təhsilinə görkəmli
şəxsiyyətlər bəxş edən Qazax müəllimlər seminariyasının məzunu olduğu üçün bu gün
fəxr etdiyini və qürur hissi keçirdiyini bildirib.
"Şərq”
qəzetinin baş redaktoru Akif Aşırlı çıxış edərək tədbir iştirakçılarını
qarşıdan gələn Novruz bayramı münasibətilə səmimi qəlbdən təbrik edib. Bildirib
ki, bu gün cəmiyyətdə tutduğumuz yerlərdə vaxtilə Qazax müəllimlər
seminariyasının məzunları olmuş müəllimlərin çox böyük əməyi vardır. Bu gün biz
həmin uğurlara görə müəllimlərimizə, eləcə də həmin seminariyanın bizlərə
bəxş etdiyi təhsilə borcluyuq. Bu gün bizim uğurumuz həmin seminariyanın uğuru
deməkdir. A.Aşırlı bu gün həmin seminariyanı bitirən yüzlərlə elm, təhsil
adamının respublikamızın bütün bölgələrində gələcək nəsillərə təhsil verdiyini,
elm, bilik bəxş etdiyini diqqətə çatdırıb. Qeyd edib ki, bu gün ölkəmizdə
qazanılan bütün uğur və nailiyyətlərin arxasında təhsil dayanır. Ona görə də
hər kəs bilməlidir ki, gələcək nəsillərə, hər birimizə təhsil lazımdır.
"Ayna.az”
saytının təsisçisi Elçin Şıxlı qeyd edib ki, Qazax müəllimlər seminariyası
müstəqil Azərbaycan Respublikasının təhsil işçilərinə gənc nəslin
azərbaycançılıq məfkurəsi ruhunda yetişdirilməsi üçün zəngin irs qoyub. Vaxtilə
seminariyanın məzunları olmuş babasının və atasının xatirələrindən söz açan natiq
seminariyanın onun ailəsinin həyatında da dərin izlər qoyduğunu bildirib. Həmin
seminariyanın yetişdirdiyi müəllim və pedaqoji işçilərin bu gün də təhsilin
keşiyində dayandığını, gələcək nəsillərə, təhsil sahəsinə öz töhfələrini
verdiyini qeyd edib. Çıxış edənlər həmçinin
"Novruz mühazirələri”nin belə vacib məsələlərə həsr edilməsinin əhəmiyyətini
qeyd edib, seminariyanın xalqımızın milli özünüdərkinin formalaşmasındakı
rolunu vurğulayıblar. Sonra Təhsil
Nazirliyi və Qazax Rayon İcra Hakimiyyəti tərəfindən "Novruz mühazirəsi”
çərçivəsində Qazax müəllimlər seminariyasının məzunlarına bayram hədiyyələri
təqdim edilib. Əmək və Əhalinin Sosial Müdafiəsi Nazirliyinin Novruz bayramı ilə
əlaqədar tənha, ahıl və yaşlı insanları əhatə edən bayramlaşma kampaniyası
çərçivəsində seminariyanın məzunları olan Ağakişi İsmayılova, Nəbi Nəbiyevə,
Sürəyya Qurbanovaya, Nuşrəvan Xəlilova və Nümayəndə Hüseynovaya "DOST Xonçası”
təqdim olunub. Təhsil Nazirliyinin
şöbə müdirinin müavini Əsgər Quliyev tədbirə yekun vuraraq bu gün Qazaxda
tarixi bir günün yaşanmasına, bu cür yüksək səviyyəli tədbirin təşkilinə görə Təhsil
nazirliyinin, Qazax Rayon İcra Hakimiyyətinin və rayon Təhsil şöbəsinin
rəhbərliyinə tədbir iştirakçıları adından minnətdarlığını bildirib. Sonra tədbir
iştirakçıları tərəfindən rayondakı Şəhidlər xiyabanı ziyarət edilib. Vətən torpaqlarının ərazi
bütövlüyü uğrunda canından keçən igid oğul və qızlarımızın xatirəsi anılıb. Mühazirə iştirakçıları
daha sonra seminariyanın ilk binası ilə tanış olublar. Tarixi binanın
qarşısında Qazax Uşaq-Gənclər İnkişaf Mərkəzinin müəllimləri və dərnək üzvləri tərəfindən
hazırlanmış bayram tədbirində iştirak ediblər. Uşaqların söylədikləri qədim el bayramına
həsr olunmuş bayatıları, şeirləri dinləyiblər. Dərnək üzvlərinin
hazırladıqları bir-birindən rəngarəng çıxışlar alqışlarla qarşılanıb. Tədbir çərşənbə
tonqalının qalanması ilə başa çatıb. Tədbir
iştirakçıları səfər zamanı şəhərin məkəzində yerləşən və ötən il əsaslı
yenidənqurmadan sonra istifadəyə verilən 95 uşaq yerlik 3 saylı körpələr
evi-uşaq bağçasında da olublar. Bağçada körpələr balalar üçün yaradılan şəraiti
yüksək qiymətləndiriblər. GOYZEN.AZ
Facebook-da paylaş