Bu gün Qazax Rayon İcra Hakimiyyətinin başçısı Rəcəb Babaşov, Rayon Polis Şöbəsinin rəisi Ədalət Əliyev, Rayon Məhkəməsinin sədri Nemət Musayev, Fövqəladə Hallar Nazirliyi Gəncə Regional Mərkəzinin rəisi Asif Məmmədli Azərbaycan-Ermənistan dövlət sərhədinin Tovuz rayonu istiqamətində gedən döyüşlər zamanı düşmən hücumunun qarşısını alarkən yaralanmış çavuş İsmayılov Səyyar Şərif oğlunu evində ziyarət ediblər.

"Hər bir hərbçimiz bizim üçün doğmadır, əzizdir”, - deyən icra başçısı hərbçimizə sağ-salamat ailəsinin yanına qayıtmasına görə səmimi ürək sözlərini çatdırıb. Vətən uğrunda igidcəsinə döyüşən hərbçimizin səhhəti və qayğıları ilə maraqlanıb. Rayon rəhbəri ona tez bir zamanda sağalaraq döyüş yoldaşlarının yanına qayıtmağı və yenidən onlarla birlikdə olmağı arzulayıb.

2016-cı ilin Aprel döyüşlərində də iştirak etdiyini bildirən hərbçimiz Vətəni üçün döyüşdə yenə də öndə getməyə, ölkə başçısı, Ali Baş Komandan İlham Əliyevin "İrəli!” əmrini yerinə yetirməyə hazır olduğunu bildirib. S.İsmayılov qeyd edib ki, bir hərbçi kimi fərəhləndim, qürurlandım ki, arxamızda dövlətimiz və ölkə rəhbərimiz dayanıb. Dövlətin, dövlət başçısının qayğısını hər zaman hiss etdiyini qeyd edən S.İsmayılov xəstəxanada olduğu müddətdə bir daha bunun şahidi olduğunu dilə gətirib. O, xəstəxanada olan zaman ailəsinə baş çəkən, dəstək olan rayon rəhbərliyinə, hüquq-mühafizə orqanlarının rəhbərlərinə minnətdarlığını bildirib. S.İsmayılov həkimlərimizə minnətdarlıq etməyi də unutmayıb. O, başda Roman həkim olmaqla, Niyaməddin həkimə, Anar həkimə, Səxavət həkimə, eləcə də adlarını çəkə bilmədiyi həkimlərimizə, tibb işçilərimizə yaralı əsgər və zabitlərimizə göstərdikləri qayğıya, şəfqətə görə təşəkkürlərini çatdırıb.
Hərbçimizin qardaşı Sərdar İsmayılov isə qeyd edib ki, "Bu gün qardaşım da, mən də Vətən yolunda canımızdan keçməyə hazırıq. Çünki biz nə Vətənimizi, nə də düşmən gülləsi ilə üz-üzə dayanan soydaşlarımızı dar gündə tək qoya bilmərik. Bu gün hər birimiz bir nəfər kimi Vətən, el-oba uğrunda döyüşməyə hazır olmalıyıq”.
Hərbçimizin anası Fəranə İsmayılova da ailə üzvləri adından övladına göstərilən qayğıya görə ölkə Prezidentinə və rayon rəhbərliyinə razılığını ifadə edib.
GOYEZEN.AZ