Qazax: Milli Məclis Sədrinin müavini və rayon rəhbəri şəhidin ailəsinə baş çəkiblər
Respublika mətbuatı Qazax haqqında İyulun 13-dən 14-nə keçən gecə
və səhər saatlarında Azərbaycan-Ermənistan dövlət sərhədinin Tovuz rayonu
istiqamətində gedən döyüşlər zamanı düşmən hücumunun qarşısını alan zaman qəhrəmancasına
həlak olan hərbçimiz, 1984-cü il təvəllüdlü mayor Namiq Hajan oğlu Əhmədov
doğulduğu Qazax rayonunun Yuxarı Salahlı kəndində dəfn olunub. Azərbaycan Respublikası Milli
Məclisi Sədrinin müavini Adil Əliyev, Qazax Rayon İcra Hakimiyyətinin başçısı Rəcəb
Babaşov və başqaları şəhidin doğulduğu Yuxarı Salahlı kəndinə gələrək ata
ocağında olub, ailəsini ziyarət ediblər. Milli Məclis Sədrinin müavini
və digər qonaqlar şəhidimizə Allahdan rəhmət, ailə üzvlərinə səbr diləyiblər.
Son günlər Azərbaycan-Ermənistan dövlət sərhədinin Tovuz rayonu istiqamətində
gedən döyüşlərdə Azərbaycan Ordusunun göstərdiyi şücaətdən, qəhrəmanlıqdan söz
açan qonaqlar Azərbaycan xalqının hərbçilərimizlə qürur duyduğunu deyiblər. Vətən
uğrunda canından keçən bütün şəhidlərin, eləcə də Namiq Əhmədovun qanının yerdə
qalmayacağını, qisasının alınacağını vurğulayıblar. Bu gün Respublika
Prezidenti, Ali Baş Komandan İlham Əliyevin ətrafında sıx birləşərək onun "İrəli”
əmrini gözləyən güclü, qüdrətli Azərbaycan Ordusunun olduğunu və həmin ordunun
zəfər çalacağı tarixi günün elə də uzaqda olmadığını bir daha diqqətə
çatdırıblar. Övladı ilə hər zaman fəxr
etdiyini bildirən şəhid atası Hajan Əhmədov Vətən uğrunda canından keçən bütün
şəhidlərimizə Allahdan rəhmət diləyib. Hamlet QASIMOV, "Xalq qəzeti”nin bölgə müxbiri 17 iyul 2020-ci il
Facebook-da paylaş