Millət vəkili Səməd Seyidov Kosalar kəndində ağsaqqallarla görüşüb
Bu gün Milli Məclisin
deputatı Səməd Seyidov Qazax Rayon İcra Hakimiyyətinin başçısı Rəcəb Babaşov və köməkçisi
Akif Əmirovla birlikdə Kosalar kəndində ağsaqqallarla görüşüb. Ölkəmizdə
yaşanan çətin bir vəziyyətdə, həssas bir zamanda həmyerlilərinin yanında olmağı
özünə borc bildiyini dilə gətirib. İyulun
13-dən 14-nə keçən gecə və səhər saatlarında Azərbaycan-Ermənistan dövlət
sərhədinin Tovuz rayonu istiqamətində gedən döyüşlər zamanı Azərbaycan
Ordusunun göstərdiyi şücaətdən, hərbçilərimizin mətinliyindən, mübarizliyindən
söz açan deputat xalqımızın öz ordusu ilə hər zaman fəxr etdiyini qeyd edib. Döyüş
zamanı düşmən hücumunun qarşısını alarkən qəhrəmancasına şəhid olan hərbi
qulluqçu, rayonunun
Yuxarı Salahlı kənd sakini mayor Əhmədov
Namiq Hajan oğluna Allahdan rəhmət diləyib. Şəhidin ailə üzvlərinə və
bütün qazaxlılara bir daha başsağlığı verib. Vətən uğrunda canından keçən Namiq
Əhmədov kimi mayorlarımızın, hərbçilərimizin qanının yerdə qalmayacağını,
qisaslarının alınacağını qeyd edib. Ölkə Prezidenti, Ali Baş Komandan İlham
Əliyevin ətrafında sıx birləşərək onun "İrəli!” əmrini gözləyən Azərbaycan
Ordusunun qələbə qazanacağı günün uzaqda olmadığını bir daha diqqətə çatdırıb.
Deputat S.Seyidov son günlər ərzində
baş vermiş toqquşmaların və qanlı döyüşlərin Azərbaycan dövlətinin, ordusunun
gücünü, xalqla iqtidar arasındakı birliyini nümayiş etdirdiyini bildirib.
Deputat cəbhə bölgəsində yerləşən rayonlarımızın, o cümlədən də Qazaxın
mövcudluğunu, sabitliyini Azərbaycanın mövcudluğu, sabitliyi kimi qiymətləndirib.
S.Seyidov qeyd edib ki, ulu öndər Heydər Əliyev əbəs yerə demirdi ki, "Siz əziz qazaxlılar!
Burada həm öz torpağınızı, həm də Azərbaycanı qoruyursunuz. Siz bütün
Azərbaycan xalqının dayağısınız!” Deputat Ümummilli Liderin söylədiyi bu
dəyərli sözlərin bu gün də hər bir qazaxlı üçün şüar olduğunu bildirib.
Qazaxın, qazaxlıların hər zaman dövlətə, dövlətçiliyə sadiqlik nümayiş
etdirdiklərini vurğulayıb. Qazaxlılar olaraq, eləcə də hər bir vətəndaş olaraq
ölkə başçısına sədaqətimizi nümayiş etdirərək dövlətimizin və onun rəhbərinin
yürütdüyü siyasətə dəstək olmağı tövsiyə edib. S.Seyidov qeyd edib ki, mənfur düşmənimiz olan ermənilər
torpaqlarımızı işğal etdikləri kimi mənəviyyatımızı da işğal etməyə çalışır,
xalqımızın birliyini, həmrəyliyini pozacaq təxribatlara əl atırlar. Xaricdə
oturub ölkəmizə qənim kəsilən sapı özümüzdən olan baltalar dövlətimizin gücünə,
qüdrətinə kölgə salmağa, xalq-dövlət arasındakı birliyi sarsıtmağa cəhd edirlər.
Son günlər yaşananlar isə onu göstərdi ki, bizlər həm xaricdə oturub mənfur
düşmənlərimizə havadarlıq edənlərə, həm də daxilimizdə olub həmin insanların əmrlərini
yerinə yetirənlərə qarşı ikiqat mübarizə aparmalıyıq. Düşmənə imkan verməməliyik
ki, xalq-dövlət arasında uçurum yaradacaq təxribatlara kənardan baxıb sevinsinlər.
Bu sevinc hissini onlara yaşatmamalıyıq. Əksinə ölkəmizin, onun rəhbərinin ətrafında
bir yumruq kimi birləşərək əsl həmrəylik nümayiş etdirməliyik. Necə ki, Azərbaycan
xalqı hər zaman bu birliyi, həmrəyliyi qoruyub saxlaya bilib.
Qazax Rayon İcra
Hakimiyyətinin başçısı Rəcəb Babaşov çıxış edərək qazaxlıların hər zaman
dövlətimizin, ölkə Prezidentinin yanında olduğunu, ölkə rəhbərinin yürütdüyü
daxili və xarici siyasəti dəstəklədiyini bildirib. Bu amilin bundan sonra da
belə olacağını bir daha diqqətə çatdırıb. Kənd sakinlərindən Azərbaycan
Yazıçılar Birliyi Qazax zona filialının sədri, şair Barat Vüsal, Əməkdar məşqçi
Tariyel Nəsibov çıxış edərək bir ağsaqqal, ziyalı olaraq son günlər ölkəmizdə
yaşanan xoşagəlməz hadisəni birmənalı şəkildə pislədiklərini qeyd ediblər. Tez
bir zamanda içimizdəki düşmənlərin təmizlənməsini bildiriblər. Azərbaycan-Ermənistan
dövlət sərhədinin Tovuz rayonu istiqamətində gedən döyüşlərdə Azərbaycan
Ordusunun düşmən təxribatının qarşısını uğurla almasını qürur hissi ilə
qarşıladıqlarını, mərdlik, igidlik nümayiş etdirən əsgərlərimizlə,
hərbçilərimizlə, Vətənin azadlığı, torpaqlarımızın ərazi bütövlüyü uğrunda
canından keçən şəhidlərimizlə fəxr etdiklərini dilə gətiriblər. Bu gün bir
vətəndaş olaraq dövlətə və onun rəhbərinə, Ali Baş Komandan İlham Əliyevə arxalandıqlarını,
güclü dövlətin və Liderin olduğu müddətcə düşmənin heç nə edə bilməyəcəyini
söyləyiblər. Xalqın
çətin anında onların yanında olduğuna, dəstək göstərdiyinə və bu gün görüşə gəlib
qayğıları ilə maraqlandığına görə deputat Səməd Seyidova və rayon rəhbərinə
minnətdarlıqlarını bildiriblər. GOYEZEN.AZ
Facebook-da paylaş