Yuxarı Salahlı kəndində sakinlərlə səyyar görüş keçirilib
Bu gün Respublika
Prezidenti cənab İlham Əliyevin tapşırıq və tövsiyəsi əsasında keçirilən növbəti
səyyar görüş Qazax rayonunun Yuxarı Salahlı kəndində olub. Bugünkü görüşdə Azərbaycan Respublikası Prezident
Administrasiyasının məsul işçisi Orxan Mürsəlov da
iştirak edib. Aidiyyatı idarə, müəssisə və təşkilat rəhbərlərinin də iştirakı ilə təşkil
olunan görüşdə dövlət başçısının yürütdüyü məqsədyönlü siyasət, əhalinin
maddi rifah halının, sosial vəziyyətinin yaxşılaşdırılması istiqamətində verdiyi
tapşırıq və tövsiyələr, Birinci vitse-prezident Mehriban Əliyevanın
vətəndaşlara göstərdiyi diqqət və qayğı bir daha vurğulanıb və minnətdarlıq
hissi ilə qarşılandığı diqqətə çatdırılıb.
Qazax Rayon İcra Hakimiyyətinin
başçısı Rəcəb Babaşov sakinləri salamlayaraq Yuxarı Salahlı kəndində onuncu
dəfə görüşdüyünü qeyd edib. Şəhər və kəndlərdə keçirilən səyyar görüşlərin məqsəd
və əhəmiyyətindən söz açan rayon rəhbəri bu görüşlərin vətəndaşları narahat
edən məsələlərin həllinə yönəldiyini, həmin məsələləri öyrənərək operativ
şəkildə yerindəcə həll etmək, ehtiyac olduğu halda isə aidiyyatı təşkilatlar
qarşısında məsələ qaldırmaqdan ibarət olduğunu bildirib.
Rayon rəhbəri dövlət
başçısı tərəfindən istər ötən ilin sonları, istərsə də bu ilin əvvəllərində
həyata keçirilən iqtisadi islahatların birbaşa vətəndaş amilinə xidmət edən
islahatlar olduğunu qeyd edib. Həmin islahatların kökündə əhalinin maddi və
sosial rifah halının yaxşılaşdırılmasının dayandığını söyləyib. Ölkə rəhbərinin
iqtisadi islahat paketinin icrası ilə bağlı imzaladığı mühüm Fərman və
Sərəncamlardan danışan icra başçısı həmin Sərəncamlardan irəli gələn
vəzifələrin bu gün də layiqincə yerinə yetirildiyini bildirib. İyunun 18-də
imzalanan çoxsaylı Sərəncamların əhəmiyyətindən danışan rayon rəhbəri istər
minimum əməkhaqqının 180 manatdan 250 manata, istər minimum pensiyanın 160
manatdan 200 manata çatdırılmasını, istər təhsil, istərsə də digər sahələrdə
çalışan işçilərin əməkhaqlarının müvafiq olaraq 20 və 40 faiz artırılmasını
ölkə vətəndaşlarının rifah halının yaxşılaşdırılması istiqamətində atılan ən
uğurlu addımlar kimi dəyərləndirib. Xüsusilə də ödənişli əsaslarla təhsil alan
tələbələrə təqaüdlərin verilməsini gənclərə olan ən böyük dəstək kimi qeyd
edib. İcra başçısı vurğulayıb ki, oktyabrın 15-də Respublika
Prezidenti İlham Əliyevin yanında keçirilən iqtisadi müşavirə zamanı dövlət
başçısının nitqində sosial paketlə bağlı olan məsələlərə xüsusi həssaslıqla
yanaşılması bir daha sübut etdi ki, həmin paketin icrası bundan sonra da uğurla
həyata keçiriləcək.
Rayon rəhbəri Vətən torpaqlarının ərazi bütövlüyü uğrunda 287 nəfər şəhid
verən, 7 nəfər igid oğlu Azərbaycanın Milli Qəhrəmanı adını alan Qazaxda igid
oğul və qızlarımızın xatirələrinin hər zaman əziz tutulduğunu bildirib. Şəhidlərimizə,
onların ailə üzvlərinə olan qayğının həmişə yüksək səviyyədə olduğunu qeyd
edib. Şəhidlərimizin uyuduğu qəbiristanlıqların, onların xatirəsinə ucaldılmış
abidələrin, parkların, bulaqların, xiyabanların abadlaşdırılmasını, yenilənməsini,
əsaslı şəkildə təmir edilməsini şəhidlərimizə olan ehtiramın bariz nümunəsi
olduğunu vurğulayıb. Şəhərin mərkəzində yerləşən Şəhidlər xiyabanını, orada
aparılan abadlıq işlərini, ən əsası da şəhidlərimizin adı və şəkli əks olunmuş
lövhənin vurulmasını şəhidlərimizin ruhu qarşısında edilən ən yüksək əməl kimi
dəyərləndirib. İcra başçısı hər zaman Azərbaycana bəxş etdiyi saysız-hesabsız
ziyalıları ilə tanınan Yuxarı Salahlı kəndində həm də mərd oğul və qızların yetişdiyini,
zaman-zaman düşmənə sinə gərən qəhrəman döyüşçülərin də olduğunu qeyd edib. Bu
gün Vətən torpaqları bütöv olsun deyə Yuxarı Salahlı kəndinin 12 nəfər şəhid
verdiyini bildirib. Rayon rəhbəri həmin qəhrəman oğullardan Aprel şəhidi Elvin
Namazovun adını çəkərək onun timsalında bütün şəhidlərin xatirəsinin daim yüksəkdə
tutulacağını bir daha diqqətə çatdırıb.
Rayon
rəhbəri son illər respublikamızda, eləcə də Qazaxda geniş vüsət alan
abadlıq-quruculuq işlərindən, işsizliyin aradan qaldırılması, minimuma
endirilməsi istiqamətində həyata keçirilən məqsədyönlü tədbirlərdən və qarşıda
duran vəzifələrdən də danışıb.
Ölkə rəhbərinin diqqət və
qayğısı, verdiyi tapşırıq və tövsiyələr sayəsində aqrar sektorun inkişaf
etməsinin, xüsusilə də kənd təsərrüfatı və sənayeləşmə ilə bağlı aparılan
uğurlu islahatların bu gün ölkəmizin iqtisadiyyatına böyük töhfələr verdiyini qeyd
edib. İcra başçısı Qazaxda istər şəhər
mərkəzində, istərsə də kəndlərdə yerləşən və açılışları nəzərdə tutulan
”Azərxalça” ASC tərəfindən tikilən xalça müəssəsinin, ”Mətanət A” şirkəti
tərəfindən inşa edilmiş Əhəng zavodunun, İkinci Şıxlı kəndində ”İnvestel GROUP”
MMC tərəfindən tikilən "Qazax Aqropark”ın, "Gedik-Carçı Qaynaq” MMC tərəfindən
inşa edilən "Gedik-Carçı” Elektrod Zavodunun istifadəyə
verilməsini işsizliyin aradan qaldırılması istiqamətində həyata keçirilən
məqsədyönlü işlər kimi qiymətləndirib. Azərbaycanda ilk dəfə olaraq Qazaxda
inşa olunan "Gedik-Carçı” Elektrod Zavodunu rayonda sənayeləşmə
sahəsində əldə olunan ən böyük uğur kimi qiymətləndirib. "Saloğlu” fərdi
mebel firması tərəfindən yeni tikilən fabrikin inşasını işsizliyin aradan
qaldırılmasında atılan ən uğurlu addım kimi göstərib. Bundan başqa, rayon
mərkəzi xəstəxanasının tikintisinin yüksək səviyyədə başa çatdırılmasını,
hazırda su-kanalizasiya xəttinin və Gəncə-Qazax-Gürcüstan dövlət sərhəddi
avtomobil yolunun çəkilməsini rayon sakinlərinin də razılıq hissi ilə
qarşıladıqlarını diqqətə çatdırıb və bir daha sakinlər adından ölkə başçısına
minnətdarlığını bildirib. Rayon rəhbəri dövlət
başçısının diqqət və qayğısı sayəsində respublika və yerli əhəmiyyətli yeni
asfalt yolların çəkilməsi bağlı imzaladığı çoxsaylı Sərəncamların Qazaxda da
uğurla icra olunduğunu, son illər rayonun Qazaxbəyli-Orta
Salahlı-Aşağı Salahlı, Yuxarı Salahlı-Kəmərli, Kosalar, Quşçu Ayrım, Canalı,
Çaylı, Bala Çaylı, Hüseynbəyli, Cəfərli, Daş Salahlı-Ürkməzli-Dəmirçilər kəndlərinə yeni asfalt
yolların çəkilməsini bu sahədə görülən işlərin əyani sübutu olduğunu qeyd edib.
Rayon rəhbəri qəbul edilmiş 5 illik Dövlət Proqramında müxtəlif illər üzrə rayonun İkinci Şıxlı, Ağköynək,
Qarapapaq, Fərəhli, Xanlıqlar kəndlərində də yeni asfalt yol çəkilişlərinin
salınmasını bu sahədə görülən işlərin bundan sonra da uğurla davam etdirilməsi
kimi qiymətləndirib.
İcra başçısı son 3 ildə
bağçalarla bağlı görülən işlərdən də söhbət açıb. Bu gün rayonda şəhər və
kəndlər üzrə mövcud olan 25 uşaq bağçasından 21-nin yüksək səviyyədə təmir
olunmasını körpələrə olan dövlət qayğısının ən bariz nümunəsi kimi
dəyərləndirib. İcra başçısı qeyd edib ki, bu gün
bir neçə kənd var ki, bağçanın açılmasına böyük ehtiyac var. Yuxarı Salahlı kəndi
də həmin kəndlər sırasındadır və bu sahədə məqsədyönlü işlərin görülməsi nəzərdə
tutulub.
"Azərbaycan
Respublikası regionlarının 2019–2023-cü illərdə sosial-iqtisadi inkişafı Dövlət
Proqramı”nın həyata keçirilməsi üzrə hazırlanmış tədbirlər
planında əksini tapan məsələlərdən danışan icra başçısı Kür çayının
ətrafında sahilbərkitmə işlərinin aparılması, torpaq məcralı arxların beton
üzlüyə alınması, yeni məktəb binalarının inşa olunması, yeni asfalt yolların
çəkilməsi, subartezian quyularının qazılması, SİP kabelləşmə işinin başa
çatdırılması kimi bir çox məsələlərin həmin proqrama salındığını
bildirib.
Sakinlərdən Məhəmməd
Vəkilov, Kərim Muradov, Şərif Kalayev, Abdulla Məmmədov, Məmləkət Quliyeva və
başqaları çıxış edərək onlarla mütəmadi olaraq görüşə gəldiyinə, daim diqqət və
qayğı göstərdiyinə görə rayon rəhbərliyinə minnətdarlıqlarını çatdırıblar. Dövlət
başçısının yürütdüyü daxili və xarici siyasəti hər zaman dəstəklədiklərini və
son illər aparılan uğurlu islahatları yüksək qiymətləndirdiklərini dilə
gətiriblər. Son 3 ildə rayonda, eləcə də Yuxarı Salahlı kəndində görülən
işlərin hər bir qazaxlının ürəyincə olduğunu bildiriblər. Kənddə məktəb
binasının əsaslı təmirini təhsil sahəsinə verilən ən yüksək qiymət, gələcəyimiz
olan uşaqlara olan diqqət və qayğı kimi göstəriblər. Bu gün dövlət başçısı və
rayon rəhbərliyi tərəfindən görülən işləri, vətəndaşlara olan qayğını, səmimi
münasibəti minnətdarlıq hissi ilə qarşıladıqlarını söyləyiblər. Ölkəmizdə vətəndaşlara göstərilən diqqət və qayğıya
görə cənab Prezident İlham Əliyevə sakinlər adından təşəkkürlərini çatdırıblar.
Görüşdə sakinlər kənddə SİP
kabelləşmə işinin aparılması, selötürücü kanalın beton üzlüyə alınması ilə
bağlı və müxtəlif səpkili müraciətlər ediblər. Vətəndaşların müraciətlərini
diqqətlə dinləyən rayon rəhbəri səslənən hər bir
məsələyə həmişə olduğu kimi bu dəfə də həssaslıqla yanaşılacağını bildirib. Qeyd
olunan məsələlərin 5 illik Dövlət Proqramında əksini tapdığını vurğulayıb. GOYEZEN.AZ
Facebook-da paylaş