BDU-nun Qazax filialında Xalq yazıçısı İsmayıl Şıxlının anadan olmasının 100 illiyinə həsr olunmuş elmi-praktik konfrans keçirilib - YENİLƏNİB
Bu gün Qazax Rayon İcra Hakimiyyətinin təşəbbüsü ilə Bakı Dövlət
Universitetinin Qazax filialında Azərbaycan ədəbiyyatının görkəmli nümayəndəsi,
istedadlı nasir, tanınmış ədəbiyyatşünas, pedaqoq və ictimai xadim, Xalq
yazıçısı İsmayıl Şıxlının anadan olmasının 100 illiyinə həsr olunmuş
elmi-praktik konfrans keçirilib. Filialın Heydər Əliyev auditoriyasında keçirilən konfransda Qazax Rayon
İcra Hakimiyyətinin başçısı Rəcəb Babaşov, icra aparatının məsul işçiləri, Xalq
yazıçısının övladları, Ayna.az saytının və Ayna tv-nin təsisçisi Elçin Şıxlı, rəssam,
jurnalist, "Ayna" - "Zerkalo" qəzetlərinin məsul katibi Fərrux Şıxlı, filologiya elmləri doktoru, professor Rüstəm Kamal, filialın
direktoru, dosent Arif Rüstəmov və müəllim-tələbə kollektivi, idarə, müəssisə və təşkilat
rəhbərləri, görkəmli
şəxsiyyət İsmayıl Şıxlının 100 illik yubiley tədbirinin yüksək səviyyədə təşkil
olunması məqsədilə rayon rəhbərinin müvafiq sərəncamına əsasən yaradılmış işçi
qrupunun üzvləri, ziyalılar, ağsaqqallar, KİV nümayəndələri iştirak ediblər. Qonaqlar
əvvəlcə filialın foyesində Xalq yazıçısının həyat və yaradıcılığını özündə əks
etdirən kitab sərgisi ilə tanış olublar. Sonra qonaqlara
və konfrans iştirakçılarına Qazax Rayon İcra Hakimiyyəti tərəfindən Xalq
yazıçısı İsmayıl Şıxlının 100 illik yubileyi münasibətilə hazırlanmış xatirə
hədiyyələri təqdim olunub. BDU Qazax
filialının direktoru, dosent Arif Rüstəmov konfransı giriş sözü ilə açaraq qonaqları
və konfrans iştirakçılarını salamlayıb, ən xoş ürək sözlərini çatdırıb.
Azərbaycan ədəbiyyatında misilsiz xidmətləri olan Xalq yazıçısı İsmayıl
Şıxlının 100 illik yubileyinin respublika səviyyəsində keçirilməsi ilə bağlı
ölkə başçısı İlham Əliyev tərəfindən imzalanmış 28 yanvar 2019-cu il tarixli
sərəncamı qazaxlı ziyalılara, xüsusilə də ədəbiyyat sahəsində olan insanlara
verilən ən böyük dəyər kimi qiymətləndirib. Bu tarixi əhəmiyyətli sərəncamın
imzalanmasına görə rayon ziyalıları, eləcə də konfrans iştirakçıları adından
minnətdarlığını çatdırıb. Azərbaycan mədəniyyətinin dünya çapında tanınmasında,
təbliğ olunmasında misilsiz xidmətləri olan Azərbaycan Respublikasının Birinci
vitse-prezidenti Mehriban xanım Əliyevaya dərin təşəkkürlərini bildirib. İsmayıl Şıxlı
yaradıcılığından, xüsusilə də Azərbaycan ədəbiyyatındakı əvəzolunmaz
xidmətlərindən söz açan filialın direktoru bildirib ki, bu gün hər bir
azərbaycanlı görkəmli şəxsiyyətin yubiley tədbirini əlamətdar hadisə kimi qeyd
edir. Hər bir qazaxlı, İsmayıl Şıxlı məktəbinin yetirmələri olan insanlar bu
tədbiri böyük ruh yüksəkliyi ilə qarşılayır və öz töhfəsini verməyə çalışır.
Qeyd edib ki, bu gün filialda keçirilən konfrans da Qazaxda yubileylə bağlı
keçirilən silsilə tədbirlərin davamıdır. Qazax Rayon İcra
Hakimiyyətinin başçısı Rəcəb Babaşov konfransda çıxış edərək bildirib ki, ölkə başçısı İlham Əliyevin İsmayıl Şıxlı
yaradıcılığına böyük qiymət verməsi, Xalq yazıçısının 100 illik yubileyinin
qeyd olunması ilə bağlı imzaladığı sərəncam bu gün bütün qazaxlılar tərəfindən
böyük rəğbət və sevinc hissi ilə qarşılanır. Azərbaycan təhsilinin inkişafında
xüsusi yeri olan Qazax müəllimlər seminariyasının 100 illik yubileyinin yüksək
səviyyədə qeyd olunması ilə bağlı 3 noyabr 2018-ci il tarixli sərəncamdan sonra
Xalq yazıçısının 100 illik yubileyi ilə əlaqədar növbəti dəyərli sərəncamın
imzalanmasına görə Respublika Prezidenti İlham Əliyevə bütün rayon ictimaiyyəti
və ziyalılar adından bir daha öz dərin minnətdarlığını çatdırıb. İcra başçısı qeyd edib ki, ölkə rəhbərinin imzaladığı hər iki sərəncam
həm elmə, təhsilə, ədəbiyyat sahəsinə verilən dəyər, həm də qazaxlı ziyalılara
olan böyük hörmət və ehtiramın ən bariz nümunəsidir. Rayon rəhbəri vurğulayıb ki,
vaxtilə ulu öndər Heydər Əliyevin qiymət verdiyi, bu gün ölkə rəhbərinin yüksək
dəyər verdiyi insan haqqında söz demək, onu tanıtmaq kimi bir şansımız var.
Bununla hər bir qazaxlı fəxr edir. Ən təqdirəlayiq haldır ki, bu şansı bizlərə yenə
də ölkə başçısı öz sərəncamı ilə bəxş edib. İcra başçısı çıxışında
diqqətə çatdırıb ki, dövlət başçısının İsmayıl Şıxlı şəxsiyyətinə və
yaradıcılığına verdiyi dəyər imzaladığı sərəncamda da öz əksini tapır. Bəli, sərəncamda
qeyd olunduğu kimi İsmayıl Şıxlı koloritli xarakterlər və yüksək
mənəvi-əxlaqi keyfiyyətlərə malik surətlərlə zəngin yaradıcılığı ilə Azərbaycan
xalqının bədii fikir salnaməsinə yeni parlaq səhifə yazmış söz ustalarındandır.
Ədibin məşhur "Dəli Kür” romanı ictimai şüurda dönüşə və özünüdərkə yol
açan mühüm ədəbi-mədəni hadisə kimi qiymətləndirilmişdir. Sənətkarın klassik irsin
ənənələrini davam etdirməklə və folklor xəzinəsindən bəhrələnməklə meydana
gətirdiyi əsərlərdə dərin həyat fəlsəfəsi öz dolğun ifadəsini tapmışdır.
Üslubun mükəmməlliyi, bədii dilin obrazlılığı, daxili aləmin təsvirinin
genişliyi və əlvanlığı İsmayıl Şıxlı nəsrinə xas olan səciyyəvi cəhətlərdir.
Taleyüklü məsələlərə münasibətdə daim vətəndaş ziyalı mövqeyi nümayiş etdirmiş
İsmayıl Şıxlının fəaliyyəti bütövlükdə azərbaycançılıq məfkurəsinə sədaqətin və
ənənəvi dəyərlərə ehtiramın bariz nümunəsidir. Rayon rəhbəri dövlət
başçısının imzaladığı həmin ali sərəncama əsasən yubiley tədbirinin Qazaxda da yüksək
səviyyədə qeyd olunması üçün 15 fevral 2019-cu il tarixli 9-21/34 nömrəli
sərəncam imzalandığını, həmin sərəncamla rayonun sayılıb-seçilən ziyalılarından
ibarət işçi qrupunun yaradıldığını, lazımi hazırlıq tədbirlərinin görüldüyünü,
tədbirlər planının hazırlandığını diqqətə çatdırıb. İcra başçısı yubiley
tədbirinin yüksək səviyyədə təşkili ilə bağlı 14 fevral, 13 mart və 8 aprel
2019-cu il tarixlərində rayon ziyalılarının, ağsaqqallarının, Xalq yazıçısının
yaxınlarının iştirakı ilə geniş tərkibdə müşavirələrin keçirildiyini, 15
apreldə tədbirlər planına əsasən Xalq yazıçısının 100 illik yubileyi
münasibətilə Qazax Rayon İcra Hakimiyyəti tərəfindən İkinci Şıxlı kəndində
"Ağalıq düzü” deyilən və Xalq yazıçısının babalarının yurd yeri olan
ərazidə alma və ərik ağaclarından ibarət meyvə bağının salındığını, yubileylə
bağlı xatirə hədiyyələrinin hazırlandığını qeyd edib. Rayon rəhbəri yubileylə
bağlı həyata keçirilən tədbirlərin silsiləli şəkildə davam etdiyini bildirərək
görülməsi nəzərdə tutulan işlərdən də danışıb. Xalq yazıçısı haqqında film
çəkilməsini, rəsm və məqalə müsabiqələrinin keçirilməsini, görkəmli şəxsiyyətin
adını daşıyan Kosalar kənd tam orta məktəbin qarşısında büstünün qoyulmasını,
eləcə də digər tədbirlərin həyata keçirilməsini bu istiqamətdə görülən işlərin
uğurla davam etdirilməsi kimi dəyərləndirib. İsmayıl Şıxlı yaradıcılığının
gələcək nəsillərə çatdırılmasında bu cür konfransların keçirilməsinin böyük
əhəmiyyət daşıdığını bildirib və konfransın işinə uğurlar arzulayıb. Sonra Xalq yazıçısı İsmayıl Şıxlının həyat və
yaradıcılığını, əsərlərini özündə əks etdirən slayd nümayiş olunub. Azərbaycan Yazıçılar Birliyi Qazax zona
filialının sədri, Əməkdar incəsənət xadimi, şair Barat Vüsal "Ədəbiyyatın və əbədiyyətin İsmayıl Şıxlı zirvəsi” adlı
məruzə ilə çıxış edərək görkəmli şəxsiyyətin Azərbaycan ədəbiyyatındakı
misilsiz xidmətlərindən söz açıb. Xalq yazıçısı ilə bağlı xatirələrindən
danışıb. Filologiya elmləri doktoru, professor Rüstəm
Kamal "İsmayil Şıxlı nəsrinin poetikası” mövzusunda çıxış edərək əsərlərində,
xüsusilə də "Dəli Kür” romanında olan obrazların ətraflı şəkildə izahını verərək
konfrans iştirakçılarına yazıçının nə demək istədiklərini çatdırıb. Qeyd edib
ki, İsmayıl Şıxlının yuxuları belə real həyatın gerçəkliklərini özündə əks
etdirir. Yazıçı öz yuxularını oxucuya real hadisə kimi təqdim edir. Bunu əsərlərindəki
obrazların timsalında da aydın şəkildə görmək olur. Professor vurğulayıb ki, "Dəli
Kür” romanında Cahandar ağanın bacısını yuxuda görməsi səhnəsi romanın ən möhtəşəm
səhnəsidir. Bildirib ki, İsmayıl Şıxlı mənəvi yaddaşımızın əbədi obrazıdır. Nə
qədər bu millət var, həmin obraz daim yaddaşlarda canlanacaq, qəlblərdə
yaşayaraq xoş xatirələrlə anılacaq. Filialın dillər, ədəbiyyat və onların tədrisi
metodikası kafedrasının müdiri, filologiya üzrə fəlsəfə doktoru İradə Arıxova
"İsmayıl Şıxlının elmi-pedaqoji fəaliyyəti”, kafedranın müəllimi Türkan Məmmədova
"İsmayıl Şıxlının "Öləm dünyam” əsərində mənəviyyat məsələləri”, AYB-nin üzvü,
şair Mustafa Rasimoğlu "İsmayıl Şıxlının yaradıcılığında millilik və şəxsiyyət
anlayışı”, tələbələrdən – sosial iş ixtisasının I kurs tələbəsi Musa Paşazadə
"İsmayıl Şıxlı yaradıcılığında kinomatoqrafiya”, Azərbaycan dili və ədəbiyyat
müəllimliyi ixtisasının III kurs tələbələri Nicat Bədəlov "Cahandar ağa
obrazına yeni baxış”, Elnarə Bənnayeva "İsmayıl Şıxlının "Namus qaçağı” əsərindəki
Qaçaq Süleyman obrazı gənclərin gözü ilə”, Tahirə Məmmədova "İsmayıl Şıxlının
yaradıcılığında milli adət-ənənələr” mövzularında çıxış ediblər. Çıxış edənlər
Xalq yazıçısının əsərlərini, eləcə də əsərlərdəki obrazları əhatəli şəkildə
izah edərək ədəbiyyatımıza bəxş etdiyi saysız-hesabsız töhfələrdən danışıblar. Qeyd
ediblər ki, o, öz əsərlərində həmişə Vətəninin, millətinin mənəvi əxlaq
dünyasını zənginləşdirməyə çalışmışdır. O, öz əsərləri ilə İsmayıl Şıxlı
dastanı yaratmışdır. Çıxış edənlər vurğulayıblar ki, əgər bu gün Azərbaycan ədəbiyyatını
xalçaya bənzətsək, tam əminliklə deyə bilərik ki, İsmayıl Şıxlı həmin xalıya vurulmuş
ən gözəl naxışdır. Xalq yazıçısının oğlu Elçin Şıxlı çıxış edərək
atasının 100 illik yubiley tədbirinin belə yüksək səviyyədə keçirilməsi üçün
imzaladığı sərəncama görə ölkə prezidenti İlham Əliyevə ailəsi adından minnətdarlığını
çatdırıb. Atasının doğulduğu doğma Qazax yurdunda yubiley tədbirinə xüsusi
hazırlıq işlərinin aparılmasına, belə yüksək səviyyəli tədbirlərin, konfrasın keçirilməsinə
görə rayon rəhbərliyinə, BDU Qazax filialının kollektivinə təşəkkürlərini
çatdırıb. Atası ilə bağlı xatirələrindən danışan E.Şıxlı qeyd edib ki, atamın
arzusu idi ki, Qazaxda ali təhsil müəssisələrinin filialları olsun. Bu gün çox
şadam ki, əsas təhsil ocağımız olan Bakı Dövlət Universitetinin Qazaxda filialı
fəaliyyət göstərir və gələcəyimiz olan gənclərə ən yüksək səviyyədə elm, bilik
öyrədilir. Bu təhsil ocağında əsl vətəndaş yetişdirilir.
Facebook-da paylaş