Gənclərin İnkişaf və Karyera Mərkəzinin Qazax nümayəndəliyinin ilin yekunlarına dair hesabat konfransı keçirilib
Dekabrın 29-da Gənclərin İnkişaf və Karyera Mərkəzinin
Qazax nümayəndəliyinin cari ilin yekunlarına dair hesabat konfransı keçirilib. Qazax Gənclər Evində keçirilən konfransda yerli dövlət
qurumlarının rəsmiləri, qazilər, könüllülər və aktiv gənclər iştirak
ediblər. Tədbirdə əvvəlcə Ulu Öndər Heydər Əliyevin və Vətən uğrunda
canından keçən şəhidlərin əziz xatirəsi bir dəqiqəlik sükutla yad edilib. Gənclərin İnkişaf və Karyera Mərkəzinin Qazax
nümayəndəliyinin direktoru İsmayıl Süleymanov tədbiri giriş sözü ilə açaraq iştirakçıları
salamlayıb, qarşıdan gələn 31 dekabr – Dünya Azərbaycanlılarının Həmrəyliyi
Günü və Yeni il münasibətilə təbrik edib, ən xoş arzularını çatdırıb. Ölkə
Prezidenti İlham Əliyevə, Birinci vitse-prezident Mehriban Əliyevaya, Qazax
Rayon İcra Hakimiyyətinin başçısı Rəcəb Babaşova gənclərə göstərilən yüksək
dövlət qayğısına görə rəhbərlik etdiyi kollektiv və gənclər adından minnətdarlığını
bildirib. İ.Süleymanov yaranmasından 2 il müddət keçməsinə baxmayaraq gənclər
təşkilatı olaraq hər zaman onlara göstərilən etimadı doğrultmaq üçün böyük
səylə çalışdıqlarını, bundan sonra da əllərindən gələni əsirgəməyəcəklərini
qeyd edib. Qurum üçün uğurlu keçən 2021-ci ildəki fəaliyyətləri haqqında illik
statistik məlumatları diqqətə çatdıran İ.Süleymanov bildirib ki, il ərzində
bir-birindən fərqli, faydalı 306 fəaliyyət həyata keçirilib və bu fəaliyyətlərə
5317 nəfər gənc cəlb olunub. GİKM
Qazax nümayəndəliyində fəaliyyət göstərən klublar barədə məlumat verən
İ.Süleymanov bildirib ki, cari ildə 43 "Kitab klubu” təşkil edilib ki,
burada yerli və dünya ədiblərinin əsərlərinin müzakirələri təşkil olunub. "Kino
klubu” 46 dəfə bir araya gəlib ki, bu görüşlərdə ümumilikdə 453 nəfər gənc
iştirak edib. "Müzakirə klubu” çərçivəsində 4 görüş keçirilib ki, burada gənclərin
ideya və təklifləri dinlənilərək, aylıq fəaliyyətlərin hazırlanmasında nəzərə
alınıb. "Vətənpərvərlik klubu”nun üzvlərinin iştirakı ilə Vətən müharibəsi
şəhidlərinin ailələrinə, qazilərinin evlərinə ziyarətlər təşkil olunub. "Sosial
fəaliyyətlər klubu”nun üzvləri tərəfindən müxtəlif əlamətdar günlərdə
aksiyalar, fleşmoblar təşkil edilib ki, bu məqsədlə, ümumilikdə 12 fəaliyyət
icra edilib. "İdman klubu”nun üzvləri 9 dəfə bir araya gəliblər. Klub üzvləri
müxtəlif günlərdə futbol, şahmat və digər əyləncəli oyunlar oynayıblar. İl
ərzində "İntellektual oyunlar klubu” 3 yarış təşkil edib ki, burada da
ümumilikdə 110 nəfər gənc iştirak edib. "Eko klub” üzvləri küçə heyvanlarına
qayğı göstərərək, müxtəlif iməclik işlərində iştirak ediblər (3 fəaliyyət – 23
nəfər). "Əyləncə klubu”nda gənclər 1 dəfə bir araya gəlib və burada
müxtəlif əyləncəli oyunlar və enercayzerlərlə asudə vaxtlarını səmərəli dəyərləndiriblər. Mərkəz
direktoru 2021-ci il ərzində təqvimdə olan əlamətdar günlərlə bağlı bir sıra tədbirlərin
təşkil olunduğunu qeyd edib. 20 Yanvar – Ümumxalq Hüzn Gününə, 2 Fevral - Gənclər
Gününə, 26 Fevral - Xocalı Soyqırımının 29-cu ildönümünə, 5 Mart - Bədən Tərbiyəsi
və İdman Gününə, 10 Mart - Milli Teatr Gününə, Novruz bayramına, 28 May - Müstəqillik Gününə, 1 Avqust - Ana Dili Gününə, 18 Sentyabr - Milli Musiqi
Gününə, 18 Oktyabr - Müstəqilliyin Bərpası Gününə həsr olunmuş silsilə tədbirlərin
keçirildiyini diqqətə çatdırıb. İ.Süleymanov
vurğulayıb ki, cari il ərzində gənclər "VətənimİZ” silsilə fəaliyyətlər çərçivəsində Vətən müharibəsi şəhidlərinin məzarlarını
ziyarət edib. Belə ki, bütün Vətən müharibəsi şəhidlərinin məzarları 14 fəaliyyət
çərçivəsində ziyarət edilib ki, bu ziyarətlərdə ümumilikdə 99 nəfər gənc
iştirak edib. Həmçinin Vətən müharibəsi şəhidlərinin vikipediya məlumatları
hazırlanıb və yerləşdirilib. GİKM
Qazax nümayəndəliyinin təşkilatçılığı ilə bir sıra silsilə təlimlər təşkil
olunub ki, bunlardan "GələcəyimİZ”, "İçindəki səni kəşf et”, "Şəxsi
inkişaf təlimləri” göstərə bilərik. "Həmrəy könüllü” layihəsi
çərçivəsində gənclər 3 görüş keçirib. Bu görüşlər Gədəbəy və Sabirabad gəncləri
ilə onlayn, "Aqrar İnkişaf Könüllüləri” ilə isə fiziki olaraq reallaşdırılıb. Nümayəndəlik
Azərbaycan Yazıçılar Birliyinin Qazax zona filialı ilə sıx əməkdaşlıq şəraitində "ƏdiblərimİZ” layihəsi çərçivəsində 6 görüş təşkil edib ki, bu görüşlərdə yerli şair və
yazıçılarımızla gənclər bir araya gəlib. "Bizim müəllim” layihəsi çərçivəsində gənclərin orta ümumtəhsil və ali məktəb müəllimləri
ilə görüşləri 4 dəfə təşkil olunub. Bu formatda olan 4 görüş isə sonradan "Bizdən
sonra siz” başlığı altında təşkil olunub. "Bərabər hüquqlarımız” layihəsi çərçivəsində gender bərabərliyi, məişət
zorakılğı mövzularında Ailə, Qadın, Uşaq Problemləri üzrə Dövlət Komitəsi ilə
bir neçə onlayn görüşlər təşkil olunub (4 təlim, 94 nəfər). "Hüququm və qaydalarım” layihəsi çərçivəsində Ombudsman Gəncə
Regional Mərkəzi və bir sıra hüquqşünaslarla gənclərin hüquqi biliklərinin
artırılması istiqamətində təlimlər təşkil olunub (6 tədbir, 220 nəfər). Gənclər
üçün bazar araşdırması, müsahibəyə hazırlıq, CV hazırlanması, iş həyatına
hazırlıq məqsədilə "Karyeram” layihəsi çərçivəsində 4 təlim təşkil olunub ki,
burada ümumilikdə 90 nəfər gənc iştirak edib. Bu mövzuda digər tədbirlər "Uğurlu
karyera yolunda” başlığı altında təşkil edilib. (3 təlim, 114 nəfər) Həmçinin,
nümayəndəliyin yer aldığı zonanın təcrübəçi könüllüləri üçün pilot olaraq,
onlayn şəkildə İngilis dili kursları təşkil olunub ki, (8 dərs), burada 64 gənc
iştirak edib. Ulu
Öndər Heydər Əliyevin Azərbaycançılıq məfkurəsinin gənclər arasında təbliği məqsədilə
müxtəlif qurumlarla, o cümlədən, Qazax Dövlət Sosial-İqtisadi Kolleci ilə bir
sıra görüşlər təşkil olunub. 2
dəfə "Qonağımız
var” adı altında müxtəlif sahələrdə uğur qazanmış şəxslərlə gənclərin
görüşləri təşkil olunub. Sonradan bu tipli tədbirlər "Uğurunu paylaş” adı
altında davam etdirilib. İ.Süleymanov
bildirib ki, gənclər arasında narkomaniya və digər zərərli vərdişlərin
qarşısının alınması məqsədilə keçirilən maarifləndirici tədbirlər xüsusi yer
tutur. Ombudsman Gəncə Regional Mərkəzinin, Qazax Rayon Polis Şöbəsinin, səhiyyə
şöbəsinin yaxından tərəfdaşlığı ilə "Təmiz nəfəs – Sağlam həyat”, "Sağlam gəncliyimİZ” adı altında keçirilən tədbirlər bunun bariz nümunəsidir. Bundan
əlavə, gənclərin fiziki-psixi sağlamlıqlarının qorunması məqsədilə Səhiyyə
Nazirliyinin və Qazax Rayon Mərkəzi Xəstəxanası Publik Hüquqi Şəxsin əməkdaşlarının
iştirakı ilə "Sağlam OL” başlığı altında təşkil olunan maarifləndirici tədbirlər
bu sahədə atılan uğurlu addımlardır. Psixoloq Kəmalə Cəfərovanın iştirakı ilə "Biz
səninləyik” başlığı altında təşkil olunan tədbirdə gənclərə erkən
nikahların mənfi fəsadları, qadınlara qarşı törədilən cinsi diskriminasiya, məişət
zorakılığı, zorakılıq hallarının aşkarlanması və qarşısının alınması barədə ətraflı
məlumatlar verildiyini qeyd edib. Gənc
rəssam Aysan Omarova tərəfindən sentyabr ayından başlayaraq, dörd ay ərzində,
ayda bir dəfə olmaqla gənclər üçün "Art Mən” proqramı çərçivəsində
rəssamlıq, bədii keramika və mozaika mövzuları üzrə ustad dərslərinin təşkil
olunduğunu söyləyib. 5
Dekabr - Beynəlxalq Könüllülər Günü münasibətilə baş ofis tərəfindən təşkil
olunan, 7 tur davam edən və bütün nümayəndəliklərin komandalarının iştirakı ilə
"BİL” – Birlik İntellekt Liqası keçirilib ki, burada Qazaxın "Sarkazm”
komandası II yerə layiq görülüb. "ZəfərimİZ” layihəsi çərçivəsində gənclərin Hərbi Qənimətlər Parkına onlayn
turu, "Qələbənin memarları" adlı görüş, "Şanlı ZəfərimİZ gənc rəssamların
gözü ilə" başlığı altında rəsm müsabiqəsi və Vətən müharibəsi şəhidlərinin
xatirəsinə ucaldılmış abidənin ziyarəti təşkil olunub. Ulu
Öndər Heydər Əliyevin anım günü ərəfəsində "Ulu öndər və GəncliyimİZ” layihəsi
çərçivəsində BDU-nun Qazax filialında "Heydər Əliyev və gənclər siyasəti"
başlığı altında dəyirmi masa, millət vəkili Səməd Seyidovla Heydər Əliyevin əsasını
qoyduğu gənclər siyasətinə həsr olunmuş görüş təşkil olunduğunu, Ümummilli Liderin
abidəsinin ziyarət edildiyini diqqətə çatdırıb. İ.Süleymanov
gənclərin il ərzində bir sıra beynəlxalq layihələrdə də iştirak etdiyini qeyd edib.
Azərbaycan Respublikasının Gənclər və İdman Nazirliyi, Gənclər Fondu, UNİCEF,
Avropa İttifaqı və bir sıra digər təşkilatların həyata keçirdikləri "Gənclərin
Təşəbbüskarlıq Həlləri”, "Yarat, İnkişaf et və töhfə ver” və "Gənclər üçün xidmətlər”
layihələri çərçivəsində gənclərin bir sıra mövzularda təşkil olunan təlimlərə
qatıldıqlarını vurğulayıb. "Təcrübə üçün səfər et” layihəsi çərçivəsində gənclərin Qazax Dövlət
Yanğından Mühafizə Hissəsinə səfəri təşkil edilərək gənclərə yanğınsöndürmə
texnikaları və avadanlıqları barədə məlumat verilib. "Nizami
ili” ilə bağlı təşkil olunan fəaliyyətlərdən danışan Mərkəzin direktoru "Bəşəri
dəyərlərin dahi tərənnümçüsü" adlı esse müsabiqəsini və Qazax Dövlət Rəsm
Qalereyası ilə birlikdə keçirilən onlayn tədbiri qeyd edib. Həmçinin il ərzində
bir neçə dəfə dahi mütəfəkkirin kəlamlarından ibarət posterlər hazırlanaraq,
sosial şəbəkə hesablarında paylaşıldığını söyləyib. GİKM
Qazax nümayəndəliyinin digər müxtəlif mövzularda da bir sıra tədbirlər təşkil etdiyini
qeyd edən İ.Süleymanov buna misal olaraq, "Azərbaycanı kəşf edək", "Biznesin
idarə edilməsi", "İnkluziv cəmiyyətə gedən yol inkluziv təhsildən
keçir", "İnklüziv həyat”, "İki nəslin görüşü”, "Könüllü qonşu”, "İrsimİZ”,
"Auditoriya qarşısında effektiv çıxış texnikaları", "GəlSən”, "Bir
gün vəzifə məndə”, "Həmrəylik kuboku” adlı layihə və tədbirləri göstərib. Mərkəz
tərəfindən rayon ərazisində iki məktəbdə təşkil olunan "Peşə təmayüllü siniflərlə”
uğurlu əməkdaşlığın əsasının qoyulduğunu bildirib. Belə ki, Qazax şəhər Səməd
Vurğun adına 2 nömrəli tam orta məktəbdə fəaliyyət göstərən peşə təmayüllü
siniflərlə gənclərin tanışlığı təşkil olunub. Bu əməkdaşlıq növbəti ildə də
davam etdiriləcək. Konfrans iştirakçılarından Qazax
Rayon Gənclər və İdman İdarəsinin rəisi Vüqar Nəbiyev çıxış edərək
əsası Ulu Öndər Heydər Əliyev tərəfindən qoyulan və bu gün ölkə Prezidenti
İlham Əliyev, Birinci vitse-prezident Mehriban Əliyeva tərəfindən davam
etdirilən dövlət gənclər siyasətindən danışıb. Ulu Öndərin ikinci dəfə
hakimiyyətə qayıdışından sonra ilk yaranan nazirliyin də məhz Gənclər və İdman
Nazirliyi olduğunu qeyd edən natiq illər öncə gənclərə göstərilən qayğının bu
gün də uğurla davam etdirildiyini bildirib. Ölkə başçısı və rayon rəhbərliyi
tərəfindən bu gün Qazax gəncləri üçün hər cür imkanlar yaradıldığını, rayonda
fəaliyyət göstərən Rayon Gənclər və İdman İdarəsinin, Qazax Gənclər Evi Sosial Xidmət
Müəssisəsinin, GİKM-in Qazax nümayəndəliyinin birbaşa gənclərə xidmət edən
sahələr olduğunu vurğulayıb. Hər üç təşkilatın əsas məqsəd və məramının gənclər
üçün geniş imkanlar açmaq, onlara bütün sahələrdə dəstək olmaq, ən əsası da
layiqli ölkə vətəndaşı olaraq yetişmələri üçün töhfə vermək olduğunu söyləyib. Bugünkü
hesabat konfransını və il ərzində görülmüş işləri yüksək qiymətləndirən
V.Nəbiyev bundan sonrakı fəaliyyətlərində yeni-yeni nailiyyətlər arzulayıb, hər
zaman qarşılıqlı əməkdaşlığa hazır olduqlarını söyləyib. Qazax
Gənclər Evi Sosial Xidmət Müəssisəsinin direktoru Vüsal Hüseynov da
nümayəndiliyin fəaliyyətini yüksək dəyərləndirib. Gənclər siyasətini rayonda
həyata keçirən dövlət qurumu olaraq hər zaman əməkdaşlıq etməkdən məmnunluğunu
ifadə edib. Azərbaycan Respublikası Milli Məclisinin Beynəlxalq münasibətlər və
parlamentlərarası əlaqələr komitəsinin sədri Səməd Seyidovun köməkçisi Akif Əmirov çıxış edərək
tədbir iştirakçılarını salamlayıb, səmimi ürək sözlərini çatdırıb. Ölkə
Prezidenti tərəfindən gənclərə göstərilən qayğıdan söz açan natiq Qazaxda
gənclərlə bağlı fəaliyyət göstərən hər üç təşkilatı məhz həmin qayğının
təzahürü kimi qeyd edib. Yarandığı ilk gündən gənclərin gələcək inkişafları
naminə daim yeniliklərlə, yeni layihələrlə seçilən GİKM-nin Qazax
nümayəndəliyinin il ərzində gördüyü işləri yüksək qiymətləndirən natiq bundan
sonra da onlara göstərilən etimadı doğrultmalarını, daha böyük nailiyyətlər
qazanmalarını arzu edib. Müstəqil Azərbaycanın parlaq gələcəyi naminə sağlam
gənclik ordusunun yetişməsi istiqamətində həyata keçirəcəkləri tədbirlərdə hər
zaman dəstək olmağa hazır olduğunu vurğulayıb. Azərbaycan Qarabağ Müharibəsi Əlilləri, Veteranları və Şəhid Ailələri
İctimai Birliyinin Qazax rayon filialının sədr müavini, I qrup Qarabağ müharibəsi
əlili Namiq Alıyev çıxış edərək GİKM-in
Qazax nümayəndəliyi barədə ürək sözlərini çatdırıb. Nümayəndəliyin təşkil
etdiyi tədbirdə iştirak edən şəxs kimi vətənpərvərlik mövzusunda keçirilən
tədbirləri yüksək qiymətləndirib. Dövlətinə, xalqına sadiq, vətənpərvər ruhda
olan gənclərin nümayəndəlikdə çalışmasını, könüllü kimi fəaliyyət göstərməsini qürurverici
hal kimi dəyərləndirib, gənclərə gələcək işlərində uğurlar arzulayıb. Gənc
könüllü Fərid Sadıqov GİKM-in
Qazax nümayəndəliyinin könüllüsü kimi iştirak etdiyi tədbirlərdən, layihələrdən
və ona qazandıran uğurlardan söz açıb. Gənclərə göstərilən qayğıya görə ölkə
Prezidentinə və rayon rəhbərliyinə minnətdarlığını bildirən gənc könüllü ona
göstərilən etimadı bundan sonra da layiqincə doğruldacağını qeyd edib. Sonda il
ərzində fəaliyyətlərə göstərdiyi dəstəyə və əməkdaşlığa görə Qazax Rayon İcra
Hakimiyyətinə, millət vəkili Səməd Seyidovun köməkçisi Akif Əmirova, Rayon
Gənclər və İdman İdarəsinə, Qazax Gənclər Evi Sosial Xidmət Müəssisəsinə, Bakı
Dövlət Universitetinin Qazax filialına, Qazax Dövlət Sosial-İqtisadi Kollecinə,
Qazax Dövlət Rəsm Qalereyasına, Qazax şəhər 1 nömrəli Musiqi Məktəbinə, Qazax
Rayon Mərkəzi Xəstəxanası Publik Hüquqi Şəxsə, Azərbaycan Yazıçılar Birliyi Qazax zona
filialına, Azərbaycan Qarabağ Müharibəsi Əlilləri, Veteranları və Şəhid Ailələri
İctimai Birliyinin Qazax rayon filialına, GÖYƏZƏN.AZ internet portalına GİKM-nin Qazax
nümayəndəliyinin Təşəkkürnamələri təqdim edilib. Həmçinin, tədbir zamanı il ərzində
aktivliyinə görə seçilən gənclər də təltif olunublar.
GOYEZEN.AZ
Facebook-da paylaş