Qazaxlı gənclər Vətən müharibəsi şəhidinin məzarını ziyarət ediblər
Şəhidlərimizi tanıyaq və
tanıdaq--------------------------- Azərbaycan
Respublikasının Prezidenti, Silahlı Qüvvələrin Müzəffər Ali Baş Komandanı İlham
Əliyevin rəhbərliyi altında şanlı ordumuzun şücaəti sayəsində sentyabrın 27-dən
başlayan 44 günlük Vətən müharibəsi Azərbaycan xalqına zəfər sevincini bəxş
etməklə yanaşı, xalqımızın qəhrəman oğullarını da bir daha öz xalqına tanıtdı. Neçə-neçə
igid oğullar Vətən uğrunda haqq savaşının iştirakçısı, şəhid və ya qazi
oldular. Sonunda zəfər çaldığımız bu müharibə Azərbaycan xalqının Vətənə necə
bağlılığını, onun üçün gözünü qırpmadan canından keçməyə hazır olduğunu bir
daha nümayiş etdirdi. Ali Baş Komandanın qətiyyətli addımlarını, müdrik
siyasətini dəstəkləyən xalqımız 30 ilə yaxın bir dövr ərzində davam edən
amansız erməni işğalına qarşı aparılan müharibədə öz rəhbərinin ətrafında yumruq
kimi birləşdi, mərd oğullarımız könüllü olaraq Vətənin müdafiəsinə qalxdılar. Vətən
torpaqlarının ərazi bütövlüyünü canı, qanı bahasına qoruyan, azadlığı uğrunda
canından keçən igid oğullarımızdan biri də şəhid baş leytenant Nəsibov Xaliddin Vaqif oğludur. 44 günlük Vətən müharibəsində Azərbaycanın hərb
tarixinə böyük Qələbəni, Zəfəri qızıl hərflərlə yazdıran igid Vətən
oğullarının, eləcə də torpaqlarımızın ərazi bütövlüyü uğrunda canından keçən
bütün şəhidlərimizin xatirələrini əziz tutmaq hər birimizin borcudur.
Gənclərin İnkişaf və Karyera Mərkəzinin Qazax
nümayəndəliyinin əməkdaşları
və könüllüləri də hər zaman şəhidlərimizi, qazilərimizi, onların ailələrini yad
edir, daim diqqətdə saxlayırlar. Fəaliyyətə başladıqları ilk gündən start
verilən ənənə bu gün də davam etdirir. Mütəmadi olaraq, "VətənimİZ”
layihəsi çərçivəsində şəhidlərimizin məzarlarını ziyarət edir, ailələrinə baş
çəkir, onlara olan vətəndaşlıq borclarını qaytarırlar. Bu gün Gənclərin İnkişaf və Karyera Mərkəzinin Qazax
nümayəndəliyinin əməkdaşları və könüllüləri "VətənimİZ” silsilə
fəaliyyətləri çərçivəsində İkinci Qarabağ müharibəsində qəhrəmancasına şəhid
olmuş baş leytenant Nəsibov Xaliddin
Vaqif oğlunun məzarını ziyarət ediblər. Gənclər şəhidimizin məzarı üzərinə gül dəstələri
qoyub, igid Vətən oğlunun ruhuna olan ehtiramlarını bildiriblər.
Qeyd edək
ki, şəhid baş leytenant
Xaliddin Nəsibov 17 iyul 1998-ci ildə Qazax rayonunun Qarapapaq kəndində anadan
olmuşdur. 2004-cü ildə Qazax şəhər Mehdi Hüseyn adına humanitar və
təbiət fənləri üzrə məktəb-liseyin 1-ci sinfinə daxil olmuş, 2012-ci ildə
həmin məktəbin 8-ci sinfini bitirmişdir. Elə həmin ildə sənədlərini
Naxçıvandakı Heydər Əliyev adına Hərbi Liseyə verərək yüksək balla daxil olmuşdur.
2015-ci ilə qədər burada oxuyub hərb sənətinin sirlərinə dərindən yiyələnən
Xaliddin sonra təhsilini Heydər Əliyev adına Azərbaycan
Ali Hərbi Məktəbində davam etdirmişdir. 2019-cu ildə həmin ali məktəbi bitirmişdir. Həmin
ilin avqust ayının 1-dən Ağcəbədi rayonunda "N” saylı hərbi hissədə leytenant hərbi
rütbəsində xidmətə başlamışdır. GOYEZEN.AZ
Vətən müharibəsi başlayanda motoatıcı tağım
komandiri vəzifəsində xidmət edən Xaliddin Nəsibov döyüş meydanında göstərdiyi
igidliyə və şücaətə görə baş leytenant rütbəsi də almışdır. O, 15 oktyabr
2020-ci ildə bölük komandiri vəzifəsinə təyin olunmuşdur. İkinci Qarabağ
döyüşlərində qəhrəmanlıq göstərən Xaliddin Nəsibov 6 noyabr 2020-ci il tarixdə
uca zirvəyə - Şəhidlik zirvəsinə yüksələrək əbədiyyətə qovuşdu. İgid
qəhrəmanımız 18 noyabr 2020-ci ildə doğulub boya-başa çatdığı Qarapapaq kəndində
kənd qəbiristanlığında izdihamla dəfn olunmuşdur. Subay idi.
Azərbaycanın ərazi bütövlüyünün bərpa olunması, doğma yurdumuzun, Vətən
torpaqlarının düşmən tapdağından azad edilməsi uğrunda ölümün gözünə dik baxan Xaliddin
Nəsibovun döyüşlərdə göstərdiyi igidlik dövlətimiz, ölkə rəhbəri tərəfindən də
yüksək qiymətləndirildi. Şəhid baş leytenant ölümündən sonra cənab Prezident
İlham Əliyevin 15 dekabr 2020-ci il tarixli Sərəncamına əsasən "Vətən
uğrunda”, 25 dekabr 2020-ci il tarixli Sərəncamına əsasən "Xocavəndin azad
olunmasına görə” medalları ilə təltif olunmuşdur.
Facebook-da paylaş