Bu gün dəyərli ziyalımız professor Əhməd Vəliyevin 75 yaşı tamam olur
Bu gün "Odlar Yurdu” Universitetinin rektoru, Azərbaycan
Respublikası Milli Məclisinin III (2005–2010) və IV (2010–2015) çağırış
deputatı, Fizika-riyaziyyat elmləri doktoru, "Şöhrət” ordenli. Amerika
Riyaziyyatçıları Cəmiyyətinin və Nyu-York Elmlər Akademiyasının üzvü Sosial və
pedaqoji Elmlər Akademiyasının həqiqi üzvü, yeni təhsil texnologiyalarının
tətbiqindəki nailiyyətlərinə
görə Fransa İqtisadiyyatına Yardım Assosiasiyasının qızıl medalına layiq
görülmüş, professor Əhməd Vəliyevin doğum günüdür. Bu gün dəyərli ziyalımızın 75
yaşı tamam olur. Əhməd Vəliyev Azərbaycan
Respublikasında təhsilin inkışafında xidmətləri olan, ölkədə və dünyada böyük
nüfuz sahibi olan alimdir. Onun yaratmış olduğu "Odlar Yurdu” Universiteti hər
zaman öz imicini qoruyan, hər il səviyyəsini artıran özəl ali məktəb olaraq
yüksək reytinq qazanmışdır. Həmçinin
Əhməd müəllim bir qazaxlı kimi hər zaman el-obasının təəssübünü çəkən
ziyalıdır. Ölkəsinə, dövlətinə, prezidentinə sadiq əsl vətənpərvər insandır! Qazax Rayon İcra Hakimiyyətinin başçısı Rəcəb Babaşov hörmətli ziyalımızı anadan olmasının 75 illiyi
münasibətilə Qazax ictimaiyyəti və öz adından səmimi qəlbdən təbrik edib.
Yubilyara cansağlığı və ən xoş arzularını çatdırıb. Müstəqil Azərbaycanımızın,
Qazaxımızın inkişafı naminə gələcək işlərində və fəaliyyətində uğurlar
arzulayıb. Vəliyev Əhməd Abdulkərim oğlu 29 noyabr 1946-cı ildə
Qazax rayonunun Alpout kəndində anadan olmuş, 1964-cü ildə orta məktəbi
bitirərək həmin ili Azərbaycan Dövlət Universitetinin "Mexanika-riyaziyyat”
fakültəsinə daxil olmuşdur. Ali təhsilini başa vurduqdan sonra Azərbaycan Xalq
Təsərrüfatı İnstitutunun riyaziyyat kafedrasında laborant, baş laborant,
laboratoriya müdiri, müəllim, baş müəllim, dossent vəzifələrində çalışmışdır.
1990-1997-ci illərdə Bakı Sənaye-Pedaqoji Texnikumunun direktoru vəzifəsində işləmişdir.
1995-ci ildə direktoru olduğu texnikumun bazasında "Odlar Yurdu” Universitetini
yaratmışdır. Əhməd Vəliyev: Fizika-riyaziyyat elmləri namizədi,
Fizika-riyaziyyat elmləri üzrə fəlsəfə doktoru (Ph.D), Fizika-riyaziyyat
elmləri doktoru elmi dərəcələrini və dossent, Professor elmi adlarını almışdır.
Amerika Riyaziyyatçıları Cəmiyyətinin və Nyu-York Elmlər Akademiyasının üzvü
Sosial və Pedaqoji Elmlər Akademiyasının həqiqi üzvüdür. Əhməd
Vəliyev yeni təhsil texnologiyalarının tətbiqindəki nailiyyətlərinə görə Fransa
İqtisadiyyatına Yardım Assosasiyasının qızıl medalına layiq görülmüşdür.
İxtisası üzrə əllidən çox elmi məqalə, bir elmi monoqrafiya, onlarla dərslik və
dərs vəsaitinin, eyni zamanda cənab Prezident İlham Əliyevin hələ prezident olmadığı
zamanda onun gələcək siyasi taleyi təkcə Azərbaycan üçün yox, dünya siyasi
arenasında tutacağı yüksək mövqe, qazanacağı uğurlar haqqında proqnoz verdiyi
siyasi publisistika janrında yazılmış "Bəsirət ünvani” adlı kitabın
müəllifidir. Kitab latın və ərəb qrafikası ilə Azərbaycan dilində, Prezident
seçkiləri qabağı 2003-cü ildə ingilis dilində çap olunmuşdur. Bundan başqa, Azərbaycanın birinci xanımı,
YUNESKO və İSESCO-nun xoşməramlı səfiri, Heydər Əliyev Fondunun prezidenti, Mehriban xanım
Əliyeva haqqında "Adının sahibi” kitabının da müəllifidir. Əhməd Vəliyev
2005-ci ildə III (31 saylı Suraxanı ikinci seçki dairəsindən), 2010-cu ildə isə
IV (107 saylı Qazax seçki dairəsindən) çağırış Azərbaycan Respublikası Milli
Məclisinə deputat seçilmişdir. Milli Məclisin Elm və Təhsil məsələləri daimi
komitəsinin üzvü olmuşdur. Eyni zamanda Azərbaycanla Almaniya, Litva, Çexiya,
Türkiyə, Şimali İrlandiya, Gürcüstan Parlamentlərarası dostluq qrupunun üzvü və
Cənubi Afrika dostluq qrupunun rəhbəri olmuşdur. Əhməd Vəliyev "Odlar Yurdu” Universitetinin qurucusu və 1997-ci
ildən rektorudur. GOYEZEN.AZ
Facebook-da paylaş