Qazaxda təhsilə göstərilən qayğı öz bəhrəsini verməkdədir
Son illər ölkəmizdə təhsilin inkişafı istiqamətində mühüm addımlar
atılır. Təhsilin normativ hüquqi bazasının təkmilləşdirilməsi, maddi-texniki təminatının
yaxşılaşdırılması, təhsil müəssisələrinin informasiya-kommunikasiya
texnologiyalarının tətbiqi sahəsində imzalanan çoxsaylı sərəncamlar ölkədə təhsil
sahəsinə göstərilən diqqət və qayğıdır. Ən əsası da bu sahədə görülən məqsədyönlü
işlər, təhsilin inkişafı ilə bağlı həyata keçirilən tədbirlər deməyə əsas verir
ki, Azərbaycan öz gələcəyini daha etibarlı və inamlı görmək əzmindədir. Çünki
müasir dünyada hər bir ölkənin gələcəyi həmin ölkədə təhsilin səviyyəsi
ilə ölçülür. Odur ki, ölkədə təhsil
sahəsinə olan qayğı gələcəyimiz olan gənclərə olan qayğı deməkdir. Respublikamızın hər yerində
olduğu kimi, Qazax rayonunda da təhsil sahəsinə xüsusi diqqət və qayğı
göstərilir. Ölkə başçısının qayğısı sayəsində rayonda təhsilin keyfiyyətinin
artırılması, müəllim və şagirdlərin yüksək şəraiti olan məktəblərdə elmlə
məşğul olmaları üçün hər cür şərait yaradılır. Bu ilin 4 fevralında əsaslı
yenidənqurmadan sonra açılışını etdiyimiz S.Vurğun adına şəhər 2 nömrəli tam
orta məktəb bu dediklərimizin əyani sübutudur. Məhz təhsilə ayrılan diqqətin,
göstərilən qayğının nəticəsidir ki, rayon məktəbliləri bu sahədə uğurlu nəticələrə
imza atırlar. Ötən il qəbul imtahanlarının nəticələrinə görə Qazaxın respublika
məktəbləri arasında 3-cü sırada dayanması təhsilə olan yüksək qayğının
göstəricisidir. Bu uğurun qazanılmasında eyni
zamanda 2018-ci ilin oktyabr ayında Qazax Rayon İcra Hakimiyyətinin
təşəbbüsü ilə rayon Təhsil şöbəsi tərəfindən yaradılmş işçi qrupunun da böyük əməyi
vardır. İşçi qrupunun yaradılmasında isə əsas məqsəd təhsil sahəsini inkişaf
etdirməkdir. Şagirdlərin dərsə davamiyyətini, müəllimlərin dərsə hazırlıq
səviyyələrini müəyyən etmək və seçilən müəllimləri yüksək qiymətləndirməkdir. Həmçinin,
məktəbdə müəllim-direktor, müəllim-şagird və müəllim-valideyn münasibətlərini
formalaşdırmaqdır. İşçi qrupu yaradılan gündən ötən müddət ərzində şagirdlərin dərsə
davamiyyət faizi onu göstərdi ki, biz bu istəyimizə - təhsilin keyfiyyətinin
artırılmasına nail ola bildik. Bunu
rayonumuzda məzunların ali məktəblərə qəbul faizinin ilbəil artmasından da
görmək olar. Məhz 2017-2018-ci tədris ili üzrə qəbul olma faizi 54,15 olmuşdur.
Belə ki, tədris ilində 676 nəfər məzundan 509 nəfər ali məktəbə qəbul
imtahanlarında iştirak etmiş, onlardan 274 nəfər ali təhsil müəssisələrinə
qəbul olmuşdur. Ümumilikdə, rayon üzrə ötən ilin məzunları ilə birlikdə 651
nəfər qəbul imtahanlarında iştirak etmişdir ki, onlardan 329 nəfər ali təhsil
müəssisəsinə qəbul olaraq tələbə adını qazanmışlar. Sevindirici haldır ki, ali
təhsil müəssisələrinə qəbul olmuş tələbələrdən 19 nəfəri 600-dən, 49 nəfəri isə
500-dən yuxarı bal toplayanlardır. Hər il olduğu kimi, 2018/2019-cu
tədris ilində Qazax rayon Təhsil şöbəsinin nəzdində fəaliyyət göstərən işçi qrupunun üzvləri şəhər və kənd üzrə rayonun ümumtəhsil
məktəblərində olublar. İşçi qrupunun üzvləri - rayon Təhsil şöbəsində metodkabinetin
müdiri Məhəmməd Cəfərov, metodist Orxan Əliyev, ibtidai sinif üzrə metodist
Şəfa Yadigarova, M.Hüseyn adına məktəb-liseyin Azərbaycan dili və ədəbiyyat
müəllimi Nüşabə Yaqubova, F.Şamoyev adına şəhər 4 saylı tam orta məktəbin riyaziyyat
müəllimi Amalya Cəfərova, N.Vəliyev adına şəhər 5 saylı tam orta məktəbin fizika
müəllimi, "Tərəqqi” medallı Yasəmən Qayayeva, Ş.Çobanov adına Ağköynək kənd tam
orta məktəbin kimya-biologiya müəllimi, Əməkdar müəllim Sədaqət Əmirxanova, S.Əfəndiyev
adına şəhər 1 saylı tam orta məktəbin tarix müəllimi, Əməkdar müəllim Mustafa
Mirzəyev, coğrafiya müəllimi, Əməkdar müəllim Şadət Carçıyev, İ.Qayıbov adına
şəhər 3 saylı tam orta məktəbin xarici dil müəllimi, Əməkdar müəllim Tahirə
Xasməmmədova mərhələlər üzrə məktəblərdə olaraq monitorinq aparıblar. I mərhələdə
işçi qrupu 16.10.2018-ci il tarixdən 18.12.2018-ci il tarixədək rayonun 20
ümumtəhsil məktəbində - Qazax şəhər 3,4,5 saylı, məktəb-lisey, Hüseynbəyli, Daş
Salahlı 1 və 2 saylı, Çaylı 2 saylı, Canalı, Yuxarı Salahlı, Yuxarı Əskipara,
Ağköynək, Sarıvəlli, Birinci Şıxlı, İkinci Şıxlı, Aşağı Əskipara kənd tam orta,
Fərəhli, Barxudarlı, Birinci Şıxlı, Qarapapaq kənd ümumi orta məktəblərində
ayrı-ayrı fənlər üzrə tədrisin vəziyyətini öyrəniblər. Qeyd olunan məktəblər
üzrə 181 nəfər müəllimin dərsi dinlənilmiş, sonra işçi qrupunun üzvləri tərəfindən qimətləndirilmişdir. 23 nəfər yüksək,
135 nəfər yaxşı, 22 nəfər orta, 1 nəfər isə zəif nəticə göstərmişdir. Yüksək nəticə
göstərən müəllimlərə rayon Təhsil şöbəsi və məktəb rəhbərliyi tərəfindən təşəkkür
elan edilmişdir. Zəif nəticə göstərənlərə isə məktəb rəhbərliyi tərəfindən
iradlar bildirilmiş və xəbərdarlıq edilmişdir. II mərhələdə
06.03.2019-cu il tarixdən 12.04.2019-cu il tarixə kimi rayonun 8 ümumtəhsil məktəbində - Qazax şəhər 1 və 2 saylı, şəhər ümumi orta, Çaylı 1 saylı,
Qazaxbəyli, Bala Çaylı, Aşağı Salahlı, Orta Salahlı kənd tam orta məktəblərdə
ayrı-ayrı fənlər üzrə tədrisin vəziyyəti öyrənilib. Bu məktəblər üzrə 80 nəfər
müəllimin dərsi dinlənilib. Hər bir dinlənilmiş dərsdən sonra işçi qrupunun
üzvləri tərəfindən həmin müəllimlərə iradlar bildirilmiş və metodik tövsiyələr
verilmişdir. Dinləmələr fizika, riyaziyyat, kimya-biologiya, Azərbaycan dili və
ədəbiyyat, tarix, coğrafiya, xarici dil, ibtidai siniflər üzrə aparılmışdır. Tərtib
edilmiş qrafikə müfaviq olaraq məktəblərdə təhsilin keyfiyyət göstəricilərinin
yaxşılaşdırılması üçün işçi qrupunun fəaliyyəti davam etdirilir. May ayının 15-ə
qədər digər 12 ümumtəhsil məktəbində işçi
qrupunun dərs dinləmələri davam etdiriləcəkdir. GOYEZEN.AZ
Facebook-da paylaş