Heydər Əliyev Fondunun təşəbbüsü və dəstəyi ilə Qazaxda daha bir məktəb üçün yeni bina inşa olunur
Heç kəsə sirr deyil ki, son illər Azərbaycan təhsili
ölkə Prezidenti cənab İlham Əliyevin və Azərbaycan Respublikasının
Birinci vitse-prezidenti, Heydər Əliyev Fondunun
prezidenti Mehriban Əliyevanın qayğısı sayəsində özünün intibah dövrünü
yaşayır. Ulu Öndərin təhsil siyasəti ölkə başçısının, Heydər Əliyev Fondunun
qayğısı və dəstəyi ilə həyata keçirilən layihələrlə davam etdirilir. Bu
gün əminliklə söyləyə bilərik ki, dövlət başçısının "Neft
kapitalını insan kapitalına çevirək” ideyası əsasında reallaşan çoxsaylı
layihələr, həyata keçirilən tədbirlər təhsil sahəsinin inkişafına yönəldilib. Azərbaycanda
təhsil sahəsinə olan yüksək dövlət qayğısının bariz nümunəsi respublikamızın
bütün bölgələrində məktəblərin maddi-texniki bazasının möhkəmləndirilməsi,
yüzlərlə məktəb binalarının tikilməsi və yaxud da əsaslı şəkildə yenidən qurulmasıdır.
Ölkə rəhbərinin bu sahə ilə bağlı imzaladığı çoxsaylı sərəncamlar, verdiyi
tapşırıqlar da bunun əyani sübutudur. Ölkəmizdə təhsil sahəsinin inkişaf etdirilməsində
Birinci vitse-prezident Mehriban xanımın da xidmətləri danılmazdır. Onun
rəhbərliyi altında Fondun həyata keçirdiyi və bütün ölkədə böyük rəğbətlə
qarşılanan "Yeniləşən Azərbaycana yeni məktəb” və "Təhsilə dəstək”
layihələri çərçivəsində ölkə üzrə yüzlərlə orta məktəb binaları tikilir, təmirə
ehtiyacı olan məktəb binaları isə əsaslı şəkildə yenidən qurulur.
Bu gün təqdirəlayiq haldır haldır ki, ölkə Prezidenti
İlham Əliyevin və Birinci vitse-prezident Mehriban Əliyevanın respublikamızda təhsil
sahəsinə göstərdikləri qayğı Qazaxda da yüksək
səviyyədə hiss olunur. Rayonda dövlət tərəfindən təhsil sahəsinə olan
qayğının əyani göstəricisi "Azərbaycan Respublikası regionlarının
2019–2023-cü illərdə sosial-iqtisadi inkişafı Dövlət Proqramı”nın həyata
keçirilməsi üzrə hazırlanmış tədbirlər planına Qazax rayonu üzrə 11 məktəb
binasının əsaslı təmirinin və ya tikintisinin salınmasıdır. Heydər Əliyev
Fondu tərəfindən reallaşan "Yeniləşən Azərbaycana yeni məktəb” layihəsi
çərçivəsində respublikamızın hər yerində olduğu kimi, Qazaxda da yeni məktəb
binaları inşa olunur. Heydər Əliyev Fondu tərəfindən Xalq yazıçısı
İsmayıl Şıxlının adını daşıyan 1176 şagird yerlik Kosalar kənd tam orta
məktəbin əsaslı şəkildə yenidən qurularaq müəllim və şagirdlərin istifadəsinə
verilməsi, Təhsil Nazirliyi tərəfindən Aydın Məmmədov adına Qaymaqlı
kənd tam orta məktəb üçün 180 şagird yerlik yeni binanın inşa olunması, ölkə başçısı tərəfindən Mehdi Hüseyn adına
humanitar və təbiət fənləri üzrə məktəb-lisey binasının sökülərək yenidən
tikilməsi haqqında imzalanan 4 avqust 2020-ci il tarixli Sərəncam dövlətin
Qazaxda təhsil sahəsinə olan yüksək diqqət və qayğısının bariz nümunəsidir. Hazırda Dövlət Proqramında tikintisi nəzərdə
tutulan Şahnabat Nəsibova adına Sarıvəlli kənd tam orta məktəb üçün Heydər
Əliyev Fondunun təşəbbüsü və dəstəyi ilə həmin məktəbin həyətində 220
şagird yerlik yeni bina inşa olunur. İş icraçısı Elnur Verdiyevin sözlərinə görə 1967-ci
ildən əsası qoyulan kənd məktəbi üçün yeni inşa edilən binada şagirdlərin
yüksək səviyyədə təhsil almaları üçün hər cür şərait yaradılacaq. Ötən ilin
yanvar ayından tikintisinə start verilən məktəb binası zirzəmisi olmaqla 2
mərtəbədən ibarətdir. Məktəbdə həcmi 25 kubmetr olan içməli su anbarı, həcmi
120 kubmetr (hər birinin həcmi 60 kubmetr olan 2 ədəd) olan yanğından mühafizə
üçün su anbarı, su nasosu stansiyası, qazanxana, idman zalı, akt zalı,
yeməkxana və oyun meydançası inşa ediləcək. İş icraçısı yeni tikilən məktəbdə işlərin sürətlə
davam etdirildiyini bildirir. Qeyd edək ki, artıq məktəb binasının dam örtüyü
vurulub, birinci və ikinci mərtəbələrdə, idman zalında daxili suvaq, eləcə də
astar-üzlük vurulması işləri başa çatıb. Məktəb binasının xarici fasadında da suvaq
işləri yekunlaşmaq üzrədir. Hər iki mərtəbədə elektrik və santexnik işləri
tamamlanıb, istilik sistemi çəkilib. Pəncərələr qoyulub. Məktəb ətrafında 700
metr hasar çəkilib. Su anbarlarının tikintisi davam edir. Məktəbin müəllim-şagird kollektivi, valideynlər, kənd
sakinləri yeni binanın inşasına görə ölkə Prezidenti İlham Əliyevə və Birinci
vitse-prezident Mehriban Əliyevaya bu gün də minnətdarlıq edir, razılıqlarını
bildirirlər.
GOYEZEN.AZ
Facebook-da paylaş