Qazaxda 65 yaşdan yuxarı şəxslərin vaksinasiyasına başlanılıb
Respublika Prezidenti cənab
İlham Əliyevin tapşırığına əsasən və Birinci vitse-prezident Mehriban
Əliyevanın rəhbərliyi altında COVID-19 infeksiyasına qarşı mübarizə məqsədilə
ölkəmizdə yanvarın
18-dən başlanılan əhalinin
peyvənd olunması kampaniyası uğurla həyata keçirilir. Nazirlər Kabinetinin
2021-ci il 16 yanvar tarixli Sərəncamı ilə təsdiq edilmiş "Azərbaycan
Respublikasında COVID-19 xəstəliyi əleyhinə 2021-2022-ci illər üçün Vaksinasiya
Strategiyası”na uyğun olaraq aparılan vaksinasiyanın birinci mərhələsində
səhiyyə işçiləri, 65 yaşdan yuxarı şəxslər və hüquq-mühafizə orqanları
tərəfindən əks-epidemik tədbirlərə cəlb olunan heyət peyvəndlənəcək.
Strategiyanın əsas məqsədi ölkədə yayılmış koronavirus pandemiyasının
qarşısının alınmasına, virusa yoluxma və ölüm səviyyəsinin aşağı salınmasına
nail olmaqdır. Vaksinin əhəmiyyəti immuniteti gücləndirmək yolu ilə xəstəlikdən
qorunmaq, infeksiyanın ötürülməsini məhdudlaşdırmaq, ölüm halının qarşısını
almaq və nəticədə səhiyyə sisteminə düşən yükü azaltmaqdan ibarətdir. Artıq vaksinasiyanın
birinci mərhələsində risk qrupuna daxil olan səhiyyə işçiləri peyvənd
olunub. Fevralın 8-dən isə Azərbaycanda
65 yaşdan yuxarı şəxslərin COVID-19 infeksiyasına qarşı vaksinasiya prosesinə start
verilib. Respublikamızın hər yerində
olduğu kimi, Qazaxda da yaşı 65-dən yuxarı olan şəxslərin vaksinasiya
prosesinə başlanılıb. Bu günə kimi 116 nəfər yaşı 65-dən yuxarı şəxs
peyvənd olunub. Məlumat üçün bildirək ki,
Qazax Rayon Mərkəzi Xəstəxanasında əhalinin COVID-19-a qarşı vaksinasiya
prosesinin yüksək mütəşəkkilliklə aparılması üçün bütün zəruri tədbirlər
görülüb. Belə ki, vaksinasiya prosesinin həyata keçirilməsi məqsədilə Rayon
Mərkəzi Xəstəxanasının yoluxucu xəstəliklər şöbəsində 1 qəbul otağı, 1
qeydiyyat otağı, 3 xüsusi peyvənd otağı, 2 nəzarət otağı, 1 təcili tibbi yardım
otağı ayrılıb. Bundan əlavə, peyvəndlərin daşınması üçün TƏBİB-in təlimatlarına
uyğun zəruri şərait yaradılıb. Bu mərhələnin də nizamlı təşkil olunması üçün
65 yaşdan yuxarı sakinlərimizə http://randevu.its.gov.az/ internet ünvanına daxil
olub qeydiyyatdan keçərək vaksinasiya olunmaq üçün Qazax Rayon Mərkəzi
Xəstəxanasını seçmələri, göstərilən tarix və saatda xəstəxanada olmaları
tövsiyə olunur. GOYEZEN.AZ
Facebook-da paylaş