Qazaxda olan şəffaflığa heç kim kölgə sala bilməz!
Hər kəsə yaxşı məlumdur ki,
cənab Prezident İlham Əliyevin yürütdüyü məqsədyönlü dövlət siyasətinin əsasını
təşkil edən amillərdən biri, bəlkə də birincisi ölkəmizdə rüşvətxorluğa və
korrupsiyaya qarşı barışmaz mövqedə olmasıdır. Ölkə başçısının rəhbər vəzifəli
şəxsləri qəbul edən zaman çıxışlarında bu sahə ilə bağlı istəyini, tələbini
dəfələrlə çatdırması da onu sübut edir ki, Azərbaycanda rüşvətxorluğa və
korrupsiyaya qarşı mübarizə günümüzün bir nömrəli məsələlərindən biridir. Dövlət başçısının bütün
sahələrdə şəffaflığın təmin olunması, xüsusilə də rüşvətxorluğa və korrupsiyaya
qarşı mübarizə sahəsində məqsədyönlü işlərin görülməsi istiqamətində verdiyi
tapşırıq və tövsiyələr son illər Qazax rayonunda da birmənalı şəkildə icra
olunur. Rayon rəhbərliyi tərəfindən bu sahə daim diqqət mərkəzində saxlanılır.
Rayonda son illər bu sahədə əldə olunan nailiyyəti bu gün də əvvəlki tək
qoruyub saxlamaq və bu cür halların qarşısının alınması üçün təxirəsalınmaz
işlər görülür. Rayon rəhbərliyinin və hüquq-mühafizə orqanları rəhbərlərinin
iştirakı ilə səhiyyə ocaqlarında pandemiyaya qarşı mübarizə tədbirlərini yerində
öyrənmək məqsədilə keçirilən reyd zamanı vətəndaş Daş Salahlı kənd sakini Hüseynova
Solmaz Binnət qızının "Qazax Rayon Mərkəzi Xəstəxanası” Publik Hüquqi Şəxsi, Rayon Doğum evində bir sıra neqativ halların
olması ilə bağlı müraciətinə operativ şəkildə baxılması bu dediklərimizin əyani
sübutudur. Qeyd edək ki, vətəndaşın neqativ hallarla bağlı iradı elə həmin gün
hüquq-mühafizə orqanları tərəfindən araşdırılmış, həqiqətən də qeyd etdiyi
nöqsanlar qismən də olsa aşkar edilmişdir. Görünür Doğum evinin baş həkimi və
digər əməkdaşları ölkədəki pandemiya dövründə belə öz əməllərindən çəkinməyiblər.
Ən əsası da rayonda səhiyyə sahəsində olan şəffaflığa kölgə saldıqlarının fərqində
belə olmayıblar. Hər zaman olduğu kimi, bu dəfə də səhiyyə sahəsində şəffaflığı tam təmin
etmək üçün məqsədyönlü işlər görüldü. Belə ki, Doğum evində vətəndaşın etdiyi
müraciət araşdırılan zaman deyilənlər qismən də olsa həqiqəti əks etdirdiyi
üçün baş həkim Namazlı Aynur Rauf qızına, həkim mama ginekoloq Cəfərova Diləfruz
Cəfər qızına və mama ginekoloq USM (ultrasəs müayinə kabineti) Qəhrəmanova
Validə Kamandar qızına töhmət verilərək
bir daha xəbərdarlıq olunub. Bunu ictimaiyyətə çatdırmaqda əsas məqsəd odur ki, rayonda istənilən
sahədə bu cür hallarla qarşılaşan hər bir vətəndaş Qazax Rayon İcra Hakimiyyətinə
müraciət edə bilər. Sizlərdən kökündə vətəndaş məmnunluğu dayanan bu işdə şəffaflığı qorumaqda
dəstək olmağınızı xahiş edirik. Unutmayaq ki, görülən hər
bir iş, atılan addım birbaşa rayonun adı ilə bağlıdır. Ona görə də bu mübarizəyə
hər birimiz yaxından dəstək olmalıyıq. Bunun üçün də sadəcə müraciət edib
bildirməyiniz kifayət edir. GOYEZEN.AZ
Facebook-da paylaş