Vətən Sizinlə qürur duyur!
Şəhidlərimizi tanıyaq və
tanıdaq---------------------------- Fani olan dünyada hər şey gözəldir,
lakin ən müqəddəs duyğu Vətəni göz bəbəyi kimi sevmək, qoynunda boya-başa çatdığın torpağın müqəddəsliyini hiss edib
yolunda canından keçməyə hazır olmaqdır. Vətən yolunda qan tökərək öz tarixinə
və xalqının taleyinə qəhrəmanlıq salnaməsi yazmaqdır ən böyük hiss. Müqəddəs
amal uğrunda şəhid olmaqla əbədiyyətə qovuşan igid oğullarımız döyüşlərdə mənfur
düşmənə ağır zərbə vurmaqla, layiqli dərs verməklə təkcə qəhrəmanlıq salnaməsinə
adlarını yazmırlar, eyni zamanda Vətənin bölünməzliyinə imza atırlar. Vətəni göz bəbəyi kimi qorumağın, Vətən torpağı bütöv və tam olsun
deyə heç düşünmədən candan keçməyin nə olduğunu öyrədirlər bizlərə. Vətənə
sevginin məhz vətənpərvərlikdən başlandığını, təkcə Allaha, valideynlərimizə
deyil, Vətənə də borclu olduğumuzu göstərirlər. Vətənini sevən hər bir insan da
bu torpaq uğrunda canından keçmiş şəhidlərini, Milli Qəhrəmanlarını unutmamalı,
onların əziz xatirəsini daim yad etməlidir. Bu gün Azərbaycanın elə bir bölgəsi, elə bir kəndi
tapılmaz ki, orada bir şəhid məzarı olmasın. Vətənimizin müdafiəsi
uğrunda döyüşə atılan igid oğullarımız minlərlədir. Qazaxlılar da hər
zaman öz şəhidləri ilə fəxr edib, onlarla qürur duyur. Vətənpərvərlik hissi,
döyüş ruhu qazaxlı gənclərdə də hər zaman olub və bu, bundan sonra da belə olacaq. Bu
gün Ermənistanla 168 km sərhədi olan, Bağanıs Ayrım, Xeyrımlı, Barxudarlı,
Sofulu, Qızılhacılı, Yuxarı Əskipara, Aşağı Əskipara kimi 7
kəndi mənfur düşmənin işğalına məruz qalan Qazax rayonu Vətən torpaqlarının
ərazi bütövlüyü uğrunda xeyli sayda şəhid verib. 7 nəfər igid oğlu Azərbaycanın
Milli Qəhrəmanı adını alıb. Vətənin dar günündə döyüşə atılan Qazaxın
igid, mərd oğulları hər zaman olub, bu gün də var, sabah da olacaq... Vətən torpaqlarının ərazi bütövlüyü uğrunda canından
keçən igid oğul və qızlarımızın xatirəsi Qazaxda hər zaman əziz tutulur.
Şəhidlərimizə, onların ailə üzvlərinə olan qayğı həmişə yüksək səviyyədədir.
Rayon rəhbərinin fəaliyyətə başladığı ilk gündən şəhidlərimizin ailə üzvlərinə
daim qayğı ilə yanaşması, şəhidlərimizin uyuduğu qəbiristanlıqların, onların
xatirəsinə ucaldılmış abidələrin, parkların, bulaqların, xiyabanların
abadlaşdırılması, yenilənməsi, əsaslı şəkildə təmir edilməsi bunun bariz
nümunəsidir. Şəhərin mərkəzində yerləşən Şəhidlər xiyabanı, orada aparılan
abadlıq işləri, ən əsası da şəhidlərimizin adı və şəkli əks olunmuş lövhənin
vurulması bu istiqamətdə görülən işlərin bariz nümunəsidir. Bu gün rayonumuza
ayrı-ayrı dövlətlərdən gələn qonaqlar belə kədər və qürur yerimiz olan həmin bu
müqəddəs məkana baş çəkir, memorial önünə tər çiçəklər düzür, igid
oğullarımızın şəkli əks olunmuş lövhə önündən keçərək əziz xatirələrini
ehtiramla yad edirlər. Qazax Tarix-Diyarşünaslıq Muzeyində Birinci və İkinci
Qarabağ müharibəsi zamanı Vətən uğrunda canlarından keçən şəhidlərin əziz
xatirəsini əbədiləşdirən guşə yaradılıb ki, bu, şəhidlərimizə olan hörmət və
etiramın daha bir bariz nümunəsidir. Qazaxda torpaqlarımızın azadlığı uğrunda canlarından
keçmiş şəhidlərimizin doğum və anım günləri də unudulmur. GOYEZEN.AZ saytının
Vətən uğrunda canından keçmiş, doğum və anım günü olan şəhidlərimizin əziz
xatirələrini yad edərək mütəmadi olaraq onlarla bağlı yazılar dərc etməsi artıq
bir ənənə halını alıb. Bu həftə də öz ənənəmizə sadiq qalıb doğum və anım
günü olan şəhidlərimizdən – İsmayıl Musayevin, Anar Vəliyevin, çavuş Arzu Nəbiyevin, çavuş Ruslan Hüseynovun,
Yusif Ayvazovun, Xədicə Kazımovanın, Məzahir Barıyevin, Əli Əhmədovun, Nəsir Yusifovun,
Mahmud Mahmudovun, Adil Qocayevin əziz xatirəsini ehtiramla yad edirik. Musayev İsmayıl Ürfət oğlu
Musayev
İsmayıl Ürfət oğlu 27 aprel 1973-cü ildə Qazax rayonunun Qarapapaq kəndində
anadan olmuşdur. 1979-cu ildə kənd məktəbinə getmiş və 1987-ci ildə səkkizinci
sinfi bitirmişdir. 117 saylı texniki peşə məktəbində təhsilini davam
etdirmişdir. 1992-ci ilin əvvəllərində hərbi komissarlığa müraciət etmiş
İsmayıl Musayevi 707 saylı hərbi hissənin 1-ci taborunda xidmət etməyə göndərmişlər.
Bir ay təlim keçdikdən sonra İsmayıl Bala Cəfərli, Cəfərli və Ballı Qaya yüksəkliyi
uğrunda gedən döyüşlərdə iştirak etmiş, öz qorxmazlığı ilə yoldaşlarına nümunə
olmuşdur. Lakin belə igid bir döyüşçünün döyüş yolu çox qısa olmuşdur. O,
1992-ci il iyul ayının 20-də Ballı Qaya yüksəkliyi uğrunda gedən döyüşdə qəhrəmancasına
vuruşmuş və 19 yaşında şəhidlik zirvəsinə ucalmışdır. Əsgər Vəliyev Anar Həmzə oğlu
Şəhid Anar Vəliyev 21 iyul 2002-ci ildə
Qazax rayonunun Orta Salahlı kəndində anadan olmuşdur. 2008-ci ildə Səməd
Hacıyev adına Orta Salahlı kənd tam orta məktəbin 1-ci sinfinə daxil olmuş,
2017-ci ildə həmin məktəbin 9-cu sinfini bitirmişdir. 23 iyul 2020-ci ildə Səfərbərlik və Hərbi Xidmətə Çağırış üzrə Dövlət
Xidmətinin Qazax Rayon Şöbəsi tərəfindən həqiqi hərbi xidmətə
çağrılmışdır. Anar
Vəliyev Vətən müharibəsində ilk döyüşə Tərtərdən başlamış, Füzulinin, Laçının
düşmənlərdən azad edilməsi uğrunda gedən qanlı vuruşmalarda fədakarlıq göstərmişdir.
Hərbi əməliyyatlar zamanı yaşına uyğun olmayan mərdliklə döyüşür, düşmənə aman
vermirdi. Talış kəndi uğrunda gedən döyüş isə Anarın sonuncu döyüşü olub. Müdafiə
Nazirliyinin "N” saylı hərbi hissəsinin operatoru əsgər Anar Vəliyev 11.10.2020-ci il tarixdə Tərtər rayonunun Talış kəndi
istiqamətində gedən döyüşlərdə düşmənin hücumunun qarşısını alarkən minaatan
silahdan atılan atəş nəticəsində başından aldığı ağır qəlpə yarasından qəhrəmancasına
şəhid olmuşdur. Vətən müharibəsində iştirak edərək Şəhidlik məqamına ucalan
Anar Vəliyev 11.10.2020-ci ildə doğulduğu Orta Salahlı kənd qəbiristanlığında
izdihamla dəfn edilmişdir. Subay idi. Azərbaycanın
hərb tarixinə qızıl hərflərlə yazılan 44 günlük Vətən müharibəsində canından
keçən bütün şəhidlərimiz kimi əsgər Anar Vəliyevin igidliyi də ölümündən sonra
ölkə Prezidenti İlham Əliyev tərəfindən yüksək qiymətləndirildi. Anar Vəliyev
cənab Prezidentin 15 dekabr 2020-ci il tarixli Sərəncamına əsasən "Vətən
uğrunda” və 29 dekabr 2020-ci il tarixli Sərəncamına əsasən "Laçının
azad olunmasına görə” medalları ilə təltif olunmuşdur. Çavuş Nəbiyev Arzu Abdulla oğlu
Nəbiyev
Arzu Abdulla oğlu 10 aprel 1965-ci ildə Qazax rayonunun Abbasbəyli kəndində
anadan olmuşdur. 1972-ci ildə Alpout kənd tam orta məktəbin birinci sinfinə
daxil olmuş və 1980-ci ildə həmin məktəbi bitirmişdir. Elə həmin ildə Qazax
rayonundakı Kənd Təsərrüfatı Texnikumuna qəbul olmuşdur. 1983-1985-ci illərdə
Ermənistanın Lalaxan rayonunda hərbi xidmət keçmişdir. Muxtar Hacıyev adına
sovxozda işləyərək evin tək oğlu olduğuna baxmayaraq könüllü olaraq Milli Orduya
qoşulmuşdur. 1990-1993-cü illərdə Qazax rayonunun Quşçu Ayrım və Fərəhli kəndləri
istiqamətində gedən döyüşlərdə iştirak etmişdir. Topçu olan Arzu Nəbiyev 22
iyul 1993-cü ildə Fərəhli kəndində yerləşən Odun dağı adlanan ərazidə minaya
düşərək şəhid olmuşdur. 1994-cü ildə ölümündən sonra "Hərbi xidmətlərə görə"
medalı ilə təltif edilmişdir. Ailəliydi. İki övladı yadigar qalmışdır. Çavuş Hüseynov Ruslan İsfəndiyar oğlu
Hüseynov
Ruslan İsfəndiyar oğlu 3 oktyabr 1971-ci ildə Qazax rayonunun Çaylı kəndində
anadan olmuşdur. 1979-cu ildə Vidadi Göşşüyev adına Çaylı kənd 1 nömrəli tam
orta məktəbin birinci sinfinə daxil olmuş, 1989-cu ildə orta məktəbi
bitirmişdir. 1989-cu ildə hərbi xidmətə getmişdir. 825-ci Hərbi Hissənin II
batalyonunda Vətən uğrunda gedən döyüşlərdə iştirak edən Ruslan Hüseynov 1993-cü ilin 22 iyulunda Fərəhli kəndində minaya düşərək şəhid
olmuşdur. Ayvazov Yusif Süleyman oğlu
Ayvazov
Yusif Süleyman oğlu 4 sentyabr 1968-ci ildə Qazax rayonunun Çaylı kəndində anadan olmuşdur. 1974-cü ildə Vidadi Göşşüyev
adına Çaylı kənd 1 nömrəli tam orta məktəbin birinci sinfinə daxil olmuş, 1985-ci
ildə həmin orta məktəbi bitirmişdir. 1986-1988-ci illərdə SSRİ-nin silahlı qüvvələrində
hərbi xidmət etmişdir. 825-ci Hərbi Hissənin II batalyonunda Vətən uğrunda gedən
döyüşlərdə iştirak edən Yusif Ayvazov 22 iyul 1993-cü ildə Fərəhli kəndində
minaya düşərək şəhid olmuşdur. Kazımova Xədicə İsmayıl qızı
Kazımova Xədicə İsmayıl qızı 22 iyul 1987-ci ildə
Qazax rayonunun Kəmərli kəndində anadan olmuşdur. 7 fevral 1993-cü ildə Kəmərli
kəndində ermənilərin atdığı mərminin dəyməsi nəticəsində şəhid olmuşdur. Barıyev Məzahir Məhəmməd oğlu
Barıyev
Məzahir Məhəmməd oğlu 14 dekabr 1968-ci ildə Aslanbəyli kəndində anadan
olmuşdur. 1978-ci ildə Aslanbəyli kənd tam orta məktəbin birinci sinfinə daxil
olmuş, 1986-cı ildə məktəbi bitirmişdir. 1989-cu ildə Yuxarı Salahlı kənd Peşə
məktəbini də bitirmişdir. 1989-1991-ci illərdə Rusiya Federasiyasının Murmansk
vilayətində hərbi xidmətdə olmuşdur. 1992-ci ildə könüllü olaraq Milli Ordu
sıralarına daxil olmuşdur. 1993-cü ilin 22 iyulunda Fərəhli kəndində gedən
döyüş zamanı şəhid olmuşdur. Əhmədov Əli Əlövsət oğlu
Əhmədov
Əli Əlövsət oğlu 23 iyul 1972-ci ildə Qazax rayonunun Qarapapaq kəndində anadan
olmuşdur. 1979-cu ildə Qarapapaq kənd ümumi orta məktəbinə daxil olmuş, 1987-ci
ildə həmin məktəbin VIII sinfini bitirmişdir. Sonra 117 saylı Texniki Peşə Məktəbində
qaynaqçı ixtisasına yiyələnmişdir. 1990-92-ci illərdə SSRİ-nin Arxangelski
vilayətində hərbi xidmətdə olmuşdur. Lakin 1 il 6 aydan sonra torpaqlarımızın
düşmən tapdağı altında olmasına dözməyərək Əli xidmətini yarımçıq qoymuş, Vətənə
dönmüşdür. Bir neçə gün keçdikdən sonra Milli Ordu sıralarına daxil olmuşdur.
O, 707 saylı Hərbi Hissənin 1-ci taborunda cəsur kəşfiyyat komandiri kimi xidmətə
başlamışdır. Vəlixan meşəsi, Bala Cəfərli və Cəfərli kəndlərinin müdafiəsi uğrunda
gedən döyüşlərdə O, mərdliklə iştirak etmişdir. 1992-ci il dekabr ayının 29-da
İcevan rayonunun Lələ kəndində gedən döyüşlərdə mühasirəyə düşərək qəhrəmancasına
şəhid olmuşdur. Bu gün Qarapapaq kənd ümumi orta
məktəbə onun adı verilmiş, məktəbin həyətində büstü qoyulmuşdur. Yusifov Nəsir Səməd oğlu
Yusifov
Nəsir Səməd oğlu 16 may 1966–cı ildə Qazax rayonunun Qazaxbəyli kəndində anadan
olmuşdur. 1973-cü ildə Alı Mustafayev adına Qazaxbəyli kənd tam orta məktəbin
birinci sinfinə daxil olmuş, 1981-ci ildə həmin məktəbin səkkizinci sinfini
bitirmişdir. Ermənilərə qarşı döyüşdə könüllü dəstədə iştirak edən Nəsir
Yusifov 23 iyul 1993-cü ildə şəhid olmuşdur. Ailəliydi, 2 övladı var. Mahmudov Mahmud Abdulla oğlu
Mahmudov
Mahmud Abdulla oğlu 23 iyul 1971-ci ildə Yuxarı Əskipara kəndində anadan
olmuşdur. 1978-ci ildə Yuxarı Əskipara kənd tam orta məktəbin birinci sinfinə
daxil olmuş, 1988-ci ildə həmin məktəbin onuncu sinfini bitirmişdir. 1992-ci
ildə Milli Orduya xidmətə çağrılmışdır. 15 iyun 1993-cü ildə Məzəm kəndində gedən
döyüşlərdə minaya düşərək şəhid olmuşdur. Ağköynək kənd qəbiristanlığında dəfn
edilmişdir. Qocayev Adil Hüseynqulu oğlu
Qocayev
Adil Hüseynqulu oğlu 29 iyul 1966-cı ildə Qazax rayonunun Çaylı kəndində anadan
olmuşdur. 1973-cü ildə Çaylı kənd 2 nömrəli orta məktəbin birinci sinfinə daxil
olmuş, 1981-ci ildə həmin məktəbin səkkizinci sinfini bitirmişdir. 1981-1983-cü
illərdə Çaylı kənd 1 nömrəli orta məktəbin X-XI sinfini bitirmişdir. Hərbi xidmətə
gedənə qədər ailəsi ilə birlikdə kənddə üzümçülük briqadasında fəhlə işləmişdir.
2 il sovetlər birliyində hərbi xidmətdə olmuşdur. Qayıtdıqdan sonra yenə də təsərrüfatda
işləmişdir. 1990-cı ildə könüllü olaraq Azərbaycan Ordusu sıralarına yazılmış,
kənddə yaradılan batalyonun üzvü olmuşdur. 22 iyul 1993-cü ildə Fərəhli kəndi
istiqamətində gedən döyüşlərdə minaya düşərək ağır yaralanmışdır. Yarası ağır
olduğundan 24 iyulda vəfat etmişdir. Subay idi. Adını əbədiləşdirmək üçün kənddə
yaşadığı məhləyə yaxın bir ədəd bulaq çəkilmişdir.
Facebook-da paylaş