Qazaxda “Vətənpərvər Azərbaycan gənci” adlı tədbir keçirilib
Bu gün Qazaxda Azərbaycan Respublikası Gənclər
Fondunun təşkilatçılığı ilə Azərbaycan Dağ Yəhudiləri Dini İcması və Veteran
Tankçılar Birliyi tərəfindən Milli Qəhrəman Albert Aqarunovun xatirəsinə həsr olunmuş "Vətənpərvər Azərbaycan gənci” adlı tədbir keçirilib. Gənclər
Mərkəzində təşkil olunan tədbirdə Qazax Rayon İcra Hakimiyyəti başçısının
müavini Gulaya Həsənova, icra aparatının məsul şəxsləri, Gənclər Fondunda
Gənclər şöbəsinin aparıcı mütəxəssisi Emil Yusifov, Veteran Tankçılar Birliyinin sədri Hacı
Əzimov, Azərbaycan Dağ Yəhudiləri Dini İcmasının
nümayəndəsi Georgiy Sergey Stepanoviç, Qarabağ müharibəsi veteranları, məktəb
direktorları, gənc müəllimlər, rayonun şəhər və
kəndlər üzrə idarə, müəssisə və təşkilatlarında çalışan, eləcə də yaşayan
gənclər, Milli Qəhrəman Albert Aqarunovun döyüş yoldaşları, KİV nümayəndələri iştirak
ediblər. Azərbaycan Respublikasının Dövlət
Himninin səsləndirilməsi ilə başlayan tədbirdə Vətən uğrunda canından keçən
şəhidlərimizin əziz xatirəsi bir dəqiqəlik sükutla yad olunub. Sonra "Milli
Qəhrəman Albert Aqarunovun həyat yolu” adlı film nümayiş olunub.
Tədbirin
aparıcısı, Qazax Gənclərin İnkişaf və Karyera Mərkəzinin direktoru İsmayıl
Süleymanov çıxış edərək bugünkü tədbirin məqsəd və əhəmiyyətindən söz açıb. Gənclər
Fondunun dəstəyi ilə Mərkəz olaraq vətənpərvərlik mövzularında keçirdikləri
tədbirlərdən, reallaşdırdıqları layihələrdən danışıb. Qazax rayon Gənclər və
İdman İdarəsi, Gənclərin İnkişaf və Karyera Mərkəzi olaraq gənclərin
vətənpərvər ruhda tərbiyə olunmaları üçün silsilə tədbirlər, idman yarışları,
müsabiqələr təşkil etdiklərini qeyd edib.
Qazax Rayon İcra Hakimiyyəti başçısının
müavini Gulaya Həsənova çıxış edərək rayon rəhbərliyinin adından qonaqları
salamlayıb, düşmənlə sərhəddə yerləşən Qazax rayonunda vətənpərvər ruhlu
tədbirin təşkilinə görə təşkilatçılara minnətdarlığını bildirib. Vətən
torpaqlarının ərazi bütövlüyünün qorunması zamanı Qazax rayonunun da xeyli
sayda şəhid verdiyini bildirib. Müavin çıxışı zamanı bildirib ki, filmdə Milli
Qəhrəmanın çıxışını dinləyən zaman bir daha əmin olduq ki, Vətəni dinindən,
irqindən, milliyyətindən asılı olmadan sevmək, qorumaq, uğrunda qan tökmək,
canlar fəda etmək hər bir vətəndaşın borcudur. Albertin çıxışında söylədiyi
kimi əgər biz bu torpaqda doğulub boya-başa çatmışıqsa, bu torpaqda
yaşayırıqsa, onu qorumağı da bacarmalıyıq. G.Həsənova bildirib ki, bu gün biz
fəxr etməliyik ki, Albert kimi oğullarımız var. O oğullar ki, milliyyət seçimi
etmədən bir qarış torpaq üçün ölümün gözünə dik baxmağı bacarırlar.
Vətənpərvərlik mövzusunda həyata keçirilən tədbirin əhəmiyyətini vurğulayan
müavin Albert kimi Milli Qəhrəmanlarımızın keçdiyi döyüş yolunun bugünkü gənc
nəsil üçün bir örnək olduğunu qeyd edib. Bu gün yetişməkdə olan gənclərin həmin
qəhrəman oğullar kimi öz Vətənlərini sevmələrini və qorumalarını arzu edib. Bu
gün Qazaxın Bağanıs Ayrım, Xeyrımlı, Barxudarlı, Sofulu, Qızılhacılı, Yuxarı Əskipara və Aşağı Əskipara kimi 7 kəndinin düşmən tapdağı altında
olduğunu söyləyən müavin Respublika Prezidenti, Ali Baş Komandan İlham Əliyevin
düşünülmüş və uzaqgörən siyasəti, qüdrətli ordumuzun gücü sayəsində həmin
torpaqların tezliklə azad ediləcəyini və zəfər gününün uzaqda olmadığını
bildirib.
Veteran Tankçılar
Birliyinin sədri, eyni zamanda, Albert Aqarunovun vaxtilə komandiri olmuş Hacı Əzimov çıxış edərək
tədbir iştirakçılarını Azərbaycan Dağ
Yəhudiləri Dini İcmasının sədri Milix Yevdayevin və öz adından salamlayıb, tədbirin yüksək səviyyədə təşkil olunmasına,
qonaqpərvərliyə görə rayon rəhbərliyinə minnətdarlığını bildirib. Ölkədə
tolerantlıq ilə multikultural dəyərlərin təbliği, eyni zamanda, vətənpərvərlik
hisslərinin gənclərə aşılanması istiqmətində bu cür tədbirlərin böyük əhəmiyyət
kəsb etdiyini vurğulayıb. Bakı şəhərindən, Quba rayonundan sonra növbəti üçüncü
tədbirin məhz Qazaxda təşkil olunduğunu qeyd edib. Qazaxın şairlər, saz-söz
adamlarının tanındığı bir rayon olması ilə yanaşı, həm də igid oğullar,
qəhrəmanlar yurdu olduğunu diqqətə çatdırıb. 1990-cı ildə Qazaxda baş verən
ağrı-acı dolu günlərdən, Quşçu Ayrım, eləcə də digər kəndlərin düşməndən azad
edilməsində tankçıların göstərdikləri şücaətdən danışıb. Milli Qəhrəman Albert Aqarunovun döyüş yolundan, Vətən sevgisindən
söz açan natiq illər keçsə belə onun əziz xatirəsinin daim qəlblərdə
yaşayacağını, gələcək nəsillər üçün hər zaman örnək olacağını söyləyib.
Gənclər
Fondunda Gənclər şöbəsinin aparıcı mütəxəssisi Emil Yusifov çıxış edərək
əməkdaşı olduğu qurumun rəhbərliyi adından tədbirin təşkilinə görə razılığını
bildirib. Gənclər Fondunun yaradılmasından, məqsəd və əhəmiyyətindən söz açıb.
Fond olaraq vətənpərvərlik mövzusunda həyata keçirdikləri layihələrdən danışıb
və bugünkü tədbirin həmin silsilə tədbirlərin davamı olduğunu bildirib. Qeyd
edib ki, Albert kimi Milli Qəhrəmanların keçdiyi döyüş yolu biz gənclər üçün
örnək olması ilə barabər həm də üzərimizə böyük yük qoyur. O yük ki, biz
gənclər Albert kimi oğulları gələcək nəsillərə tanıtmalı, onlarla hər bir
vətəndaşın fəxr etməli olduğunu çatdırmalıyıq. Biz gənclər üzərimizə düşən
missiyanı layiqincə təmsil etməyi bacarmalı və bu yolda böyük səy
göstərməliyik. Tədbirdə
Milli Qəhrəman Albert
Aqarunovun döyüş yoldaşları Zahid
Nəzərov, Vitali Hüseynov və Arif Nağıyev də
ürək sözlərini çatdırıblar. İgid və cəsur qəhrəmanın keçdiyi döyüş yoluna nəzər
salıb, onunla bağlı xatirələrindən danışıblar. Onun Şuşanın, Laçının, eləcə də
digər rayonlarımızın müdafiəsində bir tankçı kimi hər zaman öndə getdiyini,
ölümün gözünə dik baxaraq mərd şəkildə döyüşlərə atıldığını, onun kimi
oğulların yaddaşlara əbədi olaraq yazıldığını vurğulayıblar. "Azərbaycan
Qarabağ Müharibəsi Əlilləri, Veteranları və Şəhid Ailələri” İctimai Birliyinin
Qazax rayon şöbəsinin sədr müavini, I qrup Qarabağ müharibəsi əlili Namiq
Alıyev, birliyin üzvü Nüsrət Musayev də çıxış edərək hərbi-vətənpərvərlik
mövzusunda keçirilən tədbirin təşkilatçlarına veteranlar adından
minnətdarlıqlarını bildiriblər. Albert kimi oğullarımızla hər zaman fəxr
etdiklərini və qürur hissi keçirdiklərini qeyd ediblər. Dövlətimiz və dövlət
başçısı İlham Əliyev tərəfindən şəhidlərə, Milli Qəhrəmanlara, onların ailə
üzvlərinə daim diqqət və qayğı göstərildiyini söyləyiblər. Ölkə başçısının
şəhid ailələrinə olan qayğısının Qazax rayonunda da ən yüksək səviyyədə öz
əksini tapdığını bildiriblər. Qazaxda rayon rəhbərinin diqqəti və qayğısı
nəticəsində şəhidlərin xatirəsinə olan bulaqların, onların uyuduqları qəbiristanlıqların,
xiyabanların əsaslı şəkildə təmir olunmasını, şəhərin mərkəzində onların
xatirəsinə yaradılan xiyabanda abadlıq işlərinin aparılmasını, adları və
şəkilləri həkk olunmuş löhvələrin vurulmasını şəhidlərimizə olan hörmət və
ehtiramın bariz nümunəsi kimi qiymətləndiriblər. Tədbirdə Azərbaycan Dağ Yəhudiləri Dini İcmasının Milli Qəhrəman Albert Aqarunovun xatirəsinə
təsis etdikləri medal Qazax Rayon İcra Hakimiyyətinin başçısı Rəcəb Babaşova və
Əfqanıstan Veteranları İctimai Birliyinin Ağstafa filialının sədri Mirzahid
Hacıyevə təqdim olunub. Rayon rəhbərinin adından medalı qəbul edən müavin
Gulaya Həsənova medalın verilməsinə görə minnətdarlığını bildirib. Son 3 ildə
rayon rəhbərinin şəhid ailələrinə olan qayğısına görə verilən ən qiymətli
hədiyyə olduğunu qeyd edib. Vətənə sevgi, hörmət hissini aşılayan,
vətənpərvərlik duyğusunu özündə əks etdirən tədbirdə ordumuzun qüdrətindən,
düşməni hər an məhv etməyə hazır olan oğullarımızın qəhrəmanlıqlarından söz
açılıb. Tədbirdən sonra rayonumuzda olan
qonaqlar şəhərin mərkəzində yerləşən Şəhidlər xiyabanını ziyarət edib, Vətən
oğullarına olan ehtiramlarını bildiriblər. Fəxri qazaxlılar parkında, Qazax Tarix-Diyarşünaslıq
Muzeyində olublar.
GOYEZEN.AZ
Facebook-da paylaş