Qüdrətli Azərbaycan var olsun deyə canlarından keçən şəhidlərimizi hər zaman yad etməliyik
Bu gün hər bir azərbaycanlının üzərinə düşən vəzifə yetişməkdə
olan gənc nəsildə vətənçiliyi, Vətən sevgisini və vətənpərərlik hisslərini aşılamaqdır.
Çünki Azərbaycanın dövlət müstəqilliyini əbədi etmək üçün ilk növbədə gənclərdə
Vətənə, millətə, dövlətə, dövlətçiliyə sədaqət ideyasını formalaşdırmaq
lazımdır. Doğma Azərbaycanın birliyi, bütövlüyü, bölünməzliyi yolunda hər bir
gənci mübarizə ruhunda tərbiyə etməli, qanları ilə azadlıq yazan Milli
Qəhrəmanlarımızı, şəhidlərimizi örnək göstərməliyik. Azadlığımızın,
müstəqilliyimizin, dövlət quruculuğumuzun, qüdrətli Azərbaycanın var olması
üçün ölümün gözünə dik baxan şəhidlərimizi böyük ehtiramla
xatırlamaq, yad etmək hər birimizin ən müqəddəs borcu, ən başlıca vəzifəsi
olmalıdır. Bu gün düşmənlə 168 km
sərhəddi olan, 5 kəndi daim mənfur düşmən gülləsinin atəşinə məruz qalan, Bağanıs Ayrım, Xeyrımlı, Barxudarlı,
Sofulu, Qızılhacılı, Yuxarı Əskipara və Aşağı Əskipara kimi
7 kəndi hələ də düşmən tapdağı altında olan Qazax rayonu da yüzlərlə şəhid
verib. Bu gün Qazaxın Vətən uğrunda canından keçən 285 nəfər şəhidi var ki,
onlardan 7 nəfər igid oğlu Azərbaycanın Milli Qəhrəmanı adına layiq görülüb. Qazaxda Vətən torpaqlarının
azadlığı uğrunda canından keçmiş şəhidlərimizin xatirəsi isə hər zaman ən
yüksəkdə tutulur. Rayonda Vətənin müstəqilliyi və ərazi bütövlüyü naminə
canından keçən şəhidlərimizə, onların ailə üzvlərinə olan qayğı hər zaman
diqqət mərkəzində saxlanılır. Rayon rəhbərinin ilk gündən şəhidlərimizə xüsusi
diqqət ayırması, onların ailə üzvlərinə daim qayğı ilə yanaşması, şəhidlərimizin
uyuduğu qəbiristanlıqların, onların xatirəsinə ucaldılmış abidələrin,
parkların, bulaqların, xiyabanların abadlaşdırılması, əsaslı şəkildə təmir
edilməsi, xüsusilə də şəhərin mərkəzində yerləşən Şəhidlər xiyabanında aparılan
abadlıq işləri və 285 şəhidin adı, şəkli əks olunmuş lövhələrin vurulması bu
istiqamətdə görülən əməli işlərin bariz nümunəsidir. Rayonumuza gələn hər bir
qonağın, eləcə də adi rayon sakinlərinin şəhərin mərkəzində yerləşən bu
müqəddəs məkana – Şəhidlər xiyabanına baş çəkməsi, əziz xatirələrini ehtiramla
yad etmələri şəhidlərə olan böyük ehtiramdan xəbər verir. Rayonda keçirilən
tədbirlərin öncə bu müqəddəs məkanı ziyarətlə başlaması, məktəblilərin mütəmadi
olaraq xiyabanı ziyarət etmələri, hər bir Vətən oğlunun doğum və ya anım
günündə Şəhidlər xiyabanında ruhlarına dualar oxunması, əziz xatirələrinin
dərin ehtiramla yad olunması şəhidlərimizin daim qəlblərdə yaşaması
deməkdir. GOYEZEN.AZ saytı da mütəmadi
olaraq şəhidlərimizlə bağlı silsilə yazılar dərc edir, Vətən uğrunda canından
keçmiş, doğum və anım günü olan şəhidlərimizin əziz xatirələrini
yad edir. Bu həftə də doğum günü olan, şəhidlik adlı zirvəyə ucaldıqları
günləri qeyd olunan şəhidlərimizdən Azər
Hüseynovun, İsrayıl Əfəndiyevin,
Niyazi Quliyevin, İlqar Cəfərovun, Əmir Vəliyevin, Ruslan Aslanovun, Namiq Hacıyevin, Ədalət Hüseynovun, Mürsəl Qocayevin, Süleyman Süleymanovun, Vasif Haqverdiyevin, Elnarə Rəhimovanın əziz
xatirəsini yad edir. Allah bütün şəhidlərimizə
rəhmət eləsin. Hüseynov Azər Qələndər oğlu Hüseynov
Azər Qələndər oğlu 25 fevral 1973-cü ildə Qazax rayonunun Fərəhli kəndində
anadan olmuşdur. 1981-ci ildə Fərəhli kənd ümumi orta məktəbin birinci sinfinə
daxil olmuş, 1988-ci ildə həmin məktəbin səkkizinci sinfini bitirmişdir. 1988-1990-cı
illərdə Qazax şəhər 1 saylı tam orta məkəbin onuncu sinfini bitirmişdir.
1992-96-cı illərdə Azərbaycan Milli Ordu sıralarında xidmət etmişdir. 2 noyabr
1997-ci ildə Qazax rayonunun Fərəhli kəndində şəhid olmuşdur. Evli idi. Həyat yoldaşı
və iki övladı Fərəhli kəndində yaşayır. Əfəndiyev İsrayıl Süleyman oğlu Əfəndiyev
İsrayıl Süleyman oğlu 25 fevral 1964-cü ildə Qazax rayonunun İkinci Şıxlı kəndində
anadan olmuşdur. 1971-ci ildə Valeh Musayev adına İkinci Şıxlı kənd orta məktəbin
birinci sinfinə getmiş, 1981-ci ildə həmin məktəbin onuncu sinfini bitirmişdir.
Həmin ildə Bədən Tərbiyəsi Texnikumuna qəbul olmuş, 1985-ci ildə texnikumu
bitirərək hərbi xidmətə getmişdir. Hərbi xidmətdən qayıtdıqdan sonra Valeh
Musayev adına tam orta məktəbdə bədən tərbiyəsi müəllimi işləmişdir. Müəllim
işlədiyi vaxtda səfərbərlik zamanı Milli Orduya çağırılmışdır. Ordan da
Sanqaçalda "sapyor” (minaaxtaran) ixtisası üzrə zabit dərəcəsi almış, 707 saylı
hərbi hissəyə göndərilmişdir. İşlədiyi müddətdə 707 saylı hərbi hissədə şəxsi
işlər üzrə zabit işləmişdir. 17 dekabr 1994-cü ildə Qazax rayonunun İkinci
Şıxlı kəndində Babakər dağı istiqamətində gedən döyüşlərdə şəhid olmuşdur. Ailəli
olub, 2 övladı var. Quliyev Niyazi Allahverdi oğlu Quliyev
Niyazi Allahverdi oğlu 26 fevral 1975-ci ildə Qazax rayonunun Cəfərli kəndində
anadan olmuşdur. 1981-ci ildə Cəfərli kənd orta məktəbin birinci sinfinə daxil
olmuş, 1991-сi ildə həmin məktəbin onuncu sinfini bitirmişdir. 1992-сi il mart
ayının 22-də Sofulu kənd əhalisinin ev əşyalarının çıxarılmasına kömək edərkən
Cəfərli-Sofulu yolunda "UAZ” markalı avtomobildə ermənilər tərəfindən qoyulmuş
minaya düşmüşdür. Cəfərov
İlqar Dursun oğlu 27 fevral 1976-cı ildə Qazax rayonunun Quşçu Ayrım kəndində
anadan olmuşdur. 1983-cü ildə Quşçu Ayrım kənd tam orta məktəbinin birinci
sinfinə daxil olmuş, 1994-cü ildə məktəbi bitirərək Vətənin müdafiəsinə
yollanmışdır. Cəfərov İlqar Dursun oğlu 3 sentyabr 1995-ci ildə Ağdam rayonunun
Əfətli kəndi ərazisində gedən döyüş zamanı şəhid olmuşdur. Subay idi. Vəliyev Əmir İsmayıl oğlu Vəliyev
Əmir İsmayıl oğlu 1 yanvar 1972-ci ildə
Qazax rayonunun Abbasbəyli kəndində anadan olmuşdur. 1979-1983-cü illərdə
Abbasbəyli kənd ibtidai məktəbində I-IV siniflərdə təhsil almışdır.
1983-1989-cu illərdə Alpout kənd tam orta məktəbində təhsilini davam
etdirmişdir. 1990-cı ildə hərbi xidmətə çağırılmışdır. 28 fevral 1994-cü ildə
torpaqlarımızın ərazi bütövlüyü uğrunda gedən döyüşdə şəhid olmuşdur. Subay
idi. Aslanov Ruslan Yaqub oğlu Aslanov
Ruslan Yaqub oğlu 19 fevral 1969-cu ildə Qazax rayonunun Çaylı kəndində anadan olmuşdur. 1977-ci il ildə Çaylı kənd 1
saylı tam orta məktəbin birinci sinfinə daxil olmuş, 1987-ci ildə həmin orta məktəbi bitirmişdir. 1988-1990-cı
illərdə SSRİ-nin silahlı qüvvələrində hərbi xidmət etmişdir. Hərbi xidmətdən qayıtdıqdan
sonra polis əməkdaşı kimi xidmət etmişdir. Aslanov Ruslan Yaqub oğlu 28 fevral 1992-ci
ildə Bala Cəfərli kəndində polis əməkdaşı olaraq xidməti vəzifəsini icra edərkən
şəhid olmuşdur. Çaylı kəndində bir bulağa şəhid Ruslan Aslanovun adı
verilmişdir. Hacıyev Namiq Səhrab oğlu Hacıyev
Namiq Səhrab oğlu 17 dekabr 1974-cü ildə Qazax rayonunun Daş Salahlı kəndində anadan
olmuşdur. 1981-1992-ci illərdə şəhid Araz Əmilov adına Daş Salahlı kənd 1 saylı
tam orta məktəbdə təhsil almışdır. 1992-ci ilin dekabrında Azərbaycan Milli
Ordusuna xidmətə getmişdir. 1995-ci il mart ayının 1-də Ağdamda cəbhə bölgəsində
xidməti vəzifəsini yerinə yetirərkən şəhid olmuşdur. Hüseynov Ədalət Teymur oğlu Hüseynov
Ədalət Teymur oğlu 1 mart 1969-cu ildə Qazax rayonunun Qızılhacılı kəndində
anadan olmuşdur. 1976-cı ildə Qızılhacılı kənd ibtidai məktəbinin birinci
sinfinə daxil olmuş, 1984-cü ildə həmin məktəbin səkkizinci sinfini
bitirmişdir. 1984-86-cı illərdə M.Hüseyn adına məktəb-liseyin onuncu sinfini
bitirmişdir. 1987-89-cu illərdə sovet ordusu sıralarında xidmət etmişdir.
1990-92-ci illərdə Qazax rayonunun Qızılhacılı kəndinin müdafiəsi zamanı
könüllü olaraq xidmət etmişdir. 1993-cü ildə Ağstafa rayon Yanğından Mühafizə
Xidmətində işləmişdir. 29 dekabr 1993-cü ildə Qazax şəhərinə atılan mərmi
partlayışı nəticəsində şəhid olmuşdur. Subay idi. Qocayev Mürsəl Məhəmməd oğlu Qocayev
Mürsəl Məhəmməd oğlu 1 mart 1958-ci ildə Qazax rayonunun Əli Bayramlı (indiki
Aslanbəyli) kəndində anadan olmuşdur. 1965-ci ildə (Əli Bayramlı) hazırkı Aslanbəyli
kənd orta məktəbin birinci sinfinə getmiş,1975-ci ildə həmin məktəbin onuncu
sinfini bitirmişdir. 1977-79-cu illərdə sovet ordusu sıralarında xidmət etmişdir.
Ordudan qayıtdıqdan sonra Aslanbəyli kəndində
fəhlə işləmişdir. 15 iyun 1994-cü ildə Qazax rayonunun Aslanbəyli kəndi ilə Ermənistan Respublikasının sərhəddində
ermənilər tərəfindən atılan atəş nəticəsində
şəhid olmuşdur. Süleymanov Süleyman Elçin oğlu Süleymanov
Süleyman Elçin oğlu 11 noyabr 1997-ci ildə Qazax rayonunun Daş Salahlı kəndində
anadan olmuşdur. 2004-2015-ci illərdə şəhid Araz Əmilov adına Daş Salahlı kənd 1
saylı tam orta məktəbdə təhsil almışdır. 2016-cı
il yanvar ayının 26-da Səfərbərlik və Hərbi Xidmətə
Çağırış üzrə Dövlət Xidmətinin Qazax rayon şöbəsi tərəfindən həqiqi hərbi
xidmətə çağırılmışdır. Hərbi xidmətini Ağdam rayonunda başlamışdır. 2017-ci
il mart ayının 2-də Ağdamda ermənilərlə təmas xəttində ön cəbhədə hərbi xidmət
vəzifəsini yerinə yetirərkən düşmən snayperi tərəfindən vurularaq şəhid
olmuşdur. Şəhid Daş Salahlı kənd Şəhidlər xiyabanında dəfn olunmuşdur. Şəhidin
adına doğulduğu Daş Salahlı kəndində Fidat Məmmədov küçəsində xatirəsinə bulaq abidə
kompleksi tikilmişdir. Haqverdiyev Vasif Mirzə oğlu Haqverdiyev Vasif Mirzə oğlu 1971-ci il yanvar ayının 26-da Qazax rayonunun Daş
Salahlı kəndində anadan olmuşdur. 1977-1988-ci illərdə Ş.Cəbiyev adına Daş Salahlı
kənd 2 saylı tam orta məktəbdə təhsil almışdır. 1988-ci ildə keçmiş sovetlər
birliyi ordusunda hərbi xidmətdə olmuşdur. 1993-cü ildə mart ayının 2-də Ağdərə
rayonundakı Sərsəng su anbarı ətrafında gedən döyüşdə itkin düşmüşdür. Rəhimova Elnarə Faiq qızı Rəhimova
Elnarə Faiq qızı 3 mart 1983-cü ildə Qazax rayonunun Bala Cəfərli kəndində
anadan olmuşdur. 1989-cu ildə Bala Cəfərli kənd ibtidai məktəbin birinci sinfinə
daxil olmuş, 1993-сü ildə Bala Cəfərli kənd ibtidai məktəbin dördüncü sinfini
bitirmişdir. 1993-сü ildə Qazax şəhər internat məktəbə daxil olmuşdur. 2 yanvar
2000-ci ildə evlərində otaqda olarkən ermənilər tərəfindən snayper silahla
vurulmuşdur.
Facebook-da paylaş