Ön cəbhədə döyüşən qazaxlı hərbçimizin ilk qız övladı dünyaya gəlib
27 sentyabr! Bu elə
bir tarixdir ki, həmin gündən Azərbaycan düşmən tapdağında olan əzəli
torpaqlarının azadlığı uğrunda haqq savaşına çıxıb. Və o gündən etibarən Azərbaycanın
hərb tarixinə və xalqımızın yaddaşına hər gün qələbələrlə, zəfərlərlə dolu gözəl
günlər yazılır. Azərbaycan adlı, Qarabağ adlı tariximizin səhifələrinə qızıl hərflərlə
yazılan bu döyüşü, döyüşdə qazanılan qələbələri isə bizlərə bəxş edən igid, mərd,
qəhrəman Azərbaycan oğullarıdır. Bizləri qələbə sevinci ilə müjdələyən, sevinc
göz yaşlarına qərq edən igid Vətən oğullarını da uca Yaradan sevindirir. Necə
ki, bu gün haqqında söhbət açdığımız ön cəbhədə vuruşan hərbçimiz Süleymanov Babək Elburus oğlunun evində
xoş gün yaşanır. Özü üzünü görməsə də ilk qız övladının atası olmaq sevincini
uca Tanrı ona bəxş edib. 8 iyun 1992-ci ildə Odun dağı yüksəkliyində düşmən
tərəfindən açılan atəş nəticəsində şəhid olan əmisi Süleymanov Şahin Novruz
oğlunun qisasını almaq, ən əsası da düşmən tapdağında olan torpaqlarımızı azad
etmək üçün ön cəbhədə vuruşan Babək qələbə müjdəsi ilə ata olmaq sevincini birgə
yaşayır. Fəaliyyətə
başladığı ilk gündən şəhidlərimizə, Qarabağ müharibəsi əlillərinə,
veteranlarına, hərbçilərimizə, onların ailə üzvlərinə, yaxınlarına diqqət və
qayğı göstərən Qazax Rayon İcra Hakimiyyətinin başçısı Rəcəb Babaşov bu dəfə də
öz ənənəsinə sadiq qalıb. Ön cəbhədə vuruşan Babək Süleymanovu və ailəsini xoş
gün münasibətilə təbrik etməyi unutmayıb, yeni dünyaya göz açan balaca mələyimizə
hədiyyəsini göndərib. Qazax RİH başçısı aparatında Ərazi idarəetmə və yerli özünüidarəetmə orqanları ilə iş şöbəsində
böyük məsləhətçi Babək Nuruyev əlamətdar gün münasibətilə hərbçimizin ailəsində qonaq olub. Rayon rəhbərliyinin
səmimi təbriklərini, xoş arzularını çatdırıb, balaca qızımızın hədiyyəsini -
uşaq arabasını və oyuncağını təqdim edib. Hərbçimizin
anası Mətanət Hacımahmudova onlara göstərilən diqqət və qayğıya görə rayon rəhbərliyinə
ailəsi adından minnətdarlığını bildirib. Bu gün ailəsində sevincin-sevincə
qarışdığını qeyd edən nənə bir tərəfdə oğlunun və döyüş yoldaşlarının yeni qələbələr,
zəfərlər bəxş etməsi sevincini, bir tərəfdə də oğlunun ilk qız övladının
dünyaya gəlməsi sevincini yaşadıqlarını söyləyib. Övladının zəfər çalmasını,
sağ-salamat ailəsinin yanına qayıtmasını arzu etdiyini qeyd edib. Ölkə
Prezidenti, Ali Baş Komandan İlham Əliyevin rəhbərliyi altında şanlı Azərbaycan
Ordusunun Qarabağı azad edəcəyi günün və o böyük zəfərin çox yaxında olduğunu
söyləyib. Hərbçimizin
həyat yoldaşı Leyla Süleymanova da ömür-gün yoldaşı ilə fəxr etdiyini bildirib.
Oktyabrın 29-da dünyaya gələn qızlarına ad qoymaq üçün Babəkin qayıtmasını gözlədiyini
vurğulayıb. Biz
də Süleymanovlar ailəsinin arzularına qoşuluruq. İnşallah Babək zəfər çalaraq
sağ-salamat ailəsinin yanına qayıdar, qalib bir sərkərdə kimi geri dönər və
övladına istədiyi adı qoyar. GOYEZEN.AZ
Facebook-da paylaş