Azərbaycanın şöhrətini yüksəldən idmançılarımız
Ulu Öndər Heydər
Əliyevin ölkəmizə rəhbərliyi dövründə digər sahələrdə olduğu kimi, idmanın da
inkişafına böyük diqqətlə yanaşılmışdır. Ümummilli Lider Heydər Əliyevin idman
sahəsində həyata keçirdiyi siyasət 1997-ci ildən mühüm mərhələyə qədəm qoydu. Heydər Əliyevin diqqət
və qayğısı sayəsində nəhəng idman sağlamlıq, Olimpiya mərkəzləri, idman
kompleksləri tikilib istifadəyə verilmişdir. Bədən tərbiyəsi və idmanın kütləviliyi geniş vüsət almışdır. İlham Əliyevin
Milli Olimpiya Komitəsinin prezidenti seçilməsi Azərbaycan idmanının həyatında
əlamətdar hadisə kimi tarixə yazıldı. Azərbaycanın müxtəlif bölgələrində də
müasir tipli olimpiya idman kompleksləri tikilib istifadəyə verilməyə başladı.
Bu gün Azərbaycan dünyada idman ölkəsi kimi tanınaraq böyük nüfuz sahibinə
çevrilib. Ölkəmizdə idman ənənələri kifayət qədər güclüdür və gənc nəsil bu
ənənələri uğurla davam etdirir. Macarıstanın paytaxtı
Budapeştdə Güləş üzrə Avropa çempionatı keçirilmişdir. 8 aprel 2022-ci il tarixində Azərbaycan
Respublikasının Prezidenti İlham Əliyev Macarıstanda keçirilmiş Güləş üzrə
Avropa çempionatında iştirak edən Azərbaycan millisinin üzvlərini qəbul edib və
görüşü zamanı bildirib ki, Budapeştdə keçirilmiş Avropa çempionatında
güləşçilərimiz bir daha xalqımızı sevindirmişlər, böyük qələbə ilə Vətənə
qayıtmışlar. 16 medal qazanmış idmançılar bir daha Azərbaycanın idman şöhrətini
yüksəklərə qaldırmışlar. Avropada birinci olmaq, istənilən idman növündə
birinci olmaq böyük uğur hesab edilə bilər. Avropa çempionatında medalların birini
qadın idmançımız, qalanlarını isə sərbəst güləş və yunan-Roma güləşi üzrə komandalarımız
qazandı. Beləliklə, həm sərbəst güləş, həm yunan-Roma güləşi üzrə
komandalarımız Avropada birinci oldular. Bu gün ölkəmizdə
vətənpərvər, milli-mənəvi dəyərlərə, Heydər Əliyev ideyalarına sadiq gənc
idmançılar formalaşdırılır. Azərbaycan idmançıları fəal iştirakı ilə seçilir. 44 günlük Vətən
müharibəsi Azərbaycan gəncinin, idmançılarının vətənpərvərliyini, gücünü,
əzmini bütün dünyaya nümayiş etdirdi. Hər biri öz igidliyi
ilə vətənpərvərlik salnaməsi yazdı, zəfər dolu döyüş yolu ilə dillərdə dastana
döndü. Onlar necə vətənpərvər olduqlarını bütün dünyaya göstərdilər. Ölkə başçısı həmçinin
qeyd edib ki, cəmi 44 gün ərzində böyük tarixi Qələbə qazanmış xalqı təmsil etmək
həm böyük qürurdur, həm də böyük məsuliyyətdir. İdmançılarımız yarışa çıxanda
unutmamalıdırlar ki, müzəffər ölkəni və qalib xalqı təmsil edirlər. Həm
gənclər, həm böyüklər arasında Avropada birinci yeri tutmaq böyük nailiyyətdir
və onu göstərir ki, güləşdəki ənənələrimiz yaşayır və güclü gənc nəsil yetişir.
Əldə olunan uğurlar ölkəmizin və idmanımızın beynəlxalq nüfuzunu artırır. Vətənpərvərliyi
gücləndirən amillərdən biri tarixi-hərbi Zəfərimizdir və idman uğurlarımızdır.
Gənc nəsil mütləq vətənpərvərlik ruhunda tərbiyə almalıdır, milli dəyərlər
əsasında tərbiyə almalıdır və Azərbaycan dövləti buna nail olmaq üçün bütün
imkanlardan istifadə edir. Azərbaycan vətəndaşları - həm idmansevərlər, həm də
idmanla o qədər də maraqlanmayan vətəndaşlar həmişə idman arenalarında əldə
edilmiş qələbələrin xəbəri gələndə sevinirlər. Hər bir Azərbaycan vətəndaşı öz
əməyi ilə ölkəmizi gücləndirir. Məhz buna görə bu gün Azərbaycan dünyada
sürətlə inkişaf edən ölkə kimi tanınır və dünyada nadir ölkələrdəndir ki, öz
taleyini özü həll edir, müəyyən edir, öz siyasətini müstəqil şəkildə aparır və
istər döyüş meydanlarında, istər siyasi arenalarda qələbə qazanır. Ofeliya SALMANOVA, Qazax Rayon Heydər
Əliyev Mərkəzinin əməkdaşı
Facebook-da paylaş