“Yeni Azərbaycan Partiyası və dövlət mədəniyyət siyasəti” mövzusunda videokonfrans keçirilib
Martın 12-də Qazax
Rayon Heydər Əliyev Mərkəzi və Qazax Rayon mədəniyyət müəssisələri YAP-sı Ərazi
ilk Partiya Təşkilatının təşkilatçılığı ilə "Yeni Azərbaycan Partiyası və dövlət
mədəniyyət siyasəti” mövzusunda videokonfrans keçirilib. Zoom platforması
üzərindən keçirilən onlayn görüşdə Qazax Rayon Mərkəzləşdirilmiş Kitabxana Sisteminin,
Qazax Tarix-Diyarşünaslıq Muzeyinin, Qazax şəhər 2 saylı Musiqi Məktəbinin, M.P.Vaqif
və M.V.Vidadinin Xatirə Muzeyinin əməkdaşları, Yeni Azərbaycan Partiyasının mədəniyyət
müəssisələrində çalışan gənc üzvləri iştirak ediblər. Videokonfransda
Yeni Azərbaycan Partiyasının yaranma tarixindən, zərurətindən, cəmiyyətin bütün
sahələri ilə bərabər mədəniyyət sahəsindəki ölçüyəgəlməz xidmətlərindən, bugünkü
uğurlarından və s. danışılıb. Qazax Rayon Heydər
Əliyev Mərkəzinin direktoru Ceyhunə Hüseynova videokonfrans iştirakçılarını
salamlayıb, Yeni Azərbaycan Partiyası haqqında danışaraq bildirib ki, bu gün
müstəqil, azad bir dövlət, qüdrətli, güclü, dünyada özünə layiqli yer tutmuş
bir Azərbaycan haqqında danışırıqsa, bu proseslərin kökündə Heydər Əliyev şəxsiyyəti
və bu şəxsiyyətin işığından nur alıb Azərbaycanın inkişafı üçün fəaliyyət göstərən
YAP-sı dayanır. Partiyanın yaradılmasından 6 ay sonra Heydər Əliyevin hakimiyyətə
gəlməsi ilə Azərbaycanı tənəzzüldən qurtarması kimi şərəfli bir tarixə sahib
olan YAP-sı Azərbaycan dövlətinin qurulması, inkişafı, müstəqilliyimizin dönməzliyi,
əbədiliyi, beynəlxalq nüfuzunun artması, regionun lider dövləti olması və onun ideyaları, bu ideyaların uğurla həyata
keçirilməsini təmin edən Azərbaycan Respublikasının Prezidenti İlham Əliyevin fəaliyyəti nəticəsində
daha da inkişaf etdi və genişləndi. Bu gün Partiyanın sıralarında Azərbaycan
dövlətinə və xalqına ləyaqətlə, sədaqətlə xidmət edən ziyalılardan ibarət
siyasi güc və bütöv Azərbaycan xalqı var. Bu gün YAP-nın cəmiyyətdəki uğurunu, nüfuzunu şərtləndirən ən
başlıca amil İlham Əliyevin dövlət başçısı kimi uğurlu fəaliyyətidir. Sonra söz
videokonfrans iştirakçılarına verilib. Qazax Rayon Mədəniyyət Müəssisələri YAP-sı
Ərazi ilk Partiya Təşkilatının sədri Ramil Qurbanov, Qazax Tarix-Diyarşünaslıq
Muzeyinin direktoru Gülnaz Alişanova, Qazax MKS-nin direktoru Solmaz Babanlı,
Yeni Azərbaycan Partiyasının üzvlərindən şəhər 1 saylı Musiqi Məktəbinin müəllimi
Leyla Məmmədova, Qazax MKS-nin kitabxanaçısı Elnarə Məmmədova çıxış edərək Yeni
Azərbaycan Partiyasının yaradılması və dahi siyasətçi Heydər Əliyevin xalqın təkidli
tələbi ilə hakimiyyətə qayıtmasından sonra cəmiyyətin bütün sahələrində olduğu
kimi mədəniyyət sahəsində də islahatlar, yeni-yeni mədəni mübadilələr həyata
keçirilməyə başladığını qeyd ediblər. Öz daxili və xarici siyasətini yeni
tarixi şəraitə, müasir tələblərə uyğun olaraq xalqımızın tarixi və mədəni ənənələrinə,
dilimizə, dinimizə milli-mənəvi dəyərlərimizə istinad edərək həyata keçirməyə
başladığını vurğulayıblar. Bu prosesdə mədəniyyətimizdə böyük dəyişikliklər
edilmədiyini, əksinə milli-mənəvi dəyərlərimizə xələl gəlmədən mühafizə edildiyini
bildiriblər. Mədəniyyət azad və müstəqil sahədir. Mədəniyyət siyasətdən
ayrıdır. Lakin mədəniyyət heç vaxt siyasətdən kənar olmayıb, hətta dövlətin
beynəlxalq inteqrasiyasında böyük rol oynayıb. Bu mənada Azərbaycan dövlətinin
hər zaman milli mədəniyyəti qoruyub saxlamaq qarşısında mühüm vəzifə kimi
durub. Ulu Öndər yaxşı bilirdi ki, milli dövlətçilik dəyərlərinin əsasını
sağlam düşüncəli mədəniyyət təşkil edir. O, mədəniyyəti xalqın böyük sərvəti
hesab edirdi. Elə ona görə də mədəni-mənəvi dəyərlərin qorunması, təbliği üçün
mümkün olan hər şeyi edirdi. Videokonfrans
iştirakçıları qeyd ediblər ki, bizim nəsil xoşbəxtdir ki, Heydər Əliyevlə bir
epoxada yaşamaq bizə nəsib oldu və Ulu Öndərin mədəniyyətimizə, incəsənətimizə
göstərdiyi böyük qayğının şahidi olduq. Heydər Əliyev Azərbaycan mədəniyyətinin
inkişafında yeni bir dövrün əsasını qoydu. Mədəniyyətimizin elə bir sahəsi
yoxdur ki, Heydər Əliyev qayğısından bəhrələnməsin. Heydər Əliyevin mədəniyyət
siyasətinin reallaşması işində bu gün Ulu Öndərin adını şərəflə daşıyan Fondun
böyük xidmətləri vardır. Milli-mənəvi dəyərlərimizə qayğı, onların qorunması və
təbliğində Heydər Əliyev Fondunun prezidenti, YUNESKO-nun və İSESKO-nun xoşməramlı
səfiri, Azərbaycan Respublikasının Birinci vitse-prezidenti Mehriban xanım
Əliyevanın xidmətləri əvəzsizdir. Mədəniyyətimizin bugünkü inkişafı və dünyada
tanıdılması yolunda aparılan uğurlu dövlət
mədəniyyəti siyasətinin bundan sonra da davamlı olaraq həyata keçirilməsində
dövlətimizə, möhtərəm Prezidentimizə və Mədəniyyətimizin hamisi- Mehriban xanım
Əliyevaya bütün mədəniyyət işçiləri adından minnətdarlıq və təşəkkürlər
çatdırılıb, bu yolda yeni nailiyyətlər arzu edilib.
GOYEZEN.AZ
Facebook-da paylaş