“Heydər Əliyevin Ermənistanın əsassız ərazi iddialarına qarşı apardığı mübarizə” mövzusunda mühazirələr oxunub
Qazax Rayon Heydər Əliyev Mərkəzinin 2020-ci il
üçün təsdiq olunmuş tədbirlər planına əsasən Ulu Öndər Heydər Əliyev irsinin təbliğ
edilməsi məqsədilə il ərzində rayonun orta ümumtəhsil məktəblərində yuxarı
sinif şagirdlərinə mühazirələr oxunması nəzərdə tutulub. Bu məqsədlə Mərkəzdə növbəti
mühazirələr Şəmistan Şahvələdov adına Xanlıqlar kənd tam orta məktəbin XI sinif şagirdləri və Alı Əliyev adına
Hüseynbəyli kənd tam orta məktəbin VIII sinif şagirdləri üçün oxunub. "Heydər
Əliyevin Ermənistanın əsassız ərazi iddialarına qarşı apardığı mübarizə”
mövzusunda oxunan mühazirələrdə Ulu Öndərin mövzu ilə bağlı gördüyü işlərə bir
daha nəzər salınıb. Mühazirəni aparan Mərkəzin direktoru Ceyhunə Hüseynova
bildirib ki, Ermənistanın ölkəmizə və xalqımıza qarşı apardığı etnik soyqırım və
əsassız ərazi iddialarının qarşısı daim Dahi siyasətçi Heydər Əliyev tərəfindən
qətiyyətlə alınmış, Onun Dağlıq Qarabağa göstərdiyi diqqət və qayğısı nəticəsində
o dövrlərdə erməni millətçilərinin cəhdləri həmişə boşa çıxmışdır. Çünki Heydər
Əliyev Dağlıq Qarabağın tarixini, coğrafiyasını, iqtisadiyyatını, orada
yaşayanların düşüncələrini gözəl bilirdi. Məhz Heydər Əliyevin fəaliyyətinin nəticəsi
idi ki, xalqımızın mənəvi-əxlaqi dəyərlərinə söykənən genişmiqyaslı tədbirlərin
həyata keçirilməsi ilə Dağlıq Qarabağın əhalisində milli ruhun oyanması güclənmişdi.
Sovet dövründə erməni millətçiləri imkan düşdükcə Azərbaycan torpaqlarına əsassız
iddialar irəli sürürdülər. Lakin Heydər Əliyevin çevik müdaxiləsi nəticəsində
bu hadisələrin qarşısı qətiyyətlə alınmış, ermənilərin əsassız iddiaları həmişə
iflasa uğramışdır. Heydər Əliyevin 1969-1982-ci illərdə gördüyü işlər sonralar
Azərbaycanın milli dövlətçilik ideyalarının aparıcı qüvvəyə çevrilməsi və cəmiyyətin
bu ideya ətrafında səfərbər olması üçün şərait yaratdı. 1993-cü ilin II
yarısında Ümummilli Lider Heydər Əliyev yenidən hakimiyyətə qayıtdıqdan sonra
Azərbaycanın milli mənafelərinin qorunması məqsədilə özünün zəngin dövlətçilik
təcrübəsinə əsaslanaraq ən mühüm və təxirəsalınmaz vəzifələrin yerinə yetirilməsini
qarşıya məqsəd kimi qoymuşdu. Yeni siyasi kursu həyata keçirmək üçün isə ilk
növbədə müharibə dayandırılmalı və dinc şərait təmin edilməli idi. Bu məqsədlə
1994-cü ilin mayından Ermənistanla atəşkəsə nail olunması, qanunsuz hərbi birləşmələrin
buraxılması və ölkə daxilində sabitlik yaratmaq yolunda atılan addımlar sayəsində
yeni siyasi kursun ardıcıllıqla həyata keçirilməsi üçün lazım olan əlverişli
dinc şərait yarandı. Məhz Heydər Əliyev siyasi hakimiyyətə yenidən qayıtdıqdan
sonra xalqımıza qarşı həyata keçirilən etnik təmizləmə, soyqırım və təcavüzkarlıq
siyasətinin əsl mahiyyəti açıqlanmış, bu hadisələrə siyasi-hüquqi qiymət
verilmişdir. Sonra şagirdlər Muzeyi ekskursiya edərək yaxından
tanış olublar. Mərkəzin baş fond mühafizi Səidə Qocayeva məktəblilərə Ulu Öndərin
mənalı həyatı və siyasi fəaliyyəti haqqında dolğun məlumatlar çatdırıb.
GOYEZEN.AZ
Facebook-da paylaş