Qazax Rayon Heydər Əliyev Mərkəzində “Xocalını unutmayaq” başlıqlı tədbir keçirilib
Bu gün Qazax Rayon Heydər Əliyev Mərkəzində Xocalı
faciəsinin 28-ci ildönümünə həsr edilmiş "Xocalını unutmayaq” başlıqlı tədbir
keçirilib. Tədbirdə Qazax Rayon
İcra Hakimiyyəti başçısı aparatında İctimai-siyasi və humanitar məsələlər
şöbəsində baş məsləhətçi Gülnar Quluyeva, Q.Hacımahmudova adına şəhər
ümumi orta məktəbin müəllim və şagirdləri, Mərkəzin kollektivi və könüllüləri
iştirak ediblər. Mərkəzin direktoru Ceyhunə Hüseynova tədbiri giriş
sözü ilə açaraq bildirib ki, Xocalı soyqırımı 1992-ci il fevralın 25-dən 26-na
keçən gecə Ermənistan silahlı qüvvələri tərəfindən Rusiyanın 366-cı motoatıcı
alayının iştirakı ilə Xocalını işğal edərkən etnik azərbaycanlılara qarşı baş
vermiş soyqırımdır. Azərbaycan xalqı son 200 ildə ermənilərin davamlı olaraq
etnik təmizləmə və soyqırım siyasətinə məruz qalmışdır. Bütün bu qırğınlar nəticəsində
10 minlərlə azərbaycanlı ən qəddar surətdə qətlə yetirilimiş, bir milyondan çox
əhali öz doğma yurdundan didərgin salınmış, tarixən azərbaycanlılara məxsus
olan məktəblər, məscidlər, tarixi və mədəniyyət abidələri məhv edilmiş və ya
erməniləşdirilmişdir. Xocalı faciəsi isə tarixi yaddaşlara Katın, Liditsa,
Oradur, Holokost, Sonomi, Ruanda, Srebrenitsa kimi dəhşətli faciələrlə eyni dərəcədə
müharibələr tarixinə dinc əhalinin soyqırımı olaraq yazılmışdır. Bütün dünyanın
gözü qarşısında baş verən bu soyqırım yalnız Heydər Əliyev 1993-cü ildə
hakimiyyətə qayıtdıqdan sonra 26 fevral - Xocalı soyqırımı günü kimi siyasi
qiymətini almışdır. 25 fevral 1997-ci ildən isə hər il fevralın 26-sı saat
17:00-da Xocalı soyqırımı qurbanlarının xatirəsi bir dəqiqəlik sükutla yad
edilir. Hazırda soyqırımın tanınması dövlətimizin apardığı siyasətin əsasını təşkil
edir. 2008-ci ildən isə Heydər
Əliyev Fondunun təşkilatçılığı ilə Fondun vitse-prezidenti Leyla Əliyevanın təşəbbüsü
əsasında "Xocalıya ədalət!” kampaniyası çərçivəsində görülən işlər ildən-ilə
daha da genişlənir. Xocalı soyqırımının dünya miqyasında tanıdılması sahəsində
aparılan sistemli işin nəticəsidir ki, İslam Əməkdaşlıq Təşkilatı Parlament
İttifaqının, Meksika, Pakistan, Çexiya, Peru, Kolumbiya, Panama, Honduras,
Sudan, Qvatemala və Cibuti parlamentlərinin müvafiq sənədlərində Xocalıda törədilmiş
kütləvi qətllərin soyqırımı aktı olduğu təsdiq edilib. Rumıniya, Bosniya və
Herseqovina, Serbiya, İordaniya, Sloveniya, Şotlandiya parlamentləri, eləcə də
Amerika Birləşmiş Ştatlarının 20-dən çox ştatının icra və qanunvericilik orqanı
Xocalı faciəsini qətliam kimi qiymətləndirərək qətiyyətlə pisləyib. Respublika Prezidenti İlham
Əliyevin göstərişi ilə hər il Xocalı soyqırımı silsilə tədbirlərlə qeyd edilir.
2017-ci ildə Xocalı soyqırımının 25-ci ildönümü də Bakıda növbəti ümumxalq
yürüşü ilə yad edilib. Yürüşdə "Dünya Xocalı soyqırımını tanımalıdır!”,
"Xocalıya ədalət!”, "Xocalını unutmayın!”, "Rədd olsun erməni faşizmi!”,
"Xocalı - XX əsrin soyqırımı”, "Cinayətkarlar cəzasız qalmayacaqlar!” və s.
çağırışlar və şüarlar nümayiş etdirilib. Sonra Qazax Rayon İcra Hakimiyyəti
başçısı aparatında İctimai-siyasi və humanitar məsələlər
şöbəsində baş məsləhətçi Gülnar Quluyeva, Q.Hacımahmudova adına şəhər ümumi orta məktəbin direktoru Yeganə Göyüşlü çıxış edərək faciə
haqqında ürək sözlərini çatdırıblar. Bu gün yetişməkdə olan gənc nəslə və
yeniyetmələrə öz tarixi keçmişlərini unutmamağı, tarixin yaddaşına qanla
yazılmış faciələri hər zaman xatırlamağı tövsiyə ediblər. Xocalı faciəsinin dəhşətlərini
özündə əks etdirən filmin nümayişindən sonra məktəblilər faciəyə həsr olunmuş
şeirlər söyləyib, kompozisiyalar nümayiş etdiriblər.
GOYEZEN.AZ
Facebook-da paylaş