Ölkəmizdə cənab Prezident İlham Əliyevin bütün sahələrdə vətəndaş amilini, vətəndaş məmnunluğunu ön plana çəkməsi hər bir dövlət məmuruna nümunə olmalıdır. Ən əsası da dövlət siyasətinin əsasında vətəndaş amilinin dayanması Prezident İlham Əliyev və Birinci vitse-prezident Mehriban Əliyeva tərəfindən vətəndaşlara göstərilən qayğıda hər zaman öz əksini tapır. Hər bir dövlət məmuruna örnək olan bu addım bütün sahələrdə əsas götürülür.  

Ölkə rəhbərinin səsləndirdiyi “Siz daim insanlarla təmasda olmalısınız. Bütün kəndlərdə olmalısınız, kənd camaatının qayğıları ilə yaşamalısınız, onları narahat edən problemləri onların dilindən eşitməlisiniz və imkan daxilində bu problemləri həll etməlisiniz. Nəyə gücünüz çatırsa, rayon daxilində həll etməlisiniz. Elə məsələlər var ki, onlar dövlət orqanları tərəfindən həll olunmalıdır. Bu barədə də aidiyyəti dövlət orqanlarına müraciət etməlisiniz – Prezident Administrasiyasına, Nazirlər Kabinetinə, aidiyyəti dövlət qurumlarına ki, mövcud problemlər öz həllini tapsın. Əgər hər bir kəndin problemi həll olunarsa, demək olar ki, ölkədə insanları narahat edən ciddi problem qalmayacaq” fikirləri bir daha onu göstərir ki, vətəndaş amili dövlət siyasətinin prioritet istiqamətidir. 

Qazaxda bu amili əldə rəhbər tutan rayon rəhbəri tərəfindən vətəndaşların fərdi və ya ümumi şəkildə qəbul edilməsi də bu məqsədə xidmət edir.

Bu həftə ərzində müraciət etmiş daha 15 nəfər vətəndaşın istəyi sentyabrın 9-da idarə, müəssisə və xidmət sahələri rəhbərlərinin iştirakı ilə dinlənilib.

“Dövlət məmurunun işi vətəndaş məmnunluğunu təmin etmək, onlara layiqli xidmət göstərməkdir. Bu, hər birimizin vəzifə borcudur”, - deyən Qazax Rayon İcra Hakimiyyətinin başçısı Rəcəb Babaşov vətəndaş məmnunluğunu təmin etməyin hər kəsin borcu olduğunu bildirib. İcra başçısı bugünkü qəbulun da bu məqsədi daşıdığını qeyd edərək vətəndaşlara olan səmimi münasibətin, göstərilən diqqət və qayğının bundan sonra da əvvəlki tək olacağını söyləyib. Bu günə kimi, şəhər və kəndlərdə sakinlərlə keçirilən görüşlər zamanı səslənən müraciətlərə operativ şəkildə baxılmasının, vətəndaşların yaşadığı ünvandan asılı olmayaraq istəyinə əsasən yerində baxış keçirilməsinin, qaldırılan məsələlərin həlli istiqamətində yerindəcə tapşırıq verilməsinin, vətəndaşların ərizə və müraciətlərinə əsasən keçirilən qəbulların arxasında hər zaman vətəndaş məmnunluğunun dayandığını bildirib.

"Tutduğu vəzifədən asılı olmadan hər bir dövlət məmuru çalışmalıdır ki, vətəndaş müraciət etdiyi müəssisədən məmnunluqla ayrılsın, razı qalsın”, - deyən icra başçısı qəbulda iştirak edən idarə, müəssisə, təşkilat, eləcə də xidmət sahələri rəhbərlərinə dövlət məmuru olaraq vətəndaşlara, xüsusilə də şəhid ailələrinə, qazilərə, müharibə iştirakçılarına qarşı hər zaman qayğı ilə yanaşmalı, daim diqqət ayırmalı, qaldırılan hər bir məsələyə həssaslıqla baxmalı olduqlarını qeyd edib. Bununla bağlı aidiyyəti üzrə müvafiq tapşırıqlarını verib. 

Sonra Qazax şəhər sakinləri Hüseynova Niyar Sarif qızının, Xuduyeva Gülnaz Səfər qızının, Tağıyeva Sevda Saleh qızının, Yolçuyeva Günel Əziz qızının, Vəliyeva Marina Nahid qızının, Namazova Ruqiyyə İbrahim qızının, Aslanbəyli kənd sakini Məmmədov Camal Mədəd oğlunun, Çaylı kənd sakinləri Rəhimova Şahnabad Qara qızının, Musayeva Nətavan Mehralı qızının, Ağköynək kənd sakinləri Əhmədov Nemət Məzahir oğlunun, Musayev Ramiz Qorçu oğlunun, Qarapapaq kənd sakini Xasməmmədli Arzuman Yunis oğlunun, Aşağı Əskipara kənd sakini Həsənov Saleh Əmiraslan oğlunun, Daş Salahlı kənd sakini Sofuyeva Gülnaz Heydər qızının, Qazaxbəyli kənd sakini Rəhimov Fəqan Fazil oğlunun müxtəlif məzmunlu müraciətləri dinlənilib. Vətəndaşların işlə təmin olunma ilə bağlı müraciətlərinə cavab olaraq Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin Qazax-Tovuz Regional Məşğulluq filialı ilə əlaqə saxlamaları bildirilib. Məşğulluq Mərkəzində olan boş vakant yerlərə iş təklif olunması üçün aidiyyəti üzrə tapşırıq verilib.

Vətəndaşların evinin təmir edilməsində, evinin tikilməsində, həyətyanı torpaq sahəsi ilə təmin edilməsində köməklik göstərilməsi, digər müxtəlif məzmunlu müraciətləri müvafiq olaraq cavablandırılıb. Səslənən hər bir məsələyə həssaslıqla yanaşılacağı, diqqətlə baxılacağı bildirilib.

GOYEZEN.AZ