Azərbaycan Prezidenti İlham Əliyevin yanında iqtisadi müşavirə keçirilib
Xəbər
verildiyi kimi, oktyabrın 15-də Azərbaycan Respublikasının Prezidenti İlham
Əliyevin yanında iqtisadi müşavirə keçirilib.
Dövlətimizin başçısı
müşavirədə nitq söylədi.
Prezident İlham
Əliyevin nitqi
- Doqquz ayın
sosial-iqtisadi göstəriciləri müsbətdir. İqtisadi artım təmin olunub.
Sevindirici hal ondan ibarətdir ki, qeyri-neft sektorunda iqtisadi artım 3
faizdən çoxdur. Bu, onu göstərir ki, şaxələndirmə ilə bağlı tədbirlər öz
nəticəsini verir. Əlbəttə, biz istərdik ki, artım daha da yüksək olsun. Hesab
edirəm ki, buna nail olmaq üçün kifayət qədər imkanlar, potensial var. Sadəcə
olaraq, biz bu potensialdan maksimum səmərə ilə istifadə etməliyik.
Yenə də qeyri-neft sənayesi
sahəsində yüksək göstəricilər mövcuddur. Beləliklə, qeyri-neft sənayemiz 15
faizdən çox artıb. Bu, onu göstərir ki, son illərdə aparılan islahatlar,
xüsusilə qeyri-neft sektorunun inkişafı ilə bağlı atılan addımlar öz bəhrəsini
verir. Deyə bilərəm ki, qeyri-neft sənayemizin 15 faizdən çox artması dünya
miqyasında rekord göstərici hesab oluna bilər.
Bununla bərabər, bildiyiniz
kimi, son illərdə kənd təsərrüfatına böyük investisiyalar qoyulmuşdur. Kənd
təsərrüfatının inkişafı prioritet sahə kimi müəyyən edilmişdir. Mən, eyni
zamanda, əvvəlki illərdə bir qədər təəccüblənirdim ki, nə üçün bu qədər
investisiyaların müqabilində, bu qədər dəstəyin, subsidiyaların, güzəştli
şərtlərlə verilmiş kreditlərin olduğu bir zamanda kənd təsərrüfatında artım 2-3
faiz idi. Ancaq hazırda bu sahədə də ciddi irəliləyiş müşahidə olunur.
Beləliklə, kənd təsərrüfatı doqquz ayda 7 faizdən çox artmışdır.
Digər iqtisadi
göstəricilərimiz də çox müsbətdir. Bizim xarici dövlət borcumuz çox aşağı
səviyyədədir - ümumi daxili məhsulun cəmi 17 faizini təşkil edir. Bu
göstəriciyə görə biz dünya miqyasında doqquzuncu yerdəyik. Onu da bildirməliyəm
ki, bizdən daha yaxşı nəticəsi olan ölkələrin bəziləri o ölkələrdir ki, onlara,
ümumiyyətlə, xaricdən heç bir kredit verilmir. Ona görə də onların yüksək
pillədə olması əlbəttə ki, obyektiv mənzərəni əks etdirmir. Beləliklə, biz
dünya miqyasında xarici borcun aşağı səviyyəsinə görə qabaqcıl yerdəyik. Bunu
bir daha demək istəyirəm, mən hökumət qarşısında vəzifə qoymuşam ki, biz xarici
dövlət borcumuzu ildən-ilə azaldaq və gələn ilin büdcəsində bu, nəzərdə
tutulur.
İnflyasiya çox aşağı
səviyyədədir, 2 faizdən bir qədər çoxdur. Nəzərə almalıyıq ki, bu il çox ciddi
və böyük sosial paket reallaşdı – 4 milyon 200 mindən çox insanın maddi
vəziyyəti yaxşılaşdı, pensiyalar, əməkhaqları, müavinətlər artırıldı. Yəni, bu
məqsədlər üçün milyardlarla manat vəsait xərclənib və bu vəsait sosialyönümlü
istiqamətə nəzərdə tutulurdu. Buna baxmayaraq, inflyasiya çox aşağı
səviyyədədir. Bu, çox yaxşı göstəricidir. Əhalinin gəlirləri yenə də
inflyasiyanı əhəmiyyətli dərəcədə üstələyir.
Minimum pensiyanın alıcılıq
qabiliyyətinin səviyyəsinə görə Azərbaycan bu gün MDB məkanında birinci
yerdədir. Orta aylıq pensiyanın həcminə görə isə üçüncü yerdədir. Əlbəttə ki,
bu, bizi qane edə bilməz. Ancaq mən müqayisə üçün bunu bildirməliyəm. Hər şey
müqayisədə ölçülür. Gələcəkdə də minimum əməkhaqqının, minimum pensiyanın
artırılması üçün bizdə iradə var və imkanlar buna uyğun olmalıdır. Buna nail
olmaq üçün bütün maliyyə və iqtisadi sahədə tam şəffaflıq təmin edilməlidir.
Hazırda kifayət qədər çox ehtiyatlarımız var və hökumət qarşısında vəzifə
qoyulub ki, biz bütün bu ehtiyatları aşkarlayaq və həm büdcə gəlirlərimizi
artıraq, həm də büdcə xərclərimiz məqsədyönlü və şəffaf olmalıdır.
Bir neçə gün bundan əvvəl
mənim Sərəncamımla Əli Əsədov Baş Nazir vəzifəsinə təyin edilib. Əli Əsədov
uzun illər mənim köməkçim kimi fəaliyyət göstərib. Əminəm ki, Baş Nazir kimi o,
mənim tərəfimdən qarşıya qoyulan vəzifələri icra edəcək. Əsas vəzifə iqtisadi artımı
daha da yüksək rəqəmlərə qaldırmaq və islahatları davam etdirməkdir.
Keçən il prezident
seçkilərindən sonra mənim andiçmə mərasimindəki çıxışımda demək olar ki, bütün
əsas istiqamətlər üzrə hədəflər müəyyənləşdirilibdir. O çıxış proqram
xarakterli çıxış idi. O çıxışdan sonra biz əməli addımlara başladıq,
islahatları dərinləşdirdik. Vergi və gömrük sahələrində aparılan islahatlar,
şəffaflıqla bağlı addımlar öz səmərəsini verməkdədir. Gömrük və vergi orqanları
doqquz ayda büdcəyə plandan əlavə 700 milyon manatdan çox vəsait daxil ediblər.
Bu, bir daha onu göstərir ki, bizim nə qədər böyük ehtiyatlarımız var. Bu gün
də hələ bir çox şirkətlər vergiləri tam ödəmirlər. Onların qara mühasibatlığı
var. Bəzi şirkətlərdə işləyənlər orada qeydiyyata alınmır. Düzdür, son müddət
ərzində on minlərlə iş yeri rəsmiləşdirildi və beləliklə, qara bölgədən ağ
bölgəyə transfer olundu. Amma bu, kütləvi xarakter daşımalıdır. Bir çox özəl
şirkətlər vergiləri hələ də tam həcmdə ödəmir və ikili mühasibat saxlayır.
Vergi orqanları, digər
hüquq-mühafizə orqanları bu tipli dırnaqarası sahibkarlara qarşı çox ciddi
tədbirlər görməlidirlər. Həmin sahibkarlar da bilməlidirlər ki, vergiləri
ödəmək onların borcudur. Onlardan heç bir başqa ödəniş tələb oluna bilməz. Mən
bütün qurumlar qarşısında bu vəzifəni qoydum, maksimum şəffaflıq, dürüstlük
olmalıdır, rüşvətxorluğa, korrupsiyaya son qoyulmalıdır. Ancaq sahibkarlar
dövlət vergisini tam şəkildə ödəməlidirlər. Biz bu vergilər hesabına sosial
layihələri icra edirik, vergilər hesabına köçkünləri yerləşdiririk, vergilər
hesabına ordumuzu gücləndiririk. Ona görə də vergini ödəməyən cinayət
məsuliyyətinə cəlb edilməlidir.
Bir çox hallarda eşidirik
ki, bizdə standartlar, meyarlar Avropa standartlarına uyğun olmalıdır. Avropa
ölkələrində vergisini ödəməyənə hansı cəza verilirsə, biz də onlardan nümunə
götürməliyik. Ona görə vergidən yayınmaq çox ciddi nəticələrə gətirib
çıxarmalıdır. Mən bütün aidiyyəti qurumlara bir daha bu tapşırığı verirəm.
Bizim sosial siyasətimiz
birmənalıdır. Dəfələrlə demişəm ki, siyasətimizin mərkəzində Azərbaycan
vətəndaşı dayanır. Hesab edirəm ki, Azərbaycan sosial müdafiə sahəsində dünya
miqyasında nümunəvi ölkədir. Həm minimum əməkhaqqı, pensiyalar artırılır, həm
də özünüməşğulluq proqramı geniş vüsət alır. Bu il on mindən
çox insan bu proqramla əhatə olunacaq. Ünvanlı sosial yardım alanların sayı
artır. Mən Əmək və Əhalinin Sosial Müdafiəsi nazirinin qarşısında vəzifə qoydum
ki, biz bu kateqoriyadan olan insanlara daha geniş həcmdə yardım göstərək. İndi
hər bir ailə orta hesabla 200 manatdan çox yardım alır. O, ailələrin sayı
artmalıdır, qarşıya belə vəzifə qoyulub.
Əlbəttə ki, əsas vəzifəmiz iqtisadi inkişafı şərtləndirən islahatları
dərinləşdirməkdir. Bütövlükdə Azərbaycanda iqtisadi sahədə islahatlar uğurla
gedir. Beynəlxalq aparıcı maliyyə qurumları bu sahədəki fəaliyyətimizi yüksək
qiymətləndirirlər. Mənim Dünya Bankı, Avropa Yenidənqurma və İnkişaf Bankı,
Asiya İnkişaf Bankı, Avropa İnvestisiya Bankı, Beynəlxalq Valyuta Fondu və
digər aparıcı beynəlxalq maliyyə qurumlarının rəhbərləri ilə çoxsaylı
görüşlərim deməyə əsas verir ki, Azərbaycanda aparılan islahatlar yüksək
qiymətləndirilir.
"Doing Business” hesabatında biz biznes mühitinə görə dünya miqyasında
25-ci yerdəyik. Son hesabatda Azərbaycan yenə də 20 ən islahatçı ölkə sırasında
yer alıb. Bu yaxınlarda Davos Ümumdünya İqtisadi Forumu yeni hesabat dərc edib.
Bu hesabat bir daha onu göstərir ki, Azərbaycanda aparılan islahatlar ardıcıl
xarakter daşıyır. Hesabatdan bəzi məqamları mən Azərbaycan ictimaiyyətinin diqqətinə
çatdırmaq istərdim. Bildiyiniz kimi, burada rəqabətqabiliyyətliliklə bağlı bir
çox meyarlar mövcuddur, həm ictimai-siyasi vəziyyət, həm də cinayətkarlığa
qarşı mübarizə, iqtisadi islahatlar, sosial islahatlar, infrastruktur və sair.
Beləliklə, mütəşəkkil cinayətkarlığa qarşı mübarizəyə görə Azərbaycan
dünyada 18-ci yerdədir. Deyə bilərəm ki, bu hesabat dünyanın 141 ölkəsi
arasında keçirilən tədqiqatın nəticələri əsasında hazırlanıb dərc edilmişdir.
Polis orqanlarına əhali tərəfindən inamın səviyyəsinə görə Azərbaycan 30-cu
yerdədir. Mülkiyyət hüquqlarının qorunması sahəsində bizim yerimiz 37-cidir.
Hökumətin, yəni, dövlətin və rəhbərliyin uzunmüddətli strategiyasına görə
Azərbaycan, fikir verin, dünya miqyasında 10-cu yerdədir. Yəni, bu, onu
göstərir ki, düşünülmüş uzunmüddətli siyasət Azərbaycanda ən yüksək səviyyədə
həyata keçirilir. Rəhbərliyin dəyişikliklərə, yəni, islahatlara meyillilik
səviyyəsinə görə biz dünyada 5-ci yerdəyik. Nəqliyyat infrastrukturuna görə
31-ci yerdəyik. Yol infrastrukturuna görə 27-ci yerdəyik. Biz keçən hesabatda
34-cü yerdə idik, indiki hesabatda 27-ci yerdəyik və MDB məkanında birinci
yerdəyik. Dəmir yollarının səviyyəsinə görə 34-cü yerdəyik. Nəqliyyat
xidmətlərinin səmərəliliyinə görə 12-ci yerdəyik. Elektrik enerjisinin əlçatanlıq
əmsalına görə biz dünyada ikinci yerdəyik.
Son illərdə bu qədər elektrik stansiyalarının, yarımstansiyaların,
ötürücü xətlərin tikilməsi, bax, bizi dünya miqyasında ikinci yerə gətirib
çıxardı. Fəal əhalinin rəqəmsal qabiliyyətinə görə 19-cu yerdəyik. Bu,
xalqımızın istedadını və mütərəqqi meyillərə yaxın olduğunu göstərir. Biznesi
başlamaq baxımından biz 8-ci yerdəyik və bu rəqəmlər əlbəttə ki, həqiqəti əks
etdirir. Çünki Davos Ümumdünya İqtisadi Forumu dünyanın aparıcı beynəlxalq
maliyyə qurumlarından biridir və çox mötəbər forumdur. Bildiyiniz kimi,
Azərbaycan Prezidenti müntəzəm olaraq forumun iclaslarında iştirak edir.
Bütün bunlar əlbəttə ki, gördüyümüz işlərə verilən yüksək qiymətdir. Ən
böyük qiymət Azərbaycan xalqı tərəfindən verilən qiymətdir. Bu yaxınlarda
aparılan sorğuya əsasən demək olar ki, əhalinin mütləq əksəriyyəti Azərbaycan
rəhbərliyini, bizim apardığımız siyasəti birmənalı şəkildə dəstəkləyir. Əlbəttə
ki, bu dəstək bizə güc verir, iradəmizi artırır və biz islahatlara daha da böyük
həvəslə, daha da böyük imkanlarla meyil göstəririk, bu islahatları aparırıq.
Ancaq buna baxmayaraq, əlbəttə, bir daha demək istəyirəm ki, istifadə olunmayan
kifayət qədər ehtiyatlar var və biz bu ehtiyatları aşkar etməliyik. Elə
etməliyik ki, Azərbaycanda hər bir sahə şəffaf olsun və ən yüksək standartlara
cavab versin. Əlbəttə ki, bu məqsədə nail olmaq üçün korrupsiyaya,
rüşvətxorluğa qarşı amansız mübarizə aparılmalıdır. Hesab edirəm ki, hazırda bu
mübarizə bizi tam qane edə bilməz. Çünki biz bilirik ki, korrupsiya halları
geniş vüsət alıb, təkcə Azərbaycanda yox, bütün MDB məkanında. Yəni, bu, bizim
keçmişdən qalan acı mirasımızdır. Ancaq biz xoşagəlməz hallara qarşı mübarizə
aparmalıyıq və təkcə hüquq-mühafizə orqanları yox, bütün aidiyyəti qurumlar, o
cümlədən vətəndaşlar. Mən dəfələrlə demişəm ki, ictimai nəzarət daha da güclü
olmalıdır. Hər bir yerdə, hər bir bölgədə, Bakının hər bir yerində əgər hansısa
qanunsuzluq baş verirsə, aidiyyəti orqanlar bunu aşkarlamalı və bu qanunsuzluğa
yol açan vətəndaşları, insanları məsuliyyətə cəlb etməlidirlər. Vətəndaşlar da
öz növbəsində məlumat verməlidirlər, ictimai nəzarət baxımından daha da fəal
olmalıdırlar ki, biz islahatları aparaq və ölkəmizin qüdrətini artıraq.
Hazırda gələn ilin büdcəsi hazırlanır və bilirsiniz ki, büdcə hər bir
ölkənin əsas sənədlərindən biridir. Yeni hökumət qarşısında bir çox vəzifələr
qoyulub. Mən Əli Əsədovu bu vəzifəyə təyin edərkən ona bir çox vəzifələr
tapşırdım. Onun qarşısına vəzifə qoydum ki, islahatlar aparılmalıdır, o cümlədən
kadr islahatları. Müasir dünyagörüşlü, müasir iqtisadiyyatı bilən, savadlı gənc
kadrlar işə cəlb edilməlidir. Biz XXI əsrdə yaşayırıq, köhnə təfəkkürlə, köhnə
biliklərlə gələcəyə necə gedə bilərik? Nə qədər biz təbii resurslara
arxalanaraq, necə deyərlər, belə ətalət yolu ilə gedə bilərik? Düzdür,
islahatlar aparılır, dediyim rəqəmlər bunun əyani sübutudur. Hər bir ölkə bu
nəticələrlə öyünə bilər. Ancaq biz bilirik ki, ehtiyatlarımız çoxdur. Onu da
bilirik ki, əgər hər hansı dövlət və ya özəl quruma təmiz, bilikli və Vətənə
bağlı kadr gətirilirsə, biz orada dərhal dəyişiklikləri görürük. Hesab olunurdu
ki, bizdə elə sahələr var ki, orada islahatlar aparıla bilməz. Onlardan biri də
vergi sistemidir. Hesab olunurdu ki, necə deyərlər, o biabırçı vəziyyət əbədi
qalmalıdır və burada heç bir irəliləyişə nail ola bilmərik. Amma hər kəs gördü
ki, biz vəziyyəti islahatlar yolu ilə düzəldə bildik. Büdcəyə 100 milyonlarla
manat vəsait daxil olub, digər sahələrdə də həmçinin.
Sosial müdafiə sahəsində nə qədər pozuntular olub. Yeni nazir Sahil
Babayev bunları üzə çıxardı və çox ciddi islahatlar aparır. Onu da
bildirməliyəm ki, bu gün iqtidarda olan bəziləri də islahatlara qarşı çıxış
edirlər. Bu islahatlar onların şəxsi maraqlarına toxunur. Onlar hər vəchlə
bizim işimizə əngəl törətmək istəyirlər. İslahatlara meyilli olan, yeni
təfəkkürə malik kadrları qaralayırlar, o cümlədən mətbuatda. Mətbuat bir növ
daxili mübarizə növünə çevrilib. Bu, dözülməzdir. Mən indi dərinə getmək
istəmirəm. Amma bildirməliyəm: bu, dözülməzdir, bir hökumətin bəzi üzvləri
digər üzvləri tərəfindən şantaj edilir. Onlar ləkələnir. Prezidentin tapşırığı
ilə onların apardığı islahatların üzərinə kölgə salınır. Dözülməz vəziyyətdir.
Əgər kimsə hesab edir ki, biz bununla barışmalıyıq, səhv edir. Çünki islahatlara
alternativ yoxdur. Kim bu yolun yolçusudursa, əlbəttə, işləyəcək. Amma kim buna
qarşı çıxır və altdan-altdan bizim işimizə mane olmaq istəyir, əlbəttə ki, biz
belə adamlarla bir yolun yolçusu ola bilmərik. Ona görə bir də demək istəyirəm
ki, əhali də bilsin və hər kəs mənim sözümü eşitsin. Çox güclü siyasi iradə
ortaya qoyulub. Biz Azərbaycanı müasir, sürətlə inkişaf edən, şəffaflığı öz
siyasətində bayraq edən ölkə kimi görmək istəyirik və buna nail olacağıq. Heç
kim bu işdə bizə mane ola bilməz.
Gələn ilin büdcəsi ilə əlaqədar tapşırıqlar verildi. Hökumət üzvləri
artıq neçə vaxtdır ki, işləyirlər. Deməliyəm ki, gələn ilin büdcəsi həm
sosialyönümlü, həm də investisiyayönümlü olmalıdır. Biz gələn il də ciddi
sosial proqramlar icra edəcəyik, əhalinin yaşayış səviyyəsini yaxşılaşdırmaq
üçün önəmli addımlar atılacaq, infrastruktur layihələrinin icrası ilə əlaqədar
kifayət qədər vəsaitimiz olmalıdır. Ancaq gələn ilin xərclərinə biz çox böyük
diqqətlə baxmalıyıq və burada şəffaflığı tam təmin etmək üçün hökumət gərək
təkliflər versin. Tezliklə, ilin sonuna qədər bu təkliflərə baxılacaq.
Beləliklə, əminəm ki, biz eyni həcmdə olan işi az vəsaitlə icra edə bilərik.
Buna nail olmaq üçün, ilk növbədə, şəffaflıq, dövlət nəzarəti və ictimai
nəzarət olmalıdır. Bütün dövlət qurumlarına deyirəm, yoxsa onlar pis
öyrəşiblər. Hər ilin sonunda büdcə müzakirə olunarkən, sifarişlər göndərirlər.
Özü də orada şişirdilmiş rəqəmlər öz əksini tapır, havadan götürülmüş rəqəmlər.
Onlardan soruşanda ki, misal üçün bənd tikmək, yol çəkmək, kabel çəkmək bu
qədər vəsait barədə rəqəmi haradan götürürsən!? Havadan. Sonra araşdırma
aparılır, görünür ki, şişirdiblər. Nəyə görə şişirdiblər? Aydın məsələdir nəyə
görə. Buna da son qoyulmalıdır. Ona görə Maliyyə Nazirliyi, İqtisadiyyat Nazirliyi,
- bunu təkcə onların boynuna atmaq olmaz, - hökumət də nəzarətçi kimi
şişirdilmiş bütün o rəqəmləri təhlil etsinlər və real rəqəmləri
müəyyənləşdirsinlər. O rəqəmləri verənlər gərək məsuliyyət daşısınlar. Əgər bu
dəfə bizim dövlət qurumlarımız, şirkətlərimiz yenə də şişirdilmiş rəqəmlər
versələr, artıq özlərini ifşa etmiş olacaqlar. Hökumət əlbəttə ki, onların
bütün təkliflərinə baxacaq. Amma onlar əgər şişirdilmiş rəqəmləri versələr, öz
cəzalarını alacaqlar. Ona görə zəhmət çəkib normal işləsinlər və pis
vərdişlərdən əl çəksinlər. Beləliklə, biz büdcəyə böyük qənaət edərik,
maaşların, pensiyaların artırılmasına imkan yaradarıq və şəffaflığı təmin edə
bilərik. Ona görə qarşıdakı həftələr ərzində gələn ilin büdcəsinin parametrləri
ilə əlaqədar çox fəal iş aparılmalıdır. Bugünkü müşavirə, o cümlədən bu
məsələyə həsr olunub. Ona görə istərdim ki, indi burada gələn ilin büdcəsi ilə
əlaqədar fikirlər və təkliflər səslənsin.
X X X
Müzakirələrdə Birinci vitse-prezident Mehriban Əliyeva, Baş Nazir Əli
Əsədov, Azərbaycan Prezidentinin iqtisadi siyasət və sənaye məsələləri üzrə
köməkçisi Natiq Əmirov, Maliyyə naziri Samir Şərifov, İqtisadiyyat naziri Şahin
Mustafayev, Vergilər naziri Mikayıl Cabbarov, Əmək və Əhalinin Sosial Müdafiəsi
naziri Sahil Babayev, Mərkəzi Bankın İdarə Heyətinin sədri Elman Rüstəmov,
Dövlət Neft Fondunun icraçı direktoru Şahmar Mövsümov çıxış etdilər.
Maliyyə naziri Samir ŞƏRİFOV dedi:
- Möhtərəm cənab Prezident, hörmətli müşavirə iştirakçıları.
2020-ci il üçün dövlət büdcəsinin layihəsi Azərbaycan Respublikasının
"Büdcə sistemi haqqında” Qanununa uyğun olaraq hazırlanıb və büdcə
hesablamaları aparılarkən 2019-cu ildə artıq tətbiq olunan büdcə qaydasına
istinad olunmuşdur. Büdcə layihəsinin hazırlanması zamanı Maliyyə Sabitliyi
Şurasında bir neçə dəfə bu məsələyə baxılmış və Şuranın yekdil fikrinə görə
büdcədə bir sıra əsas parametrlər üzrə razılıq əldə edilmişdir. O cümlədən
büdcəmiz üçün, büdcə daxilolmaları üçün mühüm əhəmiyyətə malik olan neftin
qiyməti ilə bağlı xeyli müzakirələr aparılmış və neftin 55 dollar/barrel
qiyməti üzərində dayanılmışdır. Bunun əsasında isə büdcə qaydasına uyğun olaraq
xalis maliyyə aktivlərinin dəyəri və eyni zamanda, icmal büdcənin yuxarı həddi
müəyyən edilmişdir. Həmçinin qeyd edilməlidir, Maliyyə Sabitliyi Şurasında
baxılan məsələlərdən biri də o idi ki, orta və uzunmüddətli dövr üçün büdcə
qaydasında bəzi məqamlar mövcuddur ki, onlar bizim xərclərimizin ahəngdar
həyata keçirilməsi üçün müəyyən çağırışlar yaradır. Şübhəsiz ki, biz bunları
nəzərdə keçirməliyik. O cümlədən vacib məsələlərdən biri də inflyasiya
səviyyəsinin tam nəzərə alınmasıdır və onun dövlət büdcə hesablamalarında əks
etdirilməsidir.
Möhtərəm cənab Prezident, bildiyiniz kimi, büdcə qaydasına uyğun olaraq,
növbəti ilin icmal büdcə xərcləri əvvəlki ilin xalis maliyyə aktivləri əsasında
formalaşır. Eyni zamanda, burada digər vacib göstəricilərdən biri də ondan
ibarətdir ki, növbəti ilin icmal büdcəsinin yuxarı xərcləri əvvəlki ilin icmal
büdcəsinin yuxarı xərclərinin 103 faizindən yuxarı olmamalıdır. Hazırda təklif
olunur ki, həmin göstəriciyə biz inflyasiya prizması baxımından yanaşaq və
beləliklə, inflyasiya meyilləri nəzərə alınmalıdır, yəni, real artımdan söhbət
gedə bilər.
Prezident İlham Əliyev: Bəli, düzdür.
Maliyyə naziri Samir Şərifov: Bununla əlaqədar İqtisadiyyat Nazirliyi
tərəfindən növbəti il üçün və sonrakı üç il üçün hazırlanmış sosial-iqtisadi
proqnoz, makro-iqtisadi proqnoz nəzərə alınmış, həmin proqnoza görə növbəti
ildə 4,6 faiz inflyasiya səviyyəsi nəzərdə tutulub. Bu proqnoz nəzərə alınmaqla
biz icmal büdcənin yuxarı həddinə yenidən baxmışıq və artıq müəyyən hədəf
nəzərdə tutulur.
Prezident İlham Əliyev: Əvvəlki illərdə verilmiş proqnoz ondan sonra
özünü nə dərəcədə doğruldur? Yəni, bunun təhlilini aparan bir qurum varmı?
Yəni, sizin verdiyiniz proqnozlar özünü doğruldur, yoxsa yox?
İqtisadiyyat naziri Şahin Mustafayev: Bəli, cənab Prezident, əsasən
doğruldur.
Prezident İlham Əliyev: Əsasən neçə faiz özünü doğruldur? Siz gərək bunu
dəqiq biləsiniz və kimsə bunun uçotunu aparmalıdır. Çünki hər il sizin
verdiyiniz proqnozlar əsasında biz öz planlarımızı qururuq. Amma sonra həmin
ilin yekunları müzakirə olunarkən verdiyiniz proqnoz kənarda qalır. Ona görə
biz bilməliyik proqnoz nə qədər dəqiqliklə verilir ki, biz də ona uyğun olaraq
öz planlarımızı quraq.
Nazir Şahin Mustafayev: Beynəlxalq praktikaya uyğun olaraq fərqlənir,
yəni, proqnozların tam dəqiqliyi təbii ki, təmin olunmur, müxtəlif təsirlər
sonradan nəzərə alınır və hər üç aydan bir proqnozlar dəqiqləşdirilməlidir.
Misal üçün, bu dəfə deyə bilərəm ki, Maliyyə Nazirliyi yeni büdcə tərtib
edərkən biz proqnoza yenidən düzəliş etmişik və bu gün artıq gələn il üçün
proqnoz 3 faizdir.
Prezident İlham Əliyev: Artım?
Nazir Şahin Mustafayev: Bəli, 3 faiz görürük. Qeyri-neft sektoru üzrə
3,8 faiz proqnozlaşdırmışıq və bu, artıq Maliyyə Nazirliyinin investisiya ilə
əlaqədar etdiyi düzəlişlərlə birbaşa bağlıdır. Yəni, proqnoza müxtəlif amillər
təsir edir.
Prezident İlham Əliyev: Əlbəttə, investisiya proqramı da burada önəmli
rol oynayır.
Nazir Şahin Mustafayev: Bəli, bu, birbaşa təsir edən amillərdən biridir
və digər amillər də var. Biz üç aydan bir düzəliş veririk.
Prezident İlham Əliyev: Amma biz çalışmalıyıq ki, iqtisadi artımımız
dövlət xətti ilə aparılan xərclərə bağlı olmasın. Çünki bizim əsas iqtisadi
artımımızın mənbəyi dövlət investisiya xərcləridir və açığını desək, qeyri-neft
sektoruna xarici sərmayə az qoyulur. İndi rəqəmlər də bunu göstərir ki, bu il
də qoyulan investisiyaların yarısı xarici investisiyalardır. Amma onların
qoyulduğu sahə qeyri-neft sektoru deyil, neft-qaz əməliyyatlarıdır. Ona görə
bizim əsas vəzifəmiz iqtisadi artımımızı birbaşa qeyri-neft sektorunun inkişafı
ilə bağlamaqdır. İndi biz 1,4 milyard manat güzəştli şərtlərlə kreditlər
vermişik. Kimsə hesablayıb ki, bu kreditlər ümumi daxili məhsula, qeyri-neft
sektoruna aid olan hissəyə nə qədər təsir göstərir?
Nazir Şahin Mustafayev: Təbii ki, cənab Prezident, bütün hesablamalar
aparılır.
Prezident İlham Əliyev: Onda nə üçün bizdə qeyri-neft sektorunda ümumi
artım o qədər də böyük deyil? Güzəştlər veririk, subsidiyalar veririk, texnika
alırıq, infrastruktur layihələri həyata keçiririk, dövlət investisiya xərcləri
kifayət qədər yüksək səviyyədədir. Bütün bu amillər özlüyündə iqtisadi artımı
daha da böyük rəqəmlərə gətirib çıxarmalıdır. Amma biz bunu görmürük.
Nazir Şahin Mustafayev: Cənab Prezident, doğru olaraq qeyd edirsiniz ki,
son 3 il ərzində qeyri-neft sektorunda artım ürəkaçan deyil. Bunun əsas
səbəbləri kimi mən maliyyələşmə ilə bağlı problemləri qeyd edərdim. Çünki
Sahibkarlığın İnkişafı Fondu vasitəsilə bu ilin 9 ayında 130 milyon manat
verilib, ilin sonuna qədər 170 milyon manat nəzərdə tutulub və icra olunacaq.
Amma 130, ya 170 milyon manat sahibkarlığın maliyyələşdirilməsi üçün kifayət
qədər vəsait deyil, çünki bank sektoru tərəfindən kifayət qədər maliyyələşmə
həyata keçirilmir.
Prezident İlham Əliyev: Düz deyirsiniz, bank sektoru bizdə
iqtisadiyyatın artımına, iqtisadiyyatın real sektorunun artımına o qədər də
kömək göstərmir və son illərdə yenə də istehlak kreditlərinin həcmi artır. Mən
əvvəlki illərdə bunu demişəm ki, bizim portfelimizdə istehlak kreditləri
üstünlük təşkil edir və bank sektorunun böhranının səbəblərindən biri də məhz o
idi. İndi də mənə məlumat verilir ki, yenə də bu meyillər artır, iqtisadiyyatın
real sektoruna yox, yenə də istehlaka, yəni, istehlak mallarının alınmasına
kreditlər verilir. Əgər bu davam edərsə, yenə də bir neçə ildən sonra
xoşagəlməz problemlərlə üzləşə bilərik. Ona görə bütün bu məsələləri gərək
ümumiləşdirib, təhlil edib və bir qərara gələsiniz ki, bütün alətlər - bank
sektoru, Sahibkarlığın İnkişafı Fondu, dövlət investisiya xərcləri bir məqsədi
güdməlidir – məşğulluğun artırılması və qeyri-neft sektorunun artımı.
Nazir Samir Şərifov: Cənab Prezident, bu inflyasiyanın bizim büdcə
qaydasında nəzərə alınması üçün Azərbaycan Respublikasının "Büdcə sistemi
haqqında” Qanununda müvafiq dəyişiklik edilməsi nəzərdə tutulub. Yəni,
dəyişiklik ondan ibarətdir ki, inflyasiya nəzərə alınmalıdır.
Prezident İlham Əliyev: Bunu gərək əvvəlcədən edərdiniz.
Nazir Samir Şərifov: Birinci ildir cənab Prezident. Ola bilsin, lazım
idi ki, biz bunların hamısını sınayaq. Biz prinsipcə onun üzərində çalışırıq.
Prezident İlham Əliyev: Belə olan halda artım daha da böyük olacaq. Neçə
faiz?
Nazir Samir Şərifov: Belə olan halda, cənab Prezident, bizdə 28,1
milyard manat məbləğində icmal büdcənin yuxarı xərcləri formalaşmışdır. Dövlət
büdcəsinin xərcləri müvafiq olaraq 25,6 milyard manatdır.
Prezident İlham Əliyev: Yəni, bu ilin büdcəsindən neçə faiz artıb?
Nazir Samir Şərifov: İndi biz artırandan sonra artıq icmal büdcənin
xərcləri 29,5 milyarda çatır. Bizdə 1,3 milyard əlavə xərclər yaranır. Həmin
xərclər də nəzərdə tutulur ki, əsasən dövlət əsaslı vəsait qoyuluşuna
yönəldilsin.
Maliyyə naziri Samir Şərifov bildirdi ki, cari ildə dövlət başçısının
təşəbbüsü və tapşırıqlarına əsasən bir çox sahələri əhatə edən sosial
islahatlar həyata keçirilib və bu tədbirlər dövlət büdcəsi hesabına
maliyyələşdirilib. Nəticədə büdcədə müəyyən struktur dəyişikləri baş verib və
büdcənin cari xərcləri, yəni, sosialyönümlü xərcləri 3,7 milyard manat artıb,
investisiya dövlət əsaslı vəsait qoyuluşu xərcləri isə azalıb. İnvestisiya
xərclərinin ümumi daxili məhsulun iqtisadi artımına müsbət təsiri, eyni
zamanda, ölkədə iqtisadi fəallığın təmin edilməsində əhəmiyyəti nəzərə alınaraq
onu əvvəlki səviyyələrə çatdırmaq üçün tədbirlər görülür.
Maliyyə naziri onu da vurğuladı ki, görülən tədbirlər nəticəsində əlavə
1,3 milyard manat vəsait yaradılıb, bu isə 7,7 faiz artım deməkdir. Neft
gəlirlərinin hesabına maliyyələşən xərclərin ildən-ilə azaldılmasını təklif
edən Samir Şərifov əlavə gəlirlər və əvvəlki illərdə toplanmamış vəsaitlər
hesabına artan dövlət büdcəsinin maliyyələşdirilməsinin təmin olunacağını
vurğuladı. Prezidentin sosial sahə ilə bağlı tapşırıqlarının dövlət büdcəsi
layihəsində öz əksini tapdığını deyən Maliyyə naziri ölkədə iqtisadi sabitliyin
təmin edilməsi üçün Mərkəzi Bankla çox sıx tədbirlərin əlaqələndirilməsinin
əhəmiyyətini vurğuladı.
Əmək və Əhalinin Sosial Müdafiəsi naziri Sahil Babayev Prezident İlham
Əliyevin tapşırığına uyğun olaraq Dövlət Sosial Müdafiə Fondunun büdcəsinin
gəlirlərinin optimallaşdırılması istiqamətində görülən işlərdən danışdı. Nazir
Fondun büdcəsinin 4 milyard 825 milyon manat məbləğində proqnozlaşdırıldığını,
bunun cari ilə nisbətən 16,9 faiz çox olduğunu dedi, 697 milyon manat əlavə
vəsaitin məhz əhalinin ödənişlərinə yönəldiləcəyini vurğuladı. Ümumi sosial
sığorta yığımlarında 22,5 faiz artımın olduğunu bildirən nazir Fondun
gəlirlərində qeyri-büdcə təşkilatlarının payının artdığını vurğuladı.
Transfertin məbləğinin cari illə müqayisədə 81 milyon manat artacağını
qeyd edən Sahil BABAYEV dedi:
-Transfertin məbləği 2017-ci ildə Dövlət Sosial Müdafiə Fondunun
gəlirlərinin 39 faizini təşkil edirdisə, artıq 2018-ci ildə bu, 35,6 faizə
düşüb, 2019-cu ildə 32,8 faizə, 2020-ci ildə isə 29,6 faizə düşəcək ki, bu da
iki il ərzində 8 faizlik azalma deməkdir. Bu da Dövlət Sosial Müdafiə Fondunun
dayanıqlılığı, onun maliyyə müstəqilliyinin təmin edilməsi baxımından çox
önəmli amildir. Əhaliyə ödənişlər 4 milyard 684 milyon manat məbləğində
olacaqdır. Yəni, ümumi gəlirlərin 97,1 faizi məbləğində və bunlardan da əmək
pensiyalarının ödənişi 4 milyard 570 milyon manat məbləğində olacaqdır. Ümumi
artımın 16,6 faiz olacağı gözlənilir. 651 milyon 700 min manat məbləğində artım
gözlənilir. Bu 651 milyon 700 min manatın 475 milyon manatı məhz Sizin
təşəbbüsünüzlə həyata keçirilən əməkhaqqı artımları nəticəsində ölkədə orta
əməkhaqqının artmasının nəticəsi olacaqdır. Beləliklə, indeksasiya nəticəsində
gələn ildən etibarən ölkədə əmək pensiyaları bir daha artırılacaqdır və bu artımın
nəticəsi olaraq əlavə 475 milyon manat vəsaitin vətəndaşlarımıza ödənilməsi
planlaşdırılır. Eyni zamanda, 114 milyon manat məcburi sosial sığorta haqları
hesabına verilən müavinətlər qismində vətəndaşlarımıza ödəniləcəkdir.
Nazir bildirdi ki, dövlət büdcəsinin öhdəlikləri bu il də
balanslaşdırılmış büdcə modeli üzərində qurulduğundan transfertin həcmi ciddi
şəkildə azalıb. Ötən il əhaliyə ödənişlər 1,1 milyard manat artdığı təqdirdə,
transfertə cəmi 89 milyon manat ayrılıb. Bu da onu göstərir ki, 1 milyard
manatdan artıq vəsait məhz Dövlət Sosial Müdafiə Fondunun gəlirlərinin artması
hesabına qarşılanıb və büdcə üçün əlavə bir yük yaratmayıb. Nazir qeyd etdi ki,
hazırlanan proqnozlar əsasında gələn il ölkədə əmək pensiyalarının orta aylıq
məbləğinin 16 faiz artımına və orta aylıq pensiya məbləğinin 293 manata
çatdırılması planlaşdırılır. Aparılan optimallaşma, eyni zamanda, əsassız əldə
edilən pensiyaların ləğvi nəticəsində artıq cari ilin 9 ayı ərzində 99 milyon
manata qənaət edilib ki, növbəti dövrlər ərzində də bu məbləğ daha da artacaq
və əmək pensiyalarının davamlı şəkildə artımı təmin ediləcək.
Sahil Babayev minimum əmək pensiyasının 200 manata çatdırıldığını,
bununla da ölkəmizin MDB məkanında alıcılıq qabiliyyəti indeksi üzrə birinci
yerdə olduğunu bildirdi. Qeyd etdi ki, orta aylıq pensiya alıcılıq
qabiliyyətində də ölkəmiz MDB məkanında ilk ikilikdə qərarlaşa bilər.
Dövlət Sosial Müdafiə Fondunun xərclərinin strukturunun
optimallaşdırılması üzrə görülən işlərdən danışan nazir dedi ki, İşsizlikdən
Sığorta Fondunun gəlirləri çərçivəsində növbəti ildə 128,2 milyon manatlıq
büdcə formalaşdırılıb. Burada artım 30 faizdən çoxdur. Bu məbləğin 111 milyon
900 min manatı məhz işsizlikdən sığorta haqlarının yığımlarına yönəldiləcək.
Qeyri-büdcə təşkilatlarının sayı artıq 68 faizə çatıb ki, büdcə
təşkilatlarından toplanan payın ümumi gəlirlərdəki payı daha da aşağı düşüb.
Eyni zamanda, cari ildən gözlənilən 16 milyon manatlıq qalıq vəsait növbəti
ildə xüsusilə özünüməşğulluq proqramının maliyyələşdirilməsinə yönəldiləcək.
Çıxışını davam etdirən Sahil Babayev dedi: Xərclərimiz 128 milyon 200
min manat məbləğində nəzərdə tutulur və bunun ana xəttini Sizin tapşırığınıza
müvafiq olaraq İşsizlikdən Sığorta Fondu hesabına maliyyələşdirilən
özünüməşğulluq layihəsi təşkil edir, 63 milyon manat vəsait məhz özünüməşğulluq
layihəsinə yönəldiləcəkdir. Gələn il ərzində sırf İşsizlikdən Sığorta Fondu
hesabına 11 min ailənin özünüməşğulluq layihələrində iştirakının
maliyyələşdirilməsi planlaşdırılır.
Prezident İlham Əliyev: Dünya Bankı da bu layihəyə qoşulur. Onların da
vəsaitini nəzərə alsaq bu rəqəm daha da artacaqdır.
Nazir Sahil Babayev: Bəli, cənab Prezident, Sizin tapşırığınızla Dünya
Bankı ilə danışıqlar yekun mərhələdədir. Bu ilin sonunadək hökumətə kredit
sazişi layihəsi təqdim olunacaq. Növbəti ildə Dünya Bankının şurasında onun
təsdiqi nəzərdə tutulur. Dünya Bankının prosedurlarını nəzərə alsaq, real
aktivlərin alınması mərhələsinə biz ilin sonunda çatacağıq. Ona görə də növbəti
il Dünya Bankının payını 1000-2000 ailə olaraq qiymətləndiririk. Amma ondan
sonrakı illər ərzində sabit olaraq 5 min ailə Dünya Bankı tərəfindən
maliyyələşdiriləcək. Eyni zamanda, bu xərclərin strukturunda məşğulluq
layihələri üzrə müxtəlif aktiv məşğulluq tədbirlərinin təşkili nəzərdə tutulmuşdur.
Cari ildə planımız yüz min nəfərin işə düzəldilməsi idisə, gələn il üçün bu
rəqəm 130 minə çatdırılacaq. Haqqı ödənilən ictimai işlər proqramının davam
etdirilməsi nəzərdə tutulmuşdur. Eyni zamanda, iri dövlət şirkətlərində
yaradılan müvəqqəti ictimai işlər proqramı da davam etdiriləcək. Dünya Bankı
ilə yanaşı, BMT İnkişaf Proqramı ilə də özünüməşğulluq proqramı çərçivəsində
işlərin davam etdirilməsi nəzərdə tutulur və əlavə 500 nəfər BMT İnkişaf
Proqramının xətti ilə maliyyələşdiriləcək.
Prezident İlham Əliyev: BMT İnkişaf Proqramının maliyyə təminatını biz
öz üzərimizə götürmüşük, elədirmi?
Nazir Sahil Babayev: Bəli, cənab Prezident.
Prezident İlham Əliyev: Sadəcə, onlar məsləhətçi qismində çıxış edirlər.
Nazir Sahil Babayev: Bəli, layihənin icrasına nəzarəti təmin edirlər.
Bizim üçün də çox gözəl təcrübədir ki, ən müsbət beynəlxalq təcrübəni gətirərək
bu layihəni müxtəlif rayonlarda icra edirlər. Biz də onların müsbət təcrübəsini
digər rayonlarda özümüz tətbiq edirik.
Peşə hazırlığı üzrə gələn ilin proqnozu 5 min nəfəri əhatə edəcək. Bizim
mövcud peşə mərkəzlərimizdən əlavə iki peşə mərkəzinin tikintisi də buraya
daxildir. Orta məktəblərin son siniflərinin şagirdləri üçün peşəyönümü
məsləhətləri proqramlarının genişləndirilməsi və 150 min şagirdi əhatə etməsi
nəzərdə tutulmuşdur.
Ümumilikdə, İşsizlikdən Sığorta Fondunun və Dövlət Sosial Müdafiə
Fondunun xərcləri çərçivəsində DOST mərkəzləri şəbəkəsinin maliyyələşdirilməsi
də nəzərdə tutulmuşdur. Cari ildə əlavə iki mərkəzin açılması və növbəti ildə
əlavə yeddi mərkəzin fəaliyyətə başlaması, həmçinin onların saxlanma xərcləri
də məhz Dövlət Sosial Müdafiə Fondunun və İşsizlikdən Sığorta Fondunun
vəsaitləri hesabına qarşılanacaq. Bu da imkan verəcək ki, dövlət büdcəsinə
əlavə yük yaratmadan ümumilikdə idarəetmə xərclərinin optimallaşmasına nail
olaq.
Xəbər verildiyi kimi, oktyabrın 15-də Azərbaycan
Respublikasının Prezidenti İlham Əliyevin yanında iqtisadi müşavirə keçirilib.
Dövlətimizin başçısı müşavirədə nitq söylədi.
Prezident İlham Əliyevin nitqi
- Doqquz ayın sosial-iqtisadi göstəriciləri müsbətdir. İqtisadi artım
təmin olunub. Sevindirici hal ondan ibarətdir ki, qeyri-neft sektorunda
iqtisadi artım 3 faizdən çoxdur. Bu, onu göstərir ki, şaxələndirmə ilə bağlı
tədbirlər öz nəticəsini verir. Əlbəttə, biz istərdik ki, artım daha da yüksək
olsun. Hesab edirəm ki, buna nail olmaq üçün kifayət qədər imkanlar, potensial
var. Sadəcə olaraq, biz bu potensialdan maksimum səmərə ilə istifadə etməliyik.
Yenə də qeyri-neft sənayesi sahəsində yüksək göstəricilər mövcuddur.
Beləliklə, qeyri-neft sənayemiz 15 faizdən çox artıb. Bu, onu göstərir ki, son
illərdə aparılan islahatlar, xüsusilə qeyri-neft sektorunun inkişafı ilə bağlı
atılan addımlar öz bəhrəsini verir. Deyə bilərəm ki, qeyri-neft sənayemizin 15
faizdən çox artması dünya miqyasında rekord göstərici hesab oluna bilər.
Bununla bərabər, bildiyiniz kimi, son illərdə kənd təsərrüfatına böyük
investisiyalar qoyulmuşdur. Kənd təsərrüfatının inkişafı prioritet sahə kimi
müəyyən edilmişdir. Mən, eyni zamanda, əvvəlki illərdə bir qədər
təəccüblənirdim ki, nə üçün bu qədər investisiyaların müqabilində, bu qədər
dəstəyin, subsidiyaların, güzəştli şərtlərlə verilmiş kreditlərin olduğu bir
zamanda kənd təsərrüfatında artım 2-3 faiz idi. Ancaq hazırda bu sahədə də
ciddi irəliləyiş müşahidə olunur. Beləliklə, kənd təsərrüfatı doqquz ayda 7
faizdən çox artmışdır.
Digər iqtisadi göstəricilərimiz də çox müsbətdir. Bizim xarici dövlət
borcumuz çox aşağı səviyyədədir - ümumi daxili məhsulun cəmi 17 faizini təşkil
edir. Bu göstəriciyə görə biz dünya miqyasında doqquzuncu yerdəyik. Onu da
bildirməliyəm ki, bizdən daha yaxşı nəticəsi olan ölkələrin bəziləri o
ölkələrdir ki, onlara, ümumiyyətlə, xaricdən heç bir kredit verilmir. Ona görə
də onların yüksək pillədə olması əlbəttə ki, obyektiv mənzərəni əks etdirmir.
Beləliklə, biz dünya miqyasında xarici borcun aşağı səviyyəsinə görə qabaqcıl
yerdəyik. Bunu bir daha demək istəyirəm, mən hökumət qarşısında vəzifə qoymuşam
ki, biz xarici dövlət borcumuzu ildən-ilə azaldaq və gələn ilin büdcəsində bu,
nəzərdə tutulur.
İnflyasiya çox aşağı səviyyədədir, 2 faizdən bir qədər çoxdur. Nəzərə
almalıyıq ki, bu il çox ciddi və böyük sosial paket reallaşdı – 4 milyon 200
mindən çox insanın maddi vəziyyəti yaxşılaşdı, pensiyalar, əməkhaqları, müavinətlər
artırıldı. Yəni, bu məqsədlər üçün milyardlarla manat vəsait xərclənib və bu
vəsait sosialyönümlü istiqamətə nəzərdə tutulurdu. Buna baxmayaraq, inflyasiya
çox aşağı səviyyədədir. Bu, çox yaxşı göstəricidir. Əhalinin gəlirləri yenə də
inflyasiyanı əhəmiyyətli dərəcədə üstələyir.
Minimum pensiyanın alıcılıq qabiliyyətinin səviyyəsinə görə Azərbaycan
bu gün MDB məkanında birinci yerdədir. Orta aylıq pensiyanın həcminə görə isə
üçüncü yerdədir. Əlbəttə ki, bu, bizi qane edə bilməz. Ancaq mən müqayisə üçün
bunu bildirməliyəm. Hər şey müqayisədə ölçülür. Gələcəkdə də minimum
əməkhaqqının, minimum pensiyanın artırılması üçün bizdə iradə var və imkanlar
buna uyğun olmalıdır. Buna nail olmaq üçün bütün maliyyə və iqtisadi sahədə tam
şəffaflıq təmin edilməlidir. Hazırda kifayət qədər çox ehtiyatlarımız var və
hökumət qarşısında vəzifə qoyulub ki, biz bütün bu ehtiyatları aşkarlayaq və
həm büdcə gəlirlərimizi artıraq, həm də büdcə xərclərimiz məqsədyönlü və şəffaf
olmalıdır.
Bir neçə gün bundan əvvəl mənim Sərəncamımla Əli Əsədov Baş Nazir
vəzifəsinə təyin edilib. Əli Əsədov uzun illər mənim köməkçim kimi fəaliyyət
göstərib. Əminəm ki, Baş Nazir kimi o, mənim tərəfimdən qarşıya qoyulan
vəzifələri icra edəcək. Əsas vəzifə iqtisadi artımı daha da yüksək rəqəmlərə
qaldırmaq və islahatları davam etdirməkdir.
Keçən il prezident seçkilərindən sonra mənim andiçmə mərasimindəki
çıxışımda demək olar ki, bütün əsas istiqamətlər üzrə hədəflər
müəyyənləşdirilibdir. O çıxış proqram xarakterli çıxış idi. O çıxışdan sonra
biz əməli addımlara başladıq, islahatları dərinləşdirdik. Vergi və gömrük
sahələrində aparılan islahatlar, şəffaflıqla bağlı addımlar öz səmərəsini
verməkdədir. Gömrük və vergi orqanları doqquz ayda büdcəyə plandan əlavə 700 milyon
manatdan çox vəsait daxil ediblər. Bu, bir daha onu göstərir ki, bizim nə qədər
böyük ehtiyatlarımız var. Bu gün də hələ bir çox şirkətlər vergiləri tam
ödəmirlər. Onların qara mühasibatlığı var. Bəzi şirkətlərdə işləyənlər orada
qeydiyyata alınmır. Düzdür, son müddət ərzində on minlərlə iş yeri
rəsmiləşdirildi və beləliklə, qara bölgədən ağ bölgəyə transfer olundu. Amma
bu, kütləvi xarakter daşımalıdır. Bir çox özəl şirkətlər vergiləri hələ də tam
həcmdə ödəmir və ikili mühasibat saxlayır.
Vergi orqanları, digər hüquq-mühafizə orqanları bu tipli dırnaqarası
sahibkarlara qarşı çox ciddi tədbirlər görməlidirlər. Həmin sahibkarlar da
bilməlidirlər ki, vergiləri ödəmək onların borcudur. Onlardan heç bir başqa
ödəniş tələb oluna bilməz. Mən bütün qurumlar qarşısında bu vəzifəni qoydum,
maksimum şəffaflıq, dürüstlük olmalıdır, rüşvətxorluğa, korrupsiyaya son
qoyulmalıdır. Ancaq sahibkarlar dövlət vergisini tam şəkildə ödəməlidirlər. Biz
bu vergilər hesabına sosial layihələri icra edirik, vergilər hesabına köçkünləri
yerləşdiririk, vergilər hesabına ordumuzu gücləndiririk. Ona görə də vergini
ödəməyən cinayət məsuliyyətinə cəlb edilməlidir.
Bir çox hallarda eşidirik ki, bizdə standartlar, meyarlar Avropa
standartlarına uyğun olmalıdır. Avropa ölkələrində vergisini ödəməyənə hansı
cəza verilirsə, biz də onlardan nümunə götürməliyik. Ona görə vergidən yayınmaq
çox ciddi nəticələrə gətirib çıxarmalıdır. Mən bütün aidiyyəti qurumlara bir
daha bu tapşırığı verirəm.
Bizim sosial siyasətimiz birmənalıdır. Dəfələrlə demişəm ki,
siyasətimizin mərkəzində Azərbaycan vətəndaşı dayanır. Hesab edirəm ki,
Azərbaycan sosial müdafiə sahəsində dünya miqyasında nümunəvi ölkədir. Həm
minimum əməkhaqqı, pensiyalar artırılır, həm də özünüməşğulluq proqramı geniş
vüsət alır. Bu il on mindən çox insan bu proqramla əhatə olunacaq. Ünvanlı
sosial yardım alanların sayı artır. Mən Əmək və Əhalinin Sosial Müdafiəsi
nazirinin qarşısında vəzifə qoydum ki, biz bu kateqoriyadan olan insanlara daha
geniş həcmdə yardım göstərək. İndi hər bir ailə orta hesabla 200 manatdan çox
yardım alır. O, ailələrin sayı artmalıdır, qarşıya belə vəzifə qoyulub.
Əlbəttə ki, əsas vəzifəmiz iqtisadi inkişafı şərtləndirən islahatları
dərinləşdirməkdir. Bütövlükdə Azərbaycanda iqtisadi sahədə islahatlar uğurla
gedir. Beynəlxalq aparıcı maliyyə qurumları bu sahədəki fəaliyyətimizi yüksək
qiymətləndirirlər. Mənim Dünya Bankı, Avropa Yenidənqurma və İnkişaf Bankı,
Asiya İnkişaf Bankı, Avropa İnvestisiya Bankı, Beynəlxalq Valyuta Fondu və
digər aparıcı beynəlxalq maliyyə qurumlarının rəhbərləri ilə çoxsaylı
görüşlərim deməyə əsas verir ki, Azərbaycanda aparılan islahatlar yüksək
qiymətləndirilir.
"Doing Business” hesabatında biz biznes mühitinə görə dünya miqyasında
25-ci yerdəyik. Son hesabatda Azərbaycan yenə də 20 ən islahatçı ölkə sırasında
yer alıb. Bu yaxınlarda Davos Ümumdünya İqtisadi Forumu yeni hesabat dərc edib.
Bu hesabat bir daha onu göstərir ki, Azərbaycanda aparılan islahatlar ardıcıl
xarakter daşıyır. Hesabatdan bəzi məqamları mən Azərbaycan ictimaiyyətinin diqqətinə
çatdırmaq istərdim. Bildiyiniz kimi, burada rəqabətqabiliyyətliliklə bağlı bir
çox meyarlar mövcuddur, həm ictimai-siyasi vəziyyət, həm də cinayətkarlığa
qarşı mübarizə, iqtisadi islahatlar, sosial islahatlar, infrastruktur və sair.
Beləliklə, mütəşəkkil cinayətkarlığa qarşı mübarizəyə görə Azərbaycan
dünyada 18-ci yerdədir. Deyə bilərəm ki, bu hesabat dünyanın 141 ölkəsi
arasında keçirilən tədqiqatın nəticələri əsasında hazırlanıb dərc edilmişdir.
Polis orqanlarına əhali tərəfindən inamın səviyyəsinə görə Azərbaycan 30-cu
yerdədir. Mülkiyyət hüquqlarının qorunması sahəsində bizim yerimiz 37-cidir.
Hökumətin, yəni, dövlətin və rəhbərliyin uzunmüddətli strategiyasına görə
Azərbaycan, fikir verin, dünya miqyasında 10-cu yerdədir. Yəni, bu, onu göstərir
ki, düşünülmüş uzunmüddətli siyasət Azərbaycanda ən yüksək səviyyədə həyata
keçirilir. Rəhbərliyin dəyişikliklərə, yəni, islahatlara meyillilik səviyyəsinə
görə biz dünyada 5-ci yerdəyik. Nəqliyyat infrastrukturuna görə 31-ci yerdəyik.
Yol infrastrukturuna görə 27-ci yerdəyik. Biz keçən hesabatda 34-cü yerdə idik,
indiki hesabatda 27-ci yerdəyik və MDB məkanında birinci yerdəyik. Dəmir
yollarının səviyyəsinə görə 34-cü yerdəyik. Nəqliyyat xidmətlərinin
səmərəliliyinə görə 12-ci yerdəyik. Elektrik enerjisinin əlçatanlıq əmsalına
görə biz dünyada ikinci yerdəyik.
Son illərdə bu qədər elektrik stansiyalarının, yarımstansiyaların,
ötürücü xətlərin tikilməsi, bax, bizi dünya miqyasında ikinci yerə gətirib
çıxardı. Fəal əhalinin rəqəmsal qabiliyyətinə görə 19-cu yerdəyik. Bu,
xalqımızın istedadını və mütərəqqi meyillərə yaxın olduğunu göstərir. Biznesi
başlamaq baxımından biz 8-ci yerdəyik və bu rəqəmlər əlbəttə ki, həqiqəti əks
etdirir. Çünki Davos Ümumdünya İqtisadi Forumu dünyanın aparıcı beynəlxalq
maliyyə qurumlarından biridir və çox mötəbər forumdur. Bildiyiniz kimi,
Azərbaycan Prezidenti müntəzəm olaraq forumun iclaslarında iştirak edir.
Bütün bunlar əlbəttə ki, gördüyümüz işlərə verilən yüksək qiymətdir. Ən
böyük qiymət Azərbaycan xalqı tərəfindən verilən qiymətdir. Bu yaxınlarda
aparılan sorğuya əsasən demək olar ki, əhalinin mütləq əksəriyyəti Azərbaycan
rəhbərliyini, bizim apardığımız siyasəti birmənalı şəkildə dəstəkləyir. Əlbəttə
ki, bu dəstək bizə güc verir, iradəmizi artırır və biz islahatlara daha da
böyük həvəslə, daha da böyük imkanlarla meyil göstəririk, bu islahatları
aparırıq. Ancaq buna baxmayaraq, əlbəttə, bir daha demək istəyirəm ki, istifadə
olunmayan kifayət qədər ehtiyatlar var və biz bu ehtiyatları aşkar etməliyik.
Elə etməliyik ki, Azərbaycanda hər bir sahə şəffaf olsun və ən yüksək
standartlara cavab versin. Əlbəttə ki, bu məqsədə nail olmaq üçün korrupsiyaya,
rüşvətxorluğa qarşı amansız mübarizə aparılmalıdır. Hesab edirəm ki, hazırda bu
mübarizə bizi tam qane edə bilməz. Çünki biz bilirik ki, korrupsiya halları
geniş vüsət alıb, təkcə Azərbaycanda yox, bütün MDB məkanında. Yəni, bu, bizim
keçmişdən qalan acı mirasımızdır. Ancaq biz xoşagəlməz hallara qarşı mübarizə
aparmalıyıq və təkcə hüquq-mühafizə orqanları yox, bütün aidiyyəti qurumlar, o
cümlədən vətəndaşlar. Mən dəfələrlə demişəm ki, ictimai nəzarət daha da güclü
olmalıdır. Hər bir yerdə, hər bir bölgədə, Bakının hər bir yerində əgər hansısa
qanunsuzluq baş verirsə, aidiyyəti orqanlar bunu aşkarlamalı və bu qanunsuzluğa
yol açan vətəndaşları, insanları məsuliyyətə cəlb etməlidirlər. Vətəndaşlar da
öz növbəsində məlumat verməlidirlər, ictimai nəzarət baxımından daha da fəal
olmalıdırlar ki, biz islahatları aparaq və ölkəmizin qüdrətini artıraq.
Hazırda gələn ilin büdcəsi hazırlanır və bilirsiniz ki, büdcə hər bir
ölkənin əsas sənədlərindən biridir. Yeni hökumət qarşısında bir çox vəzifələr
qoyulub. Mən Əli Əsədovu bu vəzifəyə təyin edərkən ona bir çox vəzifələr
tapşırdım. Onun qarşısına vəzifə qoydum ki, islahatlar aparılmalıdır, o cümlədən
kadr islahatları. Müasir dünyagörüşlü, müasir iqtisadiyyatı bilən, savadlı gənc
kadrlar işə cəlb edilməlidir. Biz XXI əsrdə yaşayırıq, köhnə təfəkkürlə, köhnə
biliklərlə gələcəyə necə gedə bilərik? Nə qədər biz təbii resurslara
arxalanaraq, necə deyərlər, belə ətalət yolu ilə gedə bilərik? Düzdür,
islahatlar aparılır, dediyim rəqəmlər bunun əyani sübutudur. Hər bir ölkə bu
nəticələrlə öyünə bilər. Ancaq biz bilirik ki, ehtiyatlarımız çoxdur. Onu da
bilirik ki, əgər hər hansı dövlət və ya özəl quruma təmiz, bilikli və Vətənə
bağlı kadr gətirilirsə, biz orada dərhal dəyişiklikləri görürük. Hesab olunurdu
ki, bizdə elə sahələr var ki, orada islahatlar aparıla bilməz. Onlardan biri də
vergi sistemidir. Hesab olunurdu ki, necə deyərlər, o biabırçı vəziyyət əbədi
qalmalıdır və burada heç bir irəliləyişə nail ola bilmərik. Amma hər kəs gördü
ki, biz vəziyyəti islahatlar yolu ilə düzəldə bildik. Büdcəyə 100 milyonlarla
manat vəsait daxil olub, digər sahələrdə də həmçinin.
Sosial müdafiə sahəsində nə qədər pozuntular olub. Yeni nazir Sahil
Babayev bunları üzə çıxardı və çox ciddi islahatlar aparır. Onu da
bildirməliyəm ki, bu gün iqtidarda olan bəziləri də islahatlara qarşı çıxış
edirlər. Bu islahatlar onların şəxsi maraqlarına toxunur. Onlar hər vəchlə
bizim işimizə əngəl törətmək istəyirlər. İslahatlara meyilli olan, yeni
təfəkkürə malik kadrları qaralayırlar, o cümlədən mətbuatda. Mətbuat bir növ
daxili mübarizə növünə çevrilib. Bu, dözülməzdir. Mən indi dərinə getmək
istəmirəm. Amma bildirməliyəm: bu, dözülməzdir, bir hökumətin bəzi üzvləri
digər üzvləri tərəfindən şantaj edilir. Onlar ləkələnir. Prezidentin tapşırığı
ilə onların apardığı islahatların üzərinə kölgə salınır. Dözülməz vəziyyətdir.
Əgər kimsə hesab edir ki, biz bununla barışmalıyıq, səhv edir. Çünki
islahatlara alternativ yoxdur. Kim bu yolun yolçusudursa, əlbəttə, işləyəcək.
Amma kim buna qarşı çıxır və altdan-altdan bizim işimizə mane olmaq istəyir,
əlbəttə ki, biz belə adamlarla bir yolun yolçusu ola bilmərik. Ona görə bir də
demək istəyirəm ki, əhali də bilsin və hər kəs mənim sözümü eşitsin. Çox güclü
siyasi iradə ortaya qoyulub. Biz Azərbaycanı müasir, sürətlə inkişaf edən,
şəffaflığı öz siyasətində bayraq edən ölkə kimi görmək istəyirik və buna nail
olacağıq. Heç kim bu işdə bizə mane ola bilməz.
Gələn ilin büdcəsi ilə əlaqədar tapşırıqlar verildi. Hökumət üzvləri
artıq neçə vaxtdır ki, işləyirlər. Deməliyəm ki, gələn ilin büdcəsi həm
sosialyönümlü, həm də investisiyayönümlü olmalıdır. Biz gələn il də ciddi
sosial proqramlar icra edəcəyik, əhalinin yaşayış səviyyəsini yaxşılaşdırmaq
üçün önəmli addımlar atılacaq, infrastruktur layihələrinin icrası ilə əlaqədar
kifayət qədər vəsaitimiz olmalıdır. Ancaq gələn ilin xərclərinə biz çox böyük
diqqətlə baxmalıyıq və burada şəffaflığı tam təmin etmək üçün hökumət gərək
təkliflər versin. Tezliklə, ilin sonuna qədər bu təkliflərə baxılacaq.
Beləliklə, əminəm ki, biz eyni həcmdə olan işi az vəsaitlə icra edə bilərik.
Buna nail olmaq üçün, ilk növbədə, şəffaflıq, dövlət nəzarəti və ictimai
nəzarət olmalıdır. Bütün dövlət qurumlarına deyirəm, yoxsa onlar pis
öyrəşiblər. Hər ilin sonunda büdcə müzakirə olunarkən, sifarişlər göndərirlər.
Özü də orada şişirdilmiş rəqəmlər öz əksini tapır, havadan götürülmüş rəqəmlər.
Onlardan soruşanda ki, misal üçün bənd tikmək, yol çəkmək, kabel çəkmək bu
qədər vəsait barədə rəqəmi haradan götürürsən!? Havadan. Sonra araşdırma
aparılır, görünür ki, şişirdiblər. Nəyə görə şişirdiblər? Aydın məsələdir nəyə
görə. Buna da son qoyulmalıdır. Ona görə Maliyyə Nazirliyi, İqtisadiyyat
Nazirliyi, - bunu təkcə onların boynuna atmaq olmaz, - hökumət də nəzarətçi
kimi şişirdilmiş bütün o rəqəmləri təhlil etsinlər və real rəqəmləri
müəyyənləşdirsinlər. O rəqəmləri verənlər gərək məsuliyyət daşısınlar. Əgər bu
dəfə bizim dövlət qurumlarımız, şirkətlərimiz yenə də şişirdilmiş rəqəmlər
versələr, artıq özlərini ifşa etmiş olacaqlar. Hökumət əlbəttə ki, onların
bütün təkliflərinə baxacaq. Amma onlar əgər şişirdilmiş rəqəmləri versələr, öz
cəzalarını alacaqlar. Ona görə zəhmət çəkib normal işləsinlər və pis
vərdişlərdən əl çəksinlər. Beləliklə, biz büdcəyə böyük qənaət edərik,
maaşların, pensiyaların artırılmasına imkan yaradarıq və şəffaflığı təmin edə
bilərik. Ona görə qarşıdakı həftələr ərzində gələn ilin büdcəsinin parametrləri
ilə əlaqədar çox fəal iş aparılmalıdır. Bugünkü müşavirə, o cümlədən bu
məsələyə həsr olunub. Ona görə istərdim ki, indi burada gələn ilin büdcəsi ilə
əlaqədar fikirlər və təkliflər səslənsin.
X X X
Müzakirələrdə Birinci vitse-prezident Mehriban Əliyeva, Baş Nazir Əli
Əsədov, Azərbaycan Prezidentinin iqtisadi siyasət və sənaye məsələləri üzrə
köməkçisi Natiq Əmirov, Maliyyə naziri Samir Şərifov, İqtisadiyyat naziri Şahin
Mustafayev, Vergilər naziri Mikayıl Cabbarov, Əmək və Əhalinin Sosial Müdafiəsi
naziri Sahil Babayev, Mərkəzi Bankın İdarə Heyətinin sədri Elman Rüstəmov,
Dövlət Neft Fondunun icraçı direktoru Şahmar Mövsümov çıxış etdilər.
Maliyyə naziri Samir ŞƏRİFOV dedi:
-Möhtərəm cənab Prezident, hörmətli müşavirə iştirakçıları.
2020-ci il üçün dövlət büdcəsinin layihəsi Azərbaycan Respublikasının
"Büdcə sistemi haqqında” Qanununa uyğun olaraq hazırlanıb və büdcə
hesablamaları aparılarkən 2019-cu ildə artıq tətbiq olunan büdcə qaydasına
istinad olunmuşdur. Büdcə layihəsinin hazırlanması zamanı Maliyyə Sabitliyi
Şurasında bir neçə dəfə bu məsələyə baxılmış və Şuranın yekdil fikrinə görə
büdcədə bir sıra əsas parametrlər üzrə razılıq əldə edilmişdir. O cümlədən
büdcəmiz üçün, büdcə daxilolmaları üçün mühüm əhəmiyyətə malik olan neftin
qiyməti ilə bağlı xeyli müzakirələr aparılmış və neftin 55 dollar/barrel
qiyməti üzərində dayanılmışdır. Bunun əsasında isə büdcə qaydasına uyğun olaraq
xalis maliyyə aktivlərinin dəyəri və eyni zamanda, icmal büdcənin yuxarı həddi
müəyyən edilmişdir. Həmçinin qeyd edilməlidir, Maliyyə Sabitliyi Şurasında
baxılan məsələlərdən biri də o idi ki, orta və uzunmüddətli dövr üçün büdcə
qaydasında bəzi məqamlar mövcuddur ki, onlar bizim xərclərimizin ahəngdar
həyata keçirilməsi üçün müəyyən çağırışlar yaradır. Şübhəsiz ki, biz bunları
nəzərdə keçirməliyik. O cümlədən vacib məsələlərdən biri də inflyasiya
səviyyəsinin tam nəzərə alınmasıdır və onun dövlət büdcə hesablamalarında əks
etdirilməsidir.
Möhtərəm cənab Prezident, bildiyiniz kimi, büdcə qaydasına uyğun olaraq,
növbəti ilin icmal büdcə xərcləri əvvəlki ilin xalis maliyyə aktivləri əsasında
formalaşır. Eyni zamanda, burada digər vacib göstəricilərdən biri də ondan
ibarətdir ki, növbəti ilin icmal büdcəsinin yuxarı xərcləri əvvəlki ilin icmal
büdcəsinin yuxarı xərclərinin 103 faizindən yuxarı olmamalıdır. Hazırda təklif
olunur ki, həmin göstəriciyə biz inflyasiya prizması baxımından yanaşaq və
beləliklə, inflyasiya meyilləri nəzərə alınmalıdır, yəni, real artımdan söhbət
gedə bilər.
Prezident İlham Əliyev: Bəli, düzdür.
Maliyyə naziri Samir Şərifov: Bununla əlaqədar İqtisadiyyat Nazirliyi
tərəfindən növbəti il üçün və sonrakı üç il üçün hazırlanmış sosial-iqtisadi
proqnoz, makro-iqtisadi proqnoz nəzərə alınmış, həmin proqnoza görə növbəti
ildə 4,6 faiz inflyasiya səviyyəsi nəzərdə tutulub. Bu proqnoz nəzərə alınmaqla
biz icmal büdcənin yuxarı həddinə yenidən baxmışıq və artıq müəyyən hədəf
nəzərdə tutulur.
Prezident İlham Əliyev: Əvvəlki illərdə verilmiş proqnoz ondan sonra
özünü nə dərəcədə doğruldur? Yəni, bunun təhlilini aparan bir qurum varmı? Yəni,
sizin verdiyiniz proqnozlar özünü doğruldur, yoxsa yox?
İqtisadiyyat naziri Şahin Mustafayev: Bəli, cənab Prezident, əsasən
doğruldur.
Prezident İlham Əliyev: Əsasən neçə faiz özünü doğruldur? Siz gərək bunu
dəqiq biləsiniz və kimsə bunun uçotunu aparmalıdır. Çünki hər il sizin
verdiyiniz proqnozlar əsasında biz öz planlarımızı qururuq. Amma sonra həmin
ilin yekunları müzakirə olunarkən verdiyiniz proqnoz kənarda qalır. Ona görə
biz bilməliyik proqnoz nə qədər dəqiqliklə verilir ki, biz də ona uyğun olaraq
öz planlarımızı quraq.
Nazir Şahin Mustafayev: Beynəlxalq praktikaya uyğun olaraq fərqlənir,
yəni, proqnozların tam dəqiqliyi təbii ki, təmin olunmur, müxtəlif təsirlər
sonradan nəzərə alınır və hər üç aydan bir proqnozlar dəqiqləşdirilməlidir.
Misal üçün, bu dəfə deyə bilərəm ki, Maliyyə Nazirliyi yeni büdcə tərtib
edərkən biz proqnoza yenidən düzəliş etmişik və bu gün artıq gələn il üçün
proqnoz 3 faizdir.
Prezident İlham Əliyev: Artım?
Nazir Şahin Mustafayev: Bəli, 3 faiz görürük. Qeyri-neft sektoru üzrə
3,8 faiz proqnozlaşdırmışıq və bu, artıq Maliyyə Nazirliyinin investisiya ilə
əlaqədar etdiyi düzəlişlərlə birbaşa bağlıdır. Yəni, proqnoza müxtəlif amillər
təsir edir.
Prezident İlham Əliyev: Əlbəttə, investisiya proqramı da burada önəmli
rol oynayır.
Nazir Şahin Mustafayev: Bəli, bu, birbaşa təsir edən amillərdən biridir
və digər amillər də var. Biz üç aydan bir düzəliş veririk.
Prezident İlham Əliyev: Amma biz çalışmalıyıq ki, iqtisadi artımımız
dövlət xətti ilə aparılan xərclərə bağlı olmasın. Çünki bizim əsas iqtisadi
artımımızın mənbəyi dövlət investisiya xərcləridir və açığını desək, qeyri-neft
sektoruna xarici sərmayə az qoyulur. İndi rəqəmlər də bunu göstərir ki, bu il
də qoyulan investisiyaların yarısı xarici investisiyalardır. Amma onların
qoyulduğu sahə qeyri-neft sektoru deyil, neft-qaz əməliyyatlarıdır. Ona görə
bizim əsas vəzifəmiz iqtisadi artımımızı birbaşa qeyri-neft sektorunun inkişafı
ilə bağlamaqdır. İndi biz 1,4 milyard manat güzəştli şərtlərlə kreditlər
vermişik. Kimsə hesablayıb ki, bu kreditlər ümumi daxili məhsula, qeyri-neft
sektoruna aid olan hissəyə nə qədər təsir göstərir?
Nazir Şahin Mustafayev: Təbii ki, cənab Prezident, bütün hesablamalar
aparılır.
Prezident İlham Əliyev: Onda nə üçün bizdə qeyri-neft sektorunda ümumi
artım o qədər də böyük deyil? Güzəştlər veririk, subsidiyalar veririk, texnika
alırıq, infrastruktur layihələri həyata keçiririk, dövlət investisiya xərcləri
kifayət qədər yüksək səviyyədədir. Bütün bu amillər özlüyündə iqtisadi artımı
daha da böyük rəqəmlərə gətirib çıxarmalıdır. Amma biz bunu görmürük.
Nazir Şahin Mustafayev: Cənab Prezident, doğru olaraq qeyd edirsiniz ki,
son 3 il ərzində qeyri-neft sektorunda artım ürəkaçan deyil. Bunun əsas səbəbləri
kimi mən maliyyələşmə ilə bağlı problemləri qeyd edərdim. Çünki Sahibkarlığın
İnkişafı Fondu vasitəsilə bu ilin 9 ayında 130 milyon manat verilib, ilin
sonuna qədər 170 milyon manat nəzərdə tutulub və icra olunacaq. Amma 130, ya
170 milyon manat sahibkarlığın maliyyələşdirilməsi üçün kifayət qədər vəsait
deyil, çünki bank sektoru tərəfindən kifayət qədər maliyyələşmə həyata
keçirilmir.
Prezident İlham Əliyev: Düz deyirsiniz, bank sektoru bizdə
iqtisadiyyatın artımına, iqtisadiyyatın real sektorunun artımına o qədər də
kömək göstərmir və son illərdə yenə də istehlak kreditlərinin həcmi artır. Mən
əvvəlki illərdə bunu demişəm ki, bizim portfelimizdə istehlak kreditləri
üstünlük təşkil edir və bank sektorunun böhranının səbəblərindən biri də məhz o
idi. İndi də mənə məlumat verilir ki, yenə də bu meyillər artır, iqtisadiyyatın
real sektoruna yox, yenə də istehlaka, yəni, istehlak mallarının alınmasına
kreditlər verilir. Əgər bu davam edərsə, yenə də bir neçə ildən sonra
xoşagəlməz problemlərlə üzləşə bilərik. Ona görə bütün bu məsələləri gərək
ümumiləşdirib, təhlil edib və bir qərara gələsiniz ki, bütün alətlər - bank
sektoru, Sahibkarlığın İnkişafı Fondu, dövlət investisiya xərcləri bir məqsədi
güdməlidir – məşğulluğun artırılması və qeyri-neft sektorunun artımı.
Nazir Samir Şərifov: Cənab
Prezident, bu inflyasiyanın bizim büdcə qaydasında nəzərə alınması üçün
Azərbaycan Respublikasının "Büdcə sistemi haqqında” Qanununda müvafiq
dəyişiklik edilməsi nəzərdə tutulub. Yəni, dəyişiklik ondan ibarətdir ki, inflyasiya
nəzərə alınmalıdır.
Prezident İlham Əliyev:
Bunu gərək əvvəlcədən edərdiniz.
Nazir Samir Şərifov: Birinci ildir cənab Prezident. Ola bilsin, lazım
idi ki, biz bunların hamısını sınayaq. Biz prinsipcə onun üzərində çalışırıq.
Prezident İlham Əliyev: Belə olan halda artım daha da böyük olacaq. Neçə faiz?
Nazir Samir Şərifov: Belə
olan halda, cənab Prezident, bizdə 28,1 milyard manat məbləğində icmal büdcənin
yuxarı xərcləri formalaşmışdır. Dövlət büdcəsinin xərcləri müvafiq olaraq 25,6
milyard manatdır.
Prezident İlham Əliyev:
Yəni, bu ilin büdcəsindən neçə faiz artıb?
Nazir Samir Şərifov: İndi
biz artırandan sonra artıq icmal büdcənin xərcləri 29,5 milyarda çatır. Bizdə
1,3 milyard əlavə xərclər yaranır. Həmin xərclər də nəzərdə tutulur ki, əsasən
dövlət əsaslı vəsait qoyuluşuna yönəldilsin.
Maliyyə naziri Samir
Şərifov bildirdi ki, cari ildə dövlət başçısının təşəbbüsü və tapşırıqlarına
əsasən bir çox sahələri əhatə edən sosial islahatlar həyata keçirilib və bu
tədbirlər dövlət büdcəsi hesabına maliyyələşdirilib. Nəticədə büdcədə müəyyən
struktur dəyişikləri baş verib və büdcənin cari xərcləri, yəni, sosialyönümlü
xərcləri 3,7 milyard manat artıb, investisiya dövlət əsaslı vəsait qoyuluşu
xərcləri isə azalıb. İnvestisiya xərclərinin ümumi daxili məhsulun iqtisadi
artımına müsbət təsiri, eyni zamanda, ölkədə iqtisadi fəallığın təmin
edilməsində əhəmiyyəti nəzərə alınaraq onu əvvəlki səviyyələrə çatdırmaq üçün
tədbirlər görülür.
Maliyyə naziri onu da
vurğuladı ki, görülən tədbirlər nəticəsində əlavə 1,3 milyard manat vəsait
yaradılıb, bu isə 7,7 faiz artım deməkdir. Neft gəlirlərinin hesabına
maliyyələşən xərclərin ildən-ilə azaldılmasını təklif edən Samir Şərifov əlavə
gəlirlər və əvvəlki illərdə toplanmamış vəsaitlər hesabına artan dövlət
büdcəsinin maliyyələşdirilməsinin təmin olunacağını vurğuladı. Prezidentin
sosial sahə ilə bağlı tapşırıqlarının dövlət büdcəsi layihəsində öz əksini
tapdığını deyən Maliyyə naziri ölkədə iqtisadi sabitliyin təmin edilməsi üçün
Mərkəzi Bankla çox sıx tədbirlərin əlaqələndirilməsinin əhəmiyyətini vurğuladı.
Əmək və Əhalinin Sosial
Müdafiəsi naziri Sahil Babayev Prezident İlham Əliyevin tapşırığına uyğun
olaraq Dövlət Sosial Müdafiə Fondunun büdcəsinin gəlirlərinin
optimallaşdırılması istiqamətində görülən işlərdən danışdı. Nazir Fondun
büdcəsinin 4 milyard 825 milyon manat məbləğində proqnozlaşdırıldığını, bunun
cari ilə nisbətən 16,9 faiz çox olduğunu dedi, 697 milyon manat əlavə vəsaitin
məhz əhalinin ödənişlərinə yönəldiləcəyini vurğuladı. Ümumi sosial sığorta
yığımlarında 22,5 faiz artımın olduğunu bildirən nazir Fondun gəlirlərində
qeyri-büdcə təşkilatlarının payının artdığını vurğuladı.
Transfertin məbləğinin cari
illə müqayisədə 81 milyon manat artacağını qeyd edən Sahil BABAYEV dedi:
-Transfertin məbləği
2017-ci ildə Dövlət Sosial Müdafiə Fondunun gəlirlərinin 39 faizini təşkil
edirdisə, artıq 2018-ci ildə bu, 35,6 faizə düşüb, 2019-cu ildə 32,8 faizə,
2020-ci ildə isə 29,6 faizə düşəcək ki, bu da iki il ərzində 8 faizlik azalma
deməkdir. Bu da Dövlət Sosial Müdafiə Fondunun dayanıqlılığı, onun maliyyə
müstəqilliyinin təmin edilməsi baxımından çox önəmli amildir. Əhaliyə ödənişlər
4 milyard 684 milyon manat məbləğində olacaqdır. Yəni, ümumi gəlirlərin 97,1
faizi məbləğində və bunlardan da əmək pensiyalarının ödənişi 4 milyard 570
milyon manat məbləğində olacaqdır. Ümumi artımın 16,6 faiz olacağı gözlənilir.
651 milyon 700 min manat məbləğində artım gözlənilir. Bu 651 milyon 700 min
manatın 475 milyon manatı məhz Sizin təşəbbüsünüzlə həyata keçirilən əməkhaqqı
artımları nəticəsində ölkədə orta əməkhaqqının artmasının nəticəsi olacaqdır.
Beləliklə, indeksasiya nəticəsində gələn ildən etibarən ölkədə əmək pensiyaları
bir daha artırılacaqdır və bu artımın nəticəsi olaraq əlavə 475 milyon manat
vəsaitin vətəndaşlarımıza ödənilməsi planlaşdırılır. Eyni zamanda, 114 milyon
manat məcburi sosial sığorta haqları hesabına verilən müavinətlər qismində
vətəndaşlarımıza ödəniləcəkdir.
Nazir bildirdi ki, dövlət
büdcəsinin öhdəlikləri bu il də balanslaşdırılmış büdcə modeli üzərində qurulduğundan
transfertin həcmi ciddi şəkildə azalıb. Ötən il əhaliyə ödənişlər 1,1 milyard
manat artdığı təqdirdə, transfertə cəmi 89 milyon manat ayrılıb. Bu da onu
göstərir ki, 1 milyard manatdan artıq vəsait məhz Dövlət Sosial Müdafiə
Fondunun gəlirlərinin artması hesabına qarşılanıb və büdcə üçün əlavə bir yük
yaratmayıb. Nazir qeyd etdi ki, hazırlanan proqnozlar əsasında gələn il ölkədə
əmək pensiyalarının orta aylıq məbləğinin 16 faiz artımına və orta aylıq
pensiya məbləğinin 293 manata çatdırılması planlaşdırılır. Aparılan
optimallaşma, eyni zamanda, əsassız əldə edilən pensiyaların ləğvi nəticəsində
artıq cari ilin 9 ayı ərzində 99 milyon manata qənaət edilib ki, növbəti
dövrlər ərzində də bu məbləğ daha da artacaq və əmək pensiyalarının davamlı şəkildə
artımı təmin ediləcək.
Sahil Babayev minimum əmək
pensiyasının 200 manata çatdırıldığını, bununla da ölkəmizin MDB məkanında
alıcılıq qabiliyyəti indeksi üzrə birinci yerdə olduğunu bildirdi. Qeyd etdi
ki, orta aylıq pensiya alıcılıq qabiliyyətində də ölkəmiz MDB məkanında ilk
ikilikdə qərarlaşa bilər.
Dövlət Sosial Müdafiə
Fondunun xərclərinin strukturunun optimallaşdırılması üzrə görülən işlərdən
danışan nazir dedi ki, İşsizlikdən Sığorta Fondunun gəlirləri çərçivəsində
növbəti ildə 128,2 milyon manatlıq büdcə formalaşdırılıb. Burada artım 30
faizdən çoxdur. Bu məbləğin 111 milyon 900 min manatı məhz işsizlikdən sığorta
haqlarının yığımlarına yönəldiləcək. Qeyri-büdcə təşkilatlarının sayı artıq 68
faizə çatıb ki, büdcə təşkilatlarından toplanan payın ümumi gəlirlərdəki payı
daha da aşağı düşüb. Eyni zamanda, cari ildən gözlənilən 16 milyon manatlıq
qalıq vəsait növbəti ildə xüsusilə özünüməşğulluq proqramının
maliyyələşdirilməsinə yönəldiləcək.
Çıxışını davam etdirən
Sahil Babayev dedi: Xərclərimiz 128 milyon 200 min manat məbləğində nəzərdə
tutulur və bunun ana xəttini Sizin tapşırığınıza müvafiq olaraq İşsizlikdən
Sığorta Fondu hesabına maliyyələşdirilən özünüməşğulluq layihəsi təşkil edir,
63 milyon manat vəsait məhz özünüməşğulluq layihəsinə yönəldiləcəkdir. Gələn il
ərzində sırf İşsizlikdən Sığorta Fondu hesabına 11 min ailənin özünüməşğulluq
layihələrində iştirakının maliyyələşdirilməsi planlaşdırılır.
Prezident İlham Əliyev:
Dünya Bankı da bu layihəyə qoşulur. Onların da vəsaitini nəzərə alsaq bu rəqəm
daha da artacaqdır.
Nazir Sahil Babayev: Bəli,
cənab Prezident, Sizin tapşırığınızla Dünya Bankı ilə danışıqlar yekun
mərhələdədir. Bu ilin sonunadək hökumətə kredit sazişi layihəsi təqdim
olunacaq. Növbəti ildə Dünya Bankının şurasında onun təsdiqi nəzərdə tutulur.
Dünya Bankının prosedurlarını nəzərə alsaq, real aktivlərin alınması
mərhələsinə biz ilin sonunda çatacağıq. Ona görə də növbəti il Dünya Bankının
payını 1000-2000 ailə olaraq qiymətləndiririk. Amma ondan sonrakı illər ərzində
sabit olaraq 5 min ailə Dünya Bankı tərəfindən maliyyələşdiriləcək. Eyni
zamanda, bu xərclərin strukturunda məşğulluq layihələri üzrə müxtəlif aktiv
məşğulluq tədbirlərinin təşkili nəzərdə tutulmuşdur. Cari ildə planımız yüz min
nəfərin işə düzəldilməsi idisə, gələn il üçün bu rəqəm 130 minə çatdırılacaq.
Haqqı ödənilən ictimai işlər proqramının davam etdirilməsi nəzərdə tutulmuşdur.
Eyni zamanda, iri dövlət şirkətlərində yaradılan müvəqqəti ictimai işlər
proqramı da davam etdiriləcək. Dünya Bankı ilə yanaşı, BMT İnkişaf Proqramı ilə
də özünüməşğulluq proqramı çərçivəsində işlərin davam etdirilməsi nəzərdə
tutulur və əlavə 500 nəfər BMT İnkişaf Proqramının xətti ilə
maliyyələşdiriləcək.
Prezident İlham Əliyev: BMT
İnkişaf Proqramının maliyyə təminatını biz öz üzərimizə götürmüşük, elədirmi?
Nazir Sahil Babayev: Bəli, cənab Prezident.
Prezident İlham Əliyev:
Sadəcə, onlar məsləhətçi qismində çıxış edirlər.
Nazir Sahil Babayev: Bəli,
layihənin icrasına nəzarəti təmin edirlər. Bizim üçün də çox gözəl təcrübədir
ki, ən müsbət beynəlxalq təcrübəni gətirərək bu layihəni müxtəlif rayonlarda
icra edirlər. Biz də onların müsbət təcrübəsini digər rayonlarda özümüz tətbiq
edirik.
Peşə hazırlığı üzrə gələn
ilin proqnozu 5 min nəfəri əhatə edəcək. Bizim mövcud peşə mərkəzlərimizdən
əlavə iki peşə mərkəzinin tikintisi də buraya daxildir. Orta məktəblərin son
siniflərinin şagirdləri üçün peşəyönümü məsləhətləri proqramlarının
genişləndirilməsi və 150 min şagirdi əhatə etməsi nəzərdə tutulmuşdur.
Ümumilikdə, İşsizlikdən
Sığorta Fondunun və Dövlət Sosial Müdafiə Fondunun xərcləri çərçivəsində DOST
mərkəzləri şəbəkəsinin maliyyələşdirilməsi də nəzərdə tutulmuşdur. Cari ildə
əlavə iki mərkəzin açılması və növbəti ildə əlavə yeddi mərkəzin fəaliyyətə
başlaması, həmçinin onların saxlanma xərcləri də məhz Dövlət Sosial Müdafiə
Fondunun və İşsizlikdən Sığorta Fondunun vəsaitləri hesabına qarşılanacaq. Bu
da imkan verəcək ki, dövlət büdcəsinə əlavə yük yaratmadan ümumilikdə idarəetmə
xərclərinin optimallaşmasına nail olaq.
Facebook-da paylaş