Qazaxda icra başçısı səhiyyə sahəsində çalışan bir qrup tibb işçisini peşə bayramları münasibətilə Fəxri Fərmanla təltif edib
İnsan üçün çox qiymətli və ən böyük sərvət
sağlamlıqdır. İnsan sağlamlığının keşiyində isə tibb işçiləri dayanır. Bu gün
Azərbaycanda öz sənətinin sirlərinə dərindən bələd olan, insanların
sağlamlığının keşiyində vicdanla dayanan minlərlə səhiyyə işçisi vardır. İyunun
17-si Azərbaycanda ağxalatlı peşə sahibi olan tibb işçilərinin peşə bayramıdır.
Azərbaycan Xalq Cümhuriyyətinin 17 iyun 1918-ci il tarixli Sərəncamı ilə
Səhiyyə Nazirliyi təşkil olunub. İlk səhiyyə naziri 1903-cü ildə Xarkov
Universitetinin tibb fakültəsini bitirmiş, ixtisasca cərrah olan Xudadat bəy
Rəfibəyov təyin edilib. Ümummilli Lider Heydər Əliyevin 2001-ci il 4 iyun
tarixli Sərəncamına əsasən, Səhiyyə Nazirliyinin təşkil olunduğu tarix - iyunun
17-si ölkədə Tibb İşçilərinin Peşə Bayramı Günü kimi qeyd olunur. Respublikamızın hər yerində olduğu kimi, Qazax səhiyyəsində
çalışan tibb işçilərinin də peşə bayramı qeyd olunub. İyunun 17-də Qazax Rayon İcra Hakimiyyətinin
başçısı Rəcəb Babaşov icra aparatının məsul şəxsləri, hüquq-mühafizə
orqanlarının rəhbərləri, rayonumuzda qonaq olan "Xidmət-İş” Həmkarlar İttifaqları
Federasiyasının vitse-prezidentləri Xəyyam Nəsibov, Camaləddin İsmayılov,
AHİK-in zəhmətkeşlərin mədəni-məişət problemləri üzrə analitik təhqiqat şöbəsinin
müdiri Namiq Hüseynovla birlikdə Qazax
Müalicə Diaqnostika Mərkəzində olub, burada çalışan tibb işçilərini 17 İyun - Tibb İşçilərinin Peşə Bayramı Günü münasibətilə təbrik edib.
Bu əlamətdar gündə Mərkəzdə çalışan bir qrup tibb
işçisi 17 İyun - Tibb İşçilərinin
Peşə Bayramı Günü münasibətilə əmək funksiyalarını yüksək peşəkarlıqla
yerinə yetirdiklərinə, o cümlədən COVID-19 infeksiyasına qarşı vaksinləşmə
prosesində fəal iştirak etdiklərinə görə Fəxri Fərmanla təltif ediliblər. Qazax Rayon İcra Hakimiyyətinin başçısı Rəcəb
Babaşov giriş sözü ilə çıxış edərək rayonda
çalışan bütün səhiyyə işçilərini peşə bayramları münasibətilə təbrik edib,
səmimi ürək sözlərini çatdırıb. Əhalinin sağlamlığının keşiyində dayanan tibb
işçilərinə gələcək işlərində uğurlar arzulayıb. Dövlət
başçısı İlham Əliyevin rəhbərliyi ilə ölkəmizdə səhiyyə sahəsində qazanılan
uğurlardan danışan icra başçısı Azərbaycan
dövlətinin səhiyyənin inkişafına böyük qayğı göstərdiyini qeyd edib. Ölkəmizin iqtisadi, sosial-mədəni
və digər sahələrdəki inkişafı ilə yanaşı, səhiyyə sisteminin təkmilləşməsinə
göstərilən diqqət və qayğının, həyata keçirilən ardıcıl tədbirlərin nəticəsində
bu sahədə əhaliyə göstərilən xidmətin əhəmiyyətli dərəcədə yaxşılaşdığını
bildirib. Ölkə Prezidenti İlham Əliyevin səhiyyə sahəsində
çalışan insanlara verdiyi qiymət və dəyərdən söz açan icra başçısı hər il
onlara fəxri adların, medalların verilməsi ilə bağlı imzalanan Sərəncamları
qeyd edib. Rayon rəhbəri ölkə başçısının iyunun 16-da Azərbaycan
Respublikasının səhiyyə işçilərinin "Tərəqqi” medalı ilə təltif edilməsi
haqqında Sərəncam imzaladığını, həmin Sərəncamla uzun illər səhiyyə sahəsində
səmərəli fəaliyyətinə görə Qazaxmızın dəyərli həkimi Novruzov Əşrəf Murad oğlunun
da təltif olunanlar sırasında olduğunu diqqətə çatdırıb. Ölkə başçısının bu
addımını Əşrəf həkimin timsalında Qazax səhiyyəsində çalışan tibb işçilərinə
göstərilən qayğı, verilən dəyər kimi qiymətləndirib. Ölkə Prezidentinə səhiyyə
sahəsinə, bu sahədə çalışan insanlara göstərdiyi diqqət və qayğıya görə qazaxlı
səhiyyə işçiləri adından minnətdarlığını bildirib. Son illər ölkəmizdə səhiyyə sahəsinə göstərilən
dövlət qayğısından danışan icra başçısı bunun bariz nümunəsi olaraq 2020-ci il martın
3-də ölkə Prezidenti İlham Əliyevin iştirakı ilə istifadəyə verilən Qazax Rayon Mərkəzi Xəstəxanasını
göstərib. Qeyd edib ki, hər bir qazaxlı, xüsusilə də səhiyyə sahəsində çalışan
hər bir işçi bu əlamətdar hadisəyə – yeni xəstəxananın istifadəyə verilməsinə
görə bu gün də minnətdarlıq edir. Mənfur düşmənlə 168 km sərhəddi olan Qazax
rayonunda belə yüksək səviyyədə xəstəxananın tikintisinə görə ölkə başçısı
İlham Əliyevə sonsuz təşəkkürlərini çatdırırlar. İcra başçısı
Ümumdünya Səhiyyə Təşkilatı tərəfindən qlobal pandemiya elan olunan koronavirus
(COVID-19) infeksiyasının yayılmasının qarşısının alınması istiqamətində
Azərbaycanda həyata keçirilən təxirəsalınmaz tədbirlərdən də danışıb. İcra başçısı bildirib
ki, istər ölkə rəhbəri İlham Əliyevin, istərsə də Birinci vitse-prezident
Mehriban Əliyevanın xalqın yanında olması, ölkə vətəndaşlarına çağırışlar
etməsi bir daha onu sübut edir ki, Azərbaycanda vətəndaş amili, xüsusilə də
onların sağlamlığı və təhlükəsizliyi hər zaman prioritet sahə olub və bundan
sonra da olacaqdır.
Prezident
İlham Əliyev və Birinci vitse-prezident Mehriban Əliyevanın rəhbərliyi altında
ölkəmizdə koronavirus (COVID-19) infeksiyasına qarşı aparılan mübarizə tədbirlərindən,
əhalinin vaksinasiyası sahəsində görülən işlərdən danışan icra başçısı bu işin
rayonda uğurla aparıldığını, əhalinin peyvəndlənməsi sahəsində görülmüş işlərin
nəticəsinə görə Qazaxın ön sıralarda yer aldığını söyləyib. İcra başçısı bu uğurun əldə edilməsində heç şübhəsiz ki, həkimlərin,
tibb işçilərinin böyük rolu olduğunu vurğulayıb. Xəstə yaxınlarının ümid yerinə
çevrilən həkimlərin və tibb işçilərinin koronavirus infeksiyası ilə mübarizə
tədbirlərində, xüsusilə də əhalinin vaksinasiya olunmasında gördükləri işlərin
danılmaz olduğunu söyləyib. Silahlı Qüvvələrin Müzəffər Ali Baş Komandanı İlham
Əliyevin rəhbərliyi altında şanlı Azərbaycan Ordusunun 44 günlük Vətən müharibəsində
qazandığı tarixi Qələbədən söz açan icra başçısı bizlərə qələbəni bəxş edən qəhrəman
oğullarımızla bu gün hər birimizin fəxr etdiyini, 44 günlük savaşda əldə
etdiyimiz Zəfərə görə Ali Baş Komandana, Azərbaycan Ordusunun əsgər və zabitlərinə,
şəhidlərimizə, qazilərimizə minnətdar olduğumuzu qeyd edib. İcra başçısı yeni növ koronavirus pandemiyası ilə yanaşı,
44 günlük Vətən müharibəsi dövründə ölkəmizin tibb işçilərinin öz vəzifə
borclarını ləyaqətlə yerinə yetirərək həm ümumbəşəri təhlükə ilə mübarizədə,
həm də döyüş cəbhəsində yaralanan əsgərlərin sağaldılaraq həyata qaytarılmasında
böyük fədakarlıq göstərdiklərini bildirib. Rayon rəhbəri çıxışının
sonunda sağlamlığımızın keşiyində dayanan tibb işçilərini bir daha təbrik edib və gələcək
işlərində uğurlar arzulayıb.
"Qazax
Müalicə Diaqnostika Mərkəzi” Publik Hüquqi şəxsin direktoru Kamandar İbrahimov çıxış edərək peşə bayramlarının bu cür yüksək səviyyədə qeyd
olunmasına və tibb işçilərinə göstərdiyi qayğıya görə rayon rəhbərliyinə Qazaxda
çalışan bütün tibb işçiləri və rəhbərlik etdiyi kollektiv adından öz dərin minnətdarlığını
bildirib. Bu gün əsası Ulu Öndər Heydər Əliyev tərəfindən qoyulan Azərbaycan səhiyyəsinin
onun layiqli davamçısı İlham Əliyevin rəhbərliyi altında böyük nailiyyətlər
qazandığını qeyd edib. Hər il müasir standartlara cavab verən səhiyyə
ocaqlarının, xəstəxanaların tikilərək istifadəyə verilməsini bu sahədə olan
inkişafın bariz nümunəsi kimi qiymətləndirib. K.İbrahimov rəhbərlik etdiyi Qazax
Müalicə Diaqnostika Mərkəzinin kollektivinə göstərilən diqqətə görə rayon rəhbərliyinə
təşəkkürünü bildirib. İstər adi günlərdə, istərsə də pandemiya dövründə Mərkəzin
kollektivinə verdiyi dəstəyə görə razılığını ifadə edib. Dövlətin
səhiyyə işçilərinə olan qayğısını bundan sonra da öz əməli işləri ilə doğrultmağa
çalışacaqlarını bildirib.
"Qazax
Müalicə Diaqnostika Mərkəzi” Publik Hüquqi şəxsdə Dializ şöbəsinin müdiri İlqar
Qasımov çıxış edərək öz növbəsində tədbir iştirakçılarını salamlayıb, həmkarlarını
əlamətdar gün münasibətilə təbrik edib. Fəaliyyətə başladığı ilk gündən səhiyyə
sahəsinə, bu sahədə çalışan insanlara ayırdığı diqqətə, göstərdiyi qayğıya görə
rayon rəhbərliyinə minnətdarlıq edib. Bugünkü görüşü və təbriki həmin qayğının
bariz nümunəsi kimi dəyərləndirib. "Xidmət-İş” Həmkarlar İttifaqları Federasiyasının vitse-prezidenti Xəyyam
Nəsibov çıxış edərək əlamətdar gün münasibətilə səhiyyə işçilərinə təbriklərini
çatdırıb, çətin və şərəfli işlərində onlara uğurlar arzulayıb. Sonra "Qazax Müalicə Diaqnostika Mərkəzi”
Publik Hüquqi şəxsin direktoru İbrahimov Kamandar Həsən oğluna, "Qazax Müalicə
Diaqnostika Mərkəzi” Publik Hüquqi Şəxsin Xəstə xidmətləri şöbəsinin müdiri Məmmədov
Hacıalı Ramiz oğluna, "Qazax Müalicə Diaqnostika Mərkəzi” Publik Hüquqi Şəxsin
həkim qastroenteroloqu Məmmədov Razim Ukrayna oğluna, "Qazax Müalicə
Diaqnostika Mərkəzi” Publik Hüquqi Şəxsin Dializ şöbəsinin müdiri Qasımov İlqar
Hətəm oğluna, "Qazax Müalicə Diaqnostika Mərkəzi” Publik Hüquqi Şəxsin Cərrahiyyə
şöbəsinin böyük tibb bacısı Budaqova Səbinə
Şahmar qızına, "Qazax Müalicə Diaqnostika Mərkəzi” Publik Hüquqi Şəxsin Cərrahiyyə
şöbəsinin tibb bacısı Şəmmədova Maya Əli qızına 17 İyun - Tibb İşçilərinin Peşə Bayramı Günü münasibətilə əmək
funksiyalarını yüksək peşəkarlıqla yerinə yetirdiklərinə, o cümlədən COVID-19 infeksiyasına qarşı vaksinləşmə prosesində fəal iştirak etdiklərinə
görə Qazax Rayon İcra Hakimiyyəti başçısının Fəxri Fərmanı təqdim
olunub.
GOYEZEN.AZ
Facebook-da paylaş